saṅs rgyas bcom ldan ’das yul ser skya’i gźi nya gro dha’i kun dga’ ra ba na bźugs so ||
de nas ser skya’i gźi na gnas pa’i śākya rab tu maṅ po ’dun khaṅ du tshogs śiṅ ’dus nas bar skabs kyi gtam ’di lta bu dag gleṅ bar byed de |
śes ldan dag śākya rnams ni gaṅ las skyes | thog ma ni gaṅ yin | rgyu ni ci źig yin | śākya rnams kyi sṅon gyi rigs rgyud ni gaṅ yin |
gal te bdag cag gi druṅ du ’ga’ źig ’oṅs nas ’di skad ’dri ste | śes ldan dag śākya rnams ni gaṅ las skyes | thog ma ni gaṅ yin | rgyu ni ci źig yin, śākya rnams kyi sṅon gyi rigs rgyud ni gaṅ yin źes
de skad du ’dri na bdag cag gis ni śākya rnams gaṅ las skyes pa daṅ, thog ma gaṅ yin pa daṅ | rgyu ni ci źig yin pa daṅ | śākya rnams kyi sṅon gyi rigs rgyud gaṅ yin pa yaṅ mi śes na ji skad du luṅ bstan |
tshur bdag cag bcom ldan ’das gaṅ na ba der doṅ la lhags pa daṅ | bcom ldan ’das la don ’di ñid źus nas bcom ldan ’das kyis bdag cag la ji skad du luṅ bstan pa de bźin du gzuṅ bar bya’o ||
de nas ser skya’i gźi na gnas pa’i śākya rab tu maṅ po bcom ldan ’das gaṅ na ba der doṅ ste lhags nas, bcom ldan ’das kyi źabs gñis la mgo bos phyag byas te phyogs gcig tu ’dug go; | phyogs gcig tu ’dug nas bcom ldan ’das la ser skya’i gźi’i śākya rnams kyis ’di skad ces gsol to ||
btsun pa ’dir bdag cag ser skya’i gźi’i śākya rab tu maṅ po ’dun khaṅ du tshogs śiṅ ’dus nas bar skabs kyi bka’ mchid ’di lta bu dag gleṅ ste |
śākya rnams ni gaṅ las skyes | thog ma ni gaṅ yin | rgyu ni ci źig yin, śākya rnams kyi sṅon gyi rigs rgyud ni gaṅ yin | gal te bdag cag gi druṅ du ’ga’ źig ’oṅs nas ’di skad ces ’dri ste | śes ldan dag śākya rnams ni gaṅ las skyes | thog ma ni gaṅ yin, rgyu ni ci źig yin; śākya rnams kyi sṅon gyi rigs rgyud ni gaṅ yin źes de skad ’dri na | bdag cag gis ni śākya rnams ni gaṅ las skyes, thog ma ni gaṅ yin | rgyu ni ci źig yin | śākya rnams kyi sṅon gyi rigs rgyud ni gaṅ yin pa yaṅ mi śes na ji skad du luṅ bstan |
tshur bdag cag bcom ldan ’das gaṅ na ba der doṅ la lhags pa daṅ | bcom ldan ’das la don de ñid źus te | bcom ldan ’das kyis bdag cag la ji skad du luṅ bstan pa de bźin du gzuṅ bar bgyi’o sñam nas | de’i slad du bcom ldan ’das la bdag cag don ’di ñid źu lags na; bcom ldan ’das śākya rnams ni gaṅ las skyes lags | thog ma ni gaṅ lags | rgyu ni ci źig lags | śākya rnams kyi sṅon gyi rigs rgyud ni gaṅ lags |
de nas bcom ldan ’das ’di sñam du dgoṅs te | gal te ṅas śākya rnams kyi sṅon gyi rigs rgyud las brtsams te chos kyi gtam gleṅs na mu stegs can daṅ kun du rgyu gźan dag ’di skad ces dge sbyoṅ goo ta ma ni ci ’dod pa de lta bu ston pas bdag ñid la stod par byed do źes smra ba gaṅ yin pa’i gnas ’di yod pas
ṅa’i ñan thos las śākya rnams kyi sṅon gyi rigs rgyud las brtsams nas chos kyi gtam gleṅ bar nus pa su yod sñam mo || de’i tshe tshe daṅ ldan pa maud gal gyi bu chen po ’khor de ñid du ’dus śiṅ ’dug par gyur to ||