bcom ldan ’das de bźin gśegs pa dgra bcom pa yaṅ dag par rdzogs pa’i (7) saṅs rgyas kyis byaṅ chub sems dpa’ sems dpa’ chen po rnams la phan gdags pa’i dam pa ji sñed pas phan gdags pa daṅ | de bźin gśegs pa dgra bcom pa yaṅ dag par rdzogs pa’i saṅs rgyas kyis byaṅ chub sems dpa’ sems dpa’ chen po rnams la yoṅs su gtad pa’i dam pa ji sñed (121b1) pas yoṅs su gtad pa ni bcom ldan ’das ṅo mtshar te | bde bar gśegs pa ṅo mtshar to ||
bcom ldan ’das byaṅ chub sems dpa’i theg pa la yaṅ dag par źugs pas ji ltar gnas par bgyi | ji ltar bsgrub par bgyi | ji ltar sems rab tu gzuṅ bar bgyi | de skad ces gsol (2) pa daṅ | bcom ldan ’das kyis tshe daṅ ldan pa rab ’byor ba ’di bka’ stsal to ||
rab ’byor legs so legs so ||
rab ’byor de de bźin no ||
de de bźin te | de bźin gśegs pas byaṅ chub sems dpa’ sems dpa’ chen po rnams la phan gdags pa’i dam pas phan btags so ||
(3) de bźin gśegs pas byaṅ chub sems dpa’ sems dpa’ chen po rnams yoṅs su gtad pa’i dam pas yoṅs su gtad do ||
rab ’byor de’i phyir ñon la legs par rab tu yid la zuṅ śig daṅ | byaṅ chub sems dpa’i theg pa la yaṅ dag par źugs pas ji ltar gnas par bya ba daṅ | (4) ji ltar bsgrub par bya ba daṅ | ji ltar sems rab tu gzuṅ bar bya ba ṅas khyod la bśad do ||
bcom ldan ’das de de bźin no źes gsol nas tshe daṅ ldan pa rab ’byor bcom ldan ’das kyi ltar ñan pa daṅ | bcom ldan ’das kyis ’di skad ces bka’ stsal to ||
rab ’byor ’di la byaṅ chub (5) sems dpa’i theg pa la yaṅ dag par źugs pas ’di sñam du bdag gis ci tsam sems can du bsdu bar bsdus pa sgoṅ las skyes pa’am | mṅal nas skyes ba’am | drod gśer las skyes ba’am | brdzus te skyes pa’am | gzugs can nam | gzugs med pa’am | ’du śes (6) can nam | ’du śes med pa’am | ’du śes med ’du śes med min nam | sems can gyi khams ji tsam sems can du gdags pas btags pa de dag thams cad phuṅ po’i lhag ma med pa’i mya ṅan las ’das pa’i dbyiṅs su yoṅs su mya ṅan las ’da’o ||
de ltar sems can tshad med pa yoṅs su (7) mya ṅan las ’das kyaṅ sems can gaṅ yaṅ yoṅs su mya ṅan las ’das par gyur pa med do sñam du sems bskyed par bya’o ||
de ci’i phyir źe na | rab ’byor gal te byaṅ chub sems dpa’ sems can du ’du śes ’jug na | de byaṅ chub sems dpa’ źes mi bya ba’i phyir ro ||
de ci’i phyir źe na | rab (122a1) ’byor gaṅ sems can du ’du śes ’jug gam | srog tu ’du śes sam | gaṅ zag tu ’du śes ’jug na de byaṅ chub sems dpa’ źes mi bya ba’i phyir te | yaṅ rab ’byor byaṅ chub sems dpas dṅos po la mi gnas par sbyin pa sbyin no ||
chos la yaṅ mi gnas par sbyin pa (2) sbyin no ||
gzugs la’aṅ mi gnas par sbyin pa sbyin no ||
sgra daṅ | dri daṅ | ro daṅ | reg bya daṅ | chos la yaṅ mi gnas par sbyin pa sbyin no ||
rab ’byor ci nas mtshan mar ’du śes pa la’aṅ mi gnas pa de ltar byaṅ chub sems dpas sbyin pa sbyin no ||
de ci’i phyir źe na | rab ’byor byaṅ chub (3) sems dpa’ gaṅ mi gnas par sbyin pa sbyin pa de’i bsod nams kyi phuṅ po ni rab ’byor tshad gzuṅ bar sla ba ma yin pa’i phyir ro ||
rab ’byor ’di ji sñam du sems | śar phyogs kyi nam mkha’ tshad gzuṅ bar sla’am | rab ’byor gyis gsol pa | bcom ldan ’das de ni ma lags so ||
bcom (4) ldan ’das kyis bka’ stsal pa | de bźin du lho daṅ | nub daṅ | byaṅ daṅ | steṅ daṅ | ’og gi phyogs daṅ | phyogs mtshams daṅ | phyogs bcu’i nam mkha’ tshad gzuṅ bar sla’am | rab ’byor gyis gsol pa | bcom ldan ’das de ni ma lags so ||
bcom ldan ’das kyis bka’ stsal (5) pa | rab ’byor de bźin du byaṅ chub sems dpa’ gaṅ mi gnas par sbyin pa sbyin pa de’i bsod nams kyi phuṅ po yaṅ tshad gzuṅ bar sla ba ma yin no ||
rab ’byor ’di ji sñam du sems | mtshan phun sum tshogs pas de bźin gśegs par blta’am | rab ’byor gyis gsol pa | bcom ldan ’das de (6) ni ma lags te | mtshan phun sum tshogs pas de bźin gśegs par mi lta’o ||
de ci’i slad du źe na | de bźin gśegs pas mtshan phun sum tshogs par gaṅ gsuṅs pa de ñid mtshan phun sum tshogs pa ma mchis pa’i slad du’o ||
de skad ces gsol pa daṅ | bcom ldan ’das (7) kyis tshe daṅ ldan pa rab ’byor la ’di skad ces bka’ stsal to ||
rab ’byor ci tsam du mtshan phun sum tshogs pa de tsam du brdzun no ||
ci tsam du mtshan phun sum tshogs pa med pa de tsam du mi brdzun te | de ltar de bźin gśegs pa la mtshan daṅ | mtshan med par blta’o ||
de skad ces bka’ stsal pa (122b1) daṅ | bcom ldan ’das la tshe daṅ ldan pa rab ’byor gyis ’di skad ces gsol to ||
bcom ldan ’das ma ’oṅs pa’i dus lṅa brgya tha ma la dam pa’i chos rab tu rnam par ’jig par ’gyur ba na sems can gaṅ la la dag ’di lta bu’i mdo sde’i tshig bśad pa ’di la yaṅ dag par ’du śes skyed par (2) ’gyur ba lta mchis sam | bcom ldan ’das kyis bka’ stsal pa | rab ’byor khyod ’di skad du ma ’oṅs pa’i dus lṅa brgya tha ma la dam pa’i chos rab tu rnam par ’jig par ’gyur ba na sems can gaṅ la la dag ’di lta bu’i mdo sde’i tshig bśad pa ’di la yaṅ dag par ’du śes skyed par ’gyur ba (3) mchis sam źes ma zer cig | yaṅ rab ’byor ma ’oṅs pa’i dus lṅa brgya tha ma la dam pa’i chos rab tu rnam par ’jig par ’gyur ba na byaṅ chub sems dpa’ sems dpa’ chen po tshul khrims daṅ ldan pa | yon tan daṅ ldan pa | śes rab daṅ ldan pa dag ’byuṅ ste | rab ’byor byaṅ chub (4) sems dpa’ sems dpa’ chen po dag kyaṅ saṅs rgyas gcig la bsñen bkur byas pa ma yin | saṅs rgyas gcig la dge ba’i rtsa ba bskyed pa ma yin gyi | rab ’byor saṅs rgyas brgya stoṅ du ma la bsñen bkur byas śiṅ | saṅs rgyas brgya stoṅ du ma la dge ba’i rtsa ba dag bskyed pa’i (5) byaṅ chub sems dpa’ sems dpa’ chen po dag ’byuṅ ṅo ||
gaṅ dag ’di lta bu’i mdo sde’i tshig bśad pa ’di la sems dad pa cig tsam rñed par ’gyur ba de dag ni rab ’byor de bźin gśegs pas mkhyen to ||
rab ’byor de dag ni de bźin gśegs pas gzigs te | rab ’byor sems (6) can da dag thams cad ni bsod nams kyi phuṅ po dpag tu med pa bskyed ciṅ rab tu sdud par ’gyur | de ci’i phyir źe na | rab ’byor byaṅ chub sems dpa’ sems dpa’ chen po de dag ni bdag tu ’du śes ’jug par mi ’gyur źiṅ sems can du ’du śes pa ma yin | srog tu ’du (7) śes pa ma yin | gaṅ zag tu’aṅ ’du śes ’jug par mi ’gyur ba’i phyir ro ||
rab ’byor byaṅ chub sems dpa’ sems dpa’ chen po de dag ni chos su ’du śes pa daṅ | chos med par yaṅ ’du śes mi ’jug ste | de dag ni ’du śes daṅ ’du śes med par yaṅ ’jug par mi ’gyur ro ||
(123a1) de ci’i phyir źe na | rab ’byor gal te byaṅ chub sems dpa’ sems dpa’ chen po de dag chos su ’du śes ’jug na de ñid de dag gi bdag tu ’dzin par ’gyur źiṅ | sems can du ’dzin pa daṅ | srog tu ’dzin pa daṅ | gaṅ zag tu ’dzin par ’gyur ba’i phyir ro ||
(2) gal te chos med par ’du śes ’jug na yaṅ de ñid de dag gi bdag tu ’dzin par ’gyur źiṅ | sems can du ’dzin pa daṅ | srog tu ’dzin pa daṅ | gaṅ zag tu ’dzin par ’gyur ba’i phyir ro ||
de ci’i phyir źe na | yaṅ rab ’byor byaṅ chub sems dpas chos kyaṅ log par gzuṅ bar mi bya ste | (3) chos ma yin pa yaṅ mi gzuṅ ba’i phyir ro ||
de bas na de la dgoṅs te | de bźin gśegs pas chos kyi rnam graṅs gziṅs lta bur śes pa rnams kyis chos rnams kyaṅ spaṅ bar bya na chos ma yin pa rnams lta ci smos źes gsuṅs so ||
gźan yaṅ bcom ldan ’das kyis tshe daṅ ldan pa rab (4) ’byor la ’di skad ces bka’ stsal to ||
rab ’byor ’di ji sñam du sems | de bźin gśegs pas gaṅ bla na med pa yaṅ dag par rdzogs pa’i byaṅ chub mṅon par rdzogs par saṅs rgyas pa’i chos de gaṅ yaṅ yod dam | de bźin gśegs pas chos gaṅ yaṅ bstan tam | de skad ces (5) bka’ stsal nas | bcom ldan ’das la tshe daṅ ldan pa rab ’byor gyis ’di skad ces gsol to ||
bcom ldan ’das bcom ldan ’das kyis gsuṅs pa’i don bdag gis ’tshal ba ltar na | de bźin gśegs pas gaṅ bla na med pa yaṅ dag par rdzogs pa’i byaṅ chub tu mṅon par (6) rdzogs par saṅs rgyas pa’i chos de gaṅ yaṅ ma mchis so ||
de bźin gśegs pas gaṅ bstan pa’i chos de gaṅ yaṅ ma mchis so ||
de ci’i slad du źe na | de bźin gśegs pas chos gaṅ yaṅ mṅon par rdzogs par saṅs rgyas pa’am bstan pa de gzuṅ du ma mchis brjod du ma (7) mchis te | de ni chos kyaṅ ma lags | chos ma mchis pa’aṅ ma lags pa’i slad du’o ||
de ci’i slad du źe na | ’phags pa’i gaṅ zag rnams ni ’dus ma bgyis kyis rab tu phye ba’i slad du’o ||
bcom ldan ’das kyis bka’ stsal pa | rab ’byor ’di ji sñam du sems | rigs kyi (123b1) bu’am | rigs kyi bu mo gaṅ la la źig gis stoṅ gsum gyi stoṅ chen po’i ’jig rten gyi khams ’di rin po che sna bdun gyis rab tu gaṅ bar byas te sbyin ba byin na | rigs kyi bu’am | rigs kyi bu mo de gźi de las bsod nams kyi phuṅ po maṅ du bskyed dam | rab ’byor gyis gsol pa | bcom ldan (2) ’das maṅ lags so ||
bde bar gśegs pa maṅ lags te | rigs kyi bu’am | rigs kyi bu mo de gźi de las bsod nams kyi phuṅ po maṅ du bskyed do ||
de ci’i slad du źe na | bcom ldan ’das bsod nams kyi phuṅ po de ñid phuṅ po ma mchis pa’i slad du ste | des na de bźin gśegs (3) pas bsod nams kyi phuṅ po bsod nams kyi phuṅ po źes gsuṅs so ||
bcom ldan ’das kyis bka’ stsal pa | rab ’byor rigs kyi bu’am | rigs kyi bu mo gaṅ gis stoṅ gsum gyi stoṅ chen po’i ’jig rten gyi khams ’di rin po che sna bdun gyis rab tu gaṅ bar byas te sbyin pa byin pa bas | gaṅ (4) gis chos kyi rnam graṅs ’di las tha na tshig bźi pa’i tshigs su bcad pa gcig tsam bzuṅ nas gźan dag la yaṅ ’chad ciṅ yaṅ dag par rab tu ston na | de gźi de las bsod nams kyi phuṅ po ches maṅ du graṅs med dpag tu med pa bskyed do ||
de ci’i phyir źe na | rab ’byor de bźin gśegs pa (5) dgra bcom pa yaṅ dag par rdzogs pa’i saṅs rgyas kyi bla na med pa yaṅ dag par rdzogs pa’i byaṅ chub ni ’di las byuṅ ste | saṅs rgyas bcom ldan ’das rnams kyaṅ ’di las skyes pa’i phyir ro ||
de ci’i phyir źe na | rab ’byor saṅs rgyas kyi chos rnams saṅs rgyas kyi chos rnams źes bya ba ni saṅs (6) rgyas kyi chos de dag med par de bźin gśegs pas gsuṅs pa’i phyir te | des na saṅs rgyas kyi chos rnams źes bya’o ||
rab ’byor ’di ji sñam du sems | rgyun du źugs pa ’di sñam du bdag gis rgyun du źugs pa’i ’bras bu thob bo sñam du sems sam | rab ’byor gyis gsol pa | (7) bcom ldan ’das de ni ma lags so ||
de ci’i slad du źe na | bcom ldan ’das de ci la’aṅ źugs pa ma mchis pa’i slad du ste | des na rgyun du źugs pa źes bya’o ||
gzugs la’aṅ ma źugs | sgra la ma lags | dri la ma lags | ro la ma lags | reg bya la ma lags | chos (124a1) la’aṅ ma źugs te | des na rgyun du źugs pa źes bgyi’o ||
bcom ldan ’das gal te rgyun du źugs pa de ’di sñam du bdag gis rgyun du źugs pa’i ’bras bu thob bo sñam du sems par gyur na de ñid de’i bdag tu ’dzin par ’gyur ro ||
sems can du ’dzin pa (2) daṅ | srog tu ’dzin pa daṅ | gaṅ zag tu ’dzin par ’gyur ro ||
bcom ldan ’das kyis bka’ stsal pa | rab ’byor ’di ji sñam du sems | lan cig phyir ’oṅ ba ’di sñam du bdag gis lan cig phyir ’oṅ ba’i ’bras bu thob po sñam du sems sam | rab ’byor gyis gsol pa | (3) bcom ldan ’das de ni ma lags so ||
de ci’i slad du źe na | gaṅ lan cig phyir ’oṅ ba’i chos de gaṅ yaṅ ma mchis pa’i slad du sta | des na lan cig phyir ’oṅ ba źes bgyi’o ||
bcom ldan ’das kyis bka’ stsal pa | rab ’byor de ji sñam du sems | phyir mi ’oṅ ba ’di sñam du bdag (4) gis phyir mi ’oṅ ba’i ’bras bu thob bo sñam du sems sam | rab ’byor gyis gsol pa | bcom ldan ’das de ni ma lags so ||
de ci’i slad du źe na | gaṅ phyir mi ’oṅ ba ñid du źugs pa’i chos de gaṅ yaṅ ma mchis pa’i slad du ste | des na phyir mi ’oṅ ba źes bgyi’o ||
bcom ldan ’das (5) kyis bka’ stsal pa | rab ’byor ’di ji sñam du sems | yaṅ dgra bcom pa ’di sñam du bdag gis dgra bcom pa ñid thob bo sñam du sems sam | rab ’byor gyis gsol pa | bcom ldan ’das de ni ma lags so ||
de ci’i slad du źe na | gaṅ dgra bcom pa źes bgyi ba’i chos de gaṅ (6) yaṅ ma mchis pa’i slad du’o ||
bcom ldan ’das gal te dgra bcom pa ’di sñam du bdag gis dgra bcom pa ñid thob bo sñam du sems par gyur na de ñid de’i bdag tu ’dzin par ’gyur ro ||
sems can du ’dzin pa daṅ | srog tu ’dzin pa daṅ | gaṅ zag tu ’dzin par ’gyur ro ||
bcom ldan (7) ’das bdag ni de bźin gśegs pa dgra bcom pa yaṅ dag par rdzogs pa’i saṅs rgyas kyis ñon moṅs pa med par gnas pa rnams kyi mchog tu bstan te | bcom ldan ’das bdag ’dod chags daṅ bral ba dgra bcom pa lags kyaṅ | bcom ldan ’das bdag ’di sñam du bdag ni dgra (124b1) bcom pa’o sñam du mi sems so ||
bcom ldan ’das gal te bdag ni ’di sñam du bdag gis dgra bcom pa ñid thob bo snam du sems par gyur na | de bźin gśegs pas bdag la rigs kyi bu rab ’byor ni ñon moṅs pa med par gnas pa rnams kyi mchog yin te | ci la yaṅ mi gnas pas na (2) ñon moṅs pa med par gnas pa ñon moṅs pa med par gnas pa źes luṅ mi ston to ||
bcom ldan ’das kyis bka’ stsal pa | rab ’byor ’di ji sñam du sems | de bźin gśegs pas de bźin gśegs pa dgra bcom pa yaṅ dag par rdzogs pa’i saṅs rgyas mar me mdzad las gaṅ blaṅs (3) pa’i chos de gaṅ yaṅ yod dam | rab ’byor gyis gsol pa | bcom ldan ’das de ni ma lags te | de bźin gśegs pas de bźin gśegs pa dag bcom pa yaṅ dag par rdzogs pa’i saṅs rgyas mar me mdzad las gaṅ blaṅs pa’i chos de gaṅ yaṅ ma mchis so ||
bcom ldan ’das kyis (4) bka’ stsal pa | rab ’byor byaṅ chub sems dpa’ gaṅ la la źig ’di skad du bdag gis źiṅ bkod pa rnams bsgrub par bya’o źes zer na de ni mi bden par smra ba’o ||
de ci’i phyir źe na | rab ’byor źiṅ bkod pa rnams źiṅ bkod pa rnams źes bya ba ni bkod pa de dag med par de bźin gśegs pas (5) gsuṅs pa’i phyir te | des na źiṅ bkod pa rnams źes bya’o ||
rab ’byor de lta bas na byaṅ chub sems dpa’ sems dpa’ chen pos ’di ltar mi gnas par sems bskyed pa źes bya’o ||
ci la yaṅ mi gnas par sems bskyed par bya’o ||
gzugs la yaṅ mi gnas par sems bskyed par bya’o ||
(6) sgra daṅ | dri daṅ | ro daṅ | reg bya daṅ | chos la yaṅ mi gnas par sems bskyed par bya’o ||
rab ’byor ’di lta ste dper na skyes bu źig lus ’di lta bur gyur te | ’di lta ste | ri’i rgyal po ri rab tsam du gyur na rab ’byor ’di ji sñam du sems | lus de che ba yin nam | rab ’byor gyis gsol pa | (7) bcom ldan ’das lus de ni che ba lags so ||
bde bar gśegs pa lus de che ba lags so ||
de ci’i slad du źe na | de bźin gśegs pas de dṅos po ma mchis par gsuṅs pa’i slad du ste | des na lus źes bgyi’o ||
de dṅos po ma mchis par de bźin gśegs pas gsuṅs te | des na lus (125a1) źes bgyi’o ||
bcom ldan ’das kyis bka’ stsal pa | rab ’byor ’di ji sñam du sems | gaṅ g’i kluṅ gi bye ma ji sñed pa gaṅ g’i kluṅ yaṅ de sñed kho nar gyur na de dag gi bye ma gaṅ yin pa de maṅ ba yin nam | rab ’byor gyis gsol pa | bcom ldan ’das gaṅ g’i kluṅ (2) de dag ñid kyaṅ maṅ pa lags na de dag gi bye ma lta smos kyaṅ ci ’tshal | bcom ldan ’das kyis bka’ stsal pa | rab ’byor khyod kyis mos par bya | khyod kyis khoṅ du chud par bya’o ||
gaṅ g’i kluṅ de dag gi bye ma ji sñed kyi ’jig rten gyi khams skyes pa’am | bud med gaṅ la la źig gis rin (3) po che sna bdun gyis rab tu gaṅ bar byas te | de bźin gśegs pa dgra bcom pa yaṅ dag par rdzogs pa’i saṅs rgyas rnams la sbyin pa byin na | rab ’byor ’di ji sñam du sems | skyes pa’am bud med de gźi de las bsod nams maṅ du skyed dam | rab ’byor gyis gsol pa | bcom ldan (4) ’das maṅ lags so ||
bde bar gśegs pa maṅ lags te | skyes pa’am bud med de gźi de las bsod nams maṅ du skyed do ||
bcom ldan ’das kyis bka’ stsal pa | rab ’byor gaṅ gis ’jig rten gyi khams de sñed rin po che sna bdun gyis rab tu gaṅ bar byas te | de bźin gśegs (5) pa dgra bcom pa yaṅ dag par rdzogs pa’i saṅs rgyas rnams la sbyin pa byin pa bas | gaṅ gis chos kyi rnam graṅs ’di las tha na tshig bźi pa’i tshigs su bcad pa tsam bzuṅ nas gźan dag la yaṅ rgya cher yaṅ dag par rab tu bstan na | de ñid gźi de las bsod nams ches maṅ du graṅs med (6) dpag tu med pa bskyed do ||
yaṅ rab ’byor sa phyogs gaṅ na chos kyi rnam graṅs ’di las tha na tshig bźi pa’i tshigs su bcad pa tsam ’don tam ston pa’i sa phyogs de lha daṅ mi daṅ lha ma yin du bcas pa’i ’jig rten gyi mchod rten du gyur pa yin na | su źig chos kyi rnam graṅs ’di len pa daṅ | ’dzin pa (7) daṅ | klog pa daṅ | kun chub par byed pa daṅ | tshul bźin du yid la byed pa de ṅo mtshar rab daṅ ldan par ’gyur ba lta ci smos | sa phyogs de na ston pa yaṅ bźugs te | bla ma’i gnas gźan dag kyaṅ gnas so ||
de skad ces bka’ stsal pa daṅ | bcom ldan ’das la tshe daṅ ldan par ba ’byor gyis ’di skad ces (125b1) gsol to ||
bcom ldan ’das chos kyi rnam graṅs ’di’i miṅ ci lags | ji ltar gzuṅ bar bgyi | de skad ces gsol pa daṅ | bcom ldan ’das kyis tshe daṅ ldan pa rab ’byor la ’di skad ces bka’ stsal to ||
rab ’byor chos kyi rnam graṅs ’di śes rab kyi pha rol tu phyin pa źes bya ste | ’di de ltar zuṅ (2) źig | de ci’i phyir źe na | rab ’byor de bźin gśegs pas śes rab kyi pha rol tu phyin pa gaṅ bzuṅ ba de ñid pha rol tu phyin pa med pa’i phyir te | des na śes rab kyi pha rol tu phyin pa źes bya’o ||
rab ’byor ’di ji sñam du sems | de bźin gśegs pas gaṅ gsuṅs pa’i chos de gaṅ yaṅ yod dam | rab (3) ’byor gyis gsol pa | bcom ldan ’das de bźin gśegs pas gaṅ gsuṅs pa’i chos de gaṅ yaṅ ma mchis so ||
bcom ldan ’das kyis bka’ stsal pa | rab ’byor ’di ji sñam du sems | stoṅ gsum gyi stoṅ chen po’i ’jig rten gyi khams na sa’i rdul phra rab ji sñed yod pa de maṅ ba yin nam | (4) rab ’byor gyis gsol pa | bcom ldan ’das sa’i rdul de maṅ lags so ||
bde bar gśegs pa maṅ lags so ||
de ci’i slad du źe na | bcom ldan ’das sa’i rdul gaṅ lags pa de rdul ma mchis par de bźin gśegs pas gsuṅs pa’i slad du ste | des na sa’i rdul ces bgyi’o ||
’jig rten (5) gyi khams gaṅ lags pa de khams ma mchis par de bźin gśegs pas gsuṅs te | des na ’jig rten gyi khams źes bya’o ||
bcom ldan ’das kyis bka’ stsal pa | rab ’byor ’di ji sñam du sems | skyes bu chen po’i mtshan sum cu rtsa gñis po de dag gis de bźin gśegs pa dgra bcom pa (6) yaṅ dag par rdzogs pa’i saṅs rgyas su lta’am | rab ’byor gyis gsol pa | bcom ldan ’das de ni ma lags so ||
de ci’i slad du źe na | skyes bu chen po’i mtshan sum cu rtsa gñis po gaṅ dag de bźin gśegs pas gsuṅs pa de dag mtshan ma mchis par gsuṅs pa’i slad du ste | des na de bźin (7) gśegs pa’i mtshan sum cu rtsa gñis źes bgyi’o ||
bcom ldan ’das kyis bka’ stsal pa | yaṅ rab ’byor skyes pa’am | bud med gaṅ gis lus gaṅ g’i kluṅ gi bye ma sñed yoṅs su gtoṅ ba bas gaṅ gis chos kyi rnam graṅs ’di las tha na tshig bźi pa’i tshigs su bcad pa tsam bzuṅ ste | gźan dag (126a1) la yaṅ bstan na de gźi de las bsod nams ches maṅ du graṅs med dpag tu med pa bskyed do ||
de nas tshe daṅ ldan pa rab ’byor chos kyi śugs kyis mchi ma byuṅ ste | des mchi ma phyis nas bcom ldan ’das la ’di skad ces gsol to ||
’di ltar chos kyi rnam graṅs ’di de bźin gśegs (2) pas gsuṅs pa ni bcom ldan ’das ṅo mtshar to ||
bde bar gśegs pa ṅo mtshar to ||
bcom ldan ’das bdag gi ye śes skyes tshun chad bdag gis chos kyi rnam graṅs ’di sṅon nam yaṅ ma thos so ||
bcom ldan ’das mdo bśad pa ’di la gaṅ dag yaṅ dag par ’du śes bskyed par gyur pa’i sems can de dag (3) ni ṅo mtshar rab daṅ ldan par ’gyur ro ||
de ci’i slad du źe na | bcom ldan ’das yaṅ dag par ’du śes pa gaṅ lags pa de ñid ’du śes ma mchis pa’i slad du ste | de bas na yaṅ dag par ’du śes yaṅ dag par ’du śes źes de bźin gśegs pas gsuṅs so ||
bcom ldan ’das bdag chos kyi rnam graṅs (4) ’di bśad pa la rtog ciṅ mos pa ni bdag la mos pa ma lags kyi | bcom ldan ’das slad ma’i tshe slad ma’i dus lṅa brgya pa tha ma la sems can gaṅ dag chos kyi rnam graṅs ’di len pa daṅ | ’dzin pa daṅ | klog pa daṅ | kun chub par bgyid pa de dag ni ṅo mtshar rab daṅ ldan par ’gyur ro ||
yaṅ bcom ldan ’das (5) de dag ni bdag tu ’du śes ’jug par mi ’gyur | sems can du ’du śes pa daṅ | srog tu ’du śes pa daṅ | gaṅ zag tu ’du śes ’jug par mi ’gyur lags so ||
de ci’i slad du źe na | bcom ldan ’das bdag tu ’du śes pa daṅ | sems can ’du śes pa daṅ | srog tu ’du śes pa daṅ | gaṅ zag tu ’du (6) śes pa gaṅ lags pa de dag ñid ’du śes ma mchis pa’i slad du’o ||
de ci’i slad du źe na | saṅs rgyas bcom ldan ’das rnams ni ’du śes thams cad daṅ bral ba’i slad du’o ||
de skad ces gsol pa daṅ | bcom ldan ’das kyis tshe daṅ ldan pa rab ’byor la ’di skad ces bka’ stsal to ||
rab ’byor de de bźin no ||
(7) de de bźin te | mdo bśad pa ’di la gaṅ dag mi skrag mi dṅaṅ źiṅ dṅaṅ bar mi ’gyur ba’i sems can de dag ni ṅo mtshar rab daṅ ldan par ’gyur ro ||
de ci’i phyir źe na | rab ’byor pha rol tu phyin pa dam pa ’di ni de bźin gśegs pas gsuṅs te | pha rol tu phyin pa dam pa gaṅ dag de bźin gśegs pas (126b1) gsuṅs pa de saṅs rgyas bcom ldan ’das dpag tu med pa rnams kyis gsuṅs pa’i phyir te | des na pha rol tu phyin pa dam pa źes bya’o ||
yaṅ rab ’byor de bźin gśegs pa’i bzod pa’i pha rol tu phyin pa gaṅ yin pa de ñid pha rol tu phyin pa med do ||
de ci’i phyir źe na | rab ’byor gaṅ gi tshe ka liṅ k’i rgyal (2) pos ṅa’i yan lag daṅ ñiṅ lag rnams bcad par gyur pa de’i tshe ṅa la bdag tu ’du śes sam | sems can du ’du śes sam | srog tu ’du śes sam | gaṅ zag tu ’du śes kyaṅ ma byuṅ la | ṅa la ’du śes ci’aṅ med la ’du śes med par gyur pa yaṅ ma yin pa’i phyir ro ||
de ci’i phyir źe na | rab ’byor gal te (3) de’i tshe ṅa la bdag tu ’du śes byuṅ na de’i tshe gnod sems kyi ’du śes kyaṅ byuṅ la | sems can du ’du śes pa daṅ | srog tu ’du śes pa daṅ | gaṅ zag tu ’du śes byuṅ na de’i tshe gnod sems kyi ’du śes kyaṅ ’byuṅ ba’i phyir ro ||
rab ’byor ṅas mṅon par śes te | ’das pa’i dus na ṅa tshe rabs lṅa (4) brgyar bzod par smra ba źes bya ba’i draṅ sroṅ du gyur pa de na yaṅ ṅa la bdag tu ’du śes ma byuṅ | sems can du ’du śes pa daṅ | srog tu ’du śes pa daṅ | gaṅ zag tu ’du śes ma byuṅ ṅo ||
rab ’byor de lta bas na byaṅ chub sems dpa’ sems dpa’ chen pos ’du śes thams cad rnam par spaṅs te bla na (5) med pa yaṅ dag par rdzogs pa’i byaṅ chub tu sems bskyed par bya’o ||
gzugs la mi gnas par sems bskyed par bya’o ||
sgra daṅ | dri daṅ | ro daṅ | reg bya daṅ | chos la’aṅ mi gnas par sems bskyed par bya’o ||
chos med pa la’aṅ mi gnas par sems bskyed par bya’o ||
ci la’aṅ mi gnas (6) par sems bskyed par bya’o ||
de ci’i phyir źe na | gnas pa gaṅ yin pa de ñid mi gnas pa’i phyir te | de bas na de bźin gśegs pas ’di skad du | byaṅ chub sems dpas mi gnas par sbyin pa sbyin par bya’o źes gsuṅs so ||
yaṅ rab ’byor byaṅ chub sems dpas ’di ltar sems can thams cad (7) kyi don gyi phyir sbyin pa yoṅs su gtaṅ bar bya’o ||
sems can du ’du śes pa gaṅ yin pa de ñid kyaṅ ’du śes med pa ste | de bźin gśegs pas sems can thams cad ces gaṅ gsuṅs pa de ñid kyaṅ med pa’o ||
de ci’i phyir źe na | rab ’byor de bźin gśegs pa ni yaṅ dag par gsuṅ ba | bden (127a1) pa gsuṅ ba | de bźin ñid gsuṅ ba ste | de bźin gśegs pa ni ma nor ba de bźin ñid gsuṅ ba’i phyir ro ||
yaṅ rab ’byor de bźin gśegs pas chos gaṅ mṅon par rdzogs par saṅs rgyas pa’am bsten pa de la ni bden pa yaṅ med brdzun pa yaṅ med do ||
rab ’byor ’di lta ste dper na (2) mig daṅ ldan pa’i mi źig mun par źugs nas ci yaṅ mi mthoṅ ba de bźin du gaṅ dṅos por lhuṅ bas sbyin pa yoṅs su gtoṅ ba’i byaṅ chub sems dpar blta’o ||
rab ’byor ’di lta ste dper na nam laṅs te ñi ma śar na mig daṅ ldan pa’i mis gzugs rnam pa sna tshogs dag mthoṅ ba de bźin du | gaṅ dṅos por ma lhuṅ (3) bas sbyin pa yoṅs su gtoṅ ba’i byaṅ chub sems dpar blta’o ||
yaṅ rab ’byor rigs kyi bu’am | rigs kyi bu mo gaṅ dag chos kyi rnam graṅs ’di len pa daṅ | ’dzin pa daṅ | klog pa daṅ | kun chub par byed pa daṅ | gźan dag la yaṅ rgya cher yaṅ dag par rab tu ston pa de dag ni de bźin gśegs (4) pas ma byed | pas ma byed | de dag ni de bźin gśegs pas gzigs te | sems can de dag thams cad ni bsod nams kyi phuṅ po dpag tu med pa bskyed par ’gyur ro ||
yaṅ rab ’byor skyes pa’am bud med gaṅ źig sṅa dro’i dus kyi tshe lus gaṅ g’i kluṅ gi bye ma sñed yoṅs su gtoṅ la | phyed kyi dus daṅ | phye dro’i dus kyi (5) tshe yaṅ lus gaṅ g’i kluṅ gi bye ma sñed yoṅs su gtoṅ ste | rnam graṅs ’di lta bur bskal pa khrag khrig brgya stoṅ du lus yoṅs su gtoṅ pa bas | gaṅ gis chos kyi rnam graṅs ’di thos nas mi spoṅ na de ñid gźi de las bsod nams ches maṅ du graṅs med dpag tu med pa bskyed na | gaṅ gis yi ger bris nas (6) len pa daṅ | ’dzin pa daṅ | klog pa daṅ | kun chub par byed pa daṅ | gźan dag la yaṅ rgya cher yaṅ dag par rab tu ston pa lta ci smos | yaṅ rab ’byor chos kyi rnam graṅs ’di ni bsam gyis mi khyab ciṅ mtshuṅs pa med de | chos kyi rnam graṅs ’di ni theg pa mchog la yaṅ dag par źugs pa’i sems can (7) rnams kyi don daṅ | theg pa phul du phyin pa la yaṅ dag par źugs pa’i sems can rnams kyi don gyi phyir | de bźin gśegs pas gsuṅs so ||
gaṅ dag chos kyi rnam graṅs ’di len pa daṅ | klog pa daṅ | kun chub par byed pa daṅ | gźan dag la yaṅ rgya cher yaṅ dag par rab tu ston pa de dag ni de bźin (127b1) gśegs pas mkhyen te | de dag de bźin gśegs pas gzigs te | sems can de dag thams cad ni bsod nams kyi phuṅ po dpag tu med pa daṅ ldan par ’gyur ro ||
bsod nams kyi phuṅ po bsam gyis mi khyab pa daṅ | mtshuṅs pa med pa daṅ | gźal du med pa daṅ | tshad med pa daṅ ldan par ’gyur (2) te | sems can de dag thams cad ṅa’i byaṅ chub phrag pa la thogs par ’gyur ro ||
de ci’i phyir źe na | rab ’byor dman pa la mos pa rnams kyis chos kyi rnam graṅs ’di mñan par ma nus te | bdag tu lta ba rnams kyis ma yin | sems can du lta ba rnams kyis ma yin | srog tu lta ba rnams kyis ma yin | (3) gaṅ zag tu lta ba rnams kyis mñan pa daṅ | blaṅ ba daṅ | gzuṅ ba daṅ | bklag pa daṅ | kun chub par byed mi nus te | de ni gnas med pa’i phyir ro ||
yaṅ rab ’byor sa phyogs gaṅ na mdo sde ’di ston pa’i sa phyogs de lha daṅ | mi daṅ | lha ma yin du bcas pa’i ’jig rten gyis mchod par (4) ’os par ’gyur ro ||
sa phyogs de phyag bya bar ’os pa daṅ | bskor ba bya bar ’os par ’gyur te | sa phyogs de mchod rten lta bur ’gyur ro ||
rab ’byor rigs kyi bu’am | rigs kyi bu mo gaṅ dag ’di lta bu’i mdo sde’i tshig ’di dag len pa daṅ | ’dzin pa daṅ | klog pa daṅ | kun chub (5) bar byed pa de dag ni mnar bar ’gyur | śin du mnar bar ’gyur ro ||
de ci’i phyir źe na | rab ’byor sems can de dag gi tshe rabs sṅa ma’i mi dge ba’i las ṅan soṅ du skye bar ’gyur ba gaṅ dag byas pa dag tshe ’di ñid la mnar bas tshe rabs sṅa ma’i mi dge ba’i las de dag byaṅ bar ’gyur te (6) saṅs rgyas kyi byaṅ chub kyaṅ thob par ’gyur ba’i phyir ro ||
rab ’byor ṅas mṅon par śes te | ’das pa’i dus bskal pa graṅs med pa’i yaṅ ches graṅs med pa na | de bźin gśegs pa dgra bcom pa yaṅ dag par rdzogs pa’i saṅs rgyas mar me mdzad kyi pha rol gyi yaṅ ches pha rol na saṅs (7) rgyas bye ba khrag khrig stoṅ phrag brgyad cu rtsa bźi dag byuṅ ba ṅas mñes par byas te | mñes par byas nas thugs ma byuṅ bar byas te | rab ’byor saṅs rgyas bcom ldan ’das de dag ṅas mñes par byas nas thugs byuṅ bar ma byas pa gaṅ yin pa daṅ | phyi ma’i dus lṅa brgya tha mar gyur pa na mdo sde ’di (128a1) len pa daṅ | ’dzin pa daṅ | klog pa daṅ | kun chub par byed pa gaṅ yin pa las | rab ’byor bsod nams kyi phuṅ po ’di la bsod nams kyi phuṅ po sṅa mas brgya’i char yaṅ mi phod | stoṅ gi cha daṅ | brgya stoṅ gi cha daṅ | graṅs daṅ | cha daṅ | bgraṅ ba daṅ | dpe daṅ | (2) zla daṅ | rgyur yaṅ mi bzod do ||
rab ’byor gal te de’i tshe rigs kyi bu’am | rigs kyi bu mo dag bsod nams kyi phuṅ po ji sñed rab tu ’dzin par ’gyur ba’i rigs kyi bu’am | rigs kyi bu mo de dag gi bsod nams kyi phuṅ po ṅas brjod na | sems can rnams myo myo por ’gyur te | sems (3) ’khrugs par ’gyur ro ||
yaṅ rab ’byor chos kyi rnam graṅs ’di bsam gyis mi khyab ste | ’di’i rnam par smin pa yaṅ bsam gyis mi khyab par rig par bya’o ||
de nas bcom ldan ’das la tshe daṅ ldan pa rab ’byor gyis ’di skad ces gsol to ||
bcom ldan ’das byaṅ chub (4) sems dpa’i theg pa la yaṅ dag par źugs pas ji ltar gnas par bgyi | ji ltar bsgrub par bgyi | ji ltar sems rab tu gzuṅ bar bgyi | bcom ldan ’das kyis bka’ stsal pa | rab ’byor ’di la byaṅ chub sems dpa’i theg pa la yaṅ dag par źugs pas ’di sñam du (5) bdag gis sems can thams cad phuṅ po’i lhag ma med pa’i mya ṅan las ’das pa’i dbyiṅs su yoṅs su mya ṅan las ’da’o ||
de ltar sems can yoṅs su mya ṅan las ’das kyaṅ sems can gaṅ yaṅ yoṅs su mya ṅan las ’das par gyur pa med do sñam du sems bskyed par bya’o ||
(6) de ci’i phyir źe na | rab ’byor gal te byaṅ chub sems dpa’ sems can du ’du śes ’jug na de byaṅ chub sems dpa’ źes mi bya la | gaṅ zag gi bar du ’du śes ’jug na de yaṅ byaṅ chub sems dpa’ źes mi bya ba’i phyir ro ||
de ci’i phyir źe | rab ’byor gaṅ byaṅ chub sems dpa’i theg (7) pa la yaṅ dag par źugs pa źes bya ba’i chos de gaṅ yaṅ med pa’i phyir ro ||
rab ’byor ’di ji sñam du sems | de bźin gśegs pas da bźin gśegs pa mar me mdzad las gaṅ bla na med pa yaṅ dag par rdzogs pa’i byaṅ chub mṅon par rdzogs par saṅs rgyas pa’i chos de gaṅ (128b1) yaṅ yod dam | de skad ces bka’ stsal nas | bcom ldan ’das la tshe daṅ ldan pa rab ’byor gyis ’di skad ces gsol to ||
bcom ldan ’das de bźin gśegs pas de bźin gśegs pa mar me mdzad las gaṅ bla na med pa yaṅ dag par rdzogs pa’i byaṅ chub mṅon par rdzogs par saṅs rgyas (2) pa’i chos de gaṅ yaṅ ma mchis so ||
de skad ces gsol pa daṅ | bcom ldan ’das kyis tshe daṅ ldan pa rab ’byor la ’di skad ces bka’ stsal to ||
rab ’byor de de bźin no ||
de de bźin te | de bźin gśegs pa mar me mdzad las gaṅ bla na med pa yaṅ dag par rdzogs pa’i byaṅ chub mṅon par (3) rdzogs par saṅs rgyas pa’i chos de gaṅ yaṅ med do ||
rab ’byor gal te de bźin gśegs pas gaṅ mṅon par rdzogs par saṅs rgyas pa’i chos de ’ga’ źig yod par gyur na | de bźin gśegs pa mar me mdzad kyis ṅal bram ze’i khye’u khyod ma ’oṅs pa’i dus na de bźin gśegs (4) pa dgra bcom pa yaṅ dag par rdzogs pa’i saṅs rgyas śkya thub pa źes bya bar ’gyur ro źes luṅ mi ston pa źig na | rab ’byor ’di ltar de bźin gśegs pas gaṅ bla na med pa yaṅ dag par rdzogs pa’i byaṅ chub mṅon par rdzogs par saṅs rgyas pa’i chos de gaṅ yaṅ med pas de’i phyir (5) de bźin gśegs pa mar me mdzad kyis ṅa la bram ze’i khye’u khyod ma ’oṅs pa’i dus na de bźin gśegs pa dgra bcom pa yaṅ dag par rdzogs pa’i saṅs rgyas śkya thub pa źes bya bar ’gyur ro źes luṅ bstan to ||
de ci’i phyir źe na | rab ’byor de bźin gśegs pa źes bya ba ni yaṅ dag pa de (6) bźin ñid kyi tshig bla dgas yin pa’i phyir ro ||
rab ’byor gaṅ la la źig ’di skad du | de bźin gśegs pa dgra bcom pa yaṅ dag par rdzogs pa’i saṅs rgyas kyis bla na med pa yaṅ dag par rdzogs pa’i byaṅ chub mṅon par rdzogs par saṅs rgyas so źes zer na de log par smra ba yin (7) no ||
de ci’i phyir źe na | rab ’byor de bźin gśegs pas gaṅ bla na med pa yaṅ dag par rdzogs pa’i byaṅ chub mṅon par rdzogs par saṅs rgyas pa’i chos de gaṅ yaṅ med pa’i phyir ro ||
rab ’byor de bźin gśegs pas chos gaṅ mṅon par rdzogs par saṅs rgyas pa de la bden pa (129a1) yaṅ med brdzun pa yaṅ med de | de bas na de bźin gśegs pas chos thams cad saṅs rgyas kyi chos so źes gsuṅs so ||
rab ’byor chos thams cad ces bya ba ni de dag thams cad chos med pa yin te | de bas na chos thams cad saṅs rgyas kyi chos źes bya ste | (2) rab ’byor ’di lta ste | dper na mi źig lus daṅ ldan źiṅ lus chen por gyur pa bźin no ||
tshe daṅ ldan pa rab ’byor gyis gsol pa | bcom ldan ’das de bźin gśegs pas mi lus daṅ ldan źiṅ lus chen po źes gaṅ gsuṅs pa de | de bźin gśegs pas lus ma mchis par (3) gsuṅs te | des na lus daṅ ldan źiṅ lus chen po źes bgyi’o ||
bcom ldan ’das kyis bka’ stsal pa | rab ’byor de bźin te | byaṅ chub sems dpa’ gaṅ ’di skad du bdag gis sems can rnams yoṅs su mya ṅan las ’da’o źes zer na de byaṅ chub sems dpa’ źes mi bya’o ||
de (4) ci’i phyir źe na | rab ’byor gaṅ byaṅ chub sems dpa’ źes bya ba’i chos de gaṅ yaṅ yod dam | rab ’byor gyis gsol pa | bcom ldan ’das de ni ma mchis so ||
bcom ldan ’das kyis bka’ stsal pa | rab ’byor de bas na de bźin gśegs pas chos thams cad ni sems can med (5) pa | srog med pa | gaṅ zag med pa źes gsuṅs so ||
rab ’byor byaṅ chub sems dpa’ gaṅ źig ’di skad du | bdag gis źiṅ bkod pa rnams bsgrub bo źes zer na de yaṅ de bźin du brjod par bya’o ||
de ci’i phyir źe na | rab ’byor źiṅ bkod pa rnams źiṅ bkod pa rnams (6) źes bya ba ni de dag bkod pa med par de bźin gśegs pas gsuṅs pa’i phyir te | de bas na źiṅ bkod pa rnams źes bya’o ||
rab ’byor byaṅ chub sems dpa’ gaṅ źig chos rnams ni bdag med pa’o ||
chos rnams ni bdag med pa’o źes mos pa de ni de bźin gśegs pa (7) dgra bcom pa yaṅ dag par rdzogs pa’i saṅs rgyas kyis byaṅ chub sems dpa’ byaṅ chub sems dpa’ źes brjod do ||
rab ’byor ’di ji sñam du sems | de bźin gśegs pa la śa’i spyan mṅa’ ’am | rab ’byor gyis gsol pa | bcom ldan ’das de de lta lags te | de (129b1) bźin gśegs pa la śa’i spyan mṅa’o ||
bcom ldan ’das kyis bka’ stsal pa | rab ’byor ’di ji sñam du sems | de bźin gśegs pa la lha’i spyan mṅa’ ’am | rab ’byor gyis gsol pa | bcom ldan ’das de de lta lags te | de bźin gśegs pa la lha’i (2) spyan mṅa’o ||
bcom ldan ’das kyis bka’ stsal pa | rab ’byor ’di ji sñam du sems | de bźin gśegs pa la śes rab kyi spyan mṅa’ ’am | rab ’byor gyis gsol pa | bcom ldan ’das de de lta lags te | de bźin gśegs pa la śes rab kyi spyan (3) mṅa’o ||
bcom ldan ’das kyis bka’ stsal pa | rab ’byor ’di ji sñam du sems | de bźin gśegs pa la chos kyi spyan mṅa’ ’am | rab ’byor gyis gsol pa | bcom ldan ’das de de lta lags te | de bźin gśegs pa la chos kyi spyan mṅa’o ||
bcom ldan (4) ’das kyis bka’ stsal pa | rab ’byor ’di ji sñam du sems | de bźin gśegs pa la saṅs rgyas kyi spyan mṅa’ ’am | rab ’byor gyis gsol pa | bcom ldan ’das de de lta lags te | de bźin gśegs pa la saṅs rgyas kyi spyan mṅa’o ||
bcom ldan ’das kyis (5) bka’ stsal pa | rab ’byor ’di ji sñam du sems | gaṅ g’i kluṅ gi bye ma ji sñed pa gaṅ g’i kluṅ yaṅ de sñed du gyur la | de dag gi bye ma sñed pa de sñed kyi ’jig rten gyi khams su gyur na ’jig rten gyi khams de maṅ ba yin nam | rab ’byor gyis gsol pa | bcom ldan ’das de (6) de lta lags te | ’jig rten gyi khams de dag maṅ ba lags so ||
bcom ldan ’das kyis bka’ stsal pa | rab ’byor ’jig rten gyi khams de dag na sems can ji sñed yod pa de dag gi bsam pa tha dad pa’i sems kyi rgyud ṅas rab tu śes so ||
de ci’i phyir źe na | rab ’byor sems (7) kyi rgyud sems kyi rgyud ces bya ba ni de rgyud med par de bźin gśegs pas gsuṅs pa’i phyir te | des na sems kyi rgyud ces bya’o ||
de ci’i phyir źe na | rab ’byor ’das pa’i sems kyaṅ dmigs su med | ma ’oṅs pa’i sems kyaṅ dmigs su med | da ltar byuṅ ba’i sems kyaṅ (130a1) dmigs su med pa’i phyir ro ||
rab ’byor de ji sñam du sems | gaṅ gis stoṅ gsum gyi stoṅ chen po’i ’jig rten gyi khams ’di rin po che sna bdun gyis yoṅs su gaṅ bar byas te sbyin pa byin na | rigs kyi bu’am | rigs kyi bu mo de gźi de las bsod nams maṅ (2) du skyed dam | rab ’byor gyis gsol pa | bcom ldan ’das maṅ lags so ||
bde bar gśegs pa maṅ lags so ||
bcom ldan ’das kyis bka’ stsal pa | rab ’byor de de bźin no ||
de de bźin te | rigs kyi bu’am | rigs kyi bu mo de gźi da las bsod nams kyi phuṅ (3) po maṅ po skyed do ||
rab ’byor gal te bsod nams kyi phuṅ por gyur na | bsod nams kyi phuṅ po bsod nams kyi phuṅ po źes de bźin gśegs pa mi gsuṅ ṅo ||
rab ’byor de ji sñam du sems | gzugs kyi sku yoṅs su grub pas de bźin gśegs par blta’am | rab ’byor gyis (4) gsol pa | bcom ldan ’das de ni ma lags te | gzugs kyi sku yoṅs su grub pas de bźin gśegs par mi blta’o ||
de ci’i slad du źe na | bcom ldan ’das gzugs kyi sku yoṅs su grub pas gzugs kyi sku yoṅs su rdzogs pa źes bgyi ba ni de yoṅs su grub pa ma mchis par de bźin (5) gśegs pas gsuṅs pa’i slad du ste | des na gzugs kyi sku yoṅs su grub pa źes bgyi’o ||
bcom ldan ’das kyis bka’ stsal pa | rab ’byor ’di ji sñam du sems | mtshan phun sum tshogs pas de bźin gśegs par blta’am | rab ’byor gyis gsol pa | bcom ldan ’das de ni (6) ma lags te | mtshan phun sum tshogs pas de bźin gśegs par mi blta’o ||
de ci’i slad du źe na | de bźin gśegs pas mtshan phun sum tshogs par gsuṅs pa de mtshan phun sum tshogs pa ma mchis par de bźin gśegs pas gsuṅs pa’i slad du ste | des na mtshan phun sum (7) tshogs pa źes bgyi’o ||
bcom ldan ’das kyis bka’ stsal pa | rab ’byor ’di ji sñam du sems | de bźin gśegs pa ’di sñam du ṅas chos bstan to źes dgoṅs so sñam na | rab ’byor de ltar mi blta ste | de bźin gśegs pas gaṅ bstan pa’i chos de gaṅ yaṅ med do ||
rab (130b1) ’byor su źig ’di skad du de bźin gśegs pas chos bstan to źes zer na | rab ’byor de ni med pa daṅ log par zin pas da la skur bar ’gyur ro ||
de ci’i phyir źe na | rab ’byor chos bstan pa źes bya ba dmigs par ’gyur ba’i chos bstan pa chos bstan pa źes bya ba de gaṅ yaṅ med pa’i phyir (2) ro ||
de nas bcom ldan ’das la tshe daṅ ldan pa rab ’byor gyis ’di skad ces gsol to ||
bcom ldan ’das ma ’oṅs pa’i dus na sems can gaṅ dag ’di lta bu’i chos bśad pa thos nas mṅon par yid ches par ’gyur ba mchis sam | bcom ldan ’das kyis bka’ stsal pa | rab ’byor de dag ni (3) sems can yaṅ ma yin sems can med pa yaṅ ma yin no ||
de ci’i phyir źe na | rab ’byor sems can rnams źes bya ba ni de bźin gśegs pas de dag sems can med par gsuṅs pa’i phyir te | des na sems can rnams źes bya’o ||
rab ’byor ’di ji sñam du sems | de bźin gśegs (4) pas gaṅ bla na med pa yaṅ dag par rdzogs pa’i byaṅ chub mṅon par rdzogs par saṅs rgyas pa’i chos de gaṅ yaṅ yod dam | tshe daṅ ldan pa rab ’byor gyis gsol pa | bcom ldan ’das de bźin gśegs pas gaṅ bla na med pa yaṅ dag par rdzogs pa’i byaṅ chub mṅon par rdzogs par saṅs (5) rgyas pa’i chos de gaṅ yaṅ ma mchis so ||
bcom ldan ’das kyis bka’ stsal pa | rab ’byor de te bźin no ||
de de bźin te | de chos cuṅ zad kyaṅ med ciṅ mi dmigs te des na bla na med pa yaṅ dag par rdzogs pa’i byaṅ chub ces bya’o ||
yaṅ rab ’byor chos de ni mñam pa ste | de la mi mñam pa gaṅ (6) yaṅ med pas des na bla na med pa yaṅ dag par rdzogs pa’i byaṅ chub ces bya’o ||
bla na med pa yaṅ dag par rdzogs pa’i byaṅ chub ni bdag med pa daṅ | sems can med pa daṅ | srog med pa daṅ | gaṅ zag med par mñam ste | dge ba’i chos thams cad kyis mṅon par rdzogs par ’tshaṅ rgya’o ||
rab ’byor (7) dge ba’i chos rnams dge ba’i chos rnams źes bya ba ni de dag de bźin gśegs pas chos med pa ñid du gsuṅs te | des na dge ba’i chos rnams źes bya’o ||
yaṅ rab ’byor rigs kyi bu’am | rigs kyi bu mo gaṅ la la źig gis stoṅ gsum gyi stoṅ chen po’i ’jig rten gyi khams na ri’i rgyal po ri bdag ji sñed (131a1) yod pa de tsam gyi rin po che sna bdun gyi phuṅ po mṅon par bsdus te sbyin pa byin pa bas gaṅ gis śes rab kyi pha rol tu phyin pa ’di las than chig bźi pa’i tshigs su bcad pa tsam bzuṅ nas gźan dag la yaṅ bstan na | rab ’byor bsod nams kyi phuṅ po ’di la bsod nams kyi phuṅ po lṅa (2) ma des brgya’i char yaṅ mi phod pa nas rgyu’i bar du yaṅ mi bzod do ||
rab ’byor ’di ji sñam du sems | de bźin gśegs pa ’di sñam du ṅas sems can rnams bkrol lo źes dgoṅs so sñam na | rab ’byor de de ltar mi blta’o ||
de ci’i phyir źe na | rab ’byor de bźin gśegs pas gaṅ bkrol ba’i sems can (3) de dag gaṅ yaṅ med pa’i phyir ro ||
rab ’byor gal te de bźin gśegs pas sems can gaṅ la la źig bgrol bar gyur na de ñid de bźin gśegs pa’i bdag tu ’dzin par ’gyur | sems can du ’dzin pa daṅ | srog tu ’dzin pa daṅ | gaṅ zag tu ’dzin par ’gyur ro ||
rab ’byor bdag tu ’dzin ces bya ba (4) ni de ’dzin pa med par de bźin gśegs pas gsuṅs na de yaṅ byis pa so so’i skye bo rnams kyis bzuṅ ṅo ||
rab ’byor byis pa so so’i skye bo rnams źes bya ba ni de dag skye bo med par de bźin gśegs pas gsuṅs te | des na byis pa so so’i skye bo rnams źes bya’o ||
rab ’byor ’di ji sñam du sems mtshan (5) phun sum tshogs pas de bźin gśegs par blta ’am | rab ’byor gyis gsol pa | bcom ldan ’das de ni ma lags te | mtshan phun sum tshogs pas de bźin gśegs par mi blta’o ||
bcom ldan ’das kyis bka’ stsal pa | rab ’byor de de bźin te | mtshan phun sum tshogs pas de bźin gśegs (6) par mi blta’o ||
rab ’byor gal te mtshan phun sum tshogs pas de bźin gśegs par blta bar gyur na ’khor los sgyur ba’i rgyal po yaṅ de bźin gśegs par ’gyur te de bas na mtshan phun sum tshogs pas de bźin gśegs par mi blta’o ||
de nas bcom ldan ’das la tshe daṅ ldan pa rab ’byor gyis ’di skad (7) ces gsol to ||
bcom ldan ’das kyis gsuṅs pa’i don bdag gis ’tshal ba ltar na mtshan phun sum tshogs pas de bźin gśegs par mi blta’o ||
de nas bcom ldan ’das kyis de’i tshe tshigs su bcad pa ’di dag bka’ stsal to ||
gaṅ dag ṅa la gzugs su mthoṅ ||
gaṅ dag ṅa la sgrar śes pa ||
log par spoṅ bar (131b1) źugs pa ste ||
skye bo de dag ṅa mi mthoṅ ||
saṅs rgyas rnams ni chos ñid blta ||
’dren pa rnams ni chos kyi sku ||
chos ñid rig par bya min pas ||
de ni rnam par śes mi nus ||
rab ’byor ’di ji sñam du sems | mtshan phun sum tshogs pas de bźin gśegs pa dgra bcom pa yaṅ dag par rdzogs pa’i saṅs rgyas (2) so sñam du ’dzin na | rab ’byor khyod kyis de ltar mi blta ste | rab ’byor mtshan phun sum tshogs pas de bźin gśegs pa dgra bcom pa yaṅ dag par rdzogs pa’i saṅs rgyas kyis bla na med pa yaṅ dag par rdzogs pa’i byaṅ chub mṅon par rdzogs par saṅs rgyas pa med do ||
rab ’byor ’di ji sñam du sems ||
(3) byaṅ chub sems dpa’i theg pa la yaṅ dag par źugs pa rnams kyis chos la la źig rnam par bśig gam | chad par btags pa sñam du ’dzin na | rab ’byor te ltar mi blta ste | byaṅ chub sems dpa’i theg pa la yaṅ dag par źugs pa rnams kyis chos gaṅ la yaṅ rnam par bśig pa’am | chad (4) par btags pa med do ||
yaṅ rab ’byor rigs kyi bu ’am | rigs kyi bu mo gaṅ gi ’jig rten gyi khams gaṅ g’i kluṅ gi bye ma sñed dag rin po che sna bdun gyis rab tu gaṅ bar byas te sbyin pa byin pa bas | byaṅ chub sems dpa’ gaṅ źig chos rnams bdag med ciṅ skye ba med pa la bzod pa thob na de (5) ñid gźi de las bsod nams kyi phuṅ po ches maṅ du skyed do ||
yaṅ rab ’byor byaṅ chub sems dpas bsod nams kyi phuṅ po yoṅs su gzuṅ bar mi bya’o ||
tshe daṅ ldan pa rab ’byor gyis gsol pa | bcom ldan ’das byaṅ chub sems dpas bsod nams kyi phuṅ po yoṅs su gzuṅ bar mi bgyi lags sam | (6) bcom ldan ’das kyis bka’ stsal pa | rab ’byor yoṅs su gzuṅ mod kyis log par mi gzuṅ ste | des na yoṅs su gzuṅ ba źes bya’o ||
rab ’byor gaṅ la la źig ’di skad du | de bźin gśegs pa bźud dam | byon tam | bźeṅs sam | bźugs sam | mnal ba mdzad (7) do źes de skad zer na | des na ṅas bśad pa’i don mi śes so ||
de ci’i phyir źe na | rab ’byor de bźin gśegs pa źes bya ba ni gar yaṅ ma bźud | gaṅ nas kyaṅ ma byon pa’i phyir te | des na de bźin gśegs pa dgra bcom pa yaṅ dag par rdzogs pa’i saṅs rgyas źes bya’o ||
(132a1) yaṅ rab ’byor rigs kyi bu’am | rigs kyi bu mo gaṅ gis stoṅ gsum gyi stoṅ chen po’i ’jig rten gyi khams na sa’i rdul rnams ji sñed yod pa de dag ’di lta ste dper na rdul phra rab kyi tshogs bźin du phye mar byas na | rab ’byor ’di ji sñam du sems | rdul phra rab kyi tshogs de (2) maṅ ba yin nam | rab ’byor gyis gsol pa | bcom ldan ’das de de lta lags te | rdul phra rab kyi tshogs de maṅ ba lags so ||
de ci’i slad du źe na | bcom ldan ’das gal te tshogs śig mchis par gyur na | bcom ldan ’das kyis rdul phra rab kyi tshogs źes bka’ mi stsal ba’i slad (3) du’o ||
de ci’i slad du źe na | bcom ldan ’das kyis rdul phra rab kyi tshogs źes gaṅ gsuṅs pa de tshogs ma mchis par de bźin gśegs pas gsuṅs pa’i slad du ste | des na rdul phra rab kyi tshogs źes bgyi’o ||
de bźin gśegs pas stoṅ gsum gyi stoṅ chen po’i (4) ’jig rten gyi khams źes gaṅ gsuṅs pa de khams ma mchis par de bźin gśegs pas gsuṅs te | des na stoṅ gsum gyi stoṅ chen po’i ’jig rten gyi khams źes bgyi’o ||
de ci’i slad du źe na | bcom ldan ’das gal te khams śig mchis par gyur na | de ñid ril (5) por ’dzin par ’gyur ba’i slad du’o ||
de bźin gśegs pas ril por ’dzin par gaṅ gsuṅs pa de ’dzin pa ma mchis par de bźin gśegs pas gsuṅs te | des na ril por ’dzin pa źes bgyi’o ||
bcom ldan ’das kyis bka’ stsal pa | rab ’byor ril por ’dzin (6) pa ñid ni tha sñad de | chos de ni brjod du med pa yin na | de yaṅ byis pa so so’i skye bo rnams kyis bzuṅ ṅo ||
rab ’byor gaṅ la la źig ’di skad du | de bźin gśegs pas bdag tu lta bar gsuṅs te | de bźin gśegs pas sems can du lta ba daṅ | srog (7) chu lta ba daṅ | gaṅ zag tu lta bar gsuṅs so źes zer na | rab ’byor de yaṅ dag par smra bas smra ba yin nam | rab ’byor gyis gsol pa | bcom ldan ’das de ni ma lags so ||
bde bar gśegs pa de ni ma lags so ||
de ci’i slad du źe na | bcom ldan ’das (132b1) de bźin gśegs pas bdag tu lta bar gaṅ gsuṅs pa de lta ba ma mchis par de bźin gśegs pas gsuṅs pa’i slad du ste | des na bdag tu lta ba źes bgyi’o ||
bcom ldan ’das kyis bka’ stsal pa | rab ’byor byaṅ chub sems dpa’i theg pa la yaṅ dag par (2) źugs pas ’di ltar chos thams cad śes par bya ba lta bar bya mos par bya ste | ci nas chos su ’du śes pa la yaṅ mi gnas pa de ltar mos par bya’o ||
de ci’i phyir źe na | rab ’byor chos su ’du śes chos su ’du śes źes bya ba ni ’du śes med par de bźin gśegs pas gsuṅs (3) pa’i phyir te | des na chos su ’du śes źes bya’o ||
yaṅ rab ’byor byaṅ chub sems dpa’ sems dpa’ chen po gaṅ gis ’jig rten gyi khams dpag tu med ciṅ graṅs med pa dag | rin po che sna bdun gyis rab tu gaṅ bar byas te sbyin pa byin pa bas | rigs kyi bu’am | rigs (4) kyi bu mo gaṅ gis śes rab kyi pha rol tu phyin pa ’di las tha na tshig bźi pa’i tshigs su bcad pa tsam blaṅs nas | ’dzin tam | klog gam | kun chub par byed dam | gźan dag la yaṅ rgya cher yaṅ dag par rab tu ston na | de ñid gźi de las bsod nams ches maṅ du graṅs (5) med dpag tu med pa bskyed do ||
ji ltar yaṅ dag par rab tu ston ce na | ji ltar yaṅ dag par rab tu mi ston pa bźin du ste | des na yaṅ dag par rab tu ston pa źes bya’o ||
skar ma rab rib mar me daṅ ||
sgyu ma zil pa chu bur daṅ ||
rmi lam glog daṅ sprin lta bur ||
(6) ’dus byas de ltar blta bar bya ||
bcom ldan ’das kyis de skad ces bka’ stsal nas | gnas brtan rab ’byor daṅ | byaṅ chub sems dpa’ de dag daṅ | ’khor bźi po dge sloṅ daṅ | dge sloṅ ma daṅ | dge bsñen daṅ | dge bsñen ma de dag daṅ | lha daṅ | mi daṅ | lha (7) ma yin daṅ | dri zar bcas pa’i ’jig rten yi raṅs te | bcom ldan ’das kyis gsuṅs pa la mṅon par bstod do ||
