dga’ daṅ gus daṅ dad pa’i mchog ni ñer bźag ste ||
sgrib pa ñon moṅs bsal nas dri ma las ’das pa ||
’gro don (4) mṅon źugs des pa’i śes rab pha rol phyin ||
gaṅ la dpa’ rnams spyod pa de ni mñan par gyis ||
skabs daṅ po rnam pa thams cad mkhyen pa ñid bstan ||
’dzam bu’i gliṅ ’dir chu kluṅ ji (5) sñed cig ’bab ciṅ ||
me tog ’bras ldan sman daṅ nags tshal skyed byed pa ||
ma dros gnas pa’i klu dbaṅ klu bdag brten gnas te ||
de ni klu yi bdag po de yi mthu dpal yin ||
(2a1) rgyal ba’i ñan thos pa dag ji sñed chos ston daṅ ||
’chad daṅ rigs pa dag daṅ ldan par brjod pa daṅ ||
mchog ’phags bde ba byed daṅ de yi ’bras thob pa ||
de dag kun kyaṅ de bźin gśegs pa’i skyes bu’i mthu ||
ci phyir źe na (2) rgyal bas chos tshul gaṅ bstan pa ||
de la mi mchog slob mar gyur pas mṅon bslabs śiṅ ||
mṅon sum byas nas bslabs pa ji bźin ston byed de ||
saṅs rgyas mthus byed raṅ gi stobs kyi mthus ma yin ||
gaṅ la śes rab pha rol phyin mchog (3) mi dmigs śiṅ ||
byaṅ chub sems dpa’ mi dmigs byaṅ chub sems mi dmigs ||
de skad thos nas rmoṅs pa med ciṅ skrag med pa ||
byaṅ chub sems dpa’ de ni bde gśegs śes rab spyod ||
gzugs med tshor ba med ciṅ ’du śes sems pa (4) med ||
de la rnam śes gnas ni rdul tsam yod ma yin ||
de chos kun la mi gnas gnas pa med par spyod ||
yoṅs su gzuṅ med bde gśegs rnams kyi byaṅ chub ’thob ||
ji ltar kun tu rgyu ba bzo sbyaṅs śes pa yis ||
dmigs med phuṅ po rnam (5) par ’jig pa ’byuṅ ba ltar ||
byaṅ chub sems dpa’ gaṅ źig de ltar chos śes pa ||
mya ṅan ’das la mi reg de ni śes rab gnas ||
yaṅ ’di śes rab ’di ni gaṅ yin su yi yin ||
gaṅ las yin źes chos ’di thams cad stoṅ par rtog ||
ñe bar (6) brtags nas źum pa med ciṅ skrag med pa ||
byaṅ chub sems dpa’ de ni byaṅ chub ñe ba yin ||
gal te mi śes bźin du gzugs su ’du śes śiṅ ||
tshor ba sems pa rnam śes phuṅ por spyod byed ciṅ ||
phuṅ ’di stoṅ źes rtog na’aṅ byaṅ chub sems (2b1) dpa’ ni ||
mtshan ma la spyod skye med gnas la dad ma yin ||
gaṅ źig gzugs min tshor min ’du śes sems pa yin ||
rnam par śes la mi spyod gnas pa med par spyod ||
de ni spyod ces bya bar mi dmigs śes rab brten ||
skye med blo ldan tiṅ ’dzin źi ba mchog la (2) reg ||
byaṅ chub sems gaṅ de ltar ’dir bdag źir gnas pa ||
de ni sṅon gyi de bźin gśegs pas luṅ bstan yin ||
bdag ni mñam par bźag ce’am laṅs źes rlom sems med ||
ci phyir źe na chos kyi raṅ bźin yoṅs śes phyir ||
de ltar spyod na bde gśegs (3) rnams kyi śes rab spyod ||
des ni spyod med spyod pa yin par rab śes phyir ||
chos gaṅ spyod pa de yaṅ dmigs par mi ’gyur te ||
’di ni śes rab pha rol phyin mchog spyod pa yin ||
gaṅ źig yod pa ma yin de ni med ces bya ||
byis pa rnams kyis de brtags yod daṅ med (4) par byed ||
yod daṅ med pa ’di gñis med pa’i chos yin ta ||
byaṅ chub sems dpa’ gaṅ gis ’di śes ṅes par ’byuṅ ||
gaṅ ’dir phuṅ po lṅa dag sgyu ma ’drar śes śiṅ ||
sgyu ma gźan daṅ phuṅ po gźan du mi byed la ||
sna tshogs ’du śes bral źiṅ ñe bar źi spyod (5) pa ||
’di ni śes rab pha rol phyin mchog spyod pa yin ||
dge ba’i bśes daṅ ldan źiṅ lhag mthoṅ ldan gyur pa ||
rgyal ba rnams kyi yum thos skrag par yoṅ mi ’gyur ||
gaṅ źig sdig pa’i grogs ldan gźan gyi driṅ ’jog pa ||
de ni snod so ma btaṅ chus reg źig pa (6) bźin ||
ci phyir ’di ni byaṅ chub sems dpa’ bya źe na ||
chags pa gcod byed kun la chags pa zad par ’dod ||
rgyal ba rnams kyi byaṅ chub chags med gyur la reg ||
des na ’di ni byaṅ chub sems dpa’i miṅ thob bo ||
ci phyir ’di ni sems dpa’ che źes bya źe na ||
sems (7) can tshogs rnams maṅ po’i mchog tu gyur pa daṅ ||
sems can khams kyi lta rnams chen po gcod pa ste ||
de phyir sems dpa’ chen po źes ni rab brjod do ||
gtoṅ ba che daṅ blo che ba daṅ mthu che daṅ ||
rgyal ba rnams kyi theg chen mchog la źugs pa daṅ ||
go cha (3a1) chen po bgos śiṅ bdud kyi sgyu ’dul ba ||
de yi phyir na sems dpa’ che źes rab tu brjod ||
dper na sgyu ma mkhan gyis bźi mdor sprul byas te ||
skye bo phal chen mgo maṅ bye ba gcod byed pa’i ||
gsad bya de dag ci ’dra de ltar byaṅ chub sems ||
’gro (2) kun sprul ’dra rab śes de la ’jigs pa med ||
gzugs daṅ ’du śes tshor ba daṅ ni sems pa daṅ ||
rnam par śes pa ma bciṅs ma grol yod pa min ||
de ltar byaṅ chub la ’jug źum pa’i sems med pa ||
’di ni gaṅ zag dam pa rnams kyi go cha mchog ||
ci phyir ’di ni byaṅ (3) chub theg chen bya źe na ||
de gaṅ źon nas sems can thams cad mya ṅan zlo ||
theg pa ’di ni mkha’ ’dra gźal med khaṅ chen te ||
dga’ skyid bde ba mṅon par ’thob byed theg pa’i mchog ||
gaṅ źig źon nas phyogs su ’gro ba dmigs su med ||
mya ṅan ’das par ’gro bar (4) gsuṅs pa ’gro mi dmigs ||
dper na mi śi de yis ’gro rgyu med pa bźin ||
rgyu des de ni mya ṅan ’das źes rab tu brjod ||
byaṅ chub sems dpa’ sṅon gyi mtha’ daṅ phyi mtha’ daṅ ||
da ltar byuṅ bar mi dmigs dus gsum dag pa ste ||
gaṅ dag de ni ’dus ma byas yin (5) spros med de ||
’di ni śes rab pha rol phyin mchog spyod pa yin ||
byaṅ chub sems dpa’ mkhas rig gaṅ gi dus kyi tshe ||
skye med rnam par bsams te ’di ltar spyod byed ciṅ ||
sñiṅ rje chen po bskyed kyaṅ sems can ’du śes med ||
’di ni śes rab pha rol phyin mchog (6) spyod pa yin ||
gal te sems can ’du śes sdug bsṅal ’du śes skyed ||
’gro ba rnams kyi don bya sdug bsṅal spaṅ sñam ste ||
bdag daṅ sems can yoṅs rtog byaṅ chub sems dpa’ ste ||
’di ni śes rab pha rol phyin mchog spyod ma yin ||
bdag ci ’dra ba de ’drar sems (7) can thams cad śes ||
sems can thams cad ci ’drar de ’drar chos kun śes ||
skye ba med daṅ skye ba gñi gar mi rtog pa ||
’di ni śes rab pha rol phyin mchog spyod pa yin ||
’jig rten dag na chos miṅ ji sñed yoṅs brjod pa ||
kun la skye ba daṅ ni yaṅ dag ’das (3b1) spaṅs nas ||
ye śes ’chi med dam pa de las gźan med ’thob ||
de phyir ’di ni śes rab pha rol phyin ces bya ||
byaṅ chub sems dpa’ gaṅ źig dogs med de ltar spyod ||
śes rab ldan te mñam ñid gnas par śes par bya ||
chos rnams raṅ bźin med par yoṅs su śes (2) gyur pa ||
’di ni śes rab pha rol phyin mchog spyod pa yin ||
skabs gñis pa lam thams cad śes pa ñid bstan ||
gaṅ źig gzugs la mi gnas tshor la mi gnas śiṅ ||
gaṅ źig ’du śes mi gnas sems par mi gnas la ||
rnam śes gaṅ mi gnas pa chos ñid (3) gnas pa ste ||
’di ni śes rab pha rol phyin mchog spyod pa yin ||
rtag daṅ mi rtag bde daṅ sdug bsṅal sdug mi sdug ||
bdag daṅ bdag med de bźin ñid daṅ de bźin stoṅ ||
’bras bu thob daṅ dgra bcom sa la mi gnas śiṅ ||
raṅ rgyal sa daṅ de bźin saṅs rgyas(4) sar mi gnas ||
ji ltar ’dren pa ’dus ma byas khams mi gnas śiṅ ||
de bźin ’dus byas la yaṅ mi gnas gnas med spyod ||
de ltar byaṅ chub sems dpa’ gnas la gnas med gnas ||
gnas med gnas yin ’di ni rgyal bas gnas par gsuṅs ||
gaṅ (5) dag bde gśegs ñan thos ’gyur bar bya sñam daṅ ||
raṅ saṅs rgyas dag de bźin chos rgyal ’gyur ’dod pa ||
bzod pa ’di la ma brten thob par mi nus te ||
dper na tshu rol pha rol ’gro dogs mi mthoṅ bźin ||
chos ’chad pa daṅ ñan daṅ bśad bya gaṅ yin daṅ ||
(6) ’bras bu thob daṅ rkyen rgyal de bźin ’jig rten mgon ||
mkhas pa gsal bas thob pa’i mya ṅan ’das gaṅ yin ||
de kun sgyu ma lta bur de bźin gśegs pas bstan ||
gaṅ zag bźi po ’di dag de la mi skrag ste ||
rgyal sras bden la mkhas daṅ phyir mi ldog pa daṅ ||
(7) dgra bcom dri ma bsal źiṅ som ñi spaṅs pa daṅ ||
bźi pa dge ba’i bśes kyis yoṅs su zin pa’o ||
byaṅ chub sems dpa’ mkhas rig de ltar spyod pa ni ||
dgra bcom sa la mi slob rkyen rtogs sa la min ||
thams cad mkhyen ñid de ched du saṅs rgyas chos rjes (4a1) slob ||
gaṅ źig slob mi slob la mi slob de slob yin ||
gzugs ’phel yoṅs su ñams daṅ yoṅs su gzuṅ phyir min ||
chos rnams sna tshogs yoṅs su gzuṅ phyir mi slob par ||
slob ciṅ thams cad mkhyen pa ñid kyaṅ yoṅs ’dzin la ||
ṅes ’byuṅ (2) gaṅ yin ’di ni yon tan dga’ ba’i slob ||
gzugs ni śes rab ma yin gzugs la śes rab med ||
rnam śes ’du śes tshor daṅ sems pa ’di dag ni ||
śes rab ma yin ’di dag la yaṅ śes rab med ||
’di ni nam mkha’i khams daṅ mtshuṅs te tha dad med ||
dmigs (3) pa rnams kyi raṅ bźin de ni pha mtha’ med ||
sems can raṅ bźin gaṅ yin de yaṅ pha mtha’ med ||
nam mkha’i khams kyi raṅ bźin de yaṅ pha mtha’ med ||
’jig rten mkhyen pa’i śes rab de yaṅ pha mtha’ med ||
’du śes tshu rol yin źes ’dren pas yoṅs su bsgrags ||
(4) ’du śes rnam par bśig nas spoṅ ba pha rol ’gro ||
gaṅ dag ’du śes bral ba ’di ni rjes thob pa ||
de dag pha rol phyin nas ston pa’i bka’ la gnas ||
gal te ston pas kyaṅ ni gaṅ g’i bye sñed kyi ||
bskal par bźugs te sems can źes sgra yoṅs bsgrags kyaṅ ||
gzod (5) nas dag pas sems can skye bar ga la ’gyur ||
’di ni śes rab pha rol phyin mchog spyod pa yin ||
gaṅ tshe ṅa ni pha rol phyin pa mchog ’di daṅ ||
’thun par smra gyur de tshe sṅon gyi skyes mchog gis ||
ma ’oṅs pa yi dus na saṅs rgyas ’gyur ro źes ||
ṅa luṅ bstan par gyur ces rgyal (6) ba de skad gsuṅ ||
śes rab pha rol phyin pa gaṅ la mgon spyod pa ||
’di ni gaṅ źig gus byas ’dzin daṅ chub byed pa ||
de la dug daṅ mtshon daṅ me daṅ chus mi tshugs ||
bdud daṅ bdud kyi phyogs kyis glags kyaṅ rñed mi ’gyur ||
la las bde gśegs yoṅs su (7) mya ṅan ’das pa yi ||
mchod rten rin chen bdun las byas śiṅ mchod byed la ||
bde bar gśegs pa’i mchod rten de dag gaṅ g yi ||
bye ma sñed kyis bye ba phrag stoṅ źiṅ bkaṅ ste ||
yoṅs su brtag bzuṅ źiṅ rnams bye ba mtha’ yas na ||
sems can ji sñed (4b1) ’khod pa de dag thams cad kyis ||
las gźan mi byed lha yi me tog spos rab daṅ ||
byug pas dus gsum bskal pa’am de bas lhag mchod la ||
gaṅ źig gaṅ las rnam ’dren stobs bcu ’byuṅ ’gyur ba ||
bde bar gśegs kyi yum ’di glegs bam la bris te ||
(2) ’chaṅ źiṅ me tog byug pas bsti staṅ byed gyur na ||
mchod rten byas mchod bsod nams des ni char mi phod ||
rgyal ba’i śes rab pha rol phyin ’di rig sṅags che ||
sems can khams maṅ mya ṅan sdug bsṅal chos źi byed ||
gaṅ dag ’das daṅ gaṅ dag phyogs bcu’i ’jig (3) rten mgon ||
rig sṅags ’di bslabs sman pa’i rgyal po bla med gyur ||
gaṅ dag phan daṅ sñiṅ rjer bcas pa spyad spyod pa ||
rig sṅags ’di la bslabs nas mkhas pa byaṅ chub reg ||
’dus byas bde daṅ ’dus ma byas bde gaṅ yin pa ||
bde ba de kun ’di las ’byuṅ bar rig (4) bar bya ||
sa bon btab nas sa la gnas te ’byuṅ ’gyur ba ||
tshogs pa rñed nas rnam maṅ gzugs dag rnam par skye ||
pha rol phyin lṅa byaṅ chub yon tan ji sñed pa ||
de dag kun kyaṅ śes rab pha rol phyin las skye ||
’khor los sgyur rgyal lam gaṅ nas ni rtag ’gro (5) ba ||
lam de ñid nas rin chen bdun daṅ dpuṅ tshogs kun ||
gaṅ nas rgyal ba’i śes rab pha rol phyin ’di ’gro ||
de ñid nas ni yon tan chos kun ’gro bar ’gyur ||
rgyal bas brgya byin dri ba yoṅs dris lan gsol pa ||
gal te gaṅ g’i bye sñed saṅs rgyas źiṅ (6) gyur la ||
de kun rgyal ba’i riṅ bsrel byuṅ bur bltams gyur kyaṅ ||
bdag ni śes rab pha rol phyin pa ’di ñid len ||
ci slad ce na sku gduṅ mi gus bdag ma lags ||
’on kyaṅ śes rab yoṅs su bsgoms pas mchod par bgyid ||
dper na rgyal po rten mi rim gro (7) thob pa ltar ||
saṅs rgyas riṅ bsrel śes rab pha rol phyin la rten ||
nor bu rin chen yon tan kun ldan rin thaṅ med ||
gab tshe gaṅ du stsal ba de ni phyag bgyi ’os ||
de phyuṅ gyur kyaṅ gab tshe la ni dga’ bgyid de ||
yon tan de dag nor bu rin chen de yi lags ||
de (5a1) bźin śes rab pha rol phyin mchog yon tan gyis ||
rgyal ba mya ṅan ’das kyaṅ riṅ bsrel mchod pa brñes ||
de ltas gaṅ źig rgyal ba’i yon tan ’dzin ’tshal des ||
śes rab pha rol phyin blaṅ ’di ni thar pa lags ||
sbyin pa sbyin pa’i sṅon du ’gro ba (2) śes rab ste ||
tshul khrims bzod pa brtson ’grus bsam gtan de bźin no ||
dge chos chud mi gzan phyir yoṅs su ’dzin pa yin ||
’di ni chos rnams thams cad tshul gcig ston par byed ||
dper na ’dzam bu’i gliṅ na śiṅ rnams bye ba stoṅ ||
rnam pa sna tshogs rnam pa (3) du ma gzugs maṅ ba ||
grib mar gyur pa’i graṅs su brjod pa ma gtogs par ||
grib ma sna tshogs med ciṅ bye brag yod ma yin ||
de bźin rgyal ba’i pha rol phyin lṅa ’di dag kyaṅ ||
śes rab pha rol phyin pa’i miṅ ñid thob par ’gyur ||
thams cad mkhyen pa ñid phyir yoṅs su (4) bsṅos byas na ||
byaṅ chub ces byar drug po ’di kun ro gcig ’gyur ||
byaṅ chub sems dpa’ gal te rab tu mi śes bźin ||
gzugs daṅ ’du śes tshor daṅ sems pa rnam par śes ||
mi rtag yoṅs su ston pa bcos la spyod pa ste ||
mkhas pa nam yaṅ chos rnams ’jig par (5) mi byed do ||
gaṅ la gzugs min tshor min ’du śes mi dmigs śiṅ ||
rnam par śes pa ma yin sems pa mi dmigs la ||
chos kun skye med stoṅ pa’i tshul du rab śes pa ||
’di ni śes rab pha rol phyin mchog spyod pa yin ||
la las gaṅ g’i kluṅ gi bye sñed źiṅ rnams (6) na ||
sems can ji sñed ’khod kun dgra bcom ñid btul bas ||
gaṅ gis śes rab pha rol phyin ’di yig bris te ||
sems can mchog la glegs byin bsod nams khyad par ’phags ||
ci phyir źe na smra mchog de dag ’dir bslabs nas ||
chos rnams mtha’ dag (7) stoṅ pa ñid du ’dir ston byed ||
de thos ñan thos myur du rnam par grol la reg ||
raṅ rgyal byaṅ chub daṅ ni saṅs rgyas byaṅ chub reg ||
myu gu med par ’jig rten sdoṅ ’byuṅ yoṅ med na ||
de la yal ’dab me tog ’bras bu ga la ’byuṅ ||
byaṅ chub sems med rgyal ’byuṅ ’jig (5b1) rten yod med na ||
’bras bu brgya byin tshaṅs pa ñan thos ga la ’byuṅ ||
ñi ma’i dkyil ’khor gaṅ tshe ’od kyi dra ba ’gyed ||
de tshe sems can las byed brtson pa de bźin du ||
mkhas pa śes phyir ’jig rten byaṅ chub sems byuṅ na ||
ye śes kyis ni sems can yon tan chos (2) daṅ ldan ||
dper na ma dros mtsho la klu bdag med gyur na ||
’dzam bu’i gliṅ ’dir chu kluṅ ’bab par ga la ’gyur ||
chu kluṅ med na me tog ’bras bu ’byuṅ mi ’gyur ||
rgya mtsho la yaṅ rin chen gzugs maṅ med par ’gyur ||
de bźin ’dir yaṅ byaṅ chub sems med bde (3) gśegs kyi ||
ye śes ’jig rten ’di dag kun du ga la ’byuṅ ||
ye śes med na yon tan ’phel med byaṅ chub med ||
rgya mtsho ’dra ba’i saṅs rgyas chos kyaṅ med par ’gyur ||
’jig rten ’di na snaṅ byed srog chags ji sñed pa ||
kun gyis snaṅ bar bya phyir ’od rnams phyuṅ (4) ba bas ||
ñi ma’i dkyil ’khor ’od zer gcig phyuṅ ches mchog ste ||
snaṅ byed tshogs kyi ’od rnams kun gyis char mi phod ||
ñan thos tshogs rnams ji sñed sbyin daṅ tshul khrims daṅ ||
bsgom daṅ rab tu ldan pa’i bsod nams tshogs bskyed pa’aṅ ||
byaṅ chub sems (5) dpa’i rjes su yi raṅ sems gcig la ||
ñan thos tshogs kyi bsod nams phuṅ pos char mi phod ||
’das dus sṅon gyi saṅs rgyas bye ba khrag khrig gaṅ ||
źiṅ maṅ mtha’ yas byed stoṅ dag na gaṅ bźugs daṅ ||
gaṅ yaṅ mya ṅan ’das pa ’jig rten mgon po rnams ||
(6) sdug bsṅal zad par bya phyir rin chen chos ston pa ||
daṅ po byaṅ chub mchog tu thugs bskyed bskyed pa nas ||
rnam par ’dren pa rnams kyi dam chos zad kyi dus ||
de bar rgyal ba de dag bsod nams gaṅ yin pa ||
pha rol phyin daṅ ldan daṅ saṅs rgyas chos gaṅ daṅ ||
gaṅ (7) yaṅ saṅs rgyas sras rnams daṅ ni ñan thos daṅ ||
slob daṅ mi slob dge ba zag bcas zag med pa ||
bsdus nas byaṅ chub sems dpa’ rjes su yi raṅ źiṅ ||
’gro ba’i don rgyu byaṅ chub phyir ni thams cad bsṅo ||
yoṅs bsṅo gal te sems su ’du śes ’byuṅ (6a1) ’gyur źiṅ ||
byaṅ chub ’du śes yoṅs bsṅo sems can ’du śes na ||
’du śes phyir na lta gnas sems ni gsum la chags ||
dmigs pa yod pas yoṅs su bsṅo bar chud ma yin ||
gal te ’di ltar chos ’di ’gags śiṅ zad pa (2) daṅ ||
gaṅ du yoṅs su bsṅo ba de yaṅ zad pa daṅ ||
chos kyis chos la nam yaṅ mi bsṅo śes gyur na ||
de ltar rab tu śes pas yoṅs su bsṅos pa yin ||
gal te mtshan mar byed na de ni bsṅo ma yin ||
ji ste mtshan ma med na byaṅ chub bsṅo ba yin ||
ji ltar (3) dug daṅ ’dres pa’i kha zas bzaṅ za ba ||
dkar po’i chos la dmigs pa’aṅ de ’drar rgyal bas gsuṅs ||
de ltas ’di ltar yoṅs su bsṅo ba bslab bya ste ||
ji ltar rgyal ba de dag dge ba de mkhyen pa’i ||
rnam pa gaṅ yin ’byuṅ gaṅ mtshan ñid gaṅ yin la ||
rjes su yi raṅ (4) de lta de ltar yoṅs su bsṅo ||
de ltar bsod nams byaṅ chub yoṅs su bsṅo byed na ||
dug med saṅs rgyas mi spoṅ rgyal bas gsuṅs pa smra ||
de ltar yoṅs bsṅo dpa’ bo ’jig rten dmigs can gyi ||
byaṅ chub sems dpa’ ji sñed thams cad zil gyis gnon ||
(5) dmus loṅ dmigs bu med pa byi ba khrag khrig rnams ||
lam yaṅ mi śes groṅ khyer ’jug par ga la ’gyur ||
śes rab med na mig med pha rol phyin lṅa ’di ||
dmigs bu med pas byaṅ chub reg par nus ma yin ||
gaṅ tshe śes rab kyis ni rab tu zin gyur na ||
de tshe (6) mig rñed gyur ciṅ ’di yi miṅ thob bo ||
dper na ri mo’i las ni yoṅs zin mig med pa ||
ji srid mig ma bris pas rṅan pa mi thob bźin ||
gaṅ tshe ’dus byas ’dus ma byas daṅ dkar nag chos ||
śes rab rnam par bśig nas rdul tsam mi dmigs tshe ||
’jig (7) rten dag na śes rab pha rol phyin graṅs ’gro ||
nam mkha’ gaṅ la’aṅ cuṅ zad mi gnas de daṅ ’dra ||
gal te bdag ni rgyal ba’i śes rab spyad bya źiṅ ||
sems can sdug bsṅal reg pa khrag khrig maṅ dgrol sems ||
sems can ’du śes yoṅs rtog byaṅ chub (6b1) sems dpa’ ste ||
’di ni śes rab pha rol phyin mchog spyod ma yin ||
byaṅ chub sems dpa’ gaṅ źig sṅon chad spyod pa’i tshe ||
pha rol phyin ’dir spyod pa mkhas pa som ñi med ||
thos ma thag tu des ni ston pa’i ’du śes skyed ||
des ni byaṅ chub źi ba myur du rtogs (2) par ’gyur ||
sṅon spyad tshe na saṅs rgyas khrag khrig bkur byas kyaṅ ||
rgyal ba’i śes rab pha rol phyin la ma dad na ||
thos nas blo chuṅ de yis ’di ni spoṅ byed de ||
spaṅs nas skyabs med gyur pa de ni mnar med ’gro ||
de lta bas na gal te saṅs rgyas ye śes mchog ||(3)
reg par ’dod na rgyal ba’i yum ’dir dad par gyis ||
dper na tshoṅ pa rin chen gliṅ du soṅ nas ni ||
zoṅ zad slar log lta bur gyur na mi ruṅ ṅo ||
gzugs kyi dag pa ’bras bu dag par rig par bya ||
’bras bu gzugs dag thams cad mkhyen ñid dag par ’gyur ||
thams (4) cad mkhyen ñid ’bras bu dag daṅ gzugs dag pa ||
nam mkha’i khams daṅ mtshuṅs te dbyer med gcad du med ||
skabs gsum pa gźi thams cad śes pa bstan ||
dpa’ bo gar spyod śes rab pha rol phyin pa yis ||
khams gsum yaṅ dag ’das la rnam par grol ba’aṅ (5) min ||
ñon moṅs bsal bar gyur kyaṅ skye ba ston par byed ||
rga daṅ na daṅ ’chi ba med kyaṅ ’chi ’pho ston ||
’gro ba ’di dag miṅ daṅ gzugs kyi ’dam la chags ||
rluṅ gi ’khor lo lta bu’i ’khor ba’i ’khor lor ’khyam ||
’gro ba ’khrul pa ri dgas rgyar chud ’drar śes (6) nas ||
śes rab ldan pa mkha’ la bya bźin rnam par rgyu ||
spyod pa yoṅs dag gaṅ źig gzugs la mi spyod ciṅ ||
rnam śes ’du śes tshor ba sems par mi spyod na ||
de ltar spyod pa chags pa thams cad yoṅs spoṅ źiṅ ||
chags las rnam grol bde gśegs rnams (7) kyi śes rab spyod ||
de ltar spyod pa’i byaṅ chub sems dpa’ mkhas gsal ba ||
chags pa bcad nas ’gro la chags pa med par ’gro ||
ñi ma sgra gcan gza’ bral lhaṅ ṅer ’dug pa daṅ ||
me btaṅ rtswa daṅ śiṅ daṅ nags tshal sreg pa bźin ||
chos rnams thams cad (7a1) raṅ bźin dag ciṅ yoṅs dag par ||
byaṅ chub sems dpa’ śes rab pha rol phyin lta na ||
byed pa po yaṅ mi dmigs chos kun mi dmigs te ||
’di ni śes rab pha rol phyin mchog spyod pa yin ||
skabs bźi pa rnam pa kun mṅon par rdzogs par rtogs pa (2) bstan ||
rgyal ba la ni lha rgyal brgya byin gyis źus pa ||
byaṅ chub sems dpa’ śes rab spyod pa ji ltar brtson ||
phuṅ po khams la rdul tsam brtson par mi byed ciṅ ||
phuṅ por mi brtson de ni byaṅ chub sems dpa’ brtson ||
gaṅ źig chos ’di sprul daṅ sgyu ma ’dar thos (3) nas ||
som ñi med ciṅ slob la phyir źiṅ sbyor byed pa ||
sems can de ni riṅ nas theg chen źugs rig bya ||
saṅs rgyas bye ba khrag khrig maṅ la lhag byas yin ||
dgon pa’i lam ni dpag tshad maṅ por źugs pa’i mis ||
gnag rdzi mtshams kyi nags tshal phun sum tshogs (4) mthoṅ nas ||
’di dag groṅ daṅ groṅ khyer ñe ba’i rtags sñam ste ||
dbugs phyin rñed par ’gyur źiṅ chom rkun ’jigs pa med ||
de bźin byaṅ chub yoṅs su tshol tshe rgyal rnams kyi ||
śes rab pha rol phyin ’di mñan pa gaṅ thob pa ||
de ni dbugs phyin thob par gyur ciṅ (5) ’jigs med de ||
dgra bcom sa la ma yin rkyen rtogs sa la min ||
mi źig rgya mtsho’i chu ni blta phyir ’gro ba yis ||
gal te śiṅ daṅ nags tshal ri mthoṅ da duṅ riṅ ||
ci ste rtags ma mthoṅ na rgya mtsho chen po ni ||
ñe bar gyur to sñam ste de la som ñi med ||
de ltar (6) byaṅ chub dam par rab źugs rgyal ba yi ||
śes rab pha rol phyin pa ’di mñan rig par bya ||
rnam par ’dren pas mṅon sum luṅ bstan ma gyur kyaṅ ||
saṅs rgyas byaṅ chub riṅ por mi thogs bdag reg ’gyur ||
dpyid dus bzaṅ la sdoṅ po lo ma lhags gyur na ||
yal (7) gas riṅ por mi thogs lo ’bras me tog skrun ||
śes rab pha rol phyin ’di su yi lag thob pa ||
riṅ por mi thogs ’dren pa rnams kyi byaṅ chub thob ||
dper na bud med sbrum gaṅ sdug bsṅal ñen gyur na ||
de ni de yi btsa’ ba’i dus la bab ces bya ||
de bźin byaṅ chub (7b1) sems dpa’ rgyal ba’i śes rab ñan ||
dga’ daṅ ’dun pa skyed pa myur du byaṅ chub reg ||
śes rab pha rol phyin mchog spyod tshe rnal ’byor pa ||
gzugs kyi ’phel ba daṅ ni yoṅs su ’grib mi mthoṅ ||
gaṅ źig chos daṅ chos min chos dbyiṅs mi mthoṅ źiṅ ||
mya ṅan (2) ’das la mi reg de ni śes rab gnas ||
gaṅ źig ’dir spyod saṅs rgyas chos rnams mi rtog ste ||
stobs daṅ rdzu ’phrul rkaṅ pa byaṅ chub źi mi rtog ||
rnam par mi rtog rtog bral byin gyi rlabs kyis spyod ||
’di ni śes rab pha rol phyin mchog spyod pa yin ||
smra ba’i zla ba (3) saṅs rgyas la ni rab ’byor źus ||
yon tan dga’ ba rnams kyi bar du gcod gaṅ lags ||
ston pas bka’ stsal bar du gcod par ’gyur maṅ ste ||
de las re źig cuṅ zad tsam źig yoṅs su brjod ||
rgyal ba’i śes rab pha rol phyin ’di yig ’dri tshe ||
spobs pa tha (4) dad rnam pa du ma ’byuṅ ’gyur źiṅ ||
’gro ba’i don ma byas par glog bźin myur du yaṅ ||
yoṅs su ñams par ’gyur ba ’di ni bdud kyi las ||
’di bśad tshe na kha cig som ñi za ’gyur te ||
’dren pas ’dir ni bdag gi miṅ yaṅ yoṅs ma brjod ||
rigs daṅ sa daṅ (5) rus kyaṅ yoṅs su ma brjod ces ||
’di ni ñam par mi ’gyur spoṅ ’gyur bdud kyi las ||
de ltar mi śes de dag rtsa ba bor nas ni ||
rmoṅs pas yal ga dag daṅ ’dab ma tshol bar ’gyur ||
glaṅ po rñed nas glaṅ po’i rjes ni tshol ba ltar ||
śes rab pha rol phyin thos (6) mdo tshol de bźin no ||
dper na la las ro brgya ldan pa’i zas rñed la ||
zas mchog rñed nas zas ṅan tshol bar byed pa ltar ||
byaṅ chub sems dpa’ pha rol phyin pa ’di rñed nas ||
dgra bcom sa yis byaṅ chub tshol byed de bźin no ||
bsti staṅ ’dod par ’gyur (7) źiṅ rñed pa ’dod ’gyur daṅ ||
lta daṅ bcas pa’i sems kyis khyim ’dris byed ldan źiṅ ||
chos btaṅ nas ni chos min bya ba spyod ’gyur ba ||
lam bor lam gol ’gro ba ’di ni bdud kyi las ||
gaṅ dag de yi tshe na ’dun ciṅ dad gyur nas ||
chos kyi dam pa ’di ni (8a1) ñan du soṅ ba las ||
de dag gis ni chos sgra bya ba ldan rig nas ||
dga’ ba med ciṅ yid mi bde bar gyur nas ’gro ||
de yi tshe na bdud kyi las ’di ’byuṅ bar ’gyur ||
de tshe gaṅ dag gis ni dge sloṅ maṅ dkrugs nas ||
śes rab pha rol phyin ’di ’dzin (2) par mi ’gyur ba’i ||
bar du gcod pa rnam maṅ gźan yaṅ ’byuṅ bar ’gyur ||
rin chen rin thaṅ med pa rñed ’gyur gaṅ dag yin ||
de dag dkon la dus rnams rtag tu ’tshe ba’aṅ maṅ ||
de bźin rgyal ba’i śes rab pha rol phyin pa mchog ||
rin chen chos kyaṅ dkon la rtag tu (3) ’tshe ba’aṅ maṅ ||
theg pa gsar du źugs pa’i sems can blo chuṅ ba ||
gaṅ źig dkon pa’i rin chen ’di ni ma rñed pa ||
de la bar chad bya phyir bdud ni spro bar ’gyur ||
phyogs bcu’i saṅs rgyas de dag yoṅs su ’dzin la sbyor ||
ma źig na bar gyur la bu ni maṅ yod pa ||
de (4) kun yid mi bde źiṅ de la rim gro byed ||
de bźin phyogs bcu’i ’jig rten khams kyi saṅs rgyas kyaṅ ||
yum gyur śes rab dam pa ’di la dgoṅs pa mdzad ||
gaṅ dag ’das daṅ phyogs bcu’i ’jig rten mgon gaṅ daṅ ||
ma ’oṅs dus na ’byuṅ ’gyur de dag ’di las (5) ’byuṅ ||
’jig rten ston pa rgyal ba rnams kyi skyed byed yum ||
sems can gźan gyi sems kyi spyod pa ston par byed ||
’jig rten de bźin ñid daṅ dgra bcom de bźin ñid ||
raṅ rgyal de bźin ñid daṅ rgyal sras de bźin ñid ||
gcig pa ñid de dṅos bral gźan min de (6) bźin ñid ||
śes rab pha rol phyin pa de bźin gśegs pas mkhyen ||
mkhas pa ’jig rten gnas sam mya ṅan ’das kyaṅ ruṅ ||
chos ñid skyon med chos rnams stoṅ pa ’di gnas te ||
byaṅ chub sems dpa’ de bźin ñid ’di rjes su rtogs ||
de phyir de bźin (7) gśegs źes saṅs rgyas mtshan gsol to ||
śes rab pha rol phyin pa dga’ tshal la rten pa ||
stobs bcu rnam ’dren rnams kyi spyod yul ’di yin te ||
sems can sdug bsṅal ṅan soṅ gsum las yoṅs ’don kyaṅ ||
de dag nam yaṅ sems can ’du śes (8b1) ’gyur ba med ||
dper na seṅ ge ri sul brten nas ’jigs med par ||
ri dgas phra mo maṅ skrag byed ciṅ sgra sgrogs ltar ||
mi yi seṅ ge śes rab pha rol phyin brten nas ||
mu stegs can maṅ skrag byed ’jig rten sgra yaṅ sgrogs ||
dper na nam mkhar gnas pa’i (2) ñi ma’i ’od zer ni ||
sa ’di skems par byed ciṅ gzugs kyaṅ rab tu ston ||
de bźin chos rgyal śes rab pha rol phyin rten pa ||
sred pa’i chu kluṅ skems śiṅ chos kyaṅ rab tu ston ||
gzugs rnams mi mthoṅ tshor ba dag kyaṅ mi mthoṅ źiṅ ||
’du śes mthoṅ ba med (3) la sems pa mi mthoṅ źiṅ ||
gaṅ la rnam par śes daṅ sems yid mthoṅ med pa ||
’di ni chos mthoṅ yin źes de bźin gśegs pas bstan ||
nam mkha’ mthoṅ źes sems can tshig tu rab brjod pa ||
nam mkha’ ji ltar mthoṅ ste don ’di brtag par gyis ||
(4) de ltar chos mthoṅ ba yaṅ de bźin gśegs pas bstan ||
mthoṅ ba dpe gźan gyis ni bsñad par nus ma yin ||
gaṅ gis de ltar mthoṅ ba de yis chos kun mthoṅ ||
rgyal po btaṅ sñoms ’dug ciṅ blon po kun byed ltar ||
saṅs rgyas mdzad daṅ ñan thos chos rnams ji (5) sñed pa ||
de dag thams cad śes rab pha rol phyin pa byed ||
rgyal po groṅ du mi ’gro yul ’khor mi ’gro la ||
raṅ gi yul nas ’du ba thams cad sdud pa ltar ||
byaṅ chub sems dpa’i chos ñid gaṅ du’aṅ mi ’gro la ||
saṅs rgyas sa yi yon tan gaṅ yin thams cad (6) sdud ||
gaṅ la bde gśegs byaṅ chub sems dpa’ dad brtan yod ||
śes rab pha rol phyin pa mchog la bsam sbyor ba ||
ñan thos raṅ rgyal sa gñis śin tu ’das byas nas ||
zil gyis mi non rgyal pa’i byaṅ chub myur du thob ||
dper na rgya mtshor ’jug pa’i gru ni (7) chag gyur la ||
mi gaṅ ro ’am rtswa ’am śiṅ ni mi ’dzin pa ||
chu dbus ’jig par ’gyur te ṅogs su phyin mi ’gyur ||
gaṅ źig ’dzin pa rgya mtsho’i pha rol phyin par ’gyur ||
de ltar dad ldan daṅ ba thob pa gaṅ źig ni ||
śes rab pha rol phyin yum rjes su mi ’jug yin ||
(9a1) de dag thabs kyi yon tan śes rab yoṅs zin na ||
mchog tu rmad byuṅ bde gśegs byaṅ chub myur du reg ||
dper na la las rdza so ma btaṅ chu skyed na ||
ñam chuṅ phyir na myur du ’jig par rig par bya ||
sa btaṅ bum par chu skyed lam du ’jig pa ya ||
(2) ’jig pa med ciṅ bde bar khyim du phyin par ’gyur ||
de bźin byaṅ chub sems dpa’ dad pa maṅ gyur kyaṅ ||
śes rab rnam par ñams na myur du ma ruṅ ’gyur ||
dad pas śes rab kyis ni yoṅs su zin gyur na ||
sa gñis śin tu ’das te byaṅ chub mchog thob ’gyur ||
(3) dper na bcos legs ma byas gru ni rgya mtsho’i naṅ ||
nor daṅ bcas śiṅ tshoṅ par bcas te ’jig par ’gyur ||
gru de legs par bcos legs byas daṅ ldan gyur na ||
mi ’jig nor daṅ bcas par ṅogs su phyin par ’gyur ||
de ltar byaṅ chub sems dpa’ dad pas (4) yoṅs bsgos kyaṅ ||
śes rab med na byaṅ chub las ni myur ñams ’gyur ||
de ñid śes rab pha rol phyin pa mchog ldan na ||
ma smas mñams rgyal ba’i byag chub reg par ’gyur ||
lo brgya ñi śu lon te rgas śiṅ sdug bsṅal mi ||
laṅs kyaṅ bdag ñid ’gro bar (5) nus pa ma yin te ||
de ni g-yas g-yon gñis nas mi yis rten byas na ||
’gyel ba’i ’jigs pa med ciṅ bde blag ’gro bar ’gyur ||
de bźin byaṅ chub sems dpa’ śes rab stobs chuṅ ba ||
rab tu źugs par gyur kyaṅ rab tu ñams par ’gyur ||
de ñid thabs daṅ (6) śes rab mchog gis yoṅs zin na ||
mi ñams de bźin gśegs kyi byaṅ chub reg par ’gyur ||
byaṅ chub sems dpa’ daṅ po’i las kyi sar gnas gaṅ ||
lhag pa’i bsam pas saṅs rgyas byaṅ chub mchog źugs pa ||
slob ma bzaṅ po bla ma gus ldan de dag gis ||
(7) bla ma mkhas pa rnams la rtag tu bsten par bya ||
ci phyir źe na mkhas pa’i yon tan de las ’byuṅ ||
de dag śes rab pha rol phyin pa rjes su ston ||
saṅs rgyas chos rnams dge ba’i bśes la rten to źes ||
yon tan kun gyi mchog mṅa’ rgyal ba de skad gsuṅ ||
(9b1) sbyin daṅ tshul khrims bzod daṅ de bźin brtson ’grus daṅ ||
bsam gtan śes rab byaṅ chub yoṅs su bsṅo bar gyis ||
byaṅ chub phuṅ por źen nas mchog ’dzin ma byed ces ||
daṅ po’i las can de la de skad bstan par bya ||
de ltar spyod pa legs mtsho smra ba’i zla ba rnams ||
(2) ’gro ba’i skyabs daṅ dpuṅ gñen daṅ ni gnas yin te ||
rten daṅ blo daṅ gliṅ daṅ yoṅs ’dren don ’dod pa ||
gsal byed sgron ma chos mchog smra ba mi ’khrugs yin ||
grags chen ldan rnams bya dka’ go cha gyon byed de ||
phuṅ po khams daṅ skye mched rnams kyi go cha min ||
(3) theg gsum ’du śes bral źiṅ yoṅs su bzuṅ ba med ||
mi ldog g-yo ba med ciṅ mi ’khrugs chos can yin ||
de dag ’di ’dra’i chos daṅ ldan źiṅ spros pa med ||
the tshom som ñi yid gñis bral źiṅ don daṅ ldan ||
śes rab pha rol phyin pa thos nas mi nur ba ||
gźan (4) gyi driṅ mi ’jog ciṅ mi ldog rig par bya ||
’dren pa rnams kyi chos ’di zab ste mthoṅ bar dka’ ||
sus kyaṅ rtogs pa med ciṅ thob par ’gyur med pa ||
de phyir phan mdzad brtser ldan byaṅ chub brñes nas ni ||
sems can tshogs sus śes sñam thugs khral chuṅ bar mdzad ||
(5) sems can rnams ni gnas la dga’ źiṅ yul rnams ’dod ||
’dzin la gnas śiṅ mi mkhas blun rmoṅs mun pa bźin ||
thob par bya ba’i chos ni gnas med ’dzin med de ||
des na ’jig rten dag daṅ rtsad pa ’byuṅ ba yin ||
nam mkha’i khams ni śar gyi phyogs daṅ (6) lho phyogs daṅ ||
de bźin nub kyi phyogs daṅ byaṅ phyogs pha mtha’ yas ||
steṅ daṅ ’og daṅ phyogs bcu’i ji sñed rnams na’aṅ yod ||
tha dad gyur pa med ciṅ bye brag gyur pa med ||
’das pa’i de bźin ñid gaṅ ma byon de bźin ñid ||
da ltar de bźin ñid gaṅ dgra bcom (7) de bźin ñid ||
chos kun de bźin ñid gaṅ rgyal ba’i de bźin ñid ||
chos kyi de bźin ñid ’di thams cad bye brag med ||
bde gśegs byaṅ chub tha dad chos daṅ pral gyur pa ||
’di ni byaṅ chub sems dpa’ gaṅ źig thob ’dod pa ||
thabs daṅ ldan pas śes rab pha (10a1) ’dren pa’i śes rab med na thob par ’gyur ma yin ||
bya źig lus che dpag tshad brgya rtsa lṅa bcu par ||
gyur la ’dab gśog zad de ñam rtsal yod min na ||
de yis sum cu rtsa gsum gnas nas ’dzam gliṅ ’dir ||
bdag ñid (2) mchoṅs na der ni ñam ñes gyur pa yin ||
rgyal ba rnams kyi pha rol phyin pa lṅa ’di yaṅ ||
bskal pa bye ba khrag khrig maṅ por bsgrub byas śiṅ ||
smon lam mtha’ yas rgya chen ’jig rten rtag bsten kyaṅ ||
thabs med śes rab bral ba ñan thos ñid du ltuṅ ||
(3) saṅs rgyas theg pa ’di la ṅes par ’byuṅ ’dod gaṅ ||
’gro ba kun la sems sñoms pha ma’i ’du śes daṅ ||
phan pa’i sems daṅ byams pa’i yid kyis brtul bya źiṅ ||
tha ba med ciṅ draṅ la tshig ’jam smra bar bya ||
’jig rten mgon la gnas brtan rab ’byor (4) yoṅs źus pa ||
yon tan rgya mtsho ñon moṅs ma mchis rtags bstan gsol ||
mthu che ba dag ji ltar slar ldog mi ’gyur ba ||
de ltar yon tan phyogs tsam rgyal bas luṅ bstan gsol ||
tha dad ’du śes bral źiṅ rigs pa ldan tshig smra ||
dge sbyoṅ dag (5) daṅ bram ze gźan la rten mi byed ||
mkhas pa dus rnams rtag tu ṅan soṅ gsum po spaṅs ||
de dag dge bcu’i las kyi lam la mṅon par brtson ||
zaṅ ziṅ med par ’gro la chos ni rjes su ston ||
chos la gcig tu dga’ źiṅ rtag tu tshig ’jam ldan ||
’gro ’chag (6) ñal daṅ ’dug par śes bźin rab tu ldan ||
gña’ śiṅ gaṅ tsam lta źiṅ ’gro la sems ’khrul med ||
gtsaṅ byas gtsaṅ ma’i gos ’chaṅ gsum po dben źiṅ dag ||
rñed ’dod ma yin khyu mchog rtag tu chos ’dod pa ||
bdud kyi yul las ’das śiṅ gźan (7) gyi driṅ mi ’jog ||
bsam gtan bźi la bsam gtan bsam gtan der mi gnas ||
grags pa ’dod pa ma yin khro bas sems dkris med ||
khyim par gyur kyaṅ rtag tu dṅos po kun ma chags ||
’tsho pa’i phyir ni ya ṅas loṅs spyod tshol ma byed ||
drag śul (10b1) spyod sṅags mi byed bud med sbyor sṅags min ||
’dod pa’i las can pho mor ’gyur źes ston mi byed ||
rab tu dben pa’i śes rab pha rol phyin mchog brtson ||
’thab daṅ rtsod daṅ bral źiṅ byams pa’i sems kyaṅ brtan ||
kun mkhyen ’dod ciṅ brtan la rtag tu (2) gźol sems ldan ||
mtha’ ’khob kla klo’i skye bo’i yul mtha’ rnam par spaṅs ||
raṅ gis la dogs med rtag tu ri rab ’dra ||
chos phyir srog kyaṅ ’dor źiṅ rnal ’byor rab tu brtson ||
mi ldog rtags ni ’di dag yin par śes par bya ||
gzugs daṅ (3) tshor daṅ ’du śes sems pa rnam śes rnams ||
zab ste raṅ bźin mtshan ma med ciṅ rab źi ba ||
dper na mda’ yis rgya mtsho’i gtiṅ thug tshol ba ltar ||
śes rab kyis ni brtags na phuṅ po’i gtiṅ mi rñed ||
byaṅ chub sems dpa’ gaṅ źig de ltar zab (4) gyur ciṅ ||
theg pa don dam chags med gaṅ la phuṅ po daṅ ||
khams daṅ skye mched yod min chos ’di rtogs pa de’i ||
bsod nams yaṅ dag grub pa de las ci źig yod ||
dper na ’dod chags chos la spyod pa’i skyes bu źig ||
bud med dus btab de (5) daṅ ma phrad de yi ni ||
ñin gcig sems kyi rnam rtog spyod pa ji sñed pa ||
de sñed bskal par byaṅ chub sems dpas thob par ’gyur ||
byaṅ chub sems dpa’ gaṅ źig bskral maṅ bye stoṅ du ||
dgra bcom raṅ rgyal sbyin byed tshul khrims sruṅ byed kyaṅ ||
gaṅ (6) źig śes rab pha rol phyin mchog ldan pa’i chos ||
brjod pa’i legs pa sbyin daṅ tshul khrims char mi phod ||
byaṅ chub sems dpa’ gaṅ źig śes rab mchog bsgoms te ||
de las laṅs nas gos pa med pa’i chos brjod ciṅ ||
de yaṅ ’gro ba’i don phyir (7) byaṅ chub rgyur bsṅo na ||
dge ba de daṅ mñam pa ’jig rten gsum na med ||
bsod nams de yaṅ gsog daṅ de bźin stoṅ pa daṅ ||
gsob daṅ ya ma brla daṅ sñiṅ po med par śes ||
de ltar bde gśegs rnams kyi śes rab spyad spyod na ||
spyod tshe bsod (11a1) nams dpag tu med pa yoṅs su ’dzin ||
saṅs rgyas kyis bśad rab tu spyod ciṅ rab bstan pa’i ||
chos ’di thams cad brjod pa tsam du zad śes nas ||
bskal pa bye ba khrag khrig maṅ bor brjod byas kyaṅ ||
chos kyi dbyiṅs la zad pa med ciṅ (2) ’phel ba med ||
rgyal ba rnams kyi pha rol phyin ces bya ba gaṅ ||
chos de rnams kyaṅ miṅ tsam du ni yoṅs su bsgrags ||
yoṅs bsṅo rlom sems med pa’i byaṅ chub sems dpa’ ni ||
ñams pa med ciṅ saṅs rgyas byaṅ chub mchog reg ’gyur ||
’bru mar sñiṅ (3) po ’bar ba phrad pa daṅ po yis ||
sñiṅ po tshig min de med par yaṅ de mi tshig ||
me lce phrad pa thams sñiṅ po tshig min la ||
me lce tha ma med par sñiṅ po tshig min ltar ||
daṅ bo’i sems kyis byaṅ chub mchog reg ma yin la ||
de med par yaṅ de la reg par nus ma (4) yin ||
tha ma’i sems kyis byaṅ chub źi ba thob min la ||
de med par yaṅ de thob nus pa ma yin no ||
sa bon las ni myu gu me tog ’bras bu ’byuṅ ||
de yaṅ ’gags la śiṅ yaṅ med pa der min ltar ||
de bźin daṅ bo’i sems kyaṅ byaṅ chub rgyu yin te ||
de yaṅ (5) ’gags la byaṅ chub med pa de ma yin ||
chu yi thigs pas bum pa daṅ po tha ma’i bar ||
rim gyis ñuṅ ṅu ñuṅ ṅus de yoṅs ’geṅs pa ltar ||
de bźin daṅ po’i sems kyaṅ byaṅ chub mchog rgyu ste ||
rim gyis dkar po’i yon tan rdzogs pa’i saṅs rgyas (6) ’gyur ||
stoṅ pa mtshan med smon pa med pa’i chos spyod ciṅ ||
mya ṅan ’das la mi reg mtshan mar mi spyod pa ||
dper na mñan pa mkhas pa phar ’gro tshur ’gro yaṅ ||
mtha’ gñis mi gnas rgya mtshor gnas pa med pa bźin ||
de ltar spyod pa’i byaṅ chub sems (7) dpa’ ’di sñam bdag ||
stobs bcus luṅ bstan byaṅ chub reg ’gyur rlom sems med ||
’di la ci yaṅ med ces byaṅ chub skrag pa med ||
de ltar spyod pa bde gśegs śes rab spyod pa yin ||
’jig rten dgon pa’i lam daṅ mu ge nad bcas par ||
mthoṅ (11b1) nas skrag pa med ciṅ de nas go gyon te ||
phyi ma’i mu mthar rtag tu brtson źiṅ rab śes nas ||
yoṅs su skyo ba’i yid ni rdul tsam skyed mi byed ||
byaṅ chub sems dpa’ rgyal ba’i śes rab spyod byed ciṅ ||
phuṅ po ’di dag gdod nas stoṅ źiṅ skye med śes ||
mñam (2) par ma bźag sems can khams la sñiṅ rje ’jug ||
bar skabs der yaṅ saṅs rgyas chos las yoṅs mi ñams ||
dper na skyes bu mkhas pa yon tan kun ldan źiṅ ||
stobs ldan mi thub brtson byas sgyu rtsal cho ga śes ||
’phoṅ daṅ bzo gnas maṅ po’i pha (3) rol phyin gyur ciṅ ||
sgyu ma sgrub śes ’gro don rab tu ’dod pa źig ||
pha daṅ ma daṅ chuṅ mar bcas par yoṅs bsdus nas ||
dgra byed maṅ ba dgon pa’i lam du phyin pa daṅ ||
de yis dpal źiṅ rtul phod skyes bu maṅ sprul te ||
bde bar soṅ źiṅ phyir yaṅ khyim du (4) ’oṅ ba ltar ||
de bźin de tshe byaṅ chub sems dpa’ mkhas pa yaṅ ||
sems can khams rnams kun du sñiṅ rje cher bskyed ciṅ ||
bdud bźi dag dṅas gñis las kyaṅ rab ’das nas ||
tiṅ ’dzin mchog la gnas śiṅ byaṅ chub reg mi byed ||
mkha’ la rluṅ (5) brten de la chu yi phuṅ po brten ||
de la sa chen ’di brten de la ’gro ba brten ||
sems can las la spyod pa’i rgyu ni de ’dra ste ||
nam mkha’ gdal gnas yin don ’di bsam par gyis ||
de bźin byaṅ chub sems dpa’ stoṅ pa ñid gnas pa ||
’gro la sems (6) can śes pa’i smon lam rten can gyis ||
bya ba rnam pa sna tshogs du ma ston byed ciṅ ||
mya ṅan ’das la mi reg stoṅ par gnas pa med ||
gaṅ gi tshe na byaṅ chub sems dpa’ mkhas gsal ba ||
stoṅ pa źi ba’i tiṅ ’dzin dam pa ’di spyod pa ||
bar skabs der ni (7) mtshan ma rab tu sgom mi byed ||
mtshan ma med par gnas śiṅ źi la rab źi spyod ||
bar snaṅ ’phur ba’i byal gnas yod ma yin te ||
de na gnas pa ma yin sal ltuṅ mi ’gyur ||
de ltar byaṅ chub sems dpa’ rnam thar sgor spyod pa ||
mya ṅan ’das la mi reg (12a1) mtshan mar spyod ma yin ||
dper na ’phoṅ bslabs skyes bus gnam du mda’ ’phaṅs te ||
mda’ gźan dag gis phyi bźin brgyud mar loṅ btags te ||
sṅa ma’i mda’ de sa la ltud pa’i skabs mi byed ||
mi de ’dod na mda’ de sa la (2) ltuṅ bar ’gyur ||
de ltar śes rab pha rol phyin pa mchog spyod pa ||
śes rab thabs stobs rdzu ’phrul gyis ni rnam spyod pa ||
de dag dge ba’i rtsa ba ji srid ma rdzogs pa ||
de srid stoṅ ñid dam pa de ni thob mi byed ||
dper na dag sloṅ rdzu ’phrul stobs mchog (3) ldan pa źig ||
nam mkhar gnas te cig char cho ’phrul rnam par ’phrul ||
’gro daṅ ’chag pa daṅ ni ñal daṅ ’dug pa ston ||
de ni skyo ba med ciṅ de la dub pa med ||
de bźin byaṅ chub sems dpa’ mkhas pa stoṅ gnas śiṅ ||
ye śes rdzu ’phrul pha rol son la (4) gnas pa med ||
’gro ba dag la bya ba rnam pa mtha’ yas ston ||
bskal pa bye bar skyo ba med ciṅ dub pa med ||
dper na mi ’ga’ g-yaṅ sa chen por ’dug byed ciṅ ||
lag pa gñi gas gdugs gñis ’dzin ciṅ nam mkha’ la ||
mchoṅ bar byed ciṅ (5) g-yaṅ sa chen por lus bor nas ||
ltuṅ bar mi ’gyur ji srid der ni ’gro bar ’gyur ||
de bźin byaṅ chub sems dpa’ mkhas pa sñiṅ rjer gnas ||
thabs daṅ śes rab gñis kyi gdugs ni yoṅs bzuṅ ste ||
chos rnams stoṅ pa mtshan med smon pa med rtog ciṅ ||
(6) mya ṅan ’das la reg pa med la chos kyaṅ mthoṅ ||
dper na rin chen ’dod pa rin chen gliṅ soṅ ste ||
rin chen rñed nas phyir yaṅ khyim du ’oṅs gyur pa ||
der ni ded dpon ’ba’ źig bde bar ’tsho byed ciṅ ||
gñen bśes tshogs yid mi bder ’jog pa min pa (7) ltar ||
de bźin byaṅ chub sems dpa’ stoṅ ñid rin chen gyi ||
gliṅ du soṅ ste bsam gtan dbaṅ bo stobs thob pa ||
mya ṅan ’das la reg pa ’ba’ źig mṅon dga’ źiṅ ||
sems can sdug bsṅal yid du ’jog par ’gyur ma yin ||
dper na don (12b1) gñer tshoṅ pa rgyus śes bya ba’i phyir ||
bar gyi groṅ khyer groṅ rdal groṅ gaṅ yin par ’gro ||
der yaṅ mi gnas rin chen gliṅ du’aṅ mi gnas la ||
rig pa khyim du mi gnas lam la mkhas par ’gyur ||
de bźin byaṅ chub sems dpa’ gsal te ñan thos daṅ ||
raṅ (2) rgyal rnams kyi śes pa rnam grol kun la mkhas ||
de la mi gnas saṅs rgyas ye śes gnas ma yin ||
’dus ma byas la mi gnas lam gyi tshul śes yin ||
gaṅ tshe ’gro la byams pas rjes su ’brel byas nas ||
tiṅ ’dzin stoṅ pa mtshan med smon pa med spyod (3) pa ||
de ni mya ṅan ’das pa thob par ’gyur źe’am ||
’dus byas yin par gdags nus de ni gnas med do ||
dper na sprul pa’i mi lus mi snaṅ ma yin źiṅ ||
de ni miṅ gis kyaṅ ni gdags par nus pa ltar ||
de bźin byaṅ chub sems dpa’ rnam thar sgor spyod (4) pa ||
|de ni miṅ gis kyaṅ ni gdags par nus pa yin ||
gal te spyod pa daṅ ni dbaṅ po yoṅs dris la ||
byaṅ chub sems dpa’ stoṅ pa mtshan ma med pa’i chos ||
yoṅs su mi ston phyir mi ldog pa’i sa yi chos ||
mi ’chad de ni luṅ ma bstan par rig par bya ||
(5) skabs lṅa pa rtse mo mṅon par rdzogs par rtogs pa bstan ||
dgra bcom sa daṅ rkyen gyi saṅs rgyas ye śes daṅ ||
khams gsum dag la rmi lam na yaṅ mi ’dod ciṅ ||
saṅs rgyas rnams mthoṅ ’gro la chos kyaṅ ston byed pa ||
de ni mi ldog luṅ bstan yin par (6) rig par bya ||
rmi lam na ni sems can ṅan soṅ gsum gnas mthoṅ ||
skad cig de la ṅan soṅ rgyun gcad smon lam ’debs ||
bden pa’i byin gyis brlabs kyis me yi phuṅ po źi ||
de ni mi ldog luṅ bstan yin par rig par bya ||
mi yi ’jig rten ’byuṅ (7) po’i gdon daṅ nad maṅ ba ||
phan daṅ sñiṅ brtser ldan pa’i bden pa’i byin gyis źi ||
’on kyaṅ rlom sems med ciṅ ṅa rgyal skye med bya ||
de ni mi ldog luṅ bstan yin par rig par bya ||
ci ste de ni bden pa’i byin rlabs sna tshogs dag ||
’byor pas bdag luṅ (13a1) bstan sñam rlom sems ’byuṅ ba’am ||
gal te byaṅ chub sems dpa’ gźan gyis luṅ bstan rlom ||
rlom sems gnas pa de ni blo chuṅ śes par bya ||
miṅ gi gźi las bdud ni ñe bar ’oṅs gyur nas ||
’di skad smras te ’di ni khyod daṅ pha ma (2) daṅ ||
khyod kyi bdun mes rgyud kyi bar gyi mir yin źiṅ ||
gaṅ tshe khyod ni saṅs rgyas ’gyur ba’i miṅ ’di yin ||
sbyaṅs sdom rnal ’byor ldan pa ci ’dra ’byuṅ ’gyur la ||
khyod sṅon yon tan tshul yaṅ ’di ’dra’o źes brjod do ||
de skad gaṅ thos rlom sems byaṅ chub (3) sems dpa’ ni ||
bdud kyis yoṅs su bslaṅ źiṅ blo chuṅ rig par bya ||
rab tu dben pa’i groṅ daṅ groṅ khyer ri sul daṅ ||
dgon pa dben pa nags khrod rab tu sten byed ciṅ ||
bdag stod gźan la smod pa’i byaṅ chub sems dpa’ ni ||
bdud kyis yoṅs su (4) bslaṅ źiṅ blo chuṅ rig par bya ||
rtag tu groṅ daṅ yul ’khor groṅ rdal gnas byed ciṅ ||
sems can smin byed byaṅ chub brtson pa ma gtogs par ||
de ni dgra bcom raṅ rgyal ’dod pa gźan mi skye ||
’di ni bde bar gśegs kyi sras kyis dben par gsuṅs ||
gaṅ (5) źig dpag tshad lṅa brgya yod pa’i ri yi sul ||
sbrul gyis gaṅ bar lo maṅ bye bar gnas byed kyaṅ ||
dben pa ’di mi śes pa’i byaṅ chub sems dpa’ de ||
lhag pa’i ṅa rgyal rñed nas ’dre bar gnas pa yin ||
byaṅ chub sems dpa’ ’gro ba’i don brtson (6) bsam gtan daṅ ||
stobs daṅ dbaṅ po rnam thar tiṅ ’dzin thob de la ||
’di ni dgon dben spyod pa min sñam brñas byed pa ||
de ni bdud kyi spyod yul gnas źes rgyal bas gsuṅs ||
gaṅ źig groṅ ṅam ’on te dgon par gnas kyaṅ ruṅ ||
theg pa gñis kyi (7) sems bral byaṅ chub mchog ṅes na ||
’di ni ’gro don źugs pa rnams kyi dben pa ste ||
byaṅ chub sems dpa’ drod sñom de ni bdag ñid ñams ||
de lta bas na byaṅ chub dam pa tshol ba yis ||
bsam pa drag ldan mkhas pas ṅa rgyal ṅes bcom ste ||
(13b1) nad pa’i tshogs kyis gso phyir sman pa sten pa ltar ||
g-yel pa med par dge ba’i bśes gñen bsten par bya ||
saṅs rgyas byaṅ chub mchog źugs byaṅ chub sems dpa’ dag ||
pha rol phyin daṅ bcas te dge ba’i bśes su bsten ||
de dag rjes su ston byed ’di ni (2) bsgrub pa’i sa ||
rgyu rnam gñis kyis saṅs rgyas byaṅ chub myur du rtogs ||
rgyal ba ’das daṅ ma byon phyogs bcur gaṅ bźugs pa ||
kun lam pha rol phyin pa ’di yin gźan ma yin ||
pha rol phyin ’di byaṅ chub mchog la źugs rnams kyi ||
gsal daṅ sgron (3) daṅ snaṅ daṅ ston mchog yin źes bśad ||
ji ltar śes rab pha rol phyin pa mtshan ñid stoṅ ||
chos ’di thams cad mtshan ñid de daṅ ’drar śes śiṅ ||
chos rnams stoṅ źiṅ mtshan ma med par rab śes na ||
de ltar spyod pa bde gśegs śes rab spyod pa yin ||
sems (4) can yoṅs su ltogs pa zas la ’dod byed ciṅ ||
’khor bar chags pa’i yid daṅ ldan rnams rtag tu ’khor ||
bdag daṅ bdag gi chos gñis yaṅ dag min stoṅ ste ||
byis pa bdag ñid kyis ni mkha’ la mdud pa bor ||
dper na dogs pa’i ’du śes kyis ni (5) dug bslaṅ ba ||
dug de khoṅ du soṅ ba med kyaṅ brgyal bar ’gyur ||
de bźin byis pa bdag daṅ bdag gir khas len pa ||
bdag der ’du śes yaṅ dag mi rtag skye źiṅ ’chi ||
ji ltar ’dzin pa de ltar kun nas ñon moṅs bstan ||
bdag daṅ bdag gir mi (6) dmigs rnam par byaṅ bar gsuṅs ||
’di la gaṅ yaṅ ñon moṅs rnam dag ’gyur med par ||
byaṅ chub sems dpas śes rab pha rol phyin pa rtogs ||
’dzam bu’i gliṅ na sems can ji sñed ma lus pa ||
de dag thams cad byaṅ chub mchog (7) tu sems bskyed nas ||
lo stoṅ bye ba maṅ por sbyin pa byin byas la ||
kun kyaṅ ’gro ba’i don du byaṅ chub rgyur bsṅo yaṅ ||
gaṅ źig śes rab pha rol phyin mchog mṅon brtson pa ||
tha na ñi ma gcig cig rjes su ’thun byed na ||
de la sbyin pa’i (14a1) phuṅ pos bsod nams char mi phod ||
de phyir g-yel med rtag tu śes rab ’jug par bya ||
śes rab pha rol phyin mchog spyod pa’i rnal ’byor pa ||
sñiṅ rje chen po bskyed kyaṅ sems can ’du śes med ||
de tshe mkhas pa ’gro ba kun gyi sbyin gnas (2) ’gyur ||
rtag tu yul ’khor bsod sñoms don yod yoṅs su spyod ||
byaṅ chub sems dpa’ gaṅ ’dir yun riṅ ’brel pa yi ||
lha mi ṅan soṅ gsum gyi sems can dgrol ba’i phyir ||
lam yaṅs pha rol sems can khams la ston ’dod pas ||
ñin mtshan (3) śes rab pha rol phyin la brtson par bya ||
mi źig sṅon chad ma rñed pa yi rin chen mchog ||
dus gźan źig na rñed par gyur te dga’ ba las ||
rñed ma thag tu bag med gyur te stor na ni ||
stor bas rin chen mṅon ’dod rtag tu sdug bsṅal lo ||
de ltar byaṅ chub mchog (4) źugs rin chen lta bu yi ||
śes rab pha rol phyin la rnal ’byor dor mi bya ||
rin chen rñed nas blaṅs te rab tu brtson dkris nas ||
myur du ’gro bar byed pa źi bar ’gyur ba bźin ||
ñi ma sprin daṅ bral ba’i ’od zer dra pa can ||
mun nag thibs po mun pa thams cad (5) ’joms ’char ba ||
srin bu me khyer srog chags ’byuṅ po thams cad daṅ ||
skar ma’i tshogs daṅ zla ba’i ’od kun zil gyis gnon ||
de bźin byaṅ chub sems dpa’ śes rab pha rol phyin ||
mchog spyod stoṅ pa daṅ ni mtshan ma med spyod pa ||
mkhas pas (6) lta ba’i thibs po bcom nas ’gro kun daṅ ||
dgra bcom raṅ rgyal byaṅ chub sems maṅ zil gyis gnon ||
dper na rgyal po’i bu źig nor gtoṅ don ’dod pa ||
kun gyi gtso bor gyur te mṅon par ’gro bya ’os ||
’di ni de lta na yaṅ sems can maṅ dga’ (7) byed ||
|thabs thob gyur te rgyal srid gnas nas smos ci dgos ||
de ltar śes rab spyod mkhas byaṅ chub sems dpa’ yaṅ ||
bdud rtsi sbyin phar byed ciṅ lha daṅ mi rnams dga’ ||
’di ni de lta na yaṅ sems can maṅ phan brtson ||
chos kyi rgyal por gnas (14b1) par gyur nas smos ci dgos ||
de yi tshe na bdud ni zug rṅu ldan par ’gyur ||
mya ṅan ñam thag sdug bsṅal yid mi bde ñam chuṅ ||
ji ltar byag chub sems dpa’ ’di yid nur gyur źes ||
’jigs pa bstan phyir phyogs rnams sreg ciṅ skar mda’ gtoṅ ||
gaṅ (2) tshe mkhas pa de dag bsam pa drag ldan źiṅ ||
ñin mtshan śes rab pha rol phyin pa’i mchog don lta ||
de tshe lus sems ṅag ni mkha’ ’gro bya ltar rgyu ||
nag po’i rtsa lag rnams kyis glags rñed ga la ’gyur ||
gaṅ tshe byaṅ chub sems dpa’ ’thab daṅ rtsod gyur (3) ciṅ ||
phan tshun mi ’thun khros pa’i sems daṅ ldan gyur pa ||
de tshe bdud ni dga’ źiṅ mchog tu ñams bder ’gyur ||
de gñis rgyal ba’i ye śes las ni riṅ ’gyur sñam ||
de gñis riṅ du ’gyur źiṅ śa za ’dra bar ’gyur ||
gñi ga raṅ gi dam bcas ñams (4) bar byed par ’gyur ||
sdaṅ źiṅ bzod daṅ bral la byaṅ chub ga la yod ||
de tshe bdud rnams phyogs daṅ bcas te dga’ bar ’gyur ||
luṅ bstan ma thob byaṅ chub sems dpa’ gaṅ źig gis ||
luṅ bstan thob la sems khros rtsod pa rtsom byed na ||
thab skyon ldan (5) sems kyi skad cig ji sñed pa ||
de sñed bskal par gźi nas go cha bgo bgos so ||
saṅs rgyas bzod pa’i pha rol phyin pas byaṅ chub reg ||
sems ’di bzaṅ ba min sñam dran pa skyed byed ciṅ ||
so sor ’chags par byed ciṅ phyis kyaṅ sdom byed la ||
dga’ bar mi (6) byed de ni saṅs rgyas chos ’dir slob ||
gaṅ źig slob tshe bslab pa gaṅ yaṅ khas mi len ||
slob pa po daṅ bslab pa’i chos rnams mi dmigs śiṅ ||
bslabs daṅ bslab pa ma yin ’di gñis mi rtog pa ||
de ltar gaṅ slob de ni saṅs rgyas chos ’dir slob ||
byaṅ (7) chub sems dpa’ gaṅ źig de lta’i bslab ’di śes ||
de ni gźar yaṅ bslab ñams tshul khrims ’chal mi ’gyur ||
de ni saṅs rgyas cos mñes bya phyir ’di la slob ||
de ni bslab lhag bslab la mkhas te dmigs pa med ||
mkhas pa ’od byed rnams kyi (15a1) śes rab de ltar slob ||
dge ba ma yin sems gcig tsam yaṅ skyed mi byed ||
ñi ma mkhar la ’gro ba’i zer gyis zil gnon pa’i ||
mdun gyi bar snaṅ la ni mun pa mi gnas bźin ||
śes rab pha rol phyin la bslab par byas rnams kyi ||
pha rol (2) phyin pa thams cad ’dir ni ’dus par ’gyur ||
’jig tshogs lta bar lta ba drug cu gñis ’dus ltar ||
de bźin pha rol phyin pa ’di dag ’dus par gsuṅs ||
dper na srog gi dbaṅ po ’gags na dbaṅ po gźan ||
gaṅ dag ji sñed yod pa thams cad ’gag phar (3) ’gyur ||
de ltar śes rab spyod pa mkhas pa mchog rnams kyi ||
pha rol phyin pa thams cad ’dir ni ’dus par gsuṅs ||
byaṅ chub sems mkhas ñan thos yon tan gaṅ dag daṅ ||
de bźin raṅ rgyal yon tan kun la slob byed ciṅ ||
de dag de la mi gnas ’dod (4) pa mi skyed de ||
’di ni bdag gis bslab bya yin sñam de phyir sloṅ ||
mi ldog byaṅ chub mchog la rab tu źugs pa yi ||
sems bskyed pa la bsam pa thag pas yi raṅ ba ||
stoṅ gsum re rab sraṅ la gźal bas tshad gzuṅ ruṅ ||
rjes su yi raṅ dge ba de ni de (5) lta min ||
dge ba don gñer phan ’dod sems can ji sñed pa ||
kun gyi bsod nams phuṅ po la yaṅ yi raṅ gyur ||
de phyir de dag rgyal ba’i yon tan thob gyur nas ||
sdug bsṅal zad par bya phyir ’jig rten chos sbyin byed ||
byaṅ chub sems dpa’ gaṅ źig mi (6) rtog chos rnams kun ||
stoṅ daṅ mtshan ma med daṅ spros med yoṅs śes pa ||
de ni śes rab gñis kyis byaṅ chub tshol mi byed ||
rnal ’byor pa de śes rab pha rol phyin mchog brtson ||
nam mkha’i khams de daṅ ni nam mkha’ der ’gal ba ||
yod pa ma (7) yin gaṅ gis kyaṅ ni de ma thob ||
de bźin śes rab spyod mkhas byaṅ chub sems dpa’ yaṅ ||
nam mkha’ lta bu yin te ñe bar źi ba spyod ||
skye bo’i dbus na sgyu ma’i skyes bu ’di sñam du ||
skye bo ’di mgu bya sñam mi sems de yaṅ byed ||
rdzu ’phrul sna tshogs (15b1) rab tu ston par byed mthoṅ yaṅ ||
de la lus med sems med miṅ yaṅ yod ma yin ||
de bźin śes rab spyod pa nam yaṅ ’di sñam du ||
byaṅ chub rtogs nas ’gro ba yoṅs su dgrol mi sems ||
skye ba sna tshogs daṅ ni bya ba maṅ ldan pa ||
sgyu ma lta bur ston kyaṅ (2) rnam par mi rtog spyod ||
dper na saṅs rgyas sprul pa saṅs rgyas mdzad pa byed ||
byed pa de la dregs pa cuṅ zad skye mi ’gyur ||
de bźin śes rab spyod mkhas byaṅ chub sems dpa’ yaṅ ||
sprul pa sgyu ma bźin du bya ba thams cad ston ||
śiṅ mkhan bzo bo (3) mkhas pas skyes pa bud med daṅ ||
’dra ba’i bzo byas de yaṅ bya ba thams cad byed ||
de bźin śes rab spyod mkhas byaṅ chub sems dpa’ yaṅ ||
rnam par mi rtog ye śes bya ba thams cad byed ||
de ltar spyod mkhas rnams la lha tshogs maṅ po dag ||
thal mo sbyar ba (4) btud nas phyag kyaṅ ’tshal bar byed ||
phyogs bcu’i ’jig rten khams kyi saṅs rgyas ji sñed pa’aṅ ||
yon tan bsṅags pa’i phreṅ ba yoṅs su brjod par mdzad ||
gaṅ g’i kluṅ mñam źiṅ na sems can ji sñed pa ||
de kun yoṅs su brtag pa bzuṅ ste bdud gyur (5) la ||
ba spu ñag re las kyaṅ de sñed sprul byas kyaṅ ||
de dag kun gyis mkhas la bar chad bya mi nus ||
rgyu rnam bźi yis byaṅ chub sems dpa’ mkhas stobs ldan ||
bdud bźis thub par dka’ źiṅ bskyod par mi nus te ||
stoṅ par gnas daṅ sems (6) can yoṅs su mi gtoṅ daṅ ||
ji skad smras bźin byed daṅ bde gśegs byin brlabs can ||
de bźin gśegs yum śes rab pha rol phyin pa ’di ||
’chad tshe byaṅ chub sems dpa’ gaṅ źig mos byed ciṅ ||
bsam pa thag pas bsgrub par mṅon par brtson (7) byed na ||
des pa thams cad mkhyen pa ñid la źugs rig bya ||
chos dbyiṅs de bźin ñid la gnas par mi ’gyur źiṅ ||
dper na bar snaṅ sprin bźin gnas pa med par gnas ||
rig sṅags ’chaṅ ba gnas med mkha’ rgyu gnas ’dod pa ||
sṅags mthus (16a1) dus min me tog ldan źiṅ byin gyis rlob ||
de ltar spyod pa byaṅ chub sems dpa’ mkhas gsal ba ||
dogs par byed daṅ saṅs rgyas chos rnams dmigs mi ’gyur ||
’chad par byed daṅ chos ’dod lta bar byed mi dmigs ||
’di ni źi ’dod yon tan dga’ (2) ba’i gnas pa yin ||
dgra bcom rnam thar de bźin gśegs kye ma gtogs par ||
gnas pa ’di ni ñan thos raṅ rgyal bcas pa yi ||
gnas pa źi ba’i tiṅ ’dzin rab źi bde ldan pa ||
ji sñed kun gyi mchog daṅ goṅ na med pa yin ||
’dab chags mkha’ la gnas (3) kyaṅ ltuṅ bar ’gyur ma yin ||
ña ni chu la gnas kyaṅ ’tshubs te ’chi ba med ||
de ltar byaṅ chub sems dpa’ bsam gtan stobs dag gis ||
pha rol son pa stoṅ gnas mya ṅan ’da’ mi ’gyur ||
sems can kun gyi yon tan mchog tu ’gro ba daṅ ||
saṅs rgyas (4) ye śes mchog tu rmad byuṅ mchog reg daṅ ||
chos kyi sbyin pa rab mchog dam pa sbyin ’dod gaṅ ||
phan mdzad rnams kyi gnas mchog ’di la bsten par gyis ||
bslab pa ’di ni ’dren pas bslab pa yoṅs brjod na ||
bslab pa ji sñed kun gyi mchog daṅ goṅ na med ||
(5) mkhas pa gaṅ źig bslab kun pha rol ’gro ’dod pas ||
saṅs rgyas bslab pa śes rab pha rol phyin ’dir slobs ||
’di ni chos gter mchog daṅ chos mdzod dam pa yin ||
saṅs rgyas rigs yin ’gro ba’i bde daṅ skyid pa’i mdzod ||
’das daṅ ma byon phyogs (6) bcu’i ’jig rten mgon po rnams ||
de dag ’di las ’khruṅs kyaṅ chos dbyiṅs zad mi śes ||
śiṅ daṅ ’bras bu me tog nags tshal ji sñed pa ||
de dag thams cad sa las yaṅ dag ’byuṅ źiṅ ’thon ||
’on kyaṅ sa la zad pa med ciṅ ’phel ba med ||
yoṅs su mi ñams (7) rnam par mi rtog skyo ba med ||
saṅs rgyas sras daṅ ñan thos raṅ rgyal lha rnams daṅ ||
’gro ba kun gyi bde skyid chos rnams ji sñed pa ||
de kun śes rab pha rol phyin pa mchog las byuṅ ||
śes rab rnams kyaṅ zad pa med ciṅ ’phel ba med ||
sems can tha (16b1) ma ’briṅ daṅ mchog gyur ji sñed pa ||
de kun ma rig las byuṅ bde bar gśegs pas gsuṅs ||
rkyen rnams tshogs nas sdug bsṅal ’khrul ’khor rab tu ’byuṅ ||
ma rig ’khrul ’khor de ni zad med ’phel ba med ||
ye śes tshul sgo thabs daṅ rtsa ba ji sñed pa ||
(2) de kun śes rab pha rol phyin pa mchog las byuṅ ||
rkyen rnams tshogs nas las kyi ’khrul ’khor rab tu ’byuṅ ||
śes rab pha rol phyin la zad med ’phel ba med ||
byaṅ chub sems dpa’ gaṅ źig rten ciṅ ’brel ’byuṅ la ||
skye med zad pa med par śes rab ’di (3) śes te ||
ñi ma sprin med ’od zer ’phro bas mun bsal ltar ||
ma rig thibs po bcom nas raṅ byuṅ thob par ’gyur ||
mthu chen ldan pa bsam gtan bźis kyaṅ gnas byed la ||
rten par byed pa ma yin gnas par byed pa med ||
’on kyaṅ bsam gtan yan lag bcas (4) pa bźi po ’di ||
byaṅ chub dam pa mchog thob pa yi rten du ’gyur ||
śes rab mchog thob bsam gtan dag la gnas pa ni ||
gzugs med tiṅ ’dzin dam pa bźi yaṅ ñams su myoṅ ||
bsam gtan ’di dag byaṅ chub dam pa mchog la pan ||
byaṅ chub sems (5) dpa’ zag pa zad phyir slob pa min ||
’di ni yon tan stsogs pa’i ṅo mtshar rmad byuṅ ste ||
bsam gtan tiṅ ṅe ’dzin la gnas nas mtshan ma med ||
de la gnas rnams gal te lus ni źig gyur na ||
bsam pa ji bźin ’dod pa’i khams su yaṅ skye’o ||
dper na (6) ’dzam gliṅ mi źig sṅon chad lha yul gyi ||
lha yi groṅ khyer mchog tu ma phyin phyis soṅ ste ||
de ni yoṅs su bzuṅ ba’i yul de rnams mthoṅ nas ||
phyir ’dir ’oṅ bar gyur na chags par mi byed ltar ||
de bźin byaṅ chub sems dpa’i yon tan mchog ’chaṅ ba ||
(7) rnal ’byor brtson te bsam gtan tiṅ ’dzin la gnas nas ||
phyir yaṅ ’dod pa’i khams su gnas te chags pa med ||
chu yi padma bźin du byis pa’i chos mi gnas ||
bdag ñid chen po sems can yoṅs su smin bya daṅ ||
źiṅ spyod pha rol phyin rdzogs don (17a1) byed kho nar zad ||
byaṅ chub yon tan pha rol phyin ñams ’gyur ’oṅ źes ||
gzugs med khams su skye ba don du gñer mi byed ||
dper na mi źig rin chen gter rnams rñed gyur nas ||
de la ’dod pa’i blo ni bskyed par ma byas la ||
des kyaṅ dus gźan źig (2) na de dag yoṅs blaṅs śiṅ ||
blaṅs nas khyim du soṅ ste chags par mi byed ltar ||
de bźin byaṅ chub sems dpa’ mkhas pa dga’ ba daṅ ||
bde sbyin bsam gtan tiṅ ’dzin źi ba bźi thob nas ||
bsam gtan bde ldan bsam gtan tiṅ ’dzin thob btaṅ ste ||
’gro (3) la sñiṅ brtser ldan pa phyir yaṅ ’dod khams ’jug ||
gal te byaṅ chub sems dpa’ tiṅ ’dzin bsam gtan gnas ||
dgra bcom raṅ rgyal theg par ’dod pa’i blo skyed na ||
mñam par ma bźag rgod ciṅ sems g-yeṅs gyur pa ste ||
saṅs rgyas yon tan yoṅs ñams (4) mñan pa gru źig bźin ||
gźan yaṅ gzugs daṅ sgra daṅ de bźin dri daṅ ro ||
reg daṅ ’dod yon lṅa la mṅon par brtson gyur kyaṅ ||
dgra bcom raṅ rgyal theg bral byaṅ chub sems dga’ na ||
dpa’ bo rtag tu mñam gźag yin par śes par bya ||
sems (5) can gaṅ zag gźan phyir sems dpa’ rnam dag pa ||
brtson ’grus pha rol phyin la mṅon brtson rnam par spyod ||
dper na bran mo chu chun dbaṅ med rje bo’i dbaṅ ||
de bźin dpa’ rnams sems can kun gyi dbaṅ gis ’gro ||
spyo ba byas sam ’on te rtag tu brdegs (6) kyaṅ ruṅ ||
bran mo rje bo la ni zlog tshig mi smra yi ||
’di yis bdag ni bsad par ’gyur du ’oṅ sñam nas ||
śin tu skrag pa’i yid kyis ’jigs bcas zil gyis gnon ||
de bźin byaṅ chub ched du byaṅ chub mchog źugs pa ||
’gro ba kun la bran gyur bźin du (7) gnas par bya ||
’di las byaṅ chub thob ciṅ yon tan rdzogs par ’gyur ||
rtswa daṅ śiṅ las me byuṅ bas ni de ñid sreg ||
bdag gi bde ba btaṅ nas re ba med sems kyis ||
sems can gźan gyi dgos la ñin mtshan mṅon par brtson ||
bu gcig pa la ma ni (17b1) rim gro byed pa ltar ||
bsam pa thag pas rnam par skyo med gnas par gyis ||
byaṅ chub sems dpa’ gaṅ źig yun riṅ ’khor ’dod ciṅ ||
sems can don daṅ źiṅ sbyoṅ brtson pa’i rnal ’byor pa ||
skyo ba’i blo ni rdul tsam skye bar mi ’gyur na ||
de ni brtson (2) ’grus pha rol phyin ldan g-yel ba med ||
byaṅ chub sems dpa’ mi mkhas bskal pa bye ba bgraṅ ||
gal te riṅ bar ’du śes sdug bsṅal byaṅ chub sgrub ||
yaṅ dag chos sgrub byed tshe yun riṅ sdug bsṅal ’gyur ||
des ni brtson ’grus pha rol phyin ñams (3) le lo can ||
byaṅ chub mchog tu sems bskyed daṅ po nas bzuṅ ste ||
byaṅ chub bla na med pa thob par ’gyur gyi bar ||
ñin mtshan gcig tsam du ni yid la sems byed na ||
mkhas pa gsal bas brtson ’grus brtsams par rig par bya ||
gal te ’ga’ (4) źig ’di skad ri rab ri bśig pa’i ||
rjes la byaṅ chub mchog thob ’gyur źes smra ba las ||
ci ste skyo ba’i blo skyed tshad kyaṅ sems byed na ||
de tshe byaṅ chub sems dpa’ le lor gyur pa yin ||
ji ste de ni ’di tsam tshod lta ci dka’ źes ||
skad cig tsam la ri (5) rab thal par rlag sems bskyed ||
byaṅ chub sems dpa’ mkhas pa brtson ’grus brtsams pa ste ||
riṅ por mi thogs ’dren pa’i byaṅ chub mchog thob ’gyur ||
’gro ba yoṅs su smin par byas nas don bya źes ||
gal te lus daṅ ṅag daṅ yid kyis brtson (6) byed na ||
bdag tu ’du śes gnas pas le lor gyur pa ste ||
thams cad mkhyen pa ñid las riṅ ’gyur gnam sa bźin ||
gaṅ tshe lus daṅ sems daṅ sems can ’du śes med ||
’du śes rnam par log nas gñis su med chos spyod ||
’di ni byaṅ (7) chub źi ba mi ñams mchog ’dod pa’i ||
brtson ’grus pha rol phyen ces phan pa mdzad pas gsuṅs ||
gal te gźan las ṅan brjod tshig rtsub thos gyur na ||
bdag bde yin źes byaṅ chuṅ sems dpa’ mkhas pa dga’ ||
su smra sus thos gaṅ gis gaṅ (18a1) źig gaṅ gi phyir ||
bzod pa’i pha rol phyin mchog ldan pa mdzaṅs pa yin ||
byaṅ chub sems dpa’ gaṅ źig bzod pa’i legs chos ldan ||
gaṅ źig stoṅ gsum rin chen bkaṅ ste ’jig rten mkhyen ||
saṅs rgyas rnams daṅ dgra bcom raṅ rgyal phul (2) byas pa’i ||
sbyin pa’i phuṅ pos de la bsod nams char mi phod ||
bzod la gnas pa’i lus ni yoṅs su dag ’gyur te ||
sum cu rtsa gñis mtshan daṅ mthu stobs pha mtha’ yas ||
sems can rnams la chos rab stoṅ pa sgrogs par byed ||
’di ni bzod ldan de la (3) ’gro ba dga’ ’gyur mkhas ||
gal te sems can la las tsan dan phur ma blaṅs ||
rab gus byaṅ chub sems dpa’ la ni ñug byed la ||
gźan źig me mdag mgo la ’thor byed gñi ga la ||
de yis mñam źiṅ sñoms pa’i yid ni bskyed par bya ||
byaṅ chub sems (4) dpa’ mkhas pas de ltar bzod byas nas ||
sems bskyed de ni byaṅ chub mchog tu yoṅs bsṅos na ||
dpa’ bo ’jig rten kun la bzod pas dgra bcom daṅ ||
raṅ rgyal sems can khams maṅ ji sñed zil gyis gnon ||
bzod byed ’di sñam du yaṅ sems ni bskyed (5) bya ste ||
sems dmyal dud ’gro gśin rje’i ’jig rten sdug bsṅal maṅ ||
’dod pa’i yon tan rgyu yis dbaṅ med gnod myoṅ na ||
byaṅ chub ched du ci phyir da bzod mi bya sñam ||
lcag dbyig matsona daṅ gsad daṅ bciṅ daṅ brdeg pa daṅ ||
mgo gcod pa daṅ rna ba rkaṅ (6) lag sna gcod daṅ ||
’jig rten sdug bsṅal ji sñed bdag gis bzod sñam pa ||
byaṅ chub sems dpa’ bzod pa’i pha rol phyin la gnas ||
tshul khrims kyis ni źi ba ’dod rnams ’phags par ’gyur ||
stobs bcu’i spyod yul gnas śiṅ tshul khrims ñams pa (7) med ||
sdom pa’i bya ba ji sñed kun gyi rjes su ’jug ||
sems can kun la phan phyir de yaṅ byaṅ chub bsṅo ||
gal te dgra bcom raṅ rgyal byaṅ chub reg ’dod na ||
tshul khrims ’chal ciṅ mi mkhas de bźin spyod pa ñams ||
ci ste byad chub źi ba mchog tu yoṅs (18b1) bsṅo na ||
’dod yon brtson yaṅ tshul khrims pha rol phyin la gnas ||
chos gaṅ ṅes pa’i byaṅ chub yon tan ’byuṅ ’gyur ba ||
’di ni yon tan chos ldan rnams kyi tshul khrims don ||
chos gaṅ phan byed rnams kyi byaṅ chub yoṅs ñams pa ||
’di ni tshul khrims ’chal (2) ces rnam par ’dren pas gsuṅs ||
gal te byaṅ chub sems dpa’ ’dod yon lṅa spyod kyaṅ ||
saṅs rgyas chos daṅ ’phags pa’i dge ’dun skyabs soṅ ste ||
saṅs rgyas ’grub bya sñam du kun mkhyen yid byed na ||
mkhas pa tshul khrims pha rol phyin gnas rig (3) par bya ||
gal te bskal pa bye bar dge ba’i las lam bcu ||
spyod kyaṅ dgra bcom raṅ rgyal ñid la ’dod skyed na ||
de tshe tshul khrims skyon byuṅ tshul khrims ñams pa yin ||
sems bskyed de ni phas pham pas kyaṅ śin tu lci ||
tshul khrims sruṅ źiṅ byaṅ chub mchog (4) tu yoṅs bsṅo la ||
de yis rlom sems med ciṅ bdag bstod mi byed la ||
ṅa yi ’du śes sems can ’du śes yoṅs su spaṅs ||
byaṅ chub sems dpa’ tshul khrims pha rol phyin gnas brjod ||
gal te byaṅ chub sems dpa’ rgyal ba’i lam spyod pa ||
sems (5) can ’di dag khrims ldan ’di dag khrims ’chal źes ||
sna tshogs ’du śes źugs pa śin tu tshul khrims ’chal ||
tshul khrims ñams śiṅ de la yoṅs dag tshul khrims med ||
gaṅ la bdag gi ’du śes sems can ’du śes med ||
’du śes ’dod chags bral (6) la sdom min ga la yod ||
gaṅ la sdom daṅ sdom pa ma yin rlom sems med ||
’di ni tshul khrims sdom par rnam par ’dren pas gsuṅs ||
sems can dag pa gaṅ źig de ltar khrims ldan pa ||
sdug daṅ mi sdug kun la lta ba med pa yin ||
mgo daṅ rkaṅ (7) lag gtoṅ źiṅ źum pa’i sems kyaṅ med ||
bdog pa thams cad gtoṅ źiṅ rtag tu źen pa med ||
chos rnams raṅ bźin bdag med ya ma brlar śes nas ||
bdag gi śa yaṅ gtod źiṅ źum pa’i sems med na ||
de tshe phyi rol dṅos po gtoṅ ba smos ci dgos ||
(19a1) gal te ser sna byed pa de ni gnas med do ||
bdag tu ’du śes dṅos la bdag gir ’dzin pas chag ||
blun po rnams la gtoṅ ba’i blo lta ga la yod ||
ser sna can ni yi dgas gnas su skye bar ’gyur ||
ci ste mir skyes na yaṅ de tshe dbul por (2) ’gyur ||
de tshe byaṅ chub sems dpa’ sems can dbul śes nas ||
gtoṅ la mos par ’gyur źiṅ rtag tu lhug bar gtoṅ ||
gliṅ bźi legs par brgyan pa mchil ma’i thal ba ’dra ||
byin nas dga’ bar ’gyur gyi gliṅ theb de lta min ||
byaṅ chub sems (3) dpa’ mkhas pa gsal ba srid gsum gyi ||
sems can ji sñed de dag kun la sbyin pa ’di ||
byin par gyur cig sñam du bsams nas sbyin byin la ||
de yaṅ ’gro ba’i don phyir byaṅ chub mchog tu bsṅo ||
sbyin pa byin nas dṅos la gnas par byed pa med ||
de ni (4) nam du’aṅ rnam par smin la re ba med ||
de ltar gtoṅ la mkhas pa thams cad gtoṅ ba ste ||
chuṅ ṅu btaṅ la maṅ po dpag tu med par ’gyur ||
srid pa gsum na sems can ma lus ji sñed pa ||
yoṅs su brtag pa bzuṅ ste de dag thams cad kyis ||
’jig rten (5) mkhyen pa saṅs rgyas dgra bcom raṅ rgyal la ||
bskal ba mtha’ yas sbyin byin ñan thos legs tshol na ||
byaṅ chub sems dpa’ mkhas pa thabs mkhas gaṅ źig gis ||
de dag bsod nams bya ba’i dṅos la yi raṅ nas ||
sems can don du byaṅ chub mchog (6) rab yoṅs bsṅo na ||
yoṅs su bsṅos pas ’gro ba thams cad zil gyis gnon ||
nor bu mchiṅ bu’i phuṅ po chen por gyur pa yaṅ ||
rin chen bai DUārya gcig de kun zil gyis gnon ||
de bźin ’gro kun sbyin pa’i phuṅ po rgya chen kun ||
rjes su yi raṅ byaṅ chub (7) sems dpas zil gyis gnon ||
gal te byaṅ chub sems dpas ’gro la sbyin byin nas ||
de la bdag gir mi byed dṅos po phaṅs med na ||
de las dge ba’i rtsa ba mthu chen ’phel ’gyur te ||
sprin med ’od ldan zla dkyil yar gyi ṅo bźin no ||
(19b1) skabs drug pa mthar gyis pa bstan ||
byaṅ chub sems dpa’i sbyin pas yi dgas ’gro ba gcod ||
dbul ba daṅ ni de bźin ñon moṅs thams cad gcod ||
spyod tshe loṅs spyod mtha’ yas rgyas pa thob par ’gyur ||
sbyin pas sdug bsṅal gyur pa’i sems can (2) yoṅs smin byed ||
khrims kyis dud ’gro’i ’gro ba du ma’i ṅo bo daṅ ||
mi khom brgyad spoṅ de yis dal ba rtag tu rñed ||
bzod pas gzugs bzaṅ dam pa rgya chen thob ’gyur te ||
gser mdog sdug ciṅ ’gro bas lta ba’i ’os su ’gyur ||
brtson ’grus (3) kyis ni dkar po’i yon tan ’grib mi ’gyur ||
ye śes mtha’ yas rgyal ba’i baṅ mdzod rñed par ’gyur ||
bsam gtan gyis ni ’dod pa’i yon tan smad pa ṅa dor ||
rig daṅ mṅon par śes daṅ tiṅ ’dzin mṅon par sgrub ||
śes rab kyis ni chos kyi raṅ bźin (4) yoṅs śes nas ||
khams gsum ma lus pa las yaṅ dag ’da’ bar ’gyur ||
mi yi khyu mchog ’khor lo rin chen bskor byas nas ||
sdug bsṅal zad par bya phyir ’gro la chos kyaṅ ston ||
skabs bdun pa skad cig ma gcig la mṅon par rdzogs par byaṅ chub par bstan ||
chos (5) ’di yoṅs rdzogs byas nas byaṅ chub sems dpa’ de ||
skabs brgyad pa chos kyi sku bstan ||
yoṅs dag źiṅ daṅ sems can dag pa yoṅs su ’dzin ||
saṅs rgyas rgyud daṅ chos kyi rgyud kyaṅ yoṅs su ’dzin ||
de bźin dge ’dun rgyud daṅ chos kun yoṅs su ’dzin ||
’gro (6) ba’i nad gso mdzad pa sman pa’i mchog gyur pas ||
śes rab bstan pa byaṅ chub lam ldan ’di gsuṅs te ||
miṅ ni yon tan rin chen sdud pa byaṅ chub lam ||
lam ’di sems can kun gyis thob par bya phyir bśad ||
