Bibliotheca Polyglotta

Buddhavaṃsa

(001) Namo tassa bhagavato arahato sammāsambuddhassa.

BUDDHAVAṂSO

I -- RATANACAṄKAMANAKAṆḌAṂ

Brahmā ca lokādhipatī Sahampatī

katañjalī anadhivaraṃ ayācatha: /

santīdha sattā apparajakkhajātikā,

desehi dhammaṃ anukamp’ imaṃ pajaṃ // Bv_1.1 //

Sampannavijjācaraṇassa tādino

jutindharass’ antimadehadhārino /

tathāgatass’ appaṭipuggalassa

uppajji kāruññatā sabbasatte // Bv_1.2 //

Na h’ ete jānanti sadevamānusā

buddho ayaṃ kīdisako nar’ uttamo /

iddhibalaṃ paññābalañca kīdisaṃ

buddhabalaṃ lokahitassa kīdisaṃ // Bv_1.3 //

Na h’ ete jānanti sadevamānusā

buddho ayaṃ īdisako nar’ uttamo /

iddhibalaṃ paññābalañca īdisaṃ

buddhabalaṃ lokahitassa īdisaṃ // Bv_1.4 //

Handāhaṃ dassayissāmi buddhabalaṃ anuttaraṃ /

caṅkamaṃ māpayissāmi nabhe ratanamaṇḍitaṃ // Bv_1.5 //

Bhummā Mahārājika-Tāvatiṃsā

Yāmā ca devā Tusitā ca Nimmitā /

Paranimmitā ye pi ca Brahmakāyikā

ānanditā vipulam-akaṃsu ghosaṃ // Bv_1.6 //

Obhāsitā ca paṭhavī sadevakā

puthū ca lok’ antarikā asaṃvutā, /

tamo ca tibbo vihato tadā ahū

disvāna accherakaṃ pāṭihīraṃ // Bv_1.7 //

(002) Sadevagandhabbamanussarakkhase

ābhā uḷārā vipulā ajāyatha /

imasmiṃ loke parasmiṃ cobhayasmiṃ

adho ca uddhaṃ tiriyañca vitthataṃ // Bv_1.8 //

Satt’ uttamo anadhivaro vināyako

satthā ahū devamanussapūjito /

mahānubhāvo satapuññalakkhaṇo

dassesi accherakaṃ pāṭihīraṃ // Bv_1.9 //

So yācito devavarena cakkhumā

atthaṃ samekkhitva tadā nar’ uttamo /

caṅkamaṃ tattha māpayi lokanāyako

suniṭṭhitaṃ sabbaratananimmitaṃ // Bv_1.10 //

Iddhī ca ādesanā’ nusāsanī

tipāṭihīre bhagavā vasī ahu /

caṅkamaṃ māpayi lokanāyako

suniṭṭhitaṃ sabbaratananimmitaṃ // Bv_1.11 //

Dasasahassīlokadhātuyā Sinerupabbat’ uttame /

thambhe va dassesi paṭipāṭiyā caṅkame ratanāmaye // Bv_1.12 //

Dasasahassī atikkamma caṅkamaṃ māpayī jino /

sabbasovaṇṇamayā passe caṅkame ratanāmaye // Bv_1.13 //

Tulāsaṅghāṭānuvaggā sovaṇṇaphalak’ atthatā /

vedikā sabbasovaṇṇā d-ubhatopassesu nimmitā // Bv_1.14 //

Maṇimuttāvālukākiṇṇā nimmitā ratanāmayā /

obhāseti disā sabbā sataraṃsī va uggato // Bv_1.15 //

Tasmiṃ caṅkamane dhīro dvattiṃsavaralakkhaṇo /

virocamāno sambuddho caṅkame caṅkamī jino // Bv_1.16 //

Dibbaṃ mandāravaṃ pupphaṃ padumaṃ pāricchattakaṃ /

caṅkamane okiranti sabbe devā samāgatā // Bv_1.17 //

Passanti taṃ devasaṅghā dasasahassī pamoditā /

namassamānā nipatanti tuṭṭhahaṭṭhā pamoditā // Bv_1.18 //

Tāvatiṃsā ca Yāmā ca Tusitā cāpi devatā /

Nimmāṇaratino devā ye devā Vasavattino /

udaggacittā sumanā passanti lokanāyakaṃ // Bv_1.19 //

(003) Sadevagandhabbamanussarakkhasā

nāgā supaṇṇā athavāpi kinnarā /

passanti taṃ lokahitānukampakaṃ

nabhe va accuggatacandamaṇḍalaṃ // Bv_1.20 //

Ābhassarā Subhakiṇhā Vehapphalā Akaniṭṭhā ca devatā /

susuddhasukkavatthavasanā tiṭṭhanti pañjalīkatā // Bv_1.21 //

Muñcanti pupphaṃ pana pañcavaṇṇikaṃ

mandāravaṃ candanacuṇṇamissitaṃ /

bhamenti celāni ca ambare tadā

aho jino lokahitānukampako // Bv_1.22 //

Tuvaṃ satthā ca ketū ca dhajo yūpo ca pāṇinaṃ /

parāyano patiṭṭhā ca dīpo ca dvipad’ uttamo // Bv_1.23 //

Dasasahassī-3 lokadhātuyā devatāyo mah’ iddhikā /

parivāretvā namassanti tuṭṭhahaṭṭhā pamoditā // Bv_1.24 //

Devatā devakaññā ca pasannā tuṭṭhamānasā /

pañcavaṇṇikapupphehi pūjayanti narāsabhaṃ // Bv_1.25 //

Passanti taṃ devasaṅghā pasannā tuṭṭhamānasā /

pañcavaṇṇikapupphehi pūjayanti narāsabhaṃ // Bv_1.26 //

Aho acchariyaṃ loke abbhutaṃ lomahaṃsanaṃ /

na-m-edisaṃ bhūtapubbaṃ accheraṃ lomahaṃsanaṃ // Bv_1.27 //

Sakaṃsakamhi bhavane nisīditvāna devatā /

hasanti mahāhasitaṃ disvan’ accherakaṃ nabhe // Bv_1.28 //

Ākasaṭṭhā ca bhummaṭṭhā tiṇapanthanivāsino /

katañjalī namassanti tuṭṭhahaṭṭhā pamoditā // Bv_1.29 //

Ye pi dīghāyukā nāgā puññavanto mah’ iddhikā /

pamoditā namassanti pūjayanti nar’ uttamaṃ // Bv_1.30 //

Saṅgītiyo pavattenti ambare anil’ añjase /

cammanaddhāni vādenti disvan’ accherakaṃ nabhe // Bv_1.31 //

Saṅkhā ca paṇavā c’ eva atho pi ḍiṇḍimā bahū /

antalikkhasmi vajjenti disvān’ accherakaṃ nabhe // Bv_1.32 //

Abbhuto vata no ajja uppajji lomahaṃsano /

dhuvam-atthasiddhiṃ labhāma khaṇo no paṭipādito // Bv_1.33 //

(004) Buddho ’ti tesaṃ sutvāna pīti uppajji tāvade /

buddho buddho ’ti kathayantā tiṭṭhanti pañjalīkatā // Bv_1.34 //

Hiṃkāraṃ sādhukārañca ukkuṭṭhiṃ sampasādanaṃ /

pajā vividhā gagane vattenti pañjalīkatā // Bv_1.35 //

Gāyanti selenti ca vādayanti ca

bhujāni poṭhenti ca naccayanti ca /

muñcanti pupphaṃ pana pañcavaṇṇikaṃ

mandāravaṃ candanacuṇṇamissitaṃ // Bv_1.36 //

Yathā tuyhaṃ mahāvīra pādesu cakkalakkhaṇaṃ /

dhajavajirapatākā vaḍḍhamān’ aṅkusācitaṃ,// Bv_1.37 //

Rūpe sīle samādhimhi paññāya ca asādiso /

vimuttiyā asamasamo dhammacakkappavattane // Bv_1.38 //

Dasanāgabalaṃ kāye tuyhaṃ pākatikaṃ balaṃ /

iddhibalena asamo dhammacakkappavattane // Bv_1.39 //

Evaṃ sabbaguṇopetaṃ sabbaṅgasamupāgataṃ /

mahāmuniṃ kāruṇikaṃ lokanāthaṃ namassatha // Bv_1.40 //

Abhivādanaṃ thomanañca vandanañca pasaṃsanaṃ /

namassanañca pūjañca sabbaṃ arahasī tuvaṃ // Bv_1.41 //

Ye keci loke vandaneyyā vandanaṃ arahanti ye /

sabbaseṭṭho mahāvīra, sadiso te na vijjati // Bv_1.42 //

Sāriputto mahāpañño samādhijjhānakovido /

Gijjhakūṭe ṭhito yeva passati lokanāyakaṃ // Bv_1.43 //

Suphullaṃ sālarājaṃ va candaṃ va gagane yathā /

majjhantike va suriyaṃ oloketi narāsabhaṃ // Bv_1.44 //

Jalantaṃ dīparukkhaṃ va taruṇasuriyaṃ va uggataṃ /

byāmappabhānurañjitaṃ dhīraṃ passati nāyakaṃ // Bv_1.45 //

Pañcannaṃ bhikkhusatānaṃ katakiccāna tādinaṃ /

khīṇasavānaṃ vimalānaṃ khaṇena sannipātayī // Bv_1.46 //

Lokappasādanaṃ nāma pāṭihīraṃ nidassayī /

amhe pi tattha gamissāma,vandissāma mayaṃ jinaṃ // Bv_1.47 //

Etha sabbe samāgantvā pucchissāma mayaṃ jinaṃ /

kaṅkhaṃ vinodayissāma passitvā lokanāyakaṃ // Bv_1.48 //

(005) Sādhū ’ti te paṭissutvā nipakā saṃvut’ indriyā /

pattacīvaram-ādāya taramānā upāgamuṃ // Bv_1.49 //

Khīṇāsavehi vimalehi dantehi uttame dame /

Sāriputto mahāpañño iddhiyā upasaṅkamī // Bv_1.50 //

Tehi bhikkhūhi parivuto Sāriputto mahāgaṇī /

jalanto devo va gagane iddhiyā upasaṅkamī // Bv_1.51 //

Ukkāsitañca khipitaṃ ajjhupekkhiya subbatā /

sagāravā sappatissā sambuddhaṃ upasaṅkamuṃ // Bv_1.52 //

Upasaṅkamitvā passanti sayambhuṃ lokanāyakaṃ /

nabhe accuggataṃ dhīraṃ candaṃ va gagane yathā // Bv_1.53 //

Jalantaṃ dīparukkhaṃ va vijjū va gagane yathā /

majjhantike va suriyaṃ passanti lokanāyakaṃ // Bv_1.54 //

Pañca bhikkhusatā sabbe passanti lokanāyakaṃ /

rahadam-iva vippasannaṃ suphullaṃ padumaṃ yathā // Bv_1.55 //

Añjaliṃ paggahetvāna tuṭṭhahaṭṭhā pamoditā /

namassamānā nipatanti satthuno cakkalakkhaṇe // Bv_1.56 //

Sāriputto mahāpañño koraṇḍasamasādiso /

samādhijjhānakusalo vandatī lokanāyakaṃ // Bv_1.57 //

Gajjitā kālamegho va nīl’ uppalasamasādiso /

iddhibalena asamo Moggallāno mah’ iddhiko // Bv_1.58 //

Mahākassapo pi ca thero uttattakanakasannibho /

dhutaguṇe agganikkhitto thomito satthuvaṇṇito // Bv_1.59 //

Dibbacakkhūnaṃ yo aggo Anuruddho mahāgaṇī /

ñātiseṭṭho bhagavato avidūre va tiṭṭhati // Bv_1.60 //

Āpatti-anāpattiyā satekicchāya kovido /

vinaye agganikkhitto Upāli satthuvaṇṇito // Bv_1.61 //

Sukhumanipuṇ’ atthapaṭividdho kathikānaṃ pavaro gaṇī /

isi Mantāniyā putto Puṇṇo nāmā ’ti vissuto // Bv_1.62 //

Etesaṃ cittam-aññāya opammakusalo muni /

kaṅkhacchedo mahāvīro kathesi attano guṇaṃ // Bv_1.63 //

(006) Cattāro te asaṅkheyyā koṭi yesaṃ na ñāyati /

sattakāyo ca ākāso cakkavāḷā c’ anantakā, /

Buddhañāṇaṃ appameyyaṃ na sakkā ete vijānituṃ // Bv_1.64 //

Kim-etaṃ acchariyaṃ loke yaṃ me iddhivikubbanaṃ /

aññe bahū acchariyā abbhutā lomahaṃsanā // Bv_1.65 //

Yadā’ haṃ Tusite kāye Santusito nām’ ahaṃ tadā /

dasasahassī samāgamma yācanti pañjalī mamaṃ // Bv_1.66 //

Kālo deva mahāvīra, uppajja mātukucchiyaṃ /

sadevakaṃ tārayanto bujjhassu amataṃ padaṃ // Bv_1.67 //

Tusitā kāyā cavitvāna yadā okkami kucchiyaṃ /

dasasahassī lokadhātu kampittha dharaṇī tadā // Bv_1.68 //

Yadā’ haṃ mātukucchito sampajāno va nikkhamiṃ /

sādhukāraṃ pavattentī dasasahassī pakampatha // Bv_1.69 //

Okkanti me samo n’ atthi jātito abhinikkhame /

sambodhiyaṃ ahaṃ seṭṭho dhammacakkappavattane // Bv_1.70 //

Aho acchariyaṃ loke buddhānaṃ guṇamahantatā /

dasasahassī lokadhātu chappakāraṃ pakampatha // Bv_1.71 //

Obhāso ca mahā āsi accheraṃ lomahaṃsanaṃ /

bhagavā ca tamhi samaye lokajeṭṭho narāsabho // Bv_1.72 //

Sadevakaṃ dassayanto iddhiyā caṅkamī jino /

caṅkame caṅkamanto va kathesi lokanāyako, /

antarā na nivatteti catuhatthe caṅkame yathā // Bv_1.73 //

Sāriputto mahāpañño samādhijjhānakovido /

paññāya pāramippatto pucchati lokanāyakaṃ: // Bv_1.74 //

Kīdiso te mahāvīra abhinīhāro nar’ uttama /

kamhi kāle tayā dhīra pattitā bodhi-m-uttamā // Bv_1.75 //

Dānaṃ sīlañca nekkhammaṃ paññāviriyañca kīdisaṃ /

khanti-saccam-adhiṭṭhānaṃ mett’ upekkhā ca kīdisā // Bv_1.76 //

Dasapāramī tayā dhīra kīdisā lokanāyaka /

kathaṃ upapāramī puṇṇā param’ atthapāramī kathaṃ // Bv_1.77 //

Tassa puṭṭho viyākāsi karavīkamadhuraṅgiro /

nibbāpayanto hadayaṃ hāsayanto sadevakaṃ // Bv_1.78 //

(007) Atītabuddhānaṃ jinānaṃ desitaṃ

nikīḷitaṃ buddhaparamparāgataṃ /

pubbenivāsānugatāya buddhiyā

pakāsayī lokahitaṃ sadevake // Bv_1.79 //

Pītipāmojjajananaṃ sokasallavinodanaṃ /

sabbasampattipaṭilābhaṃ cittīkatvā suṇātha me // Bv_1.80 //

Madanimmadanaṃ sokanudaṃ saṃsāraparimocanaṃ /

sabbadukkhakkhayaṃ maggaṃ sakkaccaṃ paṭipajjathā ’ti // Bv_1.81 //

Ratanacaṅkamanakaṇḍaṃ niṭṭhitaṃ

(008) Blank Page.

(009) II -- DĪPAṄKARABUDDHAVAṂSO

Kappe ca satasahasse ca caturo ca asaṅkhiye /

Amaraṃ nāma nagaraṃ dassaneyyaṃ manoramaṃ // Bv_2.1 //

Dasahi saddehi avivittaṃ annapānasamāyutaṃ /

hatthisaddaṃ assasaddaṃ bherisaṅkharathāni ca /

khādatha pivaca c’ eva annapānena ghositaṃ // Bv_2.2 //

Nagaraṃ sabbaṅgasampannaṃ sabbakammam-upāgataṃ /

sattaratanasampannaṃ nānājanasamākulaṃ /

samiddhaṃ devanagaraṃ va āvāsaṃ puññakamminaṃ // Bv_2.3 //

Nagare Amaravatiyā Sumedho nāma brāhmaṇo /

anekakoṭisannicayo pahūtadhanadhaññavā // Bv_2.4 //

Ajjhāyako mantadharo tiṇṇaṃ vedāna pāragū /

lakkhaṇe itihāse ca sadhamme pāramiṃ gato // Bv_2.5 //

Rahogato nisīditvā evaṃ cintes’ ahaṃ tadā: /

dukkho punabbhavo nāma sarīrassa ca bhedanaṃ,// Bv_2.6 //

Jātidhammo jarādhammo vyādhidhammo c’ ahaṃ tadā /

ajaraṃ amaraṃ khemaṃ pariyesissāmi nibbutiṃ // Bv_2.7 //

Yannūn’ imaṃ pūtikāyaṃ nānākuṇapapūritaṃ /

chaḍḍayitvāna gaccheyyaṃ anapekkho anatthiko // Bv_2.8 //

Atthi hehiti so maggo na so sakkā na hetuye /

pariyesissāmi taṃ maggaṃ bhavato parimuttiyā // Bv_2.9 //

Yathā pi dukkhe vijjante sukhaṃ nāma pi vijjati /

evaṃ bhave vijjamāne vibhavo p’ icchitabbako // Bv_2.10 //

Yathā pi uṇhe vijjante aparaṃ vijjati sītalaṃ /

evaṃ tividhaggi vijjante nibbānaṃ icchitabbakaṃ // Bv_2.11 //

Yathā pi pāpe vijjante kalyāṇam-api vijjati /

evam-eva jāti vijjante ajātim-p’ icchitabbakaṃ // Bv_2.12 //

Yathā gūthagato puriso taḷākaṃ disvāna pūritaṃ /

na gavesati taṃ taḷākaṃ na doso taḷākassa so, // Bv_2.13 //

(010) Evaṃ kilesamaladhove vijjante amatantale /

na gavesati taṃ taḷākaṃ na doso amatantale // Bv_2.14 //

Yathā arīhi pariruddho vijjante gamane pathe /

na palāyati so puriso na doso añjasassa so, // Bv_2.15 //

Evaṃ kilesapariruddho vijjamāne sive pathe /

na gavesati taṃ maggaṃ na doso siva-m-añjase // Bv_2.16 //

Yathā pi vyādhito puriso vijjamāne tikicchake /

na tikicchāpeti taṃ vyādhiṃ na doso so tikicchake, // Bv_2.17 //

Evaṃ kilesavyādhīhi dukkhito paripīḷito /

na gavesati taṃ ācariyaṃ na doso so vināyake // Bv_2.18 //

Yathā pi kuṇapaṃ puriso kaṇṭhe baddhaṃ jigucchiya /

mocayitvāna gaccheyya sukhī serī sayaṃvasī, // Bv_2.19 //

Tath’ ev’ imaṃ pūtikāyaṃ nānākuṇapasañcayaṃ /

chaḍḍayitvāna gaccheyyaṃ anapekkho anatthiko // Bv_2.20 //

Yathā uccāraṭhānamhi karīsaṃ naranāriyo /

chaḍḍayitvāna gacchanti anapekkhā anatthikā, // Bv_2.21 //

Evam-evāham-imaṃ kāyaṃ nānākuṇapapūritaṃ /

chaḍḍayitvāna gacchissaṃ vaccaṃ katvā yathā kuṭiṃ // Bv_2.22 //

Yathā pi jajjaraṃ nāvaṃ paluggaṃ udakagāhiniṃ /

sāmī chaḍḍetvā gacchanti anapekkhā anatthikā, // Bv_2.23 //

Evam-evāham-imaṃ kāyaṃ navacchiddaṃ dhuvassavaṃ /

chaḍḍayitvāna gacchissaṃ chinnanāvaṃ va sāmikā // Bv_2.24 //

Yathā pi puriso corehi gacchanto bhaṇḍam-ādiya /

bhaṇḍacchedabhayaṃ disvā chaḍḍayitvāna gacchati, // Bv_2.25 //

Evam-evam-ayaṃ kāyo mahācorasamo viya /

pahāy’ imaṃ gamissāmi kusalacchedanā bhayā ’ti // Bv_2.26 //

Evāhaṃ cintayitvāna nekakoṭisataṃ dhanaṃ /

nāthānāthānaṃ datvāna Himavantam-upāgamiṃ // Bv_2.27 //

Himavantassāvidūre Dhammako nāma pabbato /

assamo sukato mayhaṃ paṇṇasālā sumāpitā // Bv_2.28 //

Caṅkamaṃ tattha māpesiṃ pañcadosavivajjitaṃ /

aṭṭhaguṇasamūpetaṃ abhiññābalam-āhariṃ // Bv_2.29 //

(011) Sāṭakaṃ pajahiṃ tattha navadosam-upāgataṃ /

vākacīraṃ nivāsesiṃ dvādasaguṇ’ upāgataṃ // Bv_2.30 //

Aṭṭhadosasamākiṇṇaṃ pajahiṃ paṇṇasālakaṃ /

upāgamiṃ rukkhamūlaṃ guṇe dasah’ upāgataṃ // Bv_2.31 //

Vāpitaṃ ropitaṃ dhaññaṃ pajahiṃ niravasesato /

anekaguṇasampannaṃ pavattaphalam-ādiyiṃ // Bv_2.32 //

Tattha padhānaṃ padahiṃ nisajjaṭṭhānacaṅkame /

abbhantaramhi sattāhe abhiññābalam-āpuṇiṃ // Bv_2.33 //

Evaṃ me siddhipattassa vasībhūtassa sāsane /

Dīpaṅkaro nāma jino uppajji lokanāyako // Bv_2.34 //

Upajjante ca jāyante bujjhante dhammadesane /

caturo nimitte nāddasaṃ jhānaratisamappito // Bv_2.35 //

Paccantadesavisaye nimantetvā tathāgataṃ /

tassa āgamanaṃ maggaṃ sodhenti tuṭṭhamānasā // Bv_2.36 //

Ahaṃ tena samayena nikkhamitvā sak’ assamā /

dhunanto vākacīrāni gacchāmi ambare tadā // Bv_2.37 //

Vedajātaṃ janaṃ disvā tuṭṭhahaṭṭhaṃ pamoditaṃ /

orohitvāna gaganā mānuse pucchi tāvade: // Bv_2.38 //

Tuṭṭhahaṭṭho pamudito vedajāto mahājano /

kassa sodhīyatī maggo añjasaṃ vaṭumāyanan-ti // Bv_2.39 //

Te me puṭṭhā viyākaṃsu:4 buddho loke anuttaro /

Dīpaṅkaro nāma jino uppajji lokanāyako, /

tassa sodhīyate maggo añjasaṃ vaṭumāyanaṃ // Bv_2.40 //

Buddho ’ti mama sutvāna pīti uppajji tāvade /

buddho buddho ’ti kathayanto somanassaṃ pavedayiṃ // Bv_2.41 //

Tattha ṭhatvā vicintesiṃ tuṭṭho saṃviggamānaso /

idha bījāni ropissaṃ khaṇo ve mā upaccagā // Bv_2.42 //

Yadi buddhassa sodhetha ek’ okāsaṃ dadātha me /

aham-pi sodhayissāmi añjasaṃ vaṭumāyanaṃ // Bv_2.43 //

Adaṃsu te mam’ okāsaṃ sodhetuṃ añjasaṃ tadā /

buddho buddho ’ti cintento maggaṃ sodhem’ ahaṃ tadā // Bv_2.44 //

(012) Aniṭṭhite mam’ okāse Dīpaṅkaro mahāmuni /

catūhi satasahassehi chaḷabhiññehi tādihi /

khīṇāsavehi vimalehi paṭipajji añjasaṃ jino // Bv_2.45 //

Paccuggamanā vattanti vajjanti bheriyo bahū /

āmoditā naramarū sādhukāraṃ pavattayuṃ // Bv_2.46 //

Devā manusse passanti manussā pi ca devatā /

ubho pi te pañjalikā anuyanti tathāgataṃ // Bv_2.47 //

Devā dibbehi turiyehi manussā mānusakehi ca /

ubho pi te vajjayantā anuyanti tathāgataṃ // Bv_2.48 //

Dibbaṃ mandāravaṃ pupphaṃ padumaṃ pāricchattakaṃ /

disodisaṃ okiranti ākāsanabhagatā marū // Bv_2.49 //

Campakaṃ salalaṃ nīpaṃ nāgapunnāga-ketakaṃ /

disodisaṃ ukkhipanti bhūmitalagatā narā // Bv_2.50 //

Kese muñcitv’ ahaṃ tattha vākacīrañca cammakaṃ /

kalale pattharitvāna avakujjo nipajj’ ahaṃ: // Bv_2.51 //

Akkamitvāna maṃ buddho saha sissehi gacchatu /

mā naṃ kalale akkamitho hitāya me bhavissati // Bv_2.52 //

Paṭhaviyaṃ nipannassa evaṃ me āsi cetaso: /

Icchamāno ahaṃ ajja kilese jhāpaye mamaṃ,// Bv_2.53 //

Kiṃ me aññātavesena dhammaṃ sacchikaten’ idha /

sabbaññutaṃ pāpuṇitvā buddho hessaṃ sadevake // Bv_2.54 //

Kiṃ me ekena tiṇṇena purisena thāmadassinā /

sabbaññutaṃ pāpuṇitvā santāressaṃ sadevake // Bv_2.55 //

Iminā me adhikārena katena puris’ uttame /

sabbaññutaṃ pāpuṇitvā tāremi janataṃ bahuṃ // Bv_2.56 //

Saṃsārasotaṃ chinditvā viddhaṃsetvā tayo bhave /

dhammanāvaṃ samāruyha santāressaṃ sadevake // Bv_2.57 //

Manussattaṃ liṅgasampatti hetu satthāradassanaṃ /

pabbajjā guṇasampatti adhikāro ca chandatā /

aṭṭhadhammasamodhānā abhinīhāro samijjhati // Bv_2.58 //

Dīpaṅkaro lokavidū āhutīnaṃ paṭiggaho /

ussīsake maṃ ṭhatvāna idaṃ vacanam-abravī: // Bv_2.59 //

(013) Passatha imaṃ tāpasaṃ jaṭilaṃ uggatāpanaṃ /

aparimeyye ito kappe buddho loke bhavissati // Bv_2.60 //

Ahu Kapilavhayā rammā nikkhamitvā tathāgato /

padhānaṃ padahitvāna katvā dukkarakārikaṃ // Bv_2.61 //

Ajapālarukkhamūlasmiṃ nisīditvā tathāgato /

tattha pāyāsam-aggayha Nerañjaram-upehiti // Bv_2.62 //

Nerañjarāya tīramhi pāyāsam-adā so jino /

paṭiyattavaramaggena bodhimūlaṃ hi ehiti // Bv_2.63 //

Tato padakkhiṇaṃ katvā bodhimaṇḍaṃ anuttaro /

assattharukkhamūlamhi bujjhissati mahāyaso // Bv_2.64 //

Imassa janikā mātā Māyā nāma bhavissati /

pitā Suddhodano nāma ayaṃ hessati Gotamo // Bv_2.65 //

Anāsavā vītarāgā Santacittā samāhitā /

Kolito Upatisso ca aggā hessanti sāvakā // Bv_2.66 //

Ānando nām’ upaṭṭhāko upaṭṭhissati taṃ jinaṃ /

Khemā Uppalavaṇṇā ca aggā hessanti sāvikā, // Bv_2.67 //

Anāsavā vītarāgā santacittā samāhitā /

bodhi tassa bhagavato assattho ’ti pavuccati // Bv_2.68 //

Citto ca Hatthāḷavako aggā hessant’ upaṭṭhakā /

Uttarā Nandamātā ca aggā hessant’ upaṭṭhikā // Bv_2.69 //

Idaṃ sutvāna vacanaṃ asamassa mahesino /

āmoditā naramarū: buddhabīj’ aṅkuro ayaṃ // Bv_2.70 //

Ukkuṭṭhisaddā vattanti apphoṭhenti hasanti ca /

katañjalī namassanti dasasahassī sadevakā: // Bv_2.71 //

Yad’ imassa lokanāthassa virajjhissāma sāsanaṃ /

anāgatamhi addhāne hessāma sammukhā imaṃ // Bv_2.72 //

Yathā manussā nadiṃ tarantā paṭititthaṃ virajjhiya /

heṭṭhā titthe gahetvāna uttaranti mahānadim, // Bv_2.73 //

Evam-eva mayaṃ sabbe yadi muñcām’ imaṃ jinaṃ /

anāgatamhi addhāne hessāma sammukhā imaṃ // Bv_2.74 //

(014) Dīpaṅkaro lokavidū āhutīnaṃ paṭiggaho /

mama kammaṃ pakittetvā dakkhiṇaṃ padam-uddhari // Bv_2.75 //

Ye tatthāsuṃ jinaputtā padakkhiṇam-akaṃsu maṃ /

devā manussā asurā ca abhivādetvāna pakkamuṃ // Bv_2.76 //

Dassanaṃ me atikkante sasaṅghe lokanāyake /

sayanā vuṭṭhahitvāna pallaṅkam-ābhujiṃ tadā // Bv_2.77 //

Sukhena sukhito homi pāmojjena pamodito /

pītiyā ca abhissanno pallaṅkam-ābhujiṃ tadā // Bv_2.78 //

Pallaṅkena nisīditvā evaṃ cintes’ ahaṃ tadā: /

vasībhūto ahaṃ jhāne abhiññāsu pāramiṅgato // Bv_2.79 //

Sahassiyamhi lokamhi isayo natthi me samā /

asamo iddhidhammesu alabhiṃ īdisaṃ sukhaṃ // Bv_2.80 //

Pallaṅkābhujane mayhaṃ dasasahassādhivāsino /

mahānādaṃ pavattesuṃ: dhuvaṃ buddho bhavissasi // Bv_2.81 //

Yā pubbe bodhisattānaṃ pallaṅkavaram-ābhuje /

nimittāni padissanti tāni ajja padissare // Bv_2.82 //

Sītaṃ vyapagataṃ hoti uṇhañca upasammati /

tāni ajja padissanti, dhuvaṃ buddho bhavissasi // Bv_2.83 //

Dasasahassī lokadhātu nissaddā hoti nirākulā /

tāni ajja padissanti, dhuvaṃ buddho bhavissasi // Bv_2.84 //

Mahāvātā na vāyanti na sandanti savantiyo /

tāni ajja padissanti, dhuvaṃ buddho bhavissasi // Bv_2.85 //

Thalajā dakajā pupphā sabbe pupphanti tāvade /

te p’ ajja pupphitā sabbe, dhuvaṃ buddho bhavissasi // Bv_2.86 //

Latā vā yadi vā rukkhā phalabhārā honti tāvade /

te p’ ajja phalitā sabbe, dhuvaṃ buddho bhavissasi // Bv_2.87 //

Ākasaṭṭhā ca bhummaṭṭhā ratanā jotanti tāvade /

te p’ ajja ratanā jotanti, dhuvaṃ buddho bhavissasi // Bv_2.88 //

Mānusakā ca dibbā ca turiyā vajjanti tāvade /

te p’ ajj’ ubho’ bhiravanti,dhuvaṃ buddho bhavissasi // Bv_2.89 //

Vicittapupphā gaganā abhivassanti tāvade /

te pi ajja padissanti,dhuvaṃ buddho bhavissasi // Bv_2.90 //

(015) Mahāsamuddo ābhujati dasasahassī pakampati /

te p’ ajj’ ubho’ bhiravanti,dhuvaṃ buddho bhavissasi // Bv_2.91 //

Niraye pi dasasahassī aggī nibbanti tāvade /

te p’ ajja nibbutā aggī, dhuvaṃ buddho bhavissasi // Bv_2.92 //

Vimalo hoti suriyo sabbā dissanti tārakā /

te pi ajja padissanti, dhuvaṃ buddho bhavissasi // Bv_2.93 //

Anovaṭṭena udakena mahiyā ubbhijji tāvade /

tam-p’ ajj’ ubbhijjate mahiyā,dhuvaṃ buddho bhavissasi // Bv_2.94 //

Tārāgaṇā virocanti nakkhattā gaganamaṇḍale /

visākhā candimayuttā,dhuvaṃ buddho bhavissasi // Bv_2.95 //

Bilāsayā darīsayā nikkhamanti sakāsayā /

te p’ ajja āsayā chuddhā, dhuvaṃ buddho bhavissasi // Bv_2.96 //

Na hoti arati sattānaṃ santuṭṭhā honti tāvade /

te p’ ajja sabbe santuṭṭhā, dhuvaṃ buddho bhavissasi // Bv_2.97 //

Rogā tad’ ūpasammanti jighacchā ca vinassati /

tāni ajja padissanti, dhuvaṃ buddho bhavissasi // Bv_2.98 //

Rāgo tadā tanu hoti doso moho vinassati /

te p’ ajja vigatā sabbe, dhuvaṃ buddho bhavissasi // Bv_2.99 //

Bhayaṃ tadā na bhavati ajja p’ etaṃ padissati /

tena liṅgena jānāma, dhuvaṃ buddho bhavissasi // Bv_2.100 //

Rajo n’ uddhaṃsatī uddhaṃ ajja p’ etaṃ padissati /

tena liṅgena jānāma, dhuvaṃ buddho bhavissasi // Bv_2.101 //

Aniṭṭhagandho pakkamati dibbagandho pavāyati /

so p’ ajja vāyatī gandho, dhuvaṃ buddho bhavissasi // Bv_2.102 //

Sabbe devā padissanti ṭhapayitvā arūpino /

te p’ ajja sabbe dissanti, dhuvaṃ buddho bhavissasi // Bv_2.103 //

Yāvatā nirayā nāma sabbe dissanti tāvade /

te p’ ajja sabbe dissanti, dhuvaṃ buddho bhavissasi // Bv_2.104 //

Kuḍḍā kavaṭā selā ca na hont’ āvaraṇā tadā /

ākāsabhūtā te p’ ajja, dhuvaṃ buddho bhavissasi // Bv_2.105 //

Cutī ca upapattī ca khaṇe tasmiṃ na vijjati /

tāni ajja padissanti, dhuvaṃ buddho bhavissasi // Bv_2.106 //

(016) Daḷhaṃ paggaṇha viriyaṃ mā nivatti abhikkama /

mayaṃ p’ etaṃ pajānāma,dhuvaṃ buddho bhavissasi // Bv_2.107 //

Buddhassa vacanaṃ sutvā dasasahassīna c’ ūbhayaṃ /

haṭṭhatuṭṭho pamudito evaṃ cintes’ ahaṃ tadā: // Bv_2.108 //

Advejjhavacanā buddhā amoghavacanā jinā /

vitathaṃ natthi buddhānaṃ dhuvaṃ buddho bhavām’ ahaṃ // Bv_2.109 //

Yathā khittaṃ nabhe leḍḍu dhuvaṃ patati bhūmiyaṃ /

tath’ eva buddhaseṭṭhānaṃ vacanaṃ dhuvasassataṃ /

vitathaṃ natthi buddhānaṃ dhuvaṃ buddho bhavām’ ahaṃ // Bv_2.110 //

Yathā’ pi sabbasattānaṃ maraṇaṃ dhuvasassataṃ /

tath’ eva buddhaseṭṭhānaṃ vacanaṃ dhuvasassataṃ /

vitathaṃ natthi buddhānaṃ dhuvaṃ buddho bhavām’ ahaṃ // Bv_2.111 //

Yathā rattikkhaye patte suriyass’ uggamanaṃ dhuvaṃ /

tath’ eva buddhaseṭṭhānam vacanaṃ dhuvasassataṃ /

vitathaṃ natthi buddhānaṃ dhuvaṃ buddho bhavām’ ahaṃ // Bv_2.112 //

Yathā nikkhantasayanassa sīhassa nadanaṃ dhuvaṃ /

tath’ eva buddhaseṭṭhānaṃ vacanaṃ dhuvasassataṃ /

vitathaṃ natthi buddhānaṃ dhuvaṃ buddho bhavām’ ahaṃ // Bv_2.113 //

Yathā āpannasattānaṃ bhāram-oropanaṃ dhuvaṃ /

tath’ eva buddhaseṭṭhānaṃ vacanaṃ dhuvasassataṃ /

vitathaṃ natthi buddhānaṃ dhuvaṃ buddho bhavām’ ahaṃ // Bv_2.114 //

Handa buddhakare dhamme vicināmi ito c’ ito /

uddhaṃ adho dasadisā yāvatā dhammadhātuyā // Bv_2.115 //

Vicinanto tadā’ dakkhiṃ paṭhamaṃ dānapāramiṃ /

pubbakehi mahesīhi anuciṇṇaṃ mahāpathaṃ // Bv_2.116 //

Imaṃ tvaṃ paṭhamaṃ tāva daḷhaṃ katvā samādiya /

dānapāramitaṃ gaccha yadi bodhiṃ pattum-icchasi // Bv_2.117 //

Yathā pi kumbho sampuṇṇo yassa kassaci adhokato /

vamate udakaṃ nissesaṃ na tattha parirakkhati, // Bv_2.118 //

Tath’ eva yācake disvā hīna-m-ukkaṭṭha-majjhime /

dadāhi dānaṃ nissesaṃ kumbho viya adhokato // Bv_2.119 //

(017) Na h’ ete ettakā yeva buddhadhammā bhavissare /

aññe pi vicinissāmi ye dhammā bodhipācanā // Bv_2.120 //

Vicinanto tadā’ dakkhiṃ dutiyaṃ sīlapāramiṃ /

pubbakehi mahesīhi āsevitanisevitaṃ // Bv_2.121 //

Imaṃ tvaṃ dutiyaṃ tāva daḷhaṃ katvā samādiya /

sīlapāramitaṃ gaccha yadi bodhiṃ pattum-icchasi // Bv_2.122 //

Yathā pi camarī vālaṃ kismici paṭilaggitaṃ /

upeti maraṇaṃ tattha na vikopeti vāladhiṃ,// Bv_2.123 //

Tath’ eva catusu bhūmīsu sīlāni paripūraya /

parirakkha sabbadā sīlaṃ camarī viya vāladhiṃ // Bv_2.124 //

Na h’ ete ettakā yeva buddhadhammā bhavissare /

aññe pi vicinissāmi ye dhammā bodhipācanā // Bv_2.125 //

Vicinanto tadā’ dakkhiṃ tatiyaṃ nekkhammapāramiṃ /

pubbakehi mahesīhi āsevitanisevitaṃ // Bv_2.126 //

Imaṃ tvaṃ tatiyaṃ tāva daḷhaṃ katvā samādiya /

nekkhammapāramiṃ gaccha yadi bodhiṃ pattum-icchasi // Bv_2.127 //

Yathā andughare puriso ciravuttho dukha’ ddito /

na tattha rāgaṃ abhijaneti muttiṃ yeva gavesati, // Bv_2.128 //

Tath’ eva tvaṃ sabbabhave passa andughare viya /

nekkhammābhimukho hohi bhavato parimuttiyā // Bv_2.129 //

Na h’ ete ettakā yeva buddhadhammā bhavissare /

aññe pi vicinissāmi ye dhammā bodhipācanā // Bv_2.130 //

Vicinanto tadā’ dakkhiṃ catutthaṃ paññāpāramiṃ /

pubbakehi mahesīhi āsevitanisevitaṃ // Bv_2.131 //

Imaṃ tvaṃ catutthaṃ tāva daḷhaṃ katvā samādiya /

paññāpāramitaṃ gaccha yadi bodhiṃ pattum-icchasi // Bv_2.132 //

Yathā pi bhikkhu bhikkhanto hīna-m-ukkaṭṭha-majjhime /

kulāni na vivajjento evaṃ labhati yāpanaṃ, // Bv_2.133 //

Tath’ eva tvaṃ sabbakālaṃ paripucchaṃ budhaṃ janaṃ /

paññāpāramitaṃ gantvā sambodhiṃ pāpuṇissasi // Bv_2.134 //

(018) Na h’ ete ettakā yeva buddhadhammā bhavissare /

aññe pi vicinissāmi ye dhammā bodhipācanā // Bv_2.135 //

Vicinanto tadā’ dakkhiṃ pañcamaṃ viriyapāramiṃ /

pubbakehi mahesīhi āsevitanisevitaṃ // Bv_2.136 //

Imaṃ tvaṃ pañcamaṃ tāva daḷhaṃ katvā samādiya /

viriyapāramitaṃ gaccha yadi bodhiṃ pattum-icchasi // Bv_2.137 //

Yathā pi sīho migarājā nisajjaṭṭhānacaṅkame /

alīnaviriyo hoti paggahītamano sadā, // Bv_2.138 //

Tath’ eva tvaṃ sabbabhave paggaṇha viriyaṃ daḷhaṃ, /

viriyapāramitaṃ gantvā sambodhiṃ pāpuṇissasi // Bv_2.139 //

Na h’ ete ettakā yeva buddhadhammā bhavissare /

aññe pi vicinissāmi ye dhammā bodhipācanā // Bv_2.140 //

Vicinanto tadā’ dakkhiṃ chaṭṭhamaṃ khantiparamiṃ /

pubbakehi mahesīhi āsevitanisevitaṃ // Bv_2.141 //

Imaṃ tvaṃ chaṭṭhamaṃ tāva daḷhaṃ katvā samādiya /

tattha advejjhamānaso sambodhiṃ pāpuṇissasi // Bv_2.142 //

Yathā pi paṭhavī nāma sucim-pi asucim-pi ca /

sabbaṃ sahati nikkhepaṃ na karoti paṭighaṃ dayaṃ,// Bv_2.143 //

Tath’ eva tvam-pi sabbesaṃ sammānāvamānakkhamo /

khantipāramitaṃ gantvā sambodhiṃ pāpuṇissasi // Bv_2.144 //

Na h’ ete ettakā yeva buddhadhammā bhavissare /

aññe pi vicinissāmi ye dhammā bodhipācanā // Bv_2.145 //

Vicinanto tadā’ dakkhiṃ sattamaṃ saccapāramiṃ /

pubbakehi mahesīhi āsevitanisevitaṃ // Bv_2.146 //

Imaṃ tvaṃ sattamaṃ tāva daḷhaṃ katvā samādiya /

tattha advejjhavacano sambodhiṃ pāpuṇissasi // Bv_2.147 //

Yathā pi osadhī nāma tulābhūtā sadevake /

samaye utuvasse vā na vokkamati vīthito, // Bv_2.148 //

Tath’ eva tvam-pi saccesu nātikkamma hi vīthito /

saccapāramitaṃ gantvā sambodhiṃ pāpuṇissasi // Bv_2.149 //

(019) Na h’ ete ettakā yeva buddhadhammā bhavissare /

aññe pi vicinissāmi ye dhammā bodhipācanā // Bv_2.150 //

Vicinanto tadā’ dakkhiṃ aṭṭhamaṃ adhiṭṭhānapāramiṃ /

pubbakehi mahesīhi āsevitanisevitaṃ // Bv_2.151 //

Imaṃ tvaṃ aṭṭhamaṃ tāva daḷhaṃ katvā samādiya /

tattha tvaṃ acalo hutvā sambodhiṃ pāpuṇissasi // Bv_2.152 //

Yathā pi pabbato selo acalo suppatiṭṭhito /

na kampati bhusavātehi sakaṭṭhane’ va tiṭṭhati, // Bv_2.153 //

Tath’ eva tvam-pi adhiṭṭhāne sabbadā acalo bhava /

adhiṭṭhānapāramitaṃ gantvā sambodhiṃ pāpuṇissasi // Bv_2.154 //

Na h’ ete ettakā yeva buddhadhammā bhavissare /

aññe pi vicinissāmi ye dhammā bodhipācanā // Bv_2.155 //

Vicinanto tadā’ dakkhiṃ navamaṃ mettāpāramiṃ /

pubbakehi mahesīhi āsevitanisevitaṃ // Bv_2.156 //

Imaṃ tvaṃ navamaṃ tāva daḷhaṃ katvā samādiya /

mettāya asamo hohi yadi bodhiṃ pattum-icchasi // Bv_2.157 //

Yathā pi udakaṃ nāma kalyāṇe pāpake jane /

samaṃ pharati sītena pavāheti rajomalaṃ, // Bv_2.158 //

Tath’ eva tvaṃ ahitahite samaṃ mettāya bhāvaya /

mettāpāramitaṃ gantvā sambodhiṃ pāpuṇissasi // Bv_2.159 //

Na h’ ete ettakā yeva buddhadhammā bhavissare /

aññe pi vicinissāmi ye dhammā bodhipācanā // Bv_2.160 //

Vicinanto tadā’ dakkhim dasamaṃ upekkhāparamiṃ /

pubbakehi mahesīhi āsevitanisevitaṃ // Bv_2.161 //

Imaṃ tvaṃ dasamaṃ tāva daḷhaṃ katvā samādiya /

tulābhūto daḷho hutvā sambodhiṃ pāpuṇissasi // Bv_2.162 //

Yathā pi paṭhavī nāma nikkhittaṃ asuciṃ suciṃ /

upekkhati ubho p’ ete kopānunayavajjitā,// Bv_2.163 //

Tath’ eva tvam-pi sukhadukkhe tulābhūto sadā bhava /

upekkhāpāramitaṃ gantvā sambodhiṃ pāpuṇissasi // Bv_2.164 //

(020) Ettakā yeva te loke ye dhammā bodhipācanā /

tat’ uddhaṃ n’ atthi aññatra daḷhaṃ tattha patiṭṭhaha // Bv_2.165 //

Ime dhamme sammasato sabhāvasarasalakkhaṇe /

dhammatejena vasudhā dasasahassī pakampatha // Bv_2.166 //

Calati ravati paṭhavī ucchuyantaṃ va pīḷitaṃ /

telayante yathā cakkaṃ evaṃ kampati medinī // Bv_2.167 //

Yavatā parisā āsi buddhassa parivesane /

pavedhamānā sā tattha mucchitā seti bhūmiyā // Bv_2.168 //

Ghaṭānekasahassāni kumbhīnañca satā bahū /

sañcuṇṇamathitā tattha aññamaññaṃ paghaṭṭitā // Bv_2.169 //

Ubbiggā tasitā bhītā bhantā vyādhitamānasā /

mahājanā samāgamma Dīpaṅkaram-upāgamum: // Bv_2.170 //

Kiṃ bhavissati lokassa kalyāṇam-atha pāpakaṃ /

sabbo upadduto loko taṃ vinodehi cakkhuma // Bv_2.171 //

Tesaṃ tadā saññapesī Dīpaṅkaro mahāmuni /

vissatthā hotha mā bhātha imasmiṃ puthuvikampane // Bv_2.172 //

Yam-ahaṃ ajja vyākāsiṃ: buddho loke bhavissati /

eso sammasatī dhammaṃ pubbakaṃ jinasevitaṃ // Bv_2.173 //

Tassa sammasato dhammaṃ buddhabhūmiṃ asesato /

tenāyaṃ kampitā puthuvī dasasahassī sadevake // Bv_2.174 //

Buddhassa vacanaṃ sutvā mano nibbāyi tāvade /

sabbe maṃ upasaṅkamma punā’ pi abhivandisuṃ // Bv_2.175 //

Samādiyitvā buddhaguṇaṃ daḷhaṃ katvāna mānasaṃ /

Dīpaṅkaraṃ namassitvā āsanā vuṭṭhahiṃ tadā // Bv_2.176 //

Dibbaṃ mānusakaṃ pupphaṃ devā mānusakā ubho /

samokiranti puppehi vuṭṭhahantassa āsanā // Bv_2.177 //

Vedayanti ca te sotthiṃ devā mānusakā ubho /

mahantaṃ patthitaṃ tuyhaṃ taṃ labhassu yath’ icchitaṃ // Bv_2.178 //

Sabb’ ītiyo vivajjantu soko rogo vinassatu /

mā te bhavatvantarāyo phusa khippaṃ bodhim-uttamaṃ // Bv_2.179 //

Yathā pi samaye patte pupphanti pupphino dumā /

tath’ eva tvaṃ mahāvīra buddhañāṇena pupphasi // Bv_2.180 //

(021) Yathā ye keci sumbuddhā pūrayuṃ dasapāramī /

tath’ eva tvaṃ mahāvīra pūraya dasapāramī // Bv_2.181 //

Yathā ye keci sambuddhā bodhimaṇḍamhi bujjhare /

tath’ eva tvaṃ mahāvīra bujjhassu jinabodhiyaṃ // Bv_2.182 //

Yathā ye keci sambuddhā dhammacakkaṃ pavattayuṃ /

tath’ eva tvaṃ mahāvīra dhammacakkaṃ pavattaya // Bv_2.183 //

Puṇṇamāse yathā cando parisuddho virocati /

tath’ eva tvaṃ puṇṇamano viroca dasasahassiyaṃ // Bv_2.184 //

Rāhumutto yathā suriyo tāpena atirocati /

tath’ eva lokā muñcitvā viroca siriyā tvaṃ // Bv_2.185 //

Yathā yā kāci nadiyo osaranti mahodadhiṃ /

evaṃ sadevakā lokā osarantu tav’ antike // Bv_2.186 //

Tehi thutappasattho so dasadhamme samādiya /

te dhamme paripūrento pavanaṃ pāvisī tadā ’ti // Bv_2.187 //

Sumedhakathā niṭṭhitā

Tadā te bhojayitvāna sasaṅghaṃ lokanāyakaṃ /

upagañchuṃ saraṇaṃ tassa Dīpaṅkarassa satthuno // Bv_2.188 //

Saraṇāgamane kañci nivesesi Tathāgato /

kañci pañcasu sīlesu sīle dasavidhe paraṃ // Bv_2.189 //

Kassaci deti sāmaññaṃ caturo phala-m-uttame /

kassaci asame dhamme deti so paṭisambhidā // Bv_2.190 //

Kassaci varasamāpattiyo aṭṭha deti narāsabho /

tisso kassaci vijjāyo chaḷabhiññā pavecchati // Bv_2.191 //

Tena yogena janakāyaṃ ovadati mahāmuni /

tena vitthārikaṃ āsi lokanāthassa sāsanaṃ // Bv_2.192 //

Mahāhanūsabhakkhandho Dīpaṅkarasanāmako /

bahū jane tārayati parimoceti duggatiṃ // Bv_2.193 //

Bodhaneyyaṃ janaṃ disvā satasahasse pi yojane /

khaṇena upagantvāna bodheti taṃ mahāmuni // Bv_2.194 //

(022) Paṭhamābhisamaye buddho koṭisatam-abodhayi /

dutiyābhisamaye nātho navutikoṭim-abodhayi // Bv_2.195 //

Yadā ca devabhavanamhi buddho dhammam-adesayi /

navutikoṭisahassānaṃ tatiyābhisamayo ahu // Bv_2.196 //

Sannipātā tayo āsuṃ Dīpaṅkarassa satthuno /

koṭisatasahassānaṃ paṭhamo āsi samāgamo // Bv_2.197 //

Puna Nāradakūṭamhi pavivekagate jine /

khīṇāsavā vītamalā samiṃsu satakoṭiyo // Bv_2.198 //

Yamhi kāle mahāvīro Sudassanasil’ uccaye /

navutikoṭisahassehi pavāresi mahāmuni,// Bv_2.199 //

Ahaṃ tena samayena jaṭilo uggatāpano /

antalikkhamhi caraṇo pañcābhiññāsu pāragū // Bv_2.200 //

Dasavīsasahassānaṃ dhammābhisamayo ahu /

ekadvinnaṃ abhisamayo gaṇanāto asaṅkhiyo // Bv_2.201 //

Vitthārikaṃ bāhujaññaṃ iddhaṃ phītaṃ ahū tadā /

Dīpaṅkarassa bhagavato sāsanaṃ suvisodhitaṃ // Bv_2.202 //

Cattāri satasahassāni chaḷabhiññā mah’ iddhikā /

Dīpaṅkaraṃ lokaviduṃ parivārenti sabbadā // Bv_2.203 //

Ye keci tena samayena jahanti mānusaṃ bhavaṃ /

appattamānasā sekhā garahitā’ va bhavanti te // Bv_2.204 //

Supupphitaṃ pāvacanaṃ arahantehi tādihi /

khīṇāsavehi vimalehi upasobhati sabbadā // Bv_2.205 //

Nagaraṃ Rammavatī nāma Sudevo nāma khattiyo /

Sumedhā nāma janikā Dīpaṅkarassa satthuno // Bv_2.206 //

Dasavassasahassāni agāraṃ ajjha so vasī /

Haṃsā Koñcā Mayūrā ca tayo pāsāda-m-uttamā // Bv_2.207 //

Tīṇi satasahassāni nāriyo samalaṅkatā /

Padumā nāma sā nārī Usabhakkhandho nāma atrajo // Bv_2.208 //

Nimitte caturo disvā hatthiyānena nikkhami /

anūnadasamāsāni padhānaṃ padahī jino // Bv_2.209 //

Padhānacāraṃ caritvā abujjhi mānasaṃ muni /

Brahmunā yācito santo Dīpaṅkaro mahāmuni, // Bv_2.210 //

(023) Vatti cakkuṃ mahāvīro Nandārāme sirīdhare /

nisinno sirīsamūlamhi akā titthiyamaddanaṃ // Bv_2.211 //

Sumaṅgalo ca Tisso ca ahesuṃ aggasāvakā /

Sāgato nām’ upaṭṭhāko Dīpaṅkarassa satthuno // Bv_2.212 //

Nandā c’ eva Sunandā ca ahesuṃ aggasāvikā /

bodhi tassa bhagavato pipphalī ’ti pavuccati // Bv_2.213 //

Tapassu-Bhallikā nāma ahesuṃ agg’ upaṭṭhakā /

Sirimā Soṇā upaṭṭhikā Dīpaṅkarassa satthuno // Bv_2.214 //

Asītihattha-m-ubbedho Dīpaṅkaro mahāmuni /

sobhati dīparukkho va sālarāja va phullito // Bv_2.215 //

Satasahassavassāni āyu tassa mahesino /

tāvatā tiṭṭhamāno so tāresi janataṃ bahuṃ // Bv_2.216 //

Jotayitvāna saddhammaṃ santāretvā mahājanaṃ /

jalitvā aggikkhandho va nibbuto so sasāvako // Bv_2.217 //

Sā ca iddhi so ca yaso tāni ca pādesu cakkaratanāni /

sabbaṃ samantarahitaṃ nanu rittā sabbasaṅkhārā // Bv_2.218 //

Dīpaṅkaro jino satthā Nandārāmamhi nibbuto /

tatth’ eva tassa jinathūpo chattiṃs’ ubbedhayojano ’ti // Bv_2.219 //

Dīpaṅkarassa bhagavato vaṃso paṭhamo

(024) Blank Page. (025) Blank Page.

(026) III -- KOṆḌAÑÑABUDDHAVAṂSO

Dīpaṅkarassa aparena Koṇḍañño nāma nāyako /

anantatejo amitayaso appameyyo durāsado // Bv_3.1 //

Dharaṇ’ ūpamo khamanena sīlena sāgar’ ūpamo /

samādhinā Merusamo ñāṇena gagan’ ūpamo // Bv_3.2 //

Indriyabalabojjhaṅga-maggasaccappakāsanaṃ /

pakāsesi sadā buddho hitāya sabbapāṇinaṃ // Bv_3.3 //

Dhammacakkappavattente Koṇḍaññe lokanāyake /

koṭisatasahassānaṃ paṭhamābhisamayo ahū // Bv_3.4 //

Tato param-pi desente naramarūnaṃ samāgame /

navutikoṭisahassānaṃ dutiyābhisamayo ahū // Bv_3.5 //

Titthiye abhimaddanto yadā dhammam-adesayi /

asītikoṭisahassānaṃ tatiyābhisamayo ahū // Bv_3.6 //

Sannipātā tayo āsuṃ Koṇḍaññassa mahesino /

khīṇāsavānaṃ vimalānaṃ santacittāna tādinaṃ // Bv_3.7 //

Koṭisatasahassānaṃ paṭhamo āsi samāgamo /

dutiyo koṭisahassānaṃ tatiyo navuti koṭinaṃ // Bv_3.8 //

Ahaṃ tena samayena Vijitāvī nāma khattiyo /

samuddaṃ antam-antena isseraṃ vattayām-ahaṃ // Bv_3.9 //

Koṭisatasahassānaṃ vimalānaṃ mahesinaṃ /

saha lok’ agganāthena param’ annena tappayiṃ // Bv_3.10 //

So pi maṃ buddho vyākāsi Koṇḍañño lokanāyako’ /

aparimeyye ito kappe buddho loke bhavissati // Bv_3.11 //

Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāyaso // Bv_3.12 //

Imassa janikā mātā Māyā nāma bhavissati /

pitā Suddhodano nāma ayaṃ hessati Gotamo // Bv_3.13 //

Kolito Upatisso ca aggā hessanti sāvakā /

Ānando nām’ upaṭṭhāko upaṭṭhissati taṃ jinaṃ // Bv_3.14 //

(027) Khemā Uppalavaṇṇā ca aggā hessanti sāvikā /

bodhi tassa bhagavato assattho ’ti pavuccati // Bv_3.15 //

Citto ca Hatthāḷavako aggā hessant’ upaṭṭhakā /

Uttarā Nandamātā ca aggā hessant’ upaṭṭhikā /

āyu vassasataṃ tassa Gotamassa yasassino // Bv_3.16 //

Idaṃ sutvāna vacanaṃ asamassa mahesino /

āmoditā naramarū: buddhabīj’ aṅkuro ayaṃ // Bv_3.17 //

Ukkuṭṭhisaddā vattanti apphoṭhenti hasanti ca /

katañjalī namassanti dasasahassī sadevakā: // Bv_3.18 //

Yad’ imassa lokanāthassa virajjhissāma sāsanaṃ /

anāgatamhi addhāne hessāma sammukhā imaṃ // Bv_3.19 //

Yathā manussā nadiṃ tarantā paṭititthaṃ virajjhiya /

heṭṭhā titthe gahetvāna uttaranti mahānadiṃ, // Bv_3.20 //

Evam-eva mayaṃ sabbe yadi muñcām’ imaṃ jinaṃ /

anāgatamhi addhāne hessāma sammukhā imaṃ // Bv_3.21 //

Tassāhaṃ vacanaṃ sutvā bhiyyo cittaṃ pasādayiṃ /

tam-eva atthaṃ sādhento mahārajjaṃ jine adaṃ /

mahārajjaṃ cajitvāna pabbajiṃ tassa santike // Bv_3.22 //

Suttantaṃ vinayañcā’ pi navaṅgaṃ satthusāsanaṃ /

sabbaṃ pariyāpuṇitvāna sobhayiṃ jinasāsanaṃ // Bv_3.23 //

Tatth’ appamatto viharanto nisajjaṭṭhānacaṅkame /

abhiññāpāramiṃ gantvā brahmalokam-agañch’ ahaṃ // Bv_3.24 //

Nagaraṃ Rammavatī nāma Sunando nāma khattiyo /

Sujātā nāma janikā Koṇḍaññassa mahesino // Bv_3.25 //

Dasavassasahassāni agāraṃ ajjha so vasī /

Ruci Suruci subho tayo pāsada-m-uttamā // Bv_3.26 //

Tīṇi satasahassāni nāriyo samalaṅkatā /

Rucidevī nāma nārī Vijitaseno nāma atrajo // Bv_3.27 //

Nimitte caturo disvā rathayānena nikkhami /

anūnadasamāsāni padhānaṃ padahī jino // Bv_3.28 //

Brahmunā yācito santo Koṇḍañño dvipad’ uttamo /

vatti cakkaṃ mahāvīro devānaṃ nagar’ uttame // Bv_3.29 //

(028) Bhaddo c’ eva Subhaddo ca ahesuṃ aggasāvakā /

Anuruddho nām’ upaṭṭhāko Koṇḍaññassa mahesino // Bv_3.30 //

Tissā ca Upatissā ca ahesuṃ aggasāvikā /

Sālakalyāṇikā bodhi Koṇḍaññassa mahesino // Bv_3.31 //

Soṇo ca Upasoṇo ca ahesuṃ agg’ upaṭṭhakā /

Nandā c’ eva Sirimā ca ahesuṃ agg’ upaṭṭhakā // Bv_3.32 //

So aṭṭhāsīti hatthāni accuggato mahāmuni /

sobbati ulurājā va suriyo majjhantike yathā // Bv_3.33 //

Vassasatasahassāni āyu vijjati tāvade /

tāvatā tiṭṭhamāno so tāresi janataṃ bahuṃ // Bv_3.34 //

Khīṇāsavehi vimalehi vicittā āsi medinī /

yathā gaganam-ulūhi evaṃ so upasobhatha // Bv_3.35 //

Te pi nāgā appameyyā asaṅkhobhā durāsadā /

vijjupātaṃ va dassetvā nibbutā te mahāyasā // Bv_3.36 //

Sā ca atuliyā jinassa iddhi ñāṇaparibhāvito ca samādhi /

sabbaṃ samantarahitaṃ nanu rittā sabbasaṅkhārā // Bv_3.37 //

Koṇḍañño pavaro Buddho Candārāmamhi nibbuto /

tatth’ eva cetiyo citto sattayojanam-ussito ’ti // Bv_3.38 //

Koṇḍaññassa bhagavato vaṃso dutiyo

(029) IV -- MAṄGALABUDDHAVAṂSO

Koṇḍaññassa aparena Maṅgalo nāma nāyako /

tamaṃ loke nihantvāna dhammokkam-abhidhārayi // Bv_4.1 //

Atulā pi pabhā tassa jineh’ aññehi uttariṃ /

candasuriyapabhaṃ hantvā dasasahassī virocati // Bv_4.2 //

So pi buddho pakāsesi catusaccavar’ uttame /

te te saccarasaṃ pītvā vinodenti mahātamaṃ // Bv_4.3 //

Patvāna bodhim-atulaṃ paṭhame dhammadesane, /

koṭisatasahassānaṃ paṭhamābhisamayo ahu // Bv_4.4 //

Sur’ indadevabhavane buddho dhammam-adesayi,/

nava koṭisahassānaṃ dutiyābhisamayo ahu // Bv_4.5 //

Yadā Sunando cakkavattī sambuddhaṃ upasaṅkami /

tadā ahani sambuddho dhammabheriṃ var’ uttamaṃ // Bv_4.6 //

Sunandassānucarā janatā tadāsuṃ navutikoṭiyo /

sabbe pi te niravasesā ahesuṃ ehi-bhikkhukā // Bv_4.7 //

Sannipātā tayo āsuṃ Maṅgalassa mahesino /

Koṭisatasahassānaṃ paṭhamo āsi samāgamo // Bv_4.8 //

Dutiyo koṭisahassānaṃ tatiyo navutikoṭinaṃ /

khīṇāsavānaṃ vimalānaṃ tadā āsi samāgamo // Bv_4.9 //

Ahaṃ tena samayena Surucī nāma brāhmaṇo /

ajjhāyako mantadharo tiṇṇaṃ vedāna pāragū // Bv_4.10 //

Tam-ahaṃ upasaṅkamma saraṇaṃ gantvāna satthuno /

sambuddhapamukhaṃ saṅghaṃ gandhamālena pūjayiṃ, /

pūjetvā gandhamālena gavapānena tappayiṃ // Bv_4.11 //

So pi maṃ buddho vyākāsi Maṅgalo dvipad’ uttamo: /

aparimeyye ito kappe ayaṃ buddho bhavissati // Bv_4.12 //

Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāyaso // Bv_4.13 //

(030) Tassāpi vacanaṃ sutvā bhiyyo cittaṃ pasādayiṃ /

uttariṃ vataṃ adhiṭṭhāsiṃ dasapāramipūriyā // Bv_4.14 //

Tadā pītim-anubrūhanto sambodhivarapattiyā /

buddhe datvāna maṃ gehaṃ pabbajiṃ tassa santike // Bv_4.15 //

Suttantaṃ vinayañcā’ pi navaṅgaṃ satthusāsanaṃ /

sabbaṃ pariyāpuṇitvāna sobhayiṃ jinasāsanaṃ // Bv_4.16 //

Tatth’ appamatto viharanto brahmaṃ bhāvetva bhāvanaṃ /

abhiññāsu pāramiṃ gantvā brahmalokam-agacch’ ahaṃ // Bv_4.17 //

Nagaraṃ Uttaraṃ nāma Uttaro nāma khattiyo /

Uttarā nāma janikā Maṅgalassa mahesino // Bv_4.18 //

Nava vassasahassāni agāraṃ ajjha so vasī /

Yasavā Sucimā Sirimā tayo pāsāda-m-uttamā // Bv_4.19 //

Samatiṃsasahassāni nāriyo samalaṅkatā /

Yasavatī nāma nārī Sīvalo nāma atrajo // Bv_4.20 //

Nimitte caturo disvā assayānena nikkhami /

anūnakam-aṭṭhamāsaṃ padhānaṃ padahī jino // Bv_4.21 //

Brahmunā yācito santo Maṅgalo lokanāyako /

vatti cakkaṃ mahāvīro vane Sirivar’ uttame // Bv_4.22 //

Sudevo Dhammaseno ca ahesuṃ aggasāvakā /

Pālito nām’ upaṭṭhāko Maṅgalassa mahesino // Bv_4.23 //

Sīvalā ca Asokā ca ahesuṃ aggasāvikā /

bodhi tassa bhagavato nāgarukkho ’ti vuccati // Bv_4.24 //

Nando c’ eva Visākho ca ahesuṃ agg’ upaṭṭhakā /

Anulā c’ eva Sutanā ca ahesuṃ agg’ upaṭṭhikā // Bv_4.25 //

Aṭṭhāsiti ratanāni accuggato mahāmuni /

tato niddhāvanti raṃsī anekasatasahassiyo // Bv_4.26 //

Navuti vassasahassāni āyu vijjati tāvade /

tāvatā tiṭṭhamāno so taresi janataṃ bahuṃ // Bv_4.27 //

Yathā pi sāgare ūmī na sakkā tā gaṇetuye /

tath’ eva sāvakā tassa na sakkā te gaṇetuye // Bv_4.28 //

(031) Yāva-d-aṭṭhāsi sambuddho Maṅgalo lokanāyako /

na tassa sāsane atthi saṅkilesamaraṇaṃ tadā // Bv_4.29 //

Dhamokkaṃ dhārayitvāna santāretvā mahājanaṃ /

jalitvā dhūmaketū’ va nibbuto so mahāyaso // Bv_4.30 //

Saṅkhārānaṃ sabhāvattaṃ dassayitvā sadevake /

jalitvā aggikkhandho va suriyo atthaṅgato yathā, // Bv_4.31 //

Uyyāne Vessare nāma buddho nibbāyi Maṅgalo /

tatth’ eva tassa jinathūpo tiṃsayojana-m-uggato ti // Bv_4.32 //

Maṅgalassa bhagavato vaṃso tatiyo

(032) V -- SUMANABUDDHAVAṂSO

Maṅgalassa aparena Sumano nāma nāyako /

sabbadhammehi asamo sabbasattānam-uttamo // Bv_5.1 //

So pi tadā amatabheriṃ ahanī Mekhale pure, /

dhammasaṅkhasamāyuttaṃ navaṅgaṃ jinasāsanaṃ // Bv_5.2 //

Nijjinitvā kilese so patvā sambodhim-uttamaṃ /

māpesi nagaraṃ satthā dhammapuravar’ uttamaṃ // Bv_5.3 //

4Nirantaraṃ akuṭilaṃ ujuṃ vipulavitthataṃ /

māpesi so mahāvīthiṃ satipaṭṭhānavar’ uttamaṃ // Bv_5.4 //

Phale cattāri sāmaññe catasso paṭisambhidā /

chaḷabhiññāṭṭhasamāpatti pasāresi tattha vīthiyaṃ // Bv_5.5 //

Ye appamattā akhilā hiriviriyeh’ upāgatā /

te te ime guṇavare ādiyanti yathā sukhaṃ // Bv_5.6 //

Evam-etena yogena uddharanto mahājanaṃ /

bodhesi paṭhamaṃ satthā koṭisahassiyo // Bv_5.7 //

Yamhi kāle mahāvīro ovadī titthiye gaṇe /

koṭisahassābhisamiṃsu dutiye dhammadesane // Bv_5.8 //

Yadā devā manussā ca samaggā ekamānasā /

nirodhapañhaṃ pucchiṃsu saṃsayañcāpi mānasaṃ,// Bv_5.9 //

Tadā pi dhammadesane nirodhaparidīpane /

navutikoṭisahassānaṃ tatiyābhisamayo ahu // Bv_5.10 //

Sannipātā tayo āsuṃ Sumanassa mahesino /

khīṇāsavānaṃ vimalānaṃ santacittāna tādinaṃ // Bv_5.11 //

Vassaṃ vutthassa bhagavato abhighuṭṭhe pavāraṇe /

koṭisatasahassehi pavāresi tathāgato // Bv_5.12 //

Tato paraṃ sannipāte vimale Kañcanapabbate /

navutikoṭisahassānaṃ dutiyo āsi samāgamo // Bv_5.13 //

Yadā Sakko devarājā buddhadassan’ upāgami /

asītikoṭisahassānaṃ tatiyo āsi samāgamo // Bv_5.14 //

(033) Ahaṃ tena samayena nāgarājā mah’ iddhiko /

Atulo nāma nāmena ussannakusalasañcayo // Bv_5.15 //

Tadā’ haṃ nāgabhavanā nikkhamitvā sañātibhi /

nāgānaṃ dibbaturiyehi sasaṅghaṃ jinam-upaṭṭhahiṃ // Bv_5.16 //

Koṭisatasahassānaṃ annapānena tappayiṃ /

paccekadussayugaṃ datvā saraṇaṃ taṃ upāgamiṃ // Bv_5.17 //

So pi maṃ buddho vyākāsi Sumano lokanāyako: /

aparimeyye ito kappe ayaṃ buddho bhavissati // Bv_5.18 //

Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāyaso // Bv_5.19 //

Tassāpi vacanaṃ sutvā bhiyyo cittaṃ pasādayiṃ /

uttariṃ vatam-adhiṭṭhāsiṃ dasapāramipūriyā // Bv_5.20 //

Mekhalaṃ nāma nagaraṃ Sudatto nāma khattiyo /

Sirimā nāma janikā Sumanassa mahesino // Bv_5.21 //

Navavassasahassāni agāraṃ ajjha so vasi /

Cando Sucando Vaṭaṃso ca tayo pāsāda-m-uttamā // Bv_5.22 //

Tesaṭṭhisatasahassāni nāriyo samalaṅkatā, /

Vaṭaṃsikā nāma nārī Anūpamo nāma atrajo // Bv_5.23 //

Nimitte caturo disvā hatthiyānena nikkhami /

anūnadasamāsāni padhānaṃ padahī jino // Bv_5.24 //

Brahmunā yacito santo Sumano lokanāyako /

vatti cakkaṃ mahāvīro Mekhale puravar’ uttame // Bv_5.25 //

Saraṇo Bhāvitatto ca ahesuṃ aggasāvakā /

Udeno nām’ upaṭṭhāko Sumanassa mahesino // Bv_5.26 //

Soṇā ca Upasoṇā ca ahesuṃ aggasāvikā /

so pi buddho amitayaso nāgamūle abujjhatha // Bv_5.27 //

Varuṇo ca Saraṇo ca ahesuṃ agg’ upaṭṭhakā /

Cālā ca Upacālā ca ahesuṃ agg’ upaṭṭhikā // Bv_5.28 //

Uccattanena so buddho navutihatthasamuggato /

kañcan’ agghiyasaṅkāso dasasahassī virocatha // Bv_5.29 //

(034) Navutivassasahassāni āyu vijjati tāvade /

tāvatā tiṭṭhamāno so tāresi janataṃ bahuṃ // Bv_5.30 //

Tāraṇīye tārayitvā bodhanīye ca bodhayī /

parinibbāyi sambuddho ulurājā va atthamī // Bv_5.31 //

Te pi khīṇāsavā bhikkhū so pi buddho asādiso /

atulaṃ pabhaṃ dassayitvā nibbutā te mahāyasā // Bv_5.32 //

Tañca ñāṇaṃ atuliyaṃ tāni cātuliyāni ratanāni /

sabbaṃ samantarahitaṃ nanu rittā sabbasaṅkhārā // Bv_5.33 //

Sumano yasadharo buddho Aṅgārāmamhi nibbuto /

tatth’ eva tassa jinathūpo catuyojana-m-uggato ti // Bv_5.34 //

Sumanassa bhagavato vaṃso catuttho

(035) VI -- REVATABUDDHAVAṂSO

Sumanassa aparena Revato nāma nāyako /

anūpamo asadiso atulo uttamo jino // Bv_6.1 //

So pi dhammaṃ pakāsesi brahmunā abhiyācito /

khandhadhātuvavatthānaṃ appavattaṃ bhavābhave // Bv_6.2 //

Tassābhisamayā tīni ahesuṃ dhammadesane /

gaṇanāya na vattabbo paṭhamābhisamayo ahū // Bv_6.3 //

Yadā Arindamaṃ rājaṃ vinesi Revato muni /

tadā koṭisahassānaṃ dutiyābhisamayo ahū // Bv_6.4 //

Sattāhaṃ paṭisallānā vuṭṭhahitvā narāsabho /

koṭisataṃ naramarūnaṃ vinesi uttame phale // Bv_6.5 //

Sannipātā tayo āsuṃ Revatassa mahesino /

khīṇāsavānaṃ vimalānaṃ suvimuttāna tādinaṃ // Bv_6.6 //

Atikkantā gaṇanapathaṃ paṭhamaṃ ye samāgatā /

koṭisatasahassānaṃ dutiyo āsi samāgamo // Bv_6.7 //

Yo so paññāya asamo tassa cakkānuvattako /

so tadā vyādhito āsi patto jīvitasaṃsayaṃ // Bv_6.8 //

Tassa gilānapucchāya ye tadā upagatā munī /

koṭisatasahassā arahanto tatiyo āsi samāgamo // Bv_6.9 //

Ahaṃ tena samayena Atidevo nāma brāhmaṇo /

upagantvā Revataṃ buddhaṃ saraṇaṃ tass’ agacch’ ahaṃ // Bv_6.10 //

Tassa sīlaṃ samādhiñca paññāguṇavar’ uttamaṃ /

thomayitvā yathā thomaṃ uttarīyam-adās’ ahaṃ // Bv_6.11 //

So pi maṃ buddho vyākāsi Revato lokanāyako: /

aparimeyye ito kappe ayaṃ buddho bhavissati // Bv_6.12 //

Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāyaso // Bv_6.13 //

(036) Tassāpi vacanaṃ sutvā bhiyyo cittaṃ pasādayiṃ /

uttariṃ vatam-adhiṭṭhāsiṃ dasapāramipūriyā // Bv_6.14 //

Tadāp’ imaṃ buddhadhammaṃ saritvā anubrūhayiṃ /

āharissāmi taṃ dhammaṃ yaṃ mayhaṃ abhipatthitaṃ // Bv_6.15 //

Nagaraṃ Sudhammakaṃ nāma Vipulo nāma khattiyo /

Vipulā nāma janikā Revatassa mahesino // Bv_6.16 //

Chabbassasahassāni agāraṃ ajjha so vasi /

Sudassano ca Ratan’ agghī Avelo ca vibhūsito, /

puññakammābhinibbattā tayo pasāda-m-uttamā // Bv_6.17 //

Tettiṃsa ca sahassāni nāriyo samalaṅkatā, /

Sudassanā nāma devī Varuṇo nāma atrajo // Bv_6.18 //

Nimitte caturo disvā rathayānena nikkhami /

anūnasattamāsāni padhānaṃ padahī jino // Bv_6.19 //

Brahmunā yācito santo Revato lokanāyako /

Vatti cakkaṃ mahāvīro Varuṇārāme sirīghane // Bv_6.20 //

Varuṇo Brahmadevo ca ahesuṃ aggasāvakā /

Sambhavo nām’ upaṭṭhāko Revatassa mahesino // Bv_6.21 //

Bhaddā c’ eva Subhaddā ca ahesuṃ aggasāvikā /

so pi buddho asamasamo nāgamūle abujjhatha // Bv_6.22 //

Padumo Kuñjaro c’ eva ahesuṃ agg’ upaṭṭhakā /

Sirimā c’ eva Yasavatī ahesuṃ agg’ upaṭṭhikā // Bv_6.23 //

Uccattanena so buddho asīti hattha-m-uggato /

obhāseti disā sabbā indaketū33’ va uggato // Bv_6.24 //

Tassa sarīre nibbattā pabhāmālā anuttarā /

divā vā yadi vā rattiṃ samantā phari yojanaṃ // Bv_6.25 //

Saṭṭhivassasahassāni āyu vijjati tāvade /

tāvatā tiṭṭhamāno so tāresi janataṃ bahuṃ // Bv_6.26 //

Dassayitvā buddhabalaṃ amataṃ loke pakāsayaṃ /

nibbāyi anupādāno yath’ agg’ upādānasaṅkhayā // Bv_6.27 //

So ca kāyo ratananibho so ca dhammo asādiso /

sabbaṃ samantarahitaṃ nanu rittā sabbasaṅkhārā // Bv_6.28 //

(037) Revato yasadharo buddho nibbuto so mahāpure /

dhātuvitthārikaṃ āsi tesu tesu padesato ti // Bv_6.29 //

Revatassa bhagavato vaṃso pañcamo

(038) VII -- SOBHITABUDDHAVAṂSO

Revatassa aparena Sobhito nāma nāyako /

samāhito santacitto asamo appaṭipuggalo // Bv_7.1 //

So jino sakagehamhi mānasaṃ vinivaṭṭayi /

patvāna kevalaṃ bodhiṃ dhammacakkaṃ pavattayi // Bv_7.2 //

Yāva heṭṭhā Avīcito bhavaggā cāpi uddhato /

etth’ antare ekaparisā ahosi dhammadesane // Bv_7.3 //

Tāya parisāya sambuddho dhammacakkaṃ pavattayi /

gaṇanāya na vattabbo paṭhamābhisamayo ahu // Bv_7.4 //

Tato param-pi desente naramarūnaṃ samāgame /

navutikoṭisahassānaṃ dutiyābhisamayo ahu // Bv_7.5 //

Punāparaṃ rājaputto Jayaseno nāma khattiyo /

ārāmaṃ ropayitvāna buddhe nīyādayī tadā // Bv_7.6 //

Tassa yāgaṃ pakittento dhammaṃ desesi cakkhumā /

tadā koṭisahassānaṃ tatiyābhisamayo ahu // Bv_7.7 //

Sannipātā tayo āsuṃ Sobhitassa mahesino /

khīṇāsavānaṃ vimalānaṃ santacittāna tādinaṃ // Bv_7.8 //

Uggato nāma so rājā dānaṃ deti nar’ uttame /

tamhi dāne samāgañchuṃ arahantā satakoṭiyo // Bv_7.9 //

Punāparaṃ puragaṇo dānaṃ deti nar’ uttame /

tadā navutikoṭīnaṃ dutiyo āsi samāgamo // Bv_7.10 //

Devaloke vasitvāna yadā orohatī jino /

tadā asītikoṭīnam tatiyo āsi samāgamo // Bv_7.11 //

Ahaṃ tena samayena Sujāto nāma brāhmaṇo /

tadā sasāvakaṃ buddhaṃ annapānena tappayiṃ // Bv_7.12 //

So pi maṃ buddho vyākāsi Sobhito lokanāyako /

aparimeyye ito kappe ayaṃ buddho bhavissati // Bv_7.13 //

Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāvaso // Bv_7.14 //

(039) Tassāpi vacanaṃ sutvā haṭṭho saṃviggamānaso /

tam-ev’ attham-anuppattiyā uggaṃ dhitim-akās’ ahaṃ // Bv_7.15 //

Sudhammaṃ nāma nagaraṃ Sudhammo nāma khattiyo /

Sudhammā nāma janikā Sobhitassa mahesino // Bv_7.16 //

Navavassasahassāni agāraṃ ajjha so vasi /

Kumudo Kalīro Padumo tayo pāsāda-m-uttamā // Bv_7.17 //

Chasattati-sahassāni nāriyo samalaṅkatā /

Samaṅgī nāma sā nārī Sīho nām’ āsi atrajo // Bv_7.18 //

Nimitte caturo disvā pāsādenābhinikkhami /

sattāhaṃ padhānacāraṃ caritvā puris’ uttamo, // Bv_7.19 //

Brahmunā yācito santo Sobhito lokanāyako /

vatti cakkaṃ mahāvīro Sudhamm’ uyyāna-m-uttame // Bv_7.20 //

Asamo ca Sunetto ca ahesuṃ aggasāvakā /

Anumo nām’ upaṭṭhāko Sobhitassa mahesino // Bv_7.21 //

Nakulā ca Sujātā ca ahesuṃ aggasāvikā /

bujjhamāno ca so buddho nāgamūle abujjhatha // Bv_7.22 //

Rammo c’ eva Sudatto ca ahesuṃ agg’ upaṭṭhakā /

Nakulā c’ eva Cittā ca ahesuṃ agg’ upaṭṭhikā // Bv_7.23 //

Aṭṭhapaññāsaratanaṃ accuggato mahāmuni /

obhāseti disā sabbā sataraṃsīva uggato // Bv_7.24 //

Yathā suphullaṃ pavanaṃ nānāgandhehi dhūpitaṃ /

tath’ eva tassa pāvacanaṃ sīlagandhehi dhūpitaṃ // Bv_7.25 //

Yathā pi sāgaro nāma dassanena atappiyo /

tath’ eva tassa pāvacanaṃ savaṇena atappiyaṃ // Bv_7.26 //

Navutivassasahassāni āyu vijjati tāvade /

tāvatā tiṭṭhamāno so tāresi janataṃ bahuṃ // Bv_7.27 //

Ovādaṃ anusiṭṭhiñca datvāna ’sesake jane /

hutāsano va tāpetvā nibbuto so sasāvako // Bv_7.28 //

So ca buddho asamasamo te pi ca sāvakā balappattā /

sabbaṃ samantarahitaṃ nanu rittā sabbasaṅkhārā // Bv_7.29 //

(040) Sobhito varasambuddho Sīhārāmamhi nibbuto /

dhātuvitthārikaṃ āsi tesu tesu padesato ti // Bv_7.30 //

Sobhitassa bhagavato vaṃso chaṭṭhamo

(041) VIII -- ANOMADASSIBUDDHAVAṂSO

Sobhitassa aparena sambuddho dvipad’ uttamo /

Anomadassī amitayaso tejasī duratikkamo // Bv_8.1 //

So chetvā bandhanaṃ sabbaṃ viddhaṃsetvā tayo bhave /

anivattigamanaṃ maggaṃ desesi devamānuse // Bv_8.2 //

Sāgaro va asaṅkhobho pabbato va durāsado /

ākāso va ananto so sālarājā va phullito // Bv_8.3 //

Dassanena pi taṃ buddhaṃ tositā honti pāṇino /

vyāharantaṃ giraṃ sutvā amataṃ pāpuṇanti te // Bv_8.4 //

Dhammābhisamayo tassa iddho phīto tadā ahu /

koṭisatāni abhisamiṃsu paṭhame dhammadesane // Bv_8.5 //

Tato param-pi abhisamaye vassante dhammavuṭṭhiyo /

asīti koṭiyo abhisamiṃsu dutiye dhammadesane // Bv_8.6 //

Tato param-pi vassante tappayante ca pāṇinaṃ /

aṭṭhasattatikoṭīnaṃ tatiyābhisamayo ahu // Bv_8.7 //

Sannipātā tayo āsuṃ tassāpi ca mahesino /

abhiññābalappattānaṃ pupphitānaṃ vimuttiyā // Bv_8.8 //

Aṭṭhasatasahassānaṃ sannipāto tadā ahu /

pahīṇamadamohānaṃ santacittāna tādinaṃ // Bv_8.9 //

Sattasatasahassānaṃ dutiyo āsi samāgamo /

anaṅgaṇānaṃ virajānaṃ upasantāna tādinaṃ // Bv_8.10 //

Channaṃ satasahassānaṃ tatiyo āsi samāgamo /

abhiññābalappattānaṃ nibbutānaṃ tapassinaṃ // Bv_8.11 //

Ahaṃ tena samayena yakkho āsiṃ mah’ iddhiko /

nekānaṃ yakkhakoṭīnaṃ vasavatti’ mhi issaro // Bv_8.12 //

Tadā pi taṃ buddhavaraṃ upagantvā mahesinaṃ /

annapānena tappesiṃ sasaṅghaṃ lokanāyakaṃ // Bv_8.13 //

(042) So pi maṃ tadā vyākāsi visuddhanayano muni: /

aparimeyye ito kappe ayaṃ buddho bhavissati // Bv_8.14 //

Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāyaso // Bv_8.15 //

Tassāpi vacanaṃ sutvā haṭṭho saṃviggamānaso /

uttariṃ vatam-adhiṭṭhāsiṃ dasapāramipūriyā // Bv_8.16 //

Nagaraṃ Candavatī nāma Yasavā nāma khattiyo /

mātā Yasodharā nāma Anomadassissa satthuno // Bv_8.17 //

Dasavassasahassāni agāraṃ ajjha so vasi /

Sirī Upasirī Vaḍḍho tayo pāsāda-m-uttamā // Bv_8.18 //

Tevīsati sahassāni nāriyo samalaṅkatā /

Sirimā nāma nārī ca Upavāno nāma atrajo // Bv_8.19 //

Nimitte caturo disvā sivikāyābhinikkhami /

anūnadasamāsāni padhānaṃ padahī jino // Bv_8.20 //

Brahmunā yācito santo Anomadassī mahāmuni /

vatti cakkaṃ mahāvīro uyyāne so Sudassane // Bv_8.21 //

Nisabho ca Asoko ca ahesuṃ aggasāvakā /

Varuṇo nām’ upaṭṭhāko Anomadassissa satthuno // Bv_8.22 //

Sundarī ca Sumanā ca ahesuṃ aggasāvikā /

bodhi tassa bhagavato ajjuno ’ti pavuccati // Bv_8.23 //

Nandivaḍḍho Sirivaḍḍho ahesuṃ agg’ upaṭṭhakā /

Uppalā c’ eva Padumā ca ahesuṃ agg’ upaṭṭhikā // Bv_8.24 //

Aṭṭhapaññāsaratanaṃ accuggato mahāmuni /

pabhā niddhāvatī tassa sataraṃsī va uggato // Bv_8.25 //

Vassasatasahassāni āyu vijjati tāvade /

tāvatā tiṭṭhamāno so tāresi janataṃ bahuṃ // Bv_8.26 //

Supupphitaṃ pāvacanaṃ arahantehi tādihi /

vītarāgehi vimalehi sobhittha jinasāsanaṃ // Bv_8.27 //

So ca satthā amitayaso yugāni tāni atuliyāni /

sabbaṃ samantarahitaṃ nanu rittā sabbasaṅkhārā // Bv_8.28 //

(043) Anomadassī jino satthā Dhammārāmamhi nibbuto /

tatth’ eva tassa jinathūpo ubbedho pañcavīsatī ti // Bv_8.29 //

Anomadassissa bhagavato vaṃso sattamo

(044) IX -- PADUMABUDDHAVAṂSO

Anomadassissa aparena sambuddho dvipad’ uttamo /

Padumo nāma nāmena asamo appaṭipuggalo // Bv_9.1 //

Tassāpi asamaṃ sīlaṃ samādhī pi anantakā /

asaṅkheyyaṃ ñāṇavaraṃ vimuttī ca anūpamā // Bv_9.2 //

Tassāpi atulatejassa dhammacakkappavattane /

abhisamayā tayo āsuṃ mahātamapavāhanā // Bv_9.3 //

Paṭhamābhisamaye buddho koṭisatam-abodhayī /

dutiyābhisamaye dhīro navutikoṭim-abodhayī // Bv_9.4 //

Yadā ca Padumo buddho ovadī sakam-atrajaṃ /

tadā asītikoṭīnaṃ tatiyābhisamayo ahu // Bv_9.5 //

Sannipātā tayo āsuṃ Padumassa mahesino /

koṭisatasahassānaṃ paṭhamo āsi samāgamo // Bv_9.6 //

Kaṭhin’ atthārasamaye uppanne kaṭhinacīvare /

dhammasenāpat’ atthāya bhikkhū sibbiṃsu cīvaraṃ // Bv_9.7 //

Tadā te vimalā bhikkhū chaḷabhiññā mah’ iddhikā /

tīṇi satasahassāni samiṃsu aparājitā // Bv_9.8 //

Punāparaṃ so narāsabho pavane vāsam-upāgami,/

tadā samāgamo āsi dvinnaṃ satasahassinaṃ // Bv_9.9 //

Ahaṃ tena samayena sīho āsiṃ migādhibhū /

vivekam-anubrūhantaṃ pavane addasaṃ jinaṃ // Bv_9.10 //

Vanditvā sirasā pāde katvāna taṃ padakkhiṇaṃ /

tikkhattuṃ abhināditvā sattāhaṃ jinam-upaṭṭhahiṃ // Bv_9.11 //

Sattāhā varasamāpattiyā uṭṭhahitvā tathāgato /

manasā cintayitvāna koṭibhikkhū samānayī // Bv_9.12 //

Tadā pi so mahāvīro tesaṃ majjhe viyākarī: /

aparimeyye ito kappe ayaṃ buddho bhavissati // Bv_9.13 //

(045) Padhānaṃ padahitvāva katvā dukkarakārikaṃ /

assatthamūle sambuddho bujjhissati mahāyaso // Bv_9.14 //

Tassāpi vacanaṃ sutvā bhiyyo cittaṃ pasādayiṃ /

uttariṃ vatam-adhiṭṭhāsiṃ dasapāramipūriyā // Bv_9.15 //

Campakaṃ nāma nagaraṃ Asamo nāma khattiyo /

Asamā nāma janikā Padumassa mahesino // Bv_9.16 //

Dasavassasahassāni agāraṃ ajjha so vasi /

Nandā ca Suyasā Uttarā tayo pāsāda-m-uttamā // Bv_9.17 //

Tettiṃsasatasahassāni nāriyo samalaṅkatā /

Uttarā nāma sā nārī Rammo nāmāsi atrajo // Bv_9.18 //

Nimitte caturo disvā rathayānena nikkhami /

anūnakaṃ aḍḍhamāsaṃ padhānaṃ padahī jino // Bv_9.19 //

Brahmunā yācito santo Padumo lokanāyako /

vatti cakkaṃ mahāvīro Dhanañjay’ uyyāna-m-uttame // Bv_9.20 //

Sālo ca Upasālo ca ahesuṃ aggasāvakā /

Varuṇo nām’ upaṭṭhāko Padumassa mahesino // Bv_9.21 //

Rādhā c’ eva Surādhā ca ahesuṃ aggasāvikā /

bodhi tassa bhagavato mahāsoṇo ’ti vuccati // Bv_9.22 //

Bhiyyo c’ eva Asamo ca ahesuṃ agg’ upaṭṭhakā /

Rucī ca Nandarāmā ca ahesuṃ agg’ upaṭṭhikā // Bv_9.23 //

Aṭṭhapaññāsaratanaṃ accuggato mahāmuni /

pabhā niddhāvatī tassa asamā sabbaso disā // Bv_9.24 //

Candappabhā suriyappabhā ratan’ agghimaṇippabhā /

sabbā pi tā hatā honti patvā jinapabh’ uttamaṃ // Bv_9.25 //

Vassasatasahassāni āyu vijjati tāvade /

tāvatā tiṭṭhamāno so tāresi janataṃ bahuṃ // Bv_9.26 //

Paripakkamānase satte bodhayitvā asesato /

sesake anusāsitvā nibbuto so sasāvako // Bv_9.27 //

Urago va tacaṃ jiṇṇaṃ vuddhapattaṃ va pādapo /

jahitvā sabbasaṅkhāre nibbuto so yathā sikhī // Bv_9.28 //

(046) Padumo jinavaro satthā Dhammārāmamhi nibbuto /

dhātuvitthārikaṃ āsi tesu tesu padesato ’ti // Bv_9.29 //

Padumassa bhagavato vaṃso aṭṭhamo

(047) X -- NĀRADABUDDHAVAṂSO

Padumassa aparena sambuddho dvipad’ uttamo /

Nārado nāma nāmena asamo appaṭipuggalo // Bv_10.1 //

So buddho cakkavattissa jeṭṭho dayita-oraso /

āmuttamālyābharaṇo uyyānaṃ upasaṅkami // Bv_10.2 //

Tatrāsi rukkho yasavipulo abhirūpo brahā suci /

tam-ajjhapatvā upanisīdi mahāsoṇassa heṭṭhato // Bv_10.3 //

Tattha ñāṇavar’ uppajji anantaṃ vajir’ ūpamaṃ /

tena vicini saṅkhāre ukkujjam-avakujjakaṃ // Bv_10.4 //

Tattha sabbakilesāni asesaṃ abhivāhayī /

pāpuṇī kevalaṃ bodhiṃ buddhañāṇe ca cuddasa // Bv_10.5 //

Pāpuṇitvāna sambodhiṃ dhammacakkaṃ pavattayi /

koṭisatasahassānaṃ paṭhamābhisamayo ahu // Bv_10.6 //

Mahādoṇaṃ nāgarājaṃ vinayanto mahāmuni /

pāṭiheraṃ tadākāsi dassayanto sadevake // Bv_10.7 //

Tadā devamanussānaṃ tamhi dhammappakāsane /

navutikoṭisahassāni tariṃsu sabbasaṃsayaṃ // Bv_10.8 //

Yamhi kāle mahāvīro ovadī sakam-atrajaṃ /

asītikoṭisahassānaṃ tatiyābhisamayo ahu // Bv_10.9 //

Sannipātā tayo āsuṃ Nāradassa mahesino /

koṭisatasahassānaṃ paṭhamo āsi samāgamo // Bv_10.10 //

Yadā buddho buddhaguṇaṃ sanidānaṃ pakāsayi /

navutikoṭisahassāni samiṃsu vimalā tadā // Bv_10.11 //

Yadā Verocano nāgo dānaṃ dadāti satthuno /

tadā samiṃsu jinaputtā asītisatasahassiyo // Bv_10.12 //

Ahaṃ tena samayena jaṭilo uggatāpano /

antalikkhacaro āsiṃ pañcābhiññāsu pāragū // Bv_10.13 //

Tadā p’ āhaṃ asamasamaṃ sasaṅghaṃ saparijjanaṃ /

annapānena tappetvā candanenābhipūjayiṃ // Bv_10.14 //

(048) So pi maṃ tadā vyākāsi Nārado lokanāyako: /

aparimeyye ito kappe ayaṃ buddho bhavissati // Bv_10.15 //

Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāyaso // Bv_10.16 //

Tassāpi vacanaṃ sutvā bhiyyo hāsetva mānasaṃ /

adhiṭṭhahiṃ vataṃ uggaṃ dasapāramipūriyā // Bv_10.17 //

Nagaraṃ Dhaññavatī nāma Sudevo nāma khattiyo /

Anomā nāma janikā Nāradassa mahesino // Bv_10.18 //

Nava vassasahassāni agāraṃ ajjha so vasī /

Jitā Vijitā’ Bhirāmā tayo pāsāda-m-uttamā // Bv_10.19 //

Ticattārīsasahassāni nāriyo samalaṅkatā /

Jitasenā nāma nārī Nand’ uttaro nāma atrajo // Bv_10.20 //

Nimitte caturo disvā padasā gamanena nikkhami /

sattāhaṃ padhānacariyaṃ acarī lokanāyako // Bv_10.21 //

Brahmunā yācito santo Nārado lokanāyako /

vatti cakkaṃ mahāvīro Dhanañjay’ uyyāna-m-uttame // Bv_10.22 //

Bhaddasālo Jitamitto ahesuṃ aggasāvakā /

Vāseṭṭho nām’ upaṭṭhāko Nāradassa mahesino // Bv_10.23 //

Uttarā Phagguṇī c’ eva ahesuṃ aggasāvikā /

bodhi tassa bhagavato mahāsoṇo ti vuccati // Bv_10.24 //

Uggar’ indo Vasabho ca ahesuṃ agg’ upaṭṭhakā /

Indāvarī ca Caṇḍī ca ahesuṃ agg’ upaṭṭhikā // Bv_10.25 //

Aṭṭhāsīti ratanāni accuggato mahāmuni /

kañcan’ agghikasaṅkāso dasasahassī virocatha // Bv_10.26 //

Tassa byāmappabhā kāyā niddhāvati disodisaṃ /

nirantaraṃ divā rattiṃ yojanaṃ pharate sadā // Bv_10.27 //

Na keci tena samayena samantā yojane janā /

ukkā padīpe ujjalenti buddharaṃsena otthaṭā // Bv_10.28 //

Navutivassasahassāni āyu vijjati tāvade /

tāvatā tiṭṭhamāno so tāresi janataṃ bahuṃ // Bv_10.29 //

(049) Yathā ulūhi gaganaṃ vicittaṃ upasobhati /

tath’ eva sāsanaṃ tassa arahantehi sobhati // Bv_10.30 //

Saṃsārasotaṃ taraṇāya sesake paṭipannake /

dhammasetuṃ daḷhaṃ katvā nibbuto so narāsabho // Bv_10.31 //

So pi buddho asamasamo te pi khīṇāsavā atulatejā /

sabbaṃ samantarahitaṃ nanu rittā sabbasaṅkhārā // Bv_10.32 //

Nārado jinavasabho nibbuto Sudassane pure /

tatth’ eva jinathūpavaro catu yojanam-uggato // Bv_10.33 //

Nāradassa bhagavato vaṃso navamo

(050) XI -- PADUMUTTARABUDDHAVAṂSO

Nāradassa aparena sambuddho dvipad’ uttamo /

Padumuttaro nāma jino akkhobho sāgar’ ūpamo // Bv_11.1 //

Maṇḍakappo va so āsi yamhi buddho ajāyatha /

ussannakusalā janatā tamhi kappe ajāyatha // Bv_11.2 //

Padumuttarassa bhagavato paṭhame dhammadesane /

koṭisatasahassānaṃ dhammābhisamayo ahu // Bv_11.3 //

Tato param-pi vass’ ante tappayante ca pāṇine /

sattatiṃsasahassānaṃ dhammābhisamayo ahu // Bv_11.4 //

Yamhi kāle mahāvīro Ānandaṃ upasaṅkami /

pitu santikam-upāgantvā ahanī amatadundubhiṃ // Bv_11.5 //

Āhate amatabherimhi vassante dhammavuṭṭhiyo /

paññāsasatasahassānaṃ tatiyābhisamayo ahu // Bv_11.6 //

Ovādako viññāpako tārako sabbapāṇinaṃ /

desanākusalo buddho tāresi janataṃ bahuṃ // Bv_11.7 //

Sannipātā tayo āsuṃ Padumuttarassa satthuno /

koṭisatasahassānaṃ paṭhamo āsi samāgamo // Bv_11.8 //

Yadā buddho asamasamo vasī Vebhārapabbate /

navutikoṭisahassānaṃ dutiyo āsi samāgamo // Bv_11.9 //

Puna cārikaṃ pakkante gāmanigamaraṭṭhato /

asītikoṭisahassānaṃ tatiyo āsi samāgamo // Bv_11.10 //

Ahaṃ tena samayena Jaṭilo nāma raṭṭhiko /

sambuddhapamukhaṃ saṅghaṃ sabhattaṃ dussam adās’ ahaṃ // Bv_11.11 //

So pi maṃ buddho vyākāsi saṅghamajjhe nisīdiya: /

satasahasse ito kappe ayaṃ buddho bhavissati // Bv_11.12 //

Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāyaso // Bv_11.13 //

(051) Tassāpi vacanaṃ sutvā uttariṃ vatam-adhiṭṭhahiṃ /

akāsim-uggaṃ daḷhaṃ dhitiṃ dasapāramipūriyā // Bv_11.14 //

Vyāhatā titthiyā sabbe vimanā dummanā tadā /

na tesaṃ keci paricaranti raṭṭhato nicchubhanti te // Bv_11.15 //

Sabbe tattha samāgantvā upagacchuṃ buddhasantike /

tuvaṃ nātho mahāvīro saraṇaṃ hohi cakkhuma // Bv_11.16 //

Anukampako kāruṇiko hitesī sabbapāṇinaṃ /

sampatte titthiye sabbe pañcasīle patiṭṭhahi // Bv_11.17 //

Evaṃ nirākulaṃ āsi suññataṃ titthiyehi taṃ /

vicittaṃ arahantehi vasībhūtehi tādihi // Bv_11.18 //

Nagaraṃ Haṃsavatī nāma Ānando nāma khattiyo /

Sujātā nāma janikā Padumuttarassa mahesino // Bv_11.19 //

Dasavassasahassāni agāraṃ ajjha so vasī /

Nārivāhano Yaso Yasavatī tayo pāsāda-m-uttamā // Bv_11.20 //

Ticattārīsasahassāni nāriyo samalaṅkatā /

Vasudattā nāma nārī Uttaro nāma atrajo // Bv_11.21 //

Nimitte caturo disvā pāsādenābhinikkhami /

sattāhaṃ padhānacāraṃ acarī puris’ uttamo // Bv_11.22 //

Brahmunā yācito santo Padumuttaro vināyako /

vatti cakkaṃ mahāvīro Mithil’ uyyāna-m-uttame // Bv_11.23 //

Devalo ca Sujāto ca ahesuṃ aggasāvakā /

Sumano nām’ upaṭṭhāko Padumuttarassa mahesino // Bv_11.24 //

Amitā Asamā c’ eva ahesuṃ aggasāvikā /

bodhi tassa bhagavato salalo ’ti pavuccati // Bv_11.25 //

Vitiṇṇo c’ eva Tisso ca ahesuṃ agg’ upaṭṭhakā /

Hatthā c’ eva Vicittā ca ahesuṃ agg’ upaṭṭhikā // Bv_11.26 //

Aṭṭhapaññāsaratanaṃ accuggato mahāmuni /

kañcan’ agghikasaṅkāso dvattiṃsavaralakkhaṇo // Bv_11.27 //

Kuḍḍā kavāṭā bhittī ca rukkhā nagasil’ uccayā /

na tassāvaraṇaṃ atthi samantā dvādasayojane // Bv_11.28 //

(052) Vassasatasahassāni āyu vijjati tāvade /

tāvatā tiṭṭhamāno so tāresi janataṃ bahuṃ // Bv_11.29 //

Santāretvā bahujanaṃ chinditvā sabbasaṃsayaṃ /

jalitvā aggikkhandho va nibbuto so sasāvako // Bv_11.30 //

Padumuttaro jino buddho Nandārāmamhi nibbuto /

tatth’ eva tassa thūpavaro dvadas’ ubbedhayojano ti // Bv_11.31 //

Padumuttarassa bhagavato vaṃso dasamo

(053) XII -- SUMEDHABUDDHAVAṂSO

Padumuttarassa aparena Sumedho nāma nāyako /

durāsado uggatejo sabbalok’ uttaro muni // Bv_12.1 //

Pasannanetto sumukho brahā uju patāpavā /

hitesī sabbasattānaṃ bahū mocesi bandhanā // Bv_12.2 //

Yadā buddho pāpuṇitvā kevalaṃ bodhim-uttamaṃ /

Sudassanamhi nagare dhammacakkam-pavattayi, // Bv_12.3 //

Tassābhisamayā tīṇi ahesuṃ dhammadesane /

koṭisatasahassānaṃ paṭhamābhisamayo ahu // Bv_12.4 //

Punāparaṃ Kumbhakaṇṇaṃ yakkhaṃ so damayī jino /

navutikoṭisahassānaṃ dutiyābhisamayo ahu // Bv_12.5 //

Punāparaṃ amitayaso catusaccaṃ pakāsayi /

asītikoṭisahassānaṃ tatiyābhisamayo ahu // Bv_12.6 //

Sannipātā tayo āsuṃ Sumedhassa mahesino /

khīṇāsavānaṃ vimalānaṃ santacittāna tādinaṃ // Bv_12.7 //

Sudassanaṃ nagaravaraṃ upagañchi jino yadā /

tadā khiṇāsavā bhikkhū samiṃsu satakoṭiyo // Bv_12.8 //

Punāparaṃ Devakūṭe bhikkhūnaṃ kaṭhin’ atthate /

tadā navutikoṭīnaṃ dutiyo āsi samāgamo // Bv_12.9 //

Punāparaṃ dasabalo yadā carati cārikaṃ /

tadā asītikoṭīnaṃ tatiyo āsi samāgamo // Bv_12.10 //

Ahaṃ tena samayena Uttaro nāma māṇavo /

asīti koṭiyo mayhaṃ ghare sannicitaṃ dhanaṃ // Bv_12.11 //

Kevalaṃ sabbaṃ datvāna sasaṅghe lokanāyake /

saraṇaṃ tass’ upāgañchiṃ pabbajjañcābhirocayiṃ // Bv_12.12 //

So pi maṃ buddho vyākāsi karonto anumodanaṃ: /

tiṃsakappasahassamhi ayaṃ buddho bhavissati // Bv_12.13 //

Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāyaso // Bv_12.14 //

(054) Tassāpi vacanaṃ sutvā bhiyyo cittaṃ pasādayiṃ /

uttariṃ vatam-adhihiṭṭhāsiṃ dasapāramipūriyā // Bv_12.15 //

Suttantaṃ vinayañcāpi navaṅgaṃ satthusāsanaṃ /

sabbaṃ pariyāpuṇitvāna sobhayiṃ jinasāsanaṃ // Bv_12.16 //

Tatth’ appamatto viharanto nisajjaṭṭhānacaṅkame /

abhiññāsu pāramiṃ gantvā brahmalokam-agañch’ ahaṃ // Bv_12.17 //

Sudassanaṃ nāma nagaraṃ Sudatto nāma khattiyo /

Sudattā nāma janikā Sumedhassa mahesino // Bv_12.18 //

Navavassasahassāni agāraṃ ajjha so vasi /

Sucanda-Kañcana-Sirivaḍḍhā tayo pāsāda-m-uttamā // Bv_12.19 //

Tisoḷasasahassāni nāriyo samalaṅkatā /

Sumanā nāma sā nārī Sumitto nāma atrajo // Bv_12.20 //

Nimitte caturo disvā hatthiyānena nikkhami /

anūnakaṃ aṭṭhamāsaṃ padhānaṃ padahī jino // Bv_12.21 //

Brahmunā yācito santo Sumedho lokanāyako /

vatti cakkaṃ mahāvīro Sudassan’ uyyāna-m-uttame // Bv_12.22 //

Saraṇo Sabbakāmo ca ahesuṃ aggasāvakā /

Sāgaro nām’ upaṭṭhāko Sumedhassa mahesino // Bv_12.23 //

Rāmā c’ eva Surāmā ca ahesuṃ aggasāvikā /

bodhi tassa bhagavato mahānimbo27 ’ti vuccati // Bv_12.24 //

Uruvelo ca Yasavo ca ahesuṃ agg’ upaṭṭhakā /

Yasodharā Sirimā ca ahesuṃ agg’ upaṭṭhikā // Bv_12.25 //

Aṭṭhāsīti ratanāni accuggato mahāmuni /

obhāseti disā sabbā cando tāragaṇe yathā // Bv_12.26 //

Cakkavattimaṇī nāma yathā tapati yojanaṃ /

tath’ eva tassa ratanaṃ samantā pharati yojanaṃ // Bv_12.27 //

Navutivassasahassāni āyu vijjati tāvade /

tāvatā tiṭṭhamāno so tāresi janataṃ bahuṃ // Bv_12.28 //

Tevijjachaḷabhiññehi balappattehi tādihi /

samākulam-idaṃ āsi arahantehi sādhuhi // Bv_12.29 //

(055) Te pi sabbe amitayasā vippamuttā nirūpadhī /

ñāṇālokaṃ dassayitvā nibbutā te mahāyasā // Bv_12.30 //

Sumedho jinavaro buddho Medhārāmamhi nibbuto /

dhātuvitthārikaṃ āsi tesu tesu padesato // Bv_12.31 //

Sumedhassa bhagavato vaṃso ekādasamo

(056) XIII -- SUJĀTABUDDHAVAṂSO

Tatth’ eva Maṇḍakappamhi Sujāto nāma nāyako /

Sīhahanūsabhakkhandho appameyyo durāsado // Bv_13.1 //

Cando va vimalo suddho sataraṃsī va tāpavā /

evaṃ sobhati sambuddho jalanto siriyā sadā // Bv_13.2 //

Pāpuṇitvāna sambuddho kevalaṃ bodhi-m-uttamaṃ /

Sumaṅgalamhi nagare dhammacakkaṃ pavattayi // Bv_13.3 //

Desente pavaraṃ dhammaṃ Sujāte lokanāyake /

asītikoṭī abhisamiṃsu paṭhame dhammadesane // Bv_13.4 //

Yadā Sujāto amitayaso deve vassaṃ upāgami /

sattatiṃsasahassānaṃ dutiyābhisamayo ahu // Bv_13.5 //

Yadā Sujāto asamasamo upagacchi pitu santikaṃ /

saṭṭhisatasahassānaṃ tatiyābhisamayo ahu // Bv_13.6 //

Sannipātā tayo āsuṃ Sujātassa mahesino /

khīṇāsavānaṃ vimalānaṃ santacittāna tādinaṃ // Bv_13.7 //

Abhiññābalappattānam appattānaṃ bhavābhave /

saṭṭhisatasahassāni paṭhamaṃ sannipatiṃsu te // Bv_13.8 //

Punāparaṃ sannipāte tidiv’ orohaṇe jine /

paññāsasatasahassānaṃ dutiyo āsi samāgamo // Bv_13.9 //

Upasaṅkamanto naravasabhaṃ tassa yo aggasāvako /

catūhi satasahassehi sambuddhaṃ upasaṅkami // Bv_13.10 //

Ahaṃ tena samayena catudīpamhi issaro /

antalikkhacaro āsiṃ cakkavattī mahabbalo // Bv_13.11 //

Loke acchariyaṃ disvā abbhutaṃ lomahaṃsanaṃ /

upagantvāna vandiṃ so Sujātaṃ lokanāyakaṃ // Bv_13.12 //

Catudīpe mahārajjaṃ ratane satta uttame /

buddhe niyyādayitvāna pabbajiṃ tassa santike // Bv_13.13 //

Āramikā janapade uṭṭhānaṃ paṭipiṇḍiya /

upanenti bhikkhusaṅghassa paccayaṃ sayanāsanaṃ // Bv_13.14 //

(057) So pi maṃ buddho vyākāsi dasasahassimhi issaro: /

tiṃsakappasahassamhi ayaṃ buddho bhavissati // Bv_13.15 //

Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāyaso // Bv_13.16 //

Tassāpi vacanaṃ sutvā bhiyyo hāsaṃ janes’ ahaṃ /

adhiṭṭhahiṃ vataṃ uggaṃ dasapāramipūriyā // Bv_13.17 //

Suttantaṃ vinayañcāpi navaṅgaṃ satthusāsanaṃ /

sabbaṃ pariyāpuṇitvāna sobhayiṃ jinasāsanaṃ // Bv_13.18 //

Tatth’ appamatto viharanto brahmaṃ bhāvetva bhāvanaṃ /

abhiññāsu pāramiṃ gantvā brahmalokaṃ agacch’ ahaṃ // Bv_13.19 //

Sumaṅgalaṃ nāma nagaraṃ Uggato nāma khattiyo /

mātā Pabhāvatī nāma Sujātassa mahesino // Bv_13.20 //

Navavassasahassāni agāraṃ ajjha so vasi /

Sirī Upasirī Nandā tayo pāsāda-m-uttamā // Bv_13.21 //

Tevīsatisahassāni nāriyo samalaṅkatā /

Sirinandā nāma nārī Upaseno nāma atrajo // Bv_13.22 //

Nimitte caturo disvā assayānena nikkhami /

anūnanavamāsāni padhānaṃ padahī jino // Bv_13.23 //

Brahmunā yācito santo Sujāto lokanāyako /

vatti cakkaṃ mahāvīro Sumaṅgal’ uyyāna-m-uttame // Bv_13.24 //

Sudassano Sudevo ca ahesuṃ aggasāvakā /

Nārado nām’ upaṭṭhāko Sujātassa mahesino // Bv_13.25 //

Nāgā ca Nāgasamālā ca ahesuṃ aggasāvikā /

bodhi tassa bhagavato mahāveḷū ’ti vuccati // Bv_13.26 //

So ca rukkho ghanaruciro acchiddo hoti pattiko /

ujuvaṃso brahā hoti dassaneyyo manoramo // Bv_13.27 //

Ekakkhandho pavaḍḍhitvā tato sākhā pabhijjatha /

yathā subaddho morahattho evaṃ sobhati so dumo // Bv_13.28 //

Na tassa kaṇḍakā honti nāpi chiddaṃ mahā ahu /

vitthiṇṇasākho aviralo sandacchāyo manoramo // Bv_13.29 //

(058) Sudatto c’ eva Citto ca ahesuṃ agg’ upaṭṭhakā /

Subhaddā c’ eva Padumā ca ahesuṃ agg’ upaṭṭhikā // Bv_13.30 //

Paññāsaratano āsi uccattanena so jino /

sabbākāravar’ ūpeto sabbaguṇa-m-upāgato // Bv_13.31 //

Tassa pabhā asamasamā niddhāvati samantato /

appamāṇo atuliyo opammehi anūpamo // Bv_13.32 //

Navutivassasahassāni āyu vijjati tāvade /

tāvatā tiṭṭhamāno so tāresi janataṃ bahuṃ // Bv_13.33 //

Yathā pi sāgare ūmi gagane tārakā yathā /

evaṃ tadā pāvacanaṃ arahantehi cittitaṃ // Bv_13.34 //

So ca buddho asamasamo guṇāni ca tāni atuliyāni /

sabbaṃ samantarahitaṃ nanu rittā sabbasaṅkhārā // Bv_13.35 //

Sujāto jinavaro buddho Sīlārāmamhi nibbuto /

tatth’ eva tassa cetiyo tīṇi gāvuta-m-uggato // Bv_13.36 //

Sujātassa bhagavato vaṃso dvādasamo

(059) XIV -- PIYADASSIBUDDHAVAṂSO

Sujātassa aparena sayambhū lokanāyako /

durāsado asamasamo Piyadassī mahāyaso // Bv_14.1 //

So pi buddho amitayaso ādicco va virocati /

nihantvāna tamaṃ sabbaṃ dhammacakkaṃ pavattayi // Bv_14.2 //

Tassāpi atulatejassa ahesum-abhisamayā tayo /

koṭisatasahassānaṃ paṭhamābhisamayo ahū // Bv_14.3 //

Sudassano devarājā micchādiṭṭhim-aracoyi /

tassa diṭṭhiṃ vinodento satthā dhammam-adesayi // Bv_14.4 //

Janasannipāto atulo mahā sannipatī tadā /

navutikoṭisahassānaṃ dutiyābhisamayo ahu // Bv_14.5 //

Yadā Doṇamukhaṃ hatthiṃ vinesi narasārathi /

asītikoṭisahassānaṃ tatiyābhisamayo ahu // Bv_14.6 //

Sannipātā tayo āsuṃ tassāpi Piyadassino /

koṭisatasahassānaṃ paṭhamo āsi samāgamo // Bv_14.7 //

Tato paraṃ navutikoṭī samiṃsu ekato munī /

tatiye sannipātamhi asītikoṭiyo ahū // Bv_14.8 //

Ahaṃ tena samayena Kassapo nāma brāhmaṇo /

ajjhāyako mantadharo tiṇṇaṃ vedāna pāragū // Bv_14.9 //

Tassa dhammaṃ suṇitvāna pasādaṃ janayī-m-ahaṃ /

koṭisatasahassehi saṅghārāmaṃ amāpayiṃ // Bv_14.10 //

Tassa datvāna ārāmaṃ haṭṭho saṃviggamānaso /

saraṇaṃ pañcasīlañca daḷhaṃ katvā samādiyiṃ // Bv_14.11 //

So pi maṃ buddho vyākāsi saṅghamajjhe nisīdiya: /

aṭṭhārase kappasate ayaṃ buddho bhavissati // Bv_14.12 //

Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāyaso // Bv_14.13 //

Tassāpi vacanaṃ sutvā bhiyyo cittaṃ pasādayiṃ /

uttariṃ vatam-adhiṭṭhāsiṃ dasapāramipūriyā // Bv_14.14 //

(060) Sudhaññaṃ nāma nagaraṃ Sudatto nāma khattiyo /

Sucandā nāma janikā Piyadassissa satthuno // Bv_14.15 //

Navavassasahassāni agāraṃ ajjha so vasī /

Sunimmala-Vimala-Giriguhā tayo pāsāda-m-uttamā // Bv_14.16 //

Tettiṃsati sahassāni nāriyo samalaṅkatā /

Vimalā nāma nārī ca Kañcanaveḷo nāma atrajo // Bv_14.17 //

Nimitte caturo disvā rathayānena nikkhami /

chamāsaṃ padhānacāraṃ acarī puris’ uttamo // Bv_14.18 //

Brahmunā yācito santo Piyadassī mahāmunī /

vatti cakkaṃ mahāvīro Ussāvan’ uyyāne manorame // Bv_14.19 //

Pālito Sabbadassī ca ahesuṃ aggasāvakā /

Sobhito nām’ upaṭṭhāko Piyadassissa satthuno // Bv_14.20 //

Sujātā Dhammadinnā ca ahesuṃ aggasāvikā /

bodhi tassa bhagavato kakudho22 ’ti pavuccati // Bv_14.21 //

Sannako Dhammiko c’ eva ahesuṃ agg’ upaṭṭhakā /

Visākhā Dhammadinnā ca ahesuṃ agg’ upaṭṭhikā // Bv_14.22 //

So pi buddho amitayaso dvattiṃsavaralakkhaṇo /

asītihattha-m-ubhedho sālarājā va dissati // Bv_14.23 //

Aggicandasuriyānaṃ n’ atthi tādisikā pabhā /

yathā ahu pabhā tassa asamassa mahesino // Bv_14.24 //

Tassāpi devadevassa āyu tāvatakaṃ ahu /

navutivassasahassāni loke aṭṭhāsi cakkhumā // Bv_14.25 //

So pi buddho asamasamo yugāni pi tāni atuliyāni /

sabbaṃ samantarahitaṃ nanu rittā sabbasaṅkhārā // Bv_14.26 //

So Piyadassī munivaro Assatthārāmamhi nibbuto /

tatth’ eva tassa jinathūpo tīṇi yojana-m-uggato ti // Bv_14.27 //

Piyadassissa bhagavato vaṃso terasamo

(061) Blank Page.

(062) XV -- ATTHADASSIBUDDHAVAṂSO

Tatth’ eva Maṇḍakappamhi Atthadassī narāsabho /

mahātamaṃ nihantvāna patto sambodhim-uttamaṃ // Bv_15.1 //

Brahmunā yācito santo dhammacakkaṃ pavattayi /

amatena tappayī lokaṃ dasasahassī sadevakaṃ // Bv_15.2 //

Tassāpi lokanāthassa ahesum-abhisamayā tayo /

koṭisatasahassānaṃ paṭhamābhisamayo ahu // Bv_15.3 //

Yadā buddho Atthadassī carati devacārikaṃ /

koṭisatasahassānaṃ dutiyābhisamayo ahu // Bv_15.4 //

Punāparaṃ yadā buddho desesi pitu santike /

koṭisatasahassānaṃ tatiyābhisamayo ahu // Bv_15.5 //

Sannipātā tayo āsuṃ tassāpi ca mahesino /

khīṇāsavānaṃ vimalānaṃ santacittāna tādinaṃ // Bv_15.6 //

Aṭṭhanavutisahassānaṃ paṭhamo āsi samāgamo /

aṭṭhāsītisahassānaṃ dutiyo āsi samāgamo // Bv_15.7 //

Aṭṭhasattatisahassānaṃ tatiyo āsi samāgamo /

anupādā vimuttānaṃ vimalānaṃ mahesinaṃ // Bv_15.8 //

Ahaṃ tena samayena jaṭilo uggatāpano /

Susīmo nāma nāmena mahiyā seṭṭhasammato // Bv_15.9 //

Dibbaṃ mandāravaṃ pupphaṃ padumaṃ pāricchattakaṃ /

devalokāharitvāna sambuddhaṃ abhipūjayiṃ // Bv_15.10 //

So pi maṃ buddho vyākāsi Atthadassī mahamuni /

aṭṭhārase kappasate ayaṃ buddho bhavissati // Bv_15.11 //

Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāyaso // Bv_15.12 //

Tassāpi vacanaṃ sutvā haṭṭho saṃviggamānaso /

uttariṃ vatam-adhiṭṭhāsiṃ dasapāramipūriyā // Bv_15.13 //

Sobhanaṃ nāma nagaraṃ Sāgaro nāma khattiyo /

Sudassanā nāma janikā Atthadassissa satthuno // Bv_15.14 //

(063) Dasavassasahassāni agāraṃ ajjha so vasi /

Amaragiri-Suragiri18-Girivāhanā tayo pāsāda-m-uttamā // Bv_15.15 //

Tettiṃsañca sahassāni nāriyo samalaṅkatā /

Visākhā nāma sā nārī Selo nāmāsi atrajo // Bv_15.16 //

Nimitte caturo disvā assayānena nikkhami /

anūna-aṭṭhamāsāni padhānaṃ padahī jino // Bv_15.17 //

Brahmunā yācito santo Atthadassī mahāyaso /

vatti cakkaṃ mahāvīro Anom’ uyyāne narāsabho // Bv_15.18 //

Santo ca Upasanto ca ahesuṃ aggasāvakā /

Abhayo nām’ upaṭṭhāko Atthadassissa satthuno // Bv_15.19 //

Dhammā c’ eva Sudhammā ca ahesuṃ aggasāvikā /

bodhi tassa bhagavato campako ’ti pavuccati // Bv_15.20 //

Nakulo ca Nisabho ca ahesuṃ agg’ upaṭṭhakā /

Makilā ca Sunandā ca ahesuṃ agg’ upaṭṭhikā // Bv_15.21 //

So pi buddho asamasamo asītihattha-m-uggato /

sobhati sālarājā va ulurājā va pūrito // Bv_15.22 //

Tassa pākatikā raṃsī anekasatakoṭiyo /

uddhaṃ adho dasadisā pharanti yojanaṃ tadā // Bv_15.23 //

So pi buddho narāsabho sabbasatt’ uttamo muni /

vassasatasahassāni loke aṭṭhāsi cakkhumā // Bv_15.24 //

Atulaṃ datvāna obhāsaṃ virocetvā sadevake /

so pi aniccataṃ patto yath’ agg’ upādānasaṅkhayā // Bv_15.25 //

Atthadassī jinavaro Anomārāmamhi nibbuto /

dhātuvitthārikaṃ āsi tesu tesu padesato ti // Bv_15.26 //

Atthadassissa bhagavato vaṃso cuddasamo

(064) Blank Page.

(065) XVI -- DHAMMADASSIBUDDHAVAṂSO

Tatth’ eva Maṇḍakappamhi Dhammadassī mahāyaso /

tam’ andhakāraṃ vidhametvā atirocati sadevake // Bv_16.1 //

Tassāpi atulatejassa dhammacakkappavattane /

koṭisatasahassānaṃ paṭhamābhisamayo ahu // Bv_16.2 //

Yadā buddho Dhammadassī vinesi Sañjayaṃ isiṃ /

tadā navutikoṭīnaṃ dutiyābhisamayo ahu // Bv_16.3 //

Yadā Sakko upāgañchi sapariso vināyakaṃ /

tadā asītikoṭīnaṃ tatiyābhisamayo ahu // Bv_16.4 //

Tassāpi devadevassa sannipātā tayo ahuṃ /

khīṇāsavānaṃ vimalānaṃ santicittāna tādinaṃ // Bv_16.5 //

Yadā buddho Dhammadassī Saraṇe vassam-upāgami /

tadā koṭisahassānaṃ paṭhamo āsi samāgamo // Bv_16.6 //

Punāparaṃ yadā buddho devato eti mānuse /

tadāpi satakoṭīnaṃ dutiyo āsi samāgamo // Bv_16.7 //

Punāparaṃ yadā buddho pakāsesi dhute guṇe /

tadā asītikoṭīnaṃ tatiyo āsi samāgamo // Bv_16.8 //

Ahaṃ tena samayena Sakko āsiṃ purindado /

dibbena gandhamālena turiyena abhipūjayiṃ // Bv_16.9 //

So pi maṃ buddho vyākāsi devamajjhe nisīdiya: /

aṭṭhārase kappasate ayaṃ buddho bhavissati // Bv_16.10 //

Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāyaso // Bv_16.11 //

Tassāpi vacanaṃ sutvā bhiyyo cittaṃ pasādayiṃ /

uttariṃ vatam-adhiṭṭhāsiṃ dasapāramipūriyā // Bv_16.12 //

Saraṇaṃ nāma nagaraṃ Saraṇo nāma khattiyo /

Sundarā nāma janikā Dhammadassissa satthuno // Bv_16.13 //

(066) Aṭṭhārasavassāni agāraṃ ajjha so vasi /

Arajo Virajo Sudassano tayo pāsāda-m-uttamā // Bv_16.14 //

Ticattārīsasahassāni nāriyo samalaṅkatā /

Vicikolī nāma nārī atrajo Puṇṇavaḍḍhano // Bv_16.15 //

Nimitte caturo disvā pāsādenābhinikkhami /

sattāhaṃ padhānacāraṃ acarī puris’ uttamo // Bv_16.16 //

Brahmunā yācito santo Dhammadassī narāsabho /

vatti cakkaṃ mahāvīro migadāye nar’ uttamo // Bv_16.17 //

Padumo Phussadevo ca ahesuṃ aggasāvakā /

Sunetto nām’ upaṭṭhāko Dhammadassissa satthuno // Bv_16.18 //

Khemā ca Saccanāmā ca ahesuṃ aggasāvikā /

bodhi tassa bhagavato bimbajālo22 ’ti vuccati // Bv_16.19 //

Subhaddo Kaṭissaho c’ eva ahesuṃ agg’ upaṭṭhakā /

Sāliyā ca Valīyā ca ahesuṃ agg’ upaṭṭhikā // Bv_16.20 //

So pi buddho asamasamo asītihattam-uggato /

atirocati tejena dasasahassimhi dhātuyā // Bv_16.21 //

Suphullo sālarājā va vijjū va gagane yathā /

majjhantike va suriyo evaṃ so upasobhatha // Bv_16.22 //

Tassāpi atulatejassa samakaṃ āsi jīvitaṃ /

vassasatasahassāni loke aṭṭhāsi cakkhumā // Bv_16.23 //

Obhāsaṃ dassayitvāna vimalaṃ katvāna sāsanaṃ /

ravi-cando va gagane nibbuto so sasāvako // Bv_16.24 //

Dhammadassī mahāvīro Kesārāmamhi nibbuto /

tatth’ eva so thūpavaro tiyojanasamuggato // Bv_16.25 //

Dhammadassissa bhagavato vaṃso paṇṇarasamo

(067) Blank Page.

(068) XVII -- SIDDHATTHABUDDHAVAṂSO

Dhammadassissa aparena Siddhattho nāma nāyako /

nihanantvāna tamaṃ sabbaṃ suriyo abbhuggato yathā // Bv_17.1 //

So pi patvāna sambodhiṃ santārento sadevakaṃ /

abhivassi dhammameghena nibbāpento sadevakaṃ // Bv_17.2 //

Tassāpi atulatejassa ahesum-abhisamayā tayo /

koṭisatasahassānaṃ paṭhamābhisamayo ahu // Bv_17.3 //

Punāparaṃ Bhīmarathe yadā ahani dundubhiṃ /

tadā navutikoṭīnaṃ dutiyābhisamayo ahu // Bv_17.4 //

Yadā buddho dhammaṃ desesi Vebhāre so pur’ uttame /

tadā navutikoṭīnaṃ tatiyābhisamayo ahu // Bv_17.5 //

Sannipātā tayo āsuṃ tasmim-pi dvipad’ uttame /

khīṇāsavānaṃ vimalānaṃ santacittāna tādinaṃ // Bv_17.6 //

Koṭisatānaṃ navutīnaṃ asītiyā ca koṭinaṃ /

ete āsuṃ tayo ṭhānā vimalānaṃ samāgame // Bv_17.7 //

Ahaṃ tena samayena Maṅgalo nāma tāpaso /

uggatejo duppasaho abhiññābalasamāhito // Bv_17.8 //

Jambuto phalam-āhatvā Siddhatthassa adās’ ahaṃ /

paṭiggahetvā sambuddho idaṃ vacanam-abravī:1 // Bv_17.9 //

Passathā imam tāpāsam jatilaṃ uggatāpanaṃ /

catunavute ito kappe ayaṃ buddho bhavissati // Bv_17.10 //

Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāyaso // Bv_17.11 //

Tassāpi vacanaṃ sutvā bhiyyo cittaṃ pasādayiṃ /

uttariṃ vatam-adhiṭṭhāsiṃ dasapāramipūriyā // Bv_17.12 //

Vebhāraṃ nāma nagaraṃ Udeno nāma khattiyo /

Suphassā nāma janikā Siddhatthassa mahesino // Bv_17.13 //

(069) Dasavassasahassāni agāraṃ ajjha so vasi /

Kokās’-Uppala-Kokanadā tayo pāsāda-m-uttamā // Bv_17.14 //

Tisoḷasasahassāni nāriyo samalaṅkatā /

Sumanā nāma sā nārī Anupamo nāma atrajo // Bv_17.15 //

Nimitte caturo disvā sivikāyānena nikkhami /

anūnadasamāsāni padhānaṃ padahī jino // Bv_17.16 //

Brahmunā yācito santo Siddhatto lokanāyako /

vatti cakkaṃ mahāvīro migadāye nar’ uttamo // Bv_17.17 //

Samphalo ca Sumitto ca ahesuṃ aggasāvakā /

Revato nām’ upaṭṭhāko Siddhatthassa mahesino // Bv_17.18 //

Sīvalā ca Surāmā ca ahesuṃ aggasāvikā /

bodhi tassa bhagavato kaṇikāro31 ’ti vuccati // Bv_17.19 //

Suppiyo ca Samuddo ca ahesuṃ agg’ upaṭṭhakā /

Rammā c’ eva Surammā ca ahesuṃ agg’ upaṭṭhikā // Bv_17.20 //

So buddho saṭṭhiratanaṃ ahosi nabham-uggato /

kañcan’ agghiyasaṅkāso dasasahassī virocati // Bv_17.21 //

So pi buddho asamasamo atulo appaṭipuggalo /

vassasatasahassāni loke aṭṭhāsi cakkhumā // Bv_17.22 //

Vimalaṃ pabhaṃ dassayitvā pupphāpetvāna sāvake /

vilāsetvā ca samāpatyā nibbuto so sasāvako // Bv_17.23 //

Siddhattho munivaro buddho Anomārāmamhi nibbuto /

tatth’ ev’ assa thūpavaro catuyojana-m-uggato ti // Bv_17.24 //

Siddhatthassa bhagavato vaṃso soḷasamo

(070) Blank Page.

(071) XVIII -- TISSABUDDHAVAṂSO

Siddhatthassa aparena asamo appaṭipuggalo /

anantatejo amitayaso Tisso lok’ agganāyako // Bv_18.1 //

Tam’ andhakāraṃ vidhametvā obhāsetvā sadevakaṃ /

anukampako mahāvīro loke uppajji cakkhumā // Bv_18.2 //

Tassāpi atulā iddhi atulaṃ sīlaṃ samādhi ca /

sabbattha pāramiṃ gantvā dhammacakkam-pavattayi // Bv_18.3 //

So buddho dasasahassimhi viññāpesi giraṃ suciṃ /

koṭisatāni abhisamiṃsu paṭhame dhammadesane // Bv_18.4 //

Dutiye navutikoṭiyo tatiye saṭṭhikoṭiyo /

bandhanā so vimocesi sampatte naramarū tadā // Bv_18.5 //

Sannipātā tayo āsuṃ Tisse lok’ agganāyake /

khīṇāsavīnaṃ vimalānaṃ santacittāna tādinaṃ // Bv_18.6 //

Khīṇāsavasahassānaṃ paṭhamo āsi samāgamo /

navutisatasahassānaṃ dutiyo āsi samāgamo // Bv_18.7 //

Asītisatasahassānaṃ tatiyo āsi samāgamo /

khīṇāsavānaṃ vimalānaṃ pupphitānaṃ vimuttiyā // Bv_18.8 //

Ahaṃ tena samayena Sujāto nāma khattiyo /

mahābhogaṃ chaḍḍayitvā pabbajiṃ isipabbajaṃ // Bv_18.9 //

Mayi pabbajite sante uppajji lokanāyako /

buddho ’ti saddaṃ sutvāna pīti me upapajjatha // Bv_18.10 //

Dibbaṃ mandāravaṃ pupphaṃ padumaṃ pāricchattakaṃ /

ubho hatthehi paggayha dhunamāno upāgamiṃ // Bv_18.11 //

Catuvaṇṇaparivutaṃ Tissaṃ lok’ agganāyakaṃ /

tam-ahaṃ pupphaṃ gahetvāna matthake dhārayiṃ jinaṃ // Bv_18.12 //

So pi maṃ buddho vyākāsi janamajjhe nisīdiya: /

dvenavute ito kappe ayaṃ buddho bhavissati // Bv_18.13 //

(072) Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāyaso // Bv_18.14 //

Tassāpi vacanaṃ sutvā bhiyyo cittaṃ pasādayiṃ /

uttariṃ vatam-adhiṭṭhāsiṃ dasapāramipūriyā // Bv_18.15 //

Khemakaṃ nāma nagaraṃ Janasandho nāma khattiyo /

Padumā nāma janikā Tissassa ca mahesino // Bv_18.16 //

Sattavassasahassāni agāraṃ ajjha so vasi /

Guhāsela-Nāri-Nisabhā tayo pāsāda-m-uttamā // Bv_18.17 //

Samatiṃsasahassāni nāriyo samalaṅkatā /

Subhaddā nāma sā nārī Ānando nāma atrajo // Bv_18.18 //

Nimitte caturo disvā assayānena nikkhami /

anūnakaṃ aṭṭhamāsaṃ padhānaṃ padahī jino // Bv_18.19 //

Brahmunā yācito santo Tisso lok’ agganāyako /

vatti cakkaṃ mahāvīro Yasavatiyam-uttame // Bv_18.20 //

Brahmadevo Udayo ca ahesuṃ aggasāvakā /

Samaṅgo nām’ upaṭṭhāko Tissassa ca mahesino // Bv_18.21 //

Phussā c’ eva Sudattā ca ahesuṃ aggasāvikā /

bodhi tassa bhagavato asano32 ’ti pavuccati // Bv_18.22 //

Sambalo ca Sirī c’ eva ahesuṃ agg’ upaṭṭhakā /

Kisāgotamī Upasenā ahesuṃ agg’ upaṭṭhikā // Bv_18.23 //

So pi buddho saṭṭhiratano ahu uccattanena jino /

anūpamo asadiso Himavā viya dissati // Bv_18.24 //

Tassāpi atulatejassa āyu āsi anuttaro /

vassasatasahassāni loke aṭṭhāsi cakkhumā // Bv_18.25 //

Uttamaṃ pavaraṃ seṭṭhaṃ anubhotvā mahāyasaṃ /

jalitvā aggikkhandho va nibbuto so sasāvako // Bv_18.26 //

Valāhako va anilena suriyena viya ussavo /

andhakāro va dīpena nibbuto so sasāvako // Bv_18.27 //

Tisso jinavaro buddho Nandārāmamhi nibbuto /

tatth’ eva tassa jinathūpo tīṇi yojana-m-ussito39 ’ti // Bv_18.28 //

Tissassa bhagavato vaṃso sattarasamo

(073) Blank Page.

(074) XIX -- PHUSSABUDDHAVAṂSO

Tatth’ eva Maṇḍakappamhi ahu satthā anuttaro /

anūpamo asamasamo Phusso lok’ agganāyako // Bv_19.1 //

So pi sabbaṃ tamaṃ hantvā vijaṭetvā mahājaṭaṃ /

sadevakaṃ tappayanto abhivassi amat’ ambunā // Bv_19.2 //

Dhammacakkappavattente phusse nakkhattamaṅgale /

koṭisatasahassānaṃ paṭhamābhisamayo ahu // Bv_19.3 //

Navutisatasahassānaṃ dutiyābhisamayo ahu /

asītisatasahassānaṃ tatiyābhisamayo ahu // Bv_19.4 //

Sannipātā tayo āsuṃ Phussassāpi mahesino /

khīṇāsavānaṃ vimalānaṃ santacittāna tādinaṃ // Bv_19.5 //

Saṭṭhisatasahassānaṃ paṭhamo āsi samāgamo /

paññāsasatasahassānaṃ dutiyo āsi samāgamo // Bv_19.6 //

Cattārīsasatasahassānaṃ tatiyo āsi samāgamo /

anupādā vimuttānaṃ vocchinnapaṭisandhinaṃ // Bv_19.7 //

Ahaṃ tena samayena Vijitāvī nāma khattiyo /

chaḍḍayitvāna mahārajjaṃ pabbajiṃ tassa santike // Bv_19.8 //

So pi maṃ buddho vyākāsi Phusso lok’ agganāyako: /

ito dvenavute kappe ayaṃ buddho bhavissati // Bv_19.9 //

Padhānaṃ padahitvāna katvā dukkarakārikaṃ /

assatthamūle sambuddho bujjhissati mahāyaso // Bv_19.10 //

Tassāpi vacanaṃ sutvā bhiyyo cittaṃ pasādayiṃ /

uttariṃ vatam19-adhiṭṭhāsiṃ dasapāramipūriyā // Bv_19.11 //

Suttantaṃ vinayañcāpi navaṅgaṃ satthusāsanaṃ /

sabbaṃ pariyāpuṇitvāna sobhayiṃ jinasāsanaṃ // Bv_19.12 //

Tatth’ appamatto viharanto brahmaṃ bhāvetva bhāvanaṃ /

abhiññāsu pāramiṃ gantvā brahmalokaṃ agacch’ ahaṃ // Bv_19.13 //

Kāsikaṃ nāma nagaraṃ Jayaseno nāma khattiyo /

Sirimā nāma janikā Phussassāpi mahesino // Bv_19.14 //

(075) Chabbassasahassāni agāraṃ ajjha so vasi /

Garuḷa26-Haṃsa-Suvaṇṇabharā tayo pāsāda-m-uttamā // Bv_19.15 //

Tevīsasahassāni nāriyo samalaṅkatā /

Kisāgotamī nāma nārī Ānando nāma atrajo // Bv_19.16 //

Nimitte caturo disvā hatthiyānena nikkhami /

chamāsaṃ padhānacāraṃ acarī puris’ uttamo // Bv_19.17 //

Brahmunā yācito santo Phusso lok’ agganāyako /

vatti cakkaṃ mahāvīro migadāye nar’ uttamo // Bv_19.18 //

Sukhito Dhammaseno ca ahesuṃ aggasāvakā /

Sabhiyo nām’ upaṭṭhāko Phussassa ca mahesino // Bv_19.19 //

Cālā ca Upacālā ca ahesuṃ aggasāvikā /

bodhi tassa bhagavato āmaṇḍo37 ’ti pavuccati // Bv_19.20 //

Dhanañjayo Visākho ca ahesuṃ agg’ upaṭṭhakā /

Padumā c’ eva Nāgā ca ahesuṃ agg’ upaṭṭhikā // Bv_19.21 //

Aṭṭhapaññāsaratanaṃ so pi accuggato muni /

sobhati sataraṃsī va ulurājā va pūrito // Bv_19.22 //

Navutivassasahassāni āyu vijjati tāvade /

tāvatā tiṭṭhamāno so tāresi janataṃ bahuṃ // Bv_19.23 //

Ovaditvā bahū satte santāretvā mahājane /

so pi satthā atulayaso nibbuto so sasāvako // Bv_19.24 //

Phusso jinavaro satthā Senārāmamhi nibbuto /

dhātuvitthārikaṃ āsi tesu tesu padesato ti // Bv_19.25 //

Phussassa bhagavato vaṃso aṭṭhārasamo

(076) Blank Page.

(077) XX -- VIPASSIBUDDHAVAṂSO

Phussassa ca aparena sambuddho dvipad’ uttamo /

Vipassī nāma nāmena loke uppajji cakkhumā // Bv_20.1 //

Avijjaṃ sabbaṃ padāletvā patto sambodhim-uttamaṃ /

dhammacakkaṃ pavattetuṃ pakkāmi Bandhumatīpuraṃ // Bv_20.2 //

Dhammacakkaṃ pavattetvā ubho bodhesi nāyako /

gaṇanāya na vattabbo paṭhamābhisamayo ahu // Bv_20.3 //

Punāparaṃ amitayaso tattha saccaṃ pakāsayi, /

caturāsītisahassānaṃ dutiyābhisamayo ahu // Bv_20.4 //

Caturāsītisahassāni sambuddhaṃ anupabbajuṃ /

tesam-ārāmapattānaṃ dhammaṃ desesi cakkhumā // Bv_20.5 //

Sabbākārena bhāsato sutvā upanisādino /

te pi dhammaṃ varaṃ gantvā tatiyābhisamayo ahu // Bv_20.6 //

Sannipātā tayo āsuṃ Vipassissa mahesino /

khīṇāsavānaṃ vimalānaṃ santacittāna tādinaṃ // Bv_20.7 //

Aṭṭhasaṭṭhisahassānaṃ paṭhamo āsi samāgamo /

bhikkhusatasahassānaṃ dutiyo āsi samāgamo // Bv_20.8 //

Asītibhikkhusahassānaṃ tatiyo āsi samāgamo. /

tattha bhikkhugaṇamajjhe sambuddho atirocati // Bv_20.9 //

Ahaṃ tena samayena nāgarājā mah’ iddhiko /

Atulo nāma nāmena puññavanto jutindharo // Bv_20.10 //

Nekānaṃ nāgakoṭīnaṃ parivāretvān’ ahaṃ tadā /

vajjanto dibbaturiyehi lokajeṭṭhaṃ upāgamiṃ // Bv_20.11 //

Upasaṅkamitvā sambuddhaṃ Vipassiṃ lokanāyakaṃ /

maṇimuttaratanakhacitaṃ sabbābharaṇabhūsitaṃ /

nimantetvā dhammarājassa suvaṇṇapīṭham-adās’ ahaṃ // Bv_20.12 //

So pi maṃ buddho vyākāsi saṅghamajjhe nisīdiya: /

ekanavute ito kappe ayaṃ buddho bhavissati // Bv_20.13 //

Ahu Kapilavhaye ramme nikkhamitvā tathāgato /

padhānaṃ padahitvāna katvā dukkarakārikaṃ,// Bv_20.14 //

(078) Ajapālarukkhamūlamhi nisīditvā tathāgato /

tattha pāyāsam-aggayha Nerañjaram-upehiti // Bv_20.15 //

Nerañjarāya tīramhi pāyāsaṃ asatī jino /

paṭiyattavaramaggena bodhimūlaṃ upehiti // Bv_20.16 //

Tato padakkhiṇaṃ katvā bodhimaṇḍaṃ anuttaro /

assatthamūle sambodhiṃ bujjhissati mahāyaso // Bv_20.17 //

Imassa janikā mātā Māyā nāma bhavissati /

pitā Suddhodano nāma ayaṃ hessati Gotamo // Bv_20.18 //

Anāsavā vītarāgā santacittā samāhitā /

Kolito Upatisso ca aggā hessanti sāvakā // Bv_20.19 //

Ānando nām’ upaṭṭhāko upaṭṭhissati taṃ jinaṃ /

Khemā Uppalavaṇṇā ca aggā hessanti sāvikā, // Bv_20.20 //

Anāsavā vītarāgā santacittā samāhitā | /

bodhi tassa bhagavato assattho ’ti pavuccati // Bv_20.21 //

Tassāhaṃ vacanaṃ sutvā bhiyyo cittaṃ pasādayiṃ /

uttariṃ vatam-adhiṭṭhāsiṃ dasapāramipūriyā // Bv_20.22 //

Nagaraṃ Bandhumatī nāma Bandhumā nāma khattiyo /

mātā Bandhumatī nāma Vipassissa mahesino // Bv_20.23 //

Aṭṭhavassasahassāni agāraṃ ajjha so vasi /

Nando Sunando Sirimā tayo pāsāda-m-uttamā // Bv_20.24 //

Ticattārīsasahassāni nāriyo samalaṅkatā /

Sutanā nāma sā nārī Samavattakkhandho nām’ atrajo // Bv_20.25 //

Nimitte caturo disvā rathayānena nikkhami /

anūna-aṭṭhamāsāni padhānaṃ padahī jino // Bv_20.26 //

Brahmunā yācito santo Vipassī lokanāyako /

vatti cakkaṃ mahāvīro migadāye nar’ uttamo // Bv_20.27 //

Khandho ca Tissanāmo ca ahesuṃ aggasāvakā /

Asoko nām’ upaṭṭhāko Vipassissa mahesino // Bv_20.28 //

Candā ca Candamittā ca ahesuṃ aggasāvikā /

bodhi tassa bhagavato pāṭalī ’ti pavuccati // Bv_20.29 //

Punabbasumitto Nāgo ca ahesuṃ agg’ upaṭṭhakā /

Sirimā Uttarā c’ eva ahesuṃ agg’ upaṭṭhikā // Bv_20.30 //

(079) Asītihattha-m-ubbedho Vipassī lokanāyako /

pabhā niddhāvatī tassa samantā sattayojane // Bv_20.31 //

Asītivassasahassāni āyu buddhassa tāvade /

tāvatā tiṭṭhamāno so tāresi janataṃ bahuṃ // Bv_20.32 //

Bahū devamanussānaṃ bandhanā parimocayi /

maggāmaggañca ācikkhi avasesaputhujjane // Bv_20.33 //

Ālokaṃ dassayitvāna desetvā amataṃ padaṃ /

jalitvā aggikkhandho va nibbuto so sasāvako // Bv_20.34 //

Iddhivaraṃ puññavaraṃ lakkhaṇaṃ catubhūmakaṃ /

sabbaṃ samantarahitaṃ nanu rittā sabbasaṅkhārā // Bv_20.35 //

Vipassī jinavaro dhīro Sumittārāmamhi nibbuto /

tatth’ eva tassa thūpavaro sattayojana-m-ussito ti // Bv_20.36 //

Vipassissa bhagavato vaṃso ekūnavīsatimo

(080) XXI -- SIKHĪBUDDHAVAṂSO

Vipassissa aparena sambuddho dvipad’ uttamo /

Sikhisavhayo nāma jino asamo appaṭipuggalo // Bv_21.1 //

Mārasenaṃ pamadditvā patto sambodhim-uttamaṃ /

dhammacakkaṃ pavattesi anukampāya pāṇinaṃ // Bv_21.2 //

Dhammacakkappavattente Sikhimhi jinapuṅgave /

koṭisatasahassānaṃ paṭhamābhisamayo ahu // Bv_21.3 //

Aparam-pi dhammaṃ desente gaṇaseṭṭhe nar’ uttame /

navutikoṭisahassānaṃ dutiyābhisamayo ahu // Bv_21.4 //

Yamakaṃ pāṭihīrañca dassayante sadevake /

asītikoṭisahassānaṃ tatiyābhisamayo ahu // Bv_21.5 //

Sannipātā tayo āsuṃ Sikhissāpi mahesino /

khīṇāsavānaṃ vimalānaṃ santacittāna tādinaṃ // Bv_21.6 //

Bhikkhusatasahassānaṃ paṭhamo āsi samāgamo /

asītibhikkhusahassānaṃ dutiyo āsi samāgamo // Bv_21.7 //

Sattatibhikkhusahassānaṃ tatiyo āsi samāgamo /

anupalitto padumaṃ va toyamhi sampavaḍḍhitaṃ // Bv_21.8 //

Ahaṃ tena samayena Arindamo nāma khattiyo /

sambuddhapamukhaṃ saṅghaṃ annapānena tappayiṃ // Bv_21.9 //

Bahuṃ dussavaraṃ datvā dussakoṭiṃ anappakaṃ /

alaṅkataṃ hatthiyānaṃ sambuddhassa adās’ ahaṃ // Bv_21.10 //

Hatthiyānaṃ nimminitvā kappiyaṃ upanāmayiṃ /

pūrayiṃ mānasaṃ mayhaṃ niccaṃ daḷham-upaṭṭhitaṃ // Bv_21.11 //

So pi maṃ buddho vyākāsi Sikhī lok’ agganāyako: /

ekatiṃse ito kappe ayaṃ buddho bhavissati // Bv_21.12 //

Ahu Kapilavhaye ramme nikkhamitvā tathāgato /

padhānaṃ padahitvāna katvā dukkarakārikaṃ,// Bv_21.13 //

(081) Tassāhaṃ vacanaṃ sutvā bhiyyo cittaṃ pasādayiṃ /

uttariṃ vatam-adhiṭṭhāsiṃ dasapāramipūriyā // Bv_21.14 //

Nagaraṃ Aruṇavatī nāma Aruṇo nāma khattiyo /

Pabhāvatī nāma janikā Sikhissa ca mahesino // Bv_21.15 //

Sattavassasahassāni agāraṃ ajjha so vasi /

Sucando Giri Vahano tayo pāsāda-m-uttamā // Bv_21.16 //

Catuvīsasahassāni nāriyo samalaṅkatā /

Sabbakāmā nāma nārī Atulo nāma atrajo // Bv_21.17 //

Nimitte caturo disvā hatthiyānena nikkhami /

aṭṭhamāsaṃ padhānacāraṃ acarī puris’ uttamo // Bv_21.18 //

Brahmunā yācito santo Sikhī lok’ agganāyako /

Vatti cakkaṃ mahāvīro migadāye nar’ uttamo // Bv_21.19 //

Abhibhū Sambhavo nāma ahesuṃ aggasāvakā /

Khemaṅkaro upaṭṭhāko Sikhissāpi mahesino // Bv_21.20 //

Akhilā c’ eva Padumā ca ahesuṃ aggasāvikā /

bodhi tassa bhagavato puṇḍarīko ’ti vuccati // Bv_21.21 //

Sirivaḍḍho ca Cando ca ahesuṃ agg’ upaṭṭhakā /

Cittā c’ eva Suguttā ca ahesuṃ agg’ upaṭṭhikā // Bv_21.22 //

Uccattanena so buddho sattatihattha-m-uggato /

kañcan’ agghikasaṅkāso dvattiṃsavaralakkhaṇo // Bv_21.23 //

Tassāpi byāmappabhā kāyā divā rattiṃ nirantaraṃ /

disodisaṃ niccharanti tīṇi yojanaso pabhā // Bv_21.24 //

Sattativassasahassāni āyu tassa mahesino /

tāvatā tiṭṭhamāno so tāresi janataṃ bahuṃ // Bv_21.25 //

Dhammameghaṃ pavassetvā temayitvā sadevake /

khemantaṃ pāpayitvāna nibbuto so sasāvako // Bv_21.26 //

Anuvyañjanasampannaṃ dvattiṃsavaralakkhaṇaṃ /

sabbaṃ samantarahitaṃ nanu rittā sabbasaṅkhārā // Bv_21.27 //

Sikhī munivaro buddho Dussārāmamhi nibbuto /

tatth’ eva tassa thūpavaro tīṇi yojana-m-uggato ti // Bv_21.28 //

Sikhissa bhagavato vaṃso vīsatimo

(082) Blank Page.

(083) XXII -- VESSABHŪBUDDHAVAṂSO

Tatth’ eva Maṇḍakappamhi asamo appaṭipuggalo /

Vessabhū nāma nāmena loke uppajji nāyako // Bv_22.1 //

Ādittaṃ vata rāg’ aggi-taṇhānaṃ vijitaṃ tadā /

nāgo va bandhanaṃ chetvā patto sambodhim-uttamaṃ // Bv_22.2 //

Dhammacakkappavattente Vessabhū-lokanāyake /

asītikoṭisahassānaṃ paṭhamābhisamayo ahu // Bv_22.3 //

Pakkante cārikaṃ raṭṭhe lokajeṭṭhe narāsabhe /

sattatikoṭisahassānaṃ dutiyābhisamayo ahu // Bv_22.4 //

Mahādiṭṭhiṃ vinodento pāṭihīraṃ karoti so | /

samāgatā naramarū dasasahassī sadevake // Bv_22.5 //

Mahā-acchariyaṃ disvā abbhutaṃ lomahaṃsanaṃ /

devā c’ eva manussā ca bujjhare saṭṭhikoṭiyo // Bv_22.6 //

Sannipātā tayo āsuṃ Vessabhussa mahesino /

khīṇāsavānaṃ vimalānaṃ santacittāna tādinaṃ // Bv_22.7 //

Asītibhikkhusahassānaṃ paṭhamo āsi samāgamo /

sattatibhikkhusahassānaṃ dutiyo āsi samāgamo // Bv_22.8 //

Saṭṭhibhikkhusahassānaṃ tatiyo āsi samāgamo /

jarādibhayabhītānaṃ orasānaṃ mahesino // Bv_22.9 //

Tassa buddhassa asamassa cakkaṃ vattitam-uttamaṃ /

sutvāna paṇītaṃ dhammaṃ pabbajjam-abhirocayiṃ // Bv_22.10 //

Ahaṃ tena samayena Sudassano nāma khattiyo /

annapānena vatthena sasaṅghaṃ jinaṃ pūjayiṃ // Bv_22.11 //

Mahādānaṃ pavattetvā rattindivam-atandito /

pabbajjaṃ guṇasampannaṃ pabbajiṃ jinasantike // Bv_22.12 //

Ācāraguṇasampanno vattasīlasamāhito /

sabbaññutaṃ gavesanto ramāmi jinasāsane // Bv_22.13 //

(084) Saddhāpītim-upāgantvā buddhaṃ vandāmi sattharaṃ /

pīti uppajjatī mayhaṃ bodhiyā yeva kāraṇā // Bv_22.14 //

Anivattamānasaṃ ñatvā sambuddho etad-abravī: /

ekatiṃse ito kappe ayaṃ buddho bhavissati // Bv_22.15 //

Ahu Kapilavhaye ramme nikkhamitvā tathāgato /

padhānaṃ padahitvāna katvā dukkarakārikaṃ,// Bv_22.16 //

Tassāhaṃ vacanaṃ sutvā bhiyyo cittaṃ pasādayiṃ /

uttariṃ vatam-adhiṭṭhāsiṃ dasapāramipūriyā // Bv_22.17 //

Anomaṃ nāma nagaraṃ Supatīto nāma khattiyo /

mātā Yasavatī nāma Vessabhussa mahesino // Bv_22.18 //

Chabbassasahassāni agāraṃ ajjha so vasi /

Ruci Suruci-Vaḍḍhamānā tayo pāsāda-m-uttamā // Bv_22.19 //

Anūnatiṃsasahassāni nāriyo samalaṅkatā /

Sucittā nāma sā nārī Suppabuddho nāma atrajo // Bv_22.20 //

Nimitte caturo disvā sivikāyābhinikkhami /

chamāsaṃ padhānacāram-acarī puris’ uttamo // Bv_22.21 //

Brahmunā yācito santo Vessabhū lokanāyako /

Vatti cakkaṃ mahāvīro Aruṇārāme nar’ uttamo // Bv_22.22 //

Soṇo ca Uttaro c’ eva ahesuṃ aggasāvakā /

Upasanto nām’ upaṭṭhāko Vessabhussa mahesino // Bv_22.23 //

Dāmā ca Samālā ca ahesuṃ aggasāvikā /

bodhi tassa bhagavato mahāsālo34 ’ti vuccati // Bv_22.24 //

Sotthiko c’ eva Rammo ca ahesuṃ agg’ upaṭṭhakā /

Gotamī ca Sirīmā ca ahesuṃ agg’ upaṭṭhakā // Bv_22.25 //

Saṭṭhiratanam-ubbedho hemayūpasamūpamo /

kāyā niccharatī raṃsī rattī va pabbate sikhī // Bv_22.26 //

Saṭṭhivassasahassāni āyu vijjati tāvade /

tāvatā tiṭṭhamāno so tāresi janataṃ bahuṃ // Bv_22.27 //

Dhammaṃ vitthārikaṃ katvā vibhajitvā mahājanaṃ /

dhammanāvaṃ ṭhapetvāna nibbuto so sasāvako // Bv_22.28 //

(085) Dassaneyyaṃ sabbajanaṃ vihārañ-c’ iriyāpathaṃ /

sabbaṃ samantarahitaṃ nanu rittā sabbasaṅkhāra // Bv_22.29 //

Vessabhū jinavaro satthā Khemārāmamhi nibbuto /

dhātuvitthārikaṃ āsi tesu tesu padesato ti // Bv_22.30 //

Vessabhussa bhagavato vaṃso ekavīsatimo

(086) XXIII -- KAKUSANDHABUDDHAVAṂSO

Vessabhussa aparena sambuddho dvipad’ uttamo /

Kakusandho nāma nāmena appameyyo durāsado // Bv_23.1 //

Ugghāṭetvā sabbabhavaṃ cariyā-pāramiṅgato /

sīho va pañjaraṃ bhetvā patto sambodhim-uttamaṃ // Bv_23.2 //

Dhammacakkappavattente Kakusandhe lokanāyake /

cattārīsaṃ koṭisahassānaṃ paṭhamābhisamayo ahu // Bv_23.3 //

Antalikkhamhi ākāse yamakaṃ katvā vikubbamaṃ /

tiṃsakoṭisahassānaṃ bodhesi devamānuse // Bv_23.4 //

Naradevassa yakkhassa catusaccappakāsane /

dhammābhisamayo tassa gaṇanāto asaṅkhiyo // Bv_23.5 //

Kakusandhassa bhagavato eko āsi samāgamo /

khīṇāsavānaṃ vimalānaṃ santacittāna tādinaṃ // Bv_23.6 //

Cattālīsasahassānaṃ tadā āsi samāgamo /

dantabhūmim-anuppattānaṃ āsavādi-gaṇakkhayā // Bv_23.7 //

Ahaṃ tena samayena Khemo nāmāsi khattiyo /

tathāgate jinaputte dānaṃ datvā anappakaṃ, // Bv_23.8 //

Pattañca cīvaraṃ datvā añjanaṃ madhulaṭṭhikaṃ /

im’ etaṃ patthitaṃ sabbaṃ paṭiyādemi varaṃ varaṃ // Bv_23.9 //

So pi maṃ muni vyākāsi Kakusandho vināyako:1 /

imamhi Bhaddake kappe ayaṃ buddho bhavissati // Bv_23.10 //

Ahu Kapilavhaye ramme nikkhamitvā tathāgato /

padhānaṃ padahitvāna katvā dukkarakārikaṃ,// Bv_23.11 //

Tassāhaṃ vacanaṃ sutvā bhiyyo cittaṃ pasādayiṃ /

uttariṃ vatam-adhiṭṭhāsiṃ dasapāramipūriyā // Bv_23.12 //

Nagaraṃ Khemavatī nāma Khemo nāmās’ ahaṃ tadā /

sabbaññutaṃ gavesanto pabbajiṃ tassa santike // Bv_23.13 //

Brāhmaṇo Aggidatto ca āsi buddhassa so pitā /

Visākhā nāma janikā Kakusandhassa mahesino // Bv_23.14 //

(087) Vasī tattha Khemapure sambuddhassa mahākulaṃ /

narānaṃ pavaraṃ seṭṭhaṃ jātimantaṃ mahāyasaṃ // Bv_23.15 //

Catuvassasahassāni agāraṃ ajjha so vasi /

Ruci-Suruci-Vaḍḍhamānā tayo pāsāda-m-uttamā // Bv_23.16 //

Samatiṃsasahassāni nāriyo samalaṅkatā /

Virocamānā nāma nārī Uttaro nāma atrajo // Bv_23.17 //

Nimitte caturo disvā rathayānena nikkhami /

anūnakaṃ aṭṭhamāsaṃ padhānaṃ padahī jino // Bv_23.18 //

Brahmunā yācito santo Kakusandho lokanāyako /

vatti cakkaṃ mahāvīro migadāye nar’ uttamo // Bv_23.19 //

Vidhuro Sañjīvanāmo ca ahesuṃ aggasāvakā /

Buddhijo nām’ upaṭṭhāko Kakusandhassa satthuno // Bv_23.20 //

Samā ca Campanāmā ca ahesuṃ aggasāvikā /

bodhi tassa bhagavato sirīso ’ti pavuccati // Bv_23.21 //

Accuto ca Sumano ca ahesuṃ agg’ upaṭṭhakā /

Nandā c’ eva Sunandā ca ahesuṃ agg’ upaṭṭhikā // Bv_23.22 //

Cattārīsaratanāni accuggato mahāmuni /

kanakappabhā niccharanti samantā dasayojanaṃ // Bv_23.23 //

Cattārīsavassasahassāni āyu tassa mahesino /

tāvatā tiṭṭhamāno so tāresi janataṃ bahuṃ // Bv_23.24 //

Dhammāpaṇaṃ pasāretvā naranārīnaṃ sadevake /

naditvā sīhanādañca nibbuto so sasāvako // Bv_23.25 //

Aṭṭhaṅgavacanasampanno acchiddāni nirantaraṃ /

sabbaṃ samantarahitaṃ nanu rittā sabbasaṅkhārā // Bv_23.26 //

Kakusandho jinavaro Khemārāmamhi nibbuto /

tatth’ eva tassa thūpavaro gāvutaṃ nabham-uggato ti // Bv_23.27 //

Kakusandhassa bhagavato vaṃso dvāvīsatimo

(088) Blank Page.

(089) XXIV -- KOṆĀGAMANABUDDHAVAṂSO

Kakusandhassa aparena sambuddho dvipad’ uttamo /

Koṇāgamano nāma jino lokajeṭṭho narāsabho // Bv_24.1 //

Dasadhamme pūrayitvāna kantāraṃ samatikkami /

pavāhiya malaṃ sabbaṃ patto sambodhim-uttamaṃ // Bv_24.2 //

Dhammacakkappavattente Koṇāgamananāyake /

tiṃsakoṭisahassānaṃ paṭhamābhisamayo ahu // Bv_24.3 //

Pāṭihīraṃ karonte ca paravādappamaddane /

vīsatikoṭisahassānaṃ dutiyābhisamayo ahu // Bv_24.4 //

Tato vikubbanaṃ katvā jino devapuraṃ gato /

vasati tattha sambuddho silāyaṃ Paṇḍukambale // Bv_24.5 //

Pakaraṇe satta desento vassaṃ vasati so muni /

dasakoṭisahassānaṃ tatiyābhisamayo ahu // Bv_24.6 //

Tassāpi devadevassa eko āsi samāgamo /

khīṇāsavānaṃ vimalānaṃ santacittāna tādinaṃ // Bv_24.7 //

Tiṃsabhikkhusahassānaṃ tadā āsi samāgamo /

oghānam-atikkantānaṃ bhijjitānañca maccuyā // Bv_24.8 //

Ahaṃ tena samayena Pabbato nāma khattiyo /

mittāmaccehi sampanno anantabalavāhano // Bv_24.9 //

Sambuddhadassanaṃ gantvā sutvā dhammam-anuttaraṃ /

nimantetvā sajinaṃ saṅghaṃ dānaṃ datvā yadicchakaṃ, // Bv_24.10 //

Pattunnaṃ cīnapaṭṭañca koseyyaṃ kambalam-pi ca /

sovaṇṇapādukañc’ eva adāsiṃ satthusāvake // Bv_24.11 //

So pi maṃ muni vyākāsi saṅghamajjhe nisīdiya: /

imamhi Bhaddake kappe ayaṃ buddho bhavissati // Bv_24.12 //

Ahu Kapilavhaye ramme nikkhamitvā tathāgato /

padhānaṃ padahitvāna katvā dukkarakārikaṃ,// Bv_24.13 //

(090) Tassāhaṃ vacanaṃ sutvā bhiyyo cittaṃ pasādayiṃ /

uttariṃ vatam-adhiṭṭhāsiṃ dasapāramipūriyā // Bv_24.14 //

Sabbaññutaṃ gavesanto dānaṃ datvā nar’ uttame /

ohāyāhaṃ mahārajjaṃ pabbajiṃ jinasantike // Bv_24.15 //

Nagaraṃ Sobhavatī nāma Sobho nāmāsi khattiyo /

vasati tattha nagare sambuddhassa mahākulaṃ // Bv_24.16 //

Brāhmaṇo Yaññadatto ca āsi buddhassa so pitā /

Uttarā nāma janikā Koṇāgamanassa satthuno // Bv_24.17 //

Tīṇi vassasahassāni agāraṃ ajjha so vasi /

Tusita-Santusita-Santuṭṭhā tayo pasāda-m-uttamā // Bv_24.18 //

Anūnasoḷasasahassāni nāriyo samalaṅkatā /

Rucigattā nāma nārī Satthavāho nāma atrajo // Bv_24.19 //

Nimitte caturo disvā hatthiyānena nikkhami /

chamāsaṃ padhānacāraṃ acarī puris’ uttamo // Bv_24.20 //

Brahmunā yācito santo Koṇāgamano nāyako /

vatti cakkaṃ mahāvīro migadāye nar’ uttamo // Bv_24.21 //

Bhiyyaso Uttaro nāma ahesuṃ aggasāvakā /

Sotthijo nām’ upaṭṭhāko Koṇāgamanassa satthuno // Bv_24.22 //

Samuddā Uttarā c’ eva ahesuṃ aggasāvikā /

bodhi tassa bhagavato udumbaro ’ti vuccati // Bv_24.23 //

Uggo ca Somadevo ca ahesuṃ agg’ upaṭṭhakā /

Sīvalā c’ eva Sāmā ca ahesuṃ agg’ upaṭṭhikā // Bv_24.24 //

Uccattanena so buddho tiṃsahatthasammuggato /

ukkāmukhe yathā kambu evaṃ raṃsīhi maṇḍito // Bv_24.25 //

Tiṃsavassasahassānī āyu buddhassa tāvade /

tāvatā tiṭṭhamāno so tāresi janataṃ bahuṃ // Bv_24.26 //

Dhammacetiṃ samussitvā dhammadussavibhūsitaṃ /

dhammapupphaguḷaṃ katvā nibbuto so sasāvako // Bv_24.27 //

Mahāvilāso tassa jano siridhammappakāsano /

sabbaṃ samantarahitaṃ nanu rittā sabbasaṅkhārā // Bv_24.28 //

(091) Koṇāgamano sambuddho Pabbatārāmamhi nibbuto /

dhātuvitthārikaṃ āsi tesu tesu padesato ti // Bv_24.29 //

Koṇāgamanassa bhagavato vaṃso tevīsatimo

(092) XXV -- KASSAPABUDDHAVAṂSO

Koṇāgamanassa aparena sambuddho dvipad’ uttamo /

Kassapo nāma nāmena dhammarājā pabhaṅkaro // Bv_25.1 //

Sañchaḍḍitaṃ kulamūlaṃ bahūnaṃ pānabhojanaṃ /

datvāna yācake dānaṃ pūrayitvāna mānasaṃ /

usabho va ālakaṃ bhetvā patto sambodhim-uttamaṃ // Bv_25.2 //

Dhammacakkappavattente Kassape lokanāyake /

vīsatikoṭisahassānaṃ paṭhamābhisamayo ahu // Bv_25.3 //

Catumāsaṃ yadā buddho loke carati cārikaṃ /

dasakoṭisahassānaṃ dutiyābhisamayo ahu // Bv_25.4 //

Yamakaṃ vikubbanaṃ katvā ñāṇadhātum-pakittayi /

pañcakoṭisahassānaṃ tatiyābhisamayo ahu // Bv_25.5 //

Sudhammadevapure ramme tattha dhammaṃ pakāsayi /

tīṇī koṭisahassānaṃ devānaṃ bodhayī jino // Bv_25.6 //

Naradevassa yakkhassa apare dhammadesane /

etesānaṃ abhisamayā gaṇanāto asaṅkhiyā // Bv_25.7 //

Tassāpi devadevassa eko āsi samāgamo /

khīṇasavānaṃ vimalānaṃ santacittāna tādinaṃ // Bv_25.8 //

Vīsatibhikkhusahassānaṃ tadā āsi samāgamo /

atikkantabhavakantānaṃ hirisīlena tādinaṃ // Bv_25.9 //

Ahaṃ tadā māṇavako Jotipālo ’ti vissuto /

ajjhāyako mantadharo tiṇṇaṃ vedāna pāragū // Bv_25.10 //

Lakkhaṇe itihāse ca sadhamme pāramiṅgato /

bhumm’ antalikkhe kusalo katavijjo anāvayo // Bv_25.11 //

Kassapassa bhagavato Ghaṭīkāro nām’ upaṭṭhako /

sagāravo sappatisso nibbuto tatiye phale // Bv_25.12 //

Ādāya maṃ Ghaṭīkāro upagañchi Kassapaṃ jinaṃ /

tassa dhammaṃ suṇitvāna pabbajiṃ tassa santike // Bv_25.13 //

(093) Āraddhaviriyo hutvā vattāvattesu kovido /

na kvāpi parihāyāmi pūremi jinasāsanaṃ // Bv_25.14 //

Yāvatā buddhabhaṇitaṃ navaṅgaṃ satthusāsanaṃ /

sabbaṃ pariyāpuṇitvāna sobhayiṃ jinasāsanaṃ // Bv_25.15 //

Mama acchariyaṃ disvā so pi buddho viyākari: /

imamhi Bhaddake kappe ayaṃ buddho bhavissati // Bv_25.16 //

Ahu Kapilavhaye ramme nikkhamitvā tathāgato /

padhānaṃ padahitvāna katvā dukkarakārikaṃ, // Bv_25.17 //

Ajapālarukkhamūle nisīditvā tathāgato /

tattha pāyasam-paggayha Nerañjaram-upehiti // Bv_25.18 //

Nerañjarāya tīramhi pāyāsaṃ paribhuñjiya /

paṭiyattavaramaggena bodhimaṇḍam-upehiti // Bv_25.19 //

Tato padakkhiṇaṃ katvā bodhimaṇḍaṃ nar’ uttamo /

aparājitaṭhānamhi bodhipallaṅka-m-uttame /

pallaṅkena nisīditvā bujjhissati mahāyaso // Bv_25.20 //

Imassa janikā mātā Māyā nāma bhavissati /

pitā Suddhodano nāma ayaṃ hessati Gotamo // Bv_25.21 //

Anāsavā vītarāgā santacittā samāhitā /

Kolito Upatisso ca aggā hessanti sāvakā // Bv_25.22 //

Ānando nām’ upaṭṭhāko upaṭṭhissati taṃ jinaṃ /

Khemā Uppalavaṇṇā ca aggā hessanti sāvikā, // Bv_25.23 //

Anāsavā vītarāgā santacittā samāhitā /

bodhi tassa bhagavato assattho ’ti pavuccati // Bv_25.24 //

Citto ca Hatthāḷavako aggā hessant’ upaṭṭhakā /

Nandamātā Uttarā ca aggā hessant’ upaṭṭhikā // Bv_25.25 //

Idaṃ sutvāna vacanaṃ asamassa mahesino /

āmoditā naramarū: buddhabīj’ aṅkuro ayaṃ // Bv_25.26 //

Ukkuṭṭhisaddā vattanti apphoṭhenti hasanti ca /

katañjalī namassanti dasasahassī sadevakā: // Bv_25.27 //

Yad’ imassa lokanāthassa virajjhissāma sāsanaṃ /

anāgatamhi addhāne hessāma sammukhā imaṃ // Bv_25.28 //

(094) Yathā manussā nadiṃ tarantā paṭititthaṃ virajjhiya /

heṭṭhā titthe gahetvāna uttaranti mahānadiṃ, // Bv_25.29 //

Evam-eva mayaṃ sabbe yadi muñcām’ imaṃ jinaṃ /

anāgatamhi addhāne hessāma sammukhā imaṃ // Bv_25.30 //

Tassāhaṃ vacanaṃ sutvā bhiyyo cittaṃ pasādayiṃ /

uttariṃ vatam-adhiṭṭhāsiṃ dasapāramipūriyā // Bv_25.31 //

Evaṃ ahaṃ saṃsaritvā parivajjento anācaraṃ /

dukkarañ ca kataṃ mayhaṃ bodhiyā yeva kāraṇā // Bv_25.32 //

Nagaraṃ Bārāṇasī nāma Kikī nām’ āsi khattiyo /

vasati tattha nagare sambuddhassa mahākulaṃ // Bv_25.33 //

Brāhmaṇo Brahmadatato ca āsi buddhassa so pitā /

Dhanavatī nāma janikā Kassapassa mahesino // Bv_25.34 //

Duve vassasahassāni agāraṃ ajjha so vasi /

Haṃso Yaso Sirinando tayo pasāda-m-uttamā // Bv_25.35 //

Tisoḷasasahassāni nāriyo samalaṅkatā /

Sunandā nāma sā nārī Vijitaseno nāma atrajo // Bv_25.36 //

Nimitte caturo disvā pāsādenābhinikkhami /

sattāhaṃ padhānacāraṃ acarī puris’ uttamo // Bv_25.37 //

Brahmunā yācito santo Kassapo lokanāyako /

vatti cakkaṃ mahāvīro migadāye nar’ uttamo // Bv_25.38 //

Tisso ca Bhāradvājo ca ahesuṃ aggasāvakā /

Sabbamitto upaṭṭhāko Kassapassa mahesino // Bv_25.39 //

Anulā ca Uruvelā ca ahesuṃ aggasāvikā /

bodhi tassa bhagavato nigrodho ’ti pavuccati // Bv_25.40 //

Sumaṅgalo Ghaṭikāro ca ahesuṃ agg’ upaṭṭhakā /

Vijitasenā ca Bhaddā ca ahesuṃ agg’ upaṭṭhikā // Bv_25.41 //

Uccattanena so buddho vīsatiratanam-uggato /

vijjulaṭṭhī va ākāse cando va gahapūrito // Bv_25.42 //

Vīsativassasahassāni āyu tassa mahesino /

tāvatā tiṭṭhamāno so tāresi janataṃ bahuṃ // Bv_25.43 //

(095) Dhammataḷākaṃ māpetvā sīlaṃ datvā vilepanaṃ /

dhammadussaṃ nivāsetvā dhammamālaṃ virājiya,// Bv_25.44 //

Dhammavimalam-ādāsaṃ ṭhapayitvā mahājane: /

keci nibbānaṃ patthentā passantu me alaṅkaraṃ // Bv_25.45 //

Sīlakañcukaṃ datvāna jhānakavacavammitaṃ /

dhammacammaṃ pārupitvā datvā sannāham-uttamaṃ, // Bv_25.46 //

Satiphalakaṃ datvāna tikhiṇañāṇakuntimaṃ /

dhammakhaggavaraṃ datvā sīlasaṃsaggamaddanaṃ,// Bv_25.47 //

Tevijjābhūsanaṃ datvā āvelaṃ caturo phale /

chaḷabhiññābharaṇaṃ datvā dhammapupphapilandhanaṃ, // Bv_25.48 //

Saddhammapaṇḍaraṃ chattaṃ datvā pāpanivāraṇaṃ /

māpetvā abhayaṃ pupphaṃ nibbuto so sasāvako // Bv_25.49 //

Eso hi sammāsambuddho appameyyo durāsado /

eso hi dhammaratano svākkhāto ehipassiko // Bv_25.50 //

Eso hi saṅgharatano suppaṭipanno anuttaro /

sabbaṃ samantarahitaṃ nanu rittā sabbasaṅkhāra // Bv_25.51 //

Mahākassapo jino satthā Setavyārāmamhi nibbuto /

tatth’ eva tassa jinathūpo yojan’ ubbedha-m-uggato ti // Bv_25.52 //

Kassapassa bhagavato vaṃso catuvīsatimo

(096) Blank Page.

(097) XXVI -- GOTAMABUDDHAVAṂSO

Aham-etarahi sambuddho Gotamo Sakyavaḍḍhano /

padhānaṃ padahitvāna patto sambodhim-uttamaṃ // Bv_26.1 //

Brahmunā yācito santo dhammacakkaṃ pavattayiṃ /

aṭṭhārasannaṃ koṭīnaṃ paṭhamābhisamayo ahu // Bv_26.2 //

Tato parañca desente naradevasamāgame /

gaṇanāya na vattabbo dutiyābhisamayo ahu // Bv_26.3 //

Idh’ evāham-etarahi ovadiṃ mama atrajaṃ, /

gaṇanāya na vattabbo tatiyābhisamayo ahu // Bv_26.4 //

Eko’ va sannipāto me sāvakānaṃ mahesinaṃ /

aḍḍhateḷasasatānaṃ bhikkhūn’ āsi samāgamo // Bv_26.5 //

Virocamāno vimalo bhikkhusaṅghassa majjhato /

dadāmi patthitaṃ sabbaṃ maṇī va sabbakāmado // Bv_26.6 //

Phalam-ākaṅkhamānānaṃ bhavacchandajahesinaṃ /

catusaccaṃ pakāsesiṃ anukampāya pāṇinaṃ // Bv_26.7 //

Dasavīsasahassānaṃ dhammābhisamayo ahu /

ekadvinnaṃ abhisamayo gaṇanāto asaṅkhiyo // Bv_26.8 //

Vitthārikaṃ bāhujaññaṃ iddhaṃ phītaṃ suphullitaṃ /

idha mayhaṃ Sakyamunino sāsanaṃ suvisodhitaṃ // Bv_26.9 //

Anāsavā vītarāgā santacittā samāhitā /

bhikkhū nekasatā sabbe parivārenti maṃ sadā // Bv_26.10 //

Idāni ye etarahi jahanti mānusaṃ bhavaṃ /

appattamānasā sekhā te bhikkhū viññugarahitā // Bv_26.11 //

Ariy’ añjasaṃ thomayantā sadā dhammaratā janā /

bujjhissanti satimanto saṃsārasaritā narā // Bv_26.12 //

Nagaraṃ Kapilavatthu me rājā Suddhodano pitā /

mayhaṃ janettikā mātā Māyādevī ’ti vuccati // Bv_26.13 //

(098) Ekūnatiṃsavassani agāraṃ ajjhahaṃ vasiṃ /

Rammo Surammo Subhako tayo pāsāda-m-uttamā // Bv_26.14 //

Cattārīsasahassāni nāriyo samalaṅkatā /

Bhaddakaccā nāma nārī Rāhulo nāma atrajo // Bv_26.15 //

Nimitte caturo disvā assayānena nikkhamiṃ /

chabbassaṃ padhānacāraṃ acariṃ dukkaraṃ ahaṃ // Bv_26.16 //

Bārāṇasī Isipatane cakkaṃ pavattitaṃ mayā /

ahaṃ Gotamasambuddho saraṇaṃ sabbapāṇinaṃ // Bv_26.17 //

Kolito Upatisso ca dve bhikkhū aggasāvakā /

Ānando nām’ upaṭṭhāko santikāvacaro mama // Bv_26.18 //

Khemā Uppalavaṇṇā ca bhikkhunī aggasāvikā /

Citto ca Hatthāḷavako agg’ upaṭṭhāk’ upāsakā // Bv_26.19 //

Nandamātā ca Uttarā agg’ upaṭṭhik’ upāsikā /

ahaṃ assatthamūlamhi patto sambodhim-uttamaṃ // Bv_26.20 //

Byāmappabhā sadā mayhaṃ soḷasahattham-uggatā /

appaṃ vassasataṃ āyu idān’ etarahi vijjati // Bv_26.21 //

Tāvatā tiṭṭhamāno’ haṃ tāremi janataṃ bahuṃ /

ṭhapayitvāna dhamm’ ukkaṃ pacchimaṃ janabodhanaṃ // Bv_26.22 //

Aham pi na cirass’ eva saddhiṃ sāvakasaṅghato /

idh’ eva parinibbissaṃ aggīvāhārasaṅkhayā; // Bv_26.23 //

Tāni ca atulatejāni imāni ca dasa balāni /

ayañca guṇavaradeho dvattiṃsalakkhaṇācito // Bv_26.24 //

Dasadisā pabhāsetvā sataraṃsīva chappabhā /

sabbā samantarahessanti nanu rittā sabbasaṅkhārā ’ti // Bv_26.25 //

Gotamassa bhagavato vaṃso pañcavīsatimo

(099) Blank Page.

(100) XXVII -- PAKIṆṆAKAKATHĀ

Aparimeyye ito kappe caturo āsuṃ vināyakā /

Taṇhaṅkaro Medhaṅkaro atho pi Saraṇaṅkaro /

Dīpaṅkaro ca sambuddho ekakappamhi te jinā // Bv_27.1 //

Dīpaṅkarassa aparena Koṇḍañño nāma nāyako /

eko va ekakappamhi tāresi janataṃ bahuṃ // Bv_27.2 //

Dīpaṅkarassa bhagavato Koṇḍaññassa ca satthuno /

etesaṃ antarā kappā gaṇanāto asaṅkhiyā // Bv_27.3 //

Koṇḍaññassa aparena Maṅgalo nāma nāyako /

tesam-pi antarā kappā gaṇanāto asaṅkhiyā // Bv_27.4 //

Maṅgalo ca Sumano ca Revato Sobhito muni /

te pi buddhā ekakappe cakkhumanto pabhaṅkarā // Bv_27.5 //

Sobhitassa aparena Anomadassī mahāyaso /

tesam-pi antarā kappā gaṇanāto asaṅkhiyā // Bv_27.6 //

Anomadassī Padumo Nārado cāpi nāyako /

te pi buddhā ekakappe tam’ antakārakā munī // Bv_27.7 //

Nāradassa aparena Padumuttaro nāma nāyako /

ekakappamhi uppanno tāresi janataṃ bahuṃ // Bv_27.8 //

Nāradassa bhagavato Padumuttarassa satthuno /

tesam-pi antarā kappā gaṇanāto asaṅkhiyā // Bv_27.9 //

Kappasatasahassamhi eko āsi mahāmuni /

Padumuttaro lokavidū āhutīnaṃ paṭiggaho // Bv_27.10 //

Tiṃsakappasasahassamhi duve āsuṃ vināyakā /

Sumedho ca Sujāto ca oraso Padumuttarā // Bv_27.11 //

Aṭṭhārase kappasate tayo āsuṃ vināyakā /

Piyadassī Atthadassī Dhammadassī ca nāyakā // Bv_27.12 //

Oraso ca Sujātassa sambuddhā dvipad’ uttamā /

ekakappamhi sambuddhā loke appaṭipuggalā // Bv_27.13 //

Catunavute ito kappe eko āsi mahāmuni /

Siddhattho so lokavidū sallakatto anuttaro // Bv_27.14 //

(101) Dvenavute ito kappe duve āsuṃ vināyakā /

Tisso Phusso ca sambuddhā asamā appaṭipuggalā // Bv_27.15 //

Ekanavute ito kappe Vipassī nāma nāyako /

so pi buddho kāruṇiko satte mocesi bandhanā // Bv_27.16 //

Ekatiṃse ito kappe duve āsuṃ vināyakā /

Sikhī ca Vessabhū c’ eva asamā appaṭipuggalā // Bv_27.17 //

Imamhi Bhaddake kappe tayo āsuṃ vināyakā /

Kakusandho Koṇāgamano Kassapo cāpi nāyako // Bv_27.18 //

Aham-etarahi sambuddho Metteyyo cāpi hessati /

ete p’ ime pañca buddhā dhīrā lokānukampakā // Bv_27.19 //

Etesaṃ dhammarājūnaṃ aññesaṃ nekakoṭinaṃ /

ācikkhitvāna taṃ maggaṃ nibbutā te sasāvakā ti // Bv_27.20 //

Buddhapakiṇṇakakaṇḍaṃ niṭṭhitaṃ

(102) XXVIII -- DHĀTUBHĀJANIYAKATHĀ

Mahāgotamo jinavaro Kusinārāmamhi nibbuto /

dhātuvitthārikaṃ āsi tesu tesu padesato // Bv_28.1 //

Eko Ajātasattussa eko Vesāliyā pure /

eko Kapilavatthumhi eko ca Allakappake, // Bv_28.2 //

Eko ca Rāmagāmamhi eko ca Veṭhadīpake /

eko Pāveyyake Malle eko ca Kusinārake // Bv_28.3 //

Kumbhassa thūpaṃ kāresi brāhmaṇo Doṇasavhayo /

Aṅgārathūpaṃ kāresuṃ Moriyā tuṭṭhamānasā // Bv_28.4 //

Aṭṭha sārīrikā thūpā navamo Kumbhacetiyo /

Aṅgārathūpo dasamo tadā yeva patiṭṭhito // Bv_28.5 //

Ekā dāṭhā Tidasapure ekā Nāgapure ahu /

ekā Gandhāravisaye ekā Kāliṅgarājino // Bv_28.6 //

Cattāḷīsasamā dantā kesā lomā ca sabbaso /

devā hariṃsu ek’ ekaṃ cakkavāḷaparamparā // Bv_28.7 //

Vajirāyaṃ bhagavato patto daṇḍañca cīvaraṃ /

nivāsanaṃ Kusaghare paccattharaṇaṃ Kapilavhaye // Bv_28.8 //

Pāṭaliputtanagare karakaṃ kāyabandhanaṃ /

Campāyaṃ udakasāṭikā uṇṇalomañca Kosale, // Bv_28.9 //

Kāsāvañca brahmaloke veṭhanaṃ Tidase pure /

Pāsāṇake padaṃ seṭṭhaṃ yañcāpi accutippadaṃ /

nisīdanaṃ Avantipure Raṭṭhe attharaṇaṃ tadā // Bv_28.10 //

Araṇī ca Mithilāyaṃ Videhe parissāvanaṃ /

vāsisūcigharañcāpi Indapatte pure tadā // Bv_28.11 //

Parikkhāram-avasesaṃ janapade Aparantake /

paribhuttañca muninā akaṃsu manujā tadā // Bv_28.12 //

Dhātuvitthārikaṃ āsi Gotamassa mahesino /

pāṇīnam-anukampāya āhu porāṇikā tadā ti // Bv_28.13 //

Dhātubhājaniyakathā niṭṭhitā

Buddhavaṃso niṭṭhito

Permanent link

http://www2.hf.uio.no/common/apps/permlink/permlink.php?app=polyglotta&context=ctext&uid=4dbd68b1-8d51-11e6-98cc-0050569f23b2

Choose languages

Choose images, etc.

Choose languages

Choose display