Bibliotheca Polyglotta

[Pāyantika 78]
saṅs rgyas bcom ldan ’das mñan yod na rgyal byed kyi tshal mgon med zas sbyin gyi kun dga’ ra ba na bźugs so || chu srin byis pa gsod kyi ril khyim bdag rtogs ldan źes bya ba phyug pa | nor maṅ ba | loṅs spyod che ba | yoṅs su gzuṅ (2) ba yaṅs śiṅ rgya che ba | rnam thos kyi bu’i nor daṅ ldan pa || rnam thos kyi bu la nor gyis ’gran pa źig ’dug pa des rigs mñam pa las chuṅ ma blaṅs nas de de daṅ ldan lhan cig rtse bar byed || dga’ bar byed | dga’ mgur spyod par byed do || de la bu mo gzugs bzaṅ ba | blta na sdug pa | (3) mdzes pa źig btsas nas de bsriṅs śiṅ bskyed de chen mor gyur to | khyim bdag des bsams pa | bdag gis bu mo ’di gzugs kyi phyir yaṅ mi sbyin || bzo’i phyir yaṅ mi sbyin gyi bdag daṅ rigs daṅ | nor gyis ’dra ba’am | lhag pa gaṅ yin pa la bdag gis bu lo ’di sbyin no (4) sñam mo | des mñan yod na khyim bdag mgon med zas sbyin źes bya ba phyug pa nor maṅ ba | loṅs spyod che ba | yoṅs su gzuṅ ba yaṅs śiṅ rgya che ba | rnam thos kyi bu’i nor daṅ ldan pa | rnam thos kyi bu la nor gyis ’gran pa źig ’dug pa do bdag daṅ rigs daṅ | nor gyis mñam (5) źiṅ nor gyi rnam pas ches lhag pa yin no źes thos nas des bu mo de mñan yod du khyim bdag mgon med zas sbyin gyi bu la byin no || khyim bdag mgon med zas sbyin gyis kyaṅ dpal gyi ’byor pas bu’i chuṅ mar blaṅs so || khyim bdag rtogs ldan yaṅ rtse bar byed || dga’ bar byed | (6) dga’ mgur spyod par byed pa’i chuṅ ma la sems can źugs par gyur nas de la gaṅ gi ñin mo sems can źugs par gyur pa de ñid kyi ñin mo khyim bdag rtogs ldan la gnod pa brgya dag byuṅ bar gyur to || mṅal na gnas pa de ji lta ji ltar skyes par gyur pa de lta de ltar khyim bdag rtogs (7) ldan la yaṅ daṅ yaṅ du rgya cher gnod pa brgya dag byuṅ bar gyur to || khyim bdag rtogs ldan gyis bsams pa | bdag skyed mos tshal du soṅ ste ’dug go sñam nas | des źo śas ’tsho bdag la bsgo ba | śes ldan dag gal te kho bo la gnod pa chen po źig byuṅ bar gyur na sbron cig | (19b1) ji ste ma byuṅ na ma sbron cig ces bsgo nas de skyed mos tshal du soṅ ste ’dug go | de nas dus gźan źig na de’i chuṅ ma btsas pa las khye’u źig byuṅ nas de gaṅ gi ñi ma la byuṅ ba de ñid kyi ñin mo khyim bdag rtogs ldan la gnod pa stoṅ dag byuṅ bar gyur to || de nas mi źig riṅs pa riṅs par (2) khyim bdag rtogs ldan ga lab der soṅ ba daṅ | khyim bdag rtogs ldan gyis mi de thag riṅ pho kho na nas riṅs pa riṅs par ’oṅ ba mthoṅ nas des bsams pa || bdag la gnod pa chen po źig byuṅ bar gyur gor ma chag sñam nas des mi de la smras pa | kwa’i naṅ rje ci’i phyir ’di ltar (3) riṅs pa riṅs par ’oṅ | mi des smras pa | khyod kyi sras bltam gyis dgyes par skyed cig | rtogs ldan gyis smras pa | kwa’i naṅ rje kho bo’i bus gnod pa brgya phrag maṅ po bskyed mod kyi ’on kyaṅ bu ’oṅs pa legs so | de’i ñe du dag ’dus śiṅ lhags nas khye’u ’di’i miṅ cir (4) gdags sñam nas de dag ’di sñam du sems te | khye’u ’di la phas ’oṅs pa legs so źes bya ba’i tshig brjod pas khye’u ’di’i miṅ legs ’oṅs źes gdags so źes de’i miṅ legs ’oṅs źes bya bar btags so || legs ’oṅs ji lta ji ltar skyes par gyur pa de lta de ltar khyim bdag (5) rtogs ldan gyi khyim na nor daṅ | ’bru daṅ | dbyig daṅ | gser daṅ | bran daṅ | bran mo daṅ | las byed pa daṅ | źo śas ’tsho ba dag yoṅs su zad par gyur to || de nas dus gźan źig na khyim bdag rtogs ldan yaṅ dus la bab ciṅ de’i chuṅ ma yaṅ dus la bab | de’i khyim (6) yaṅ mes tshig | baṅ mdzod kyi rnam pa daṅ | źiṅ gi rnam pa daṅ | nor gyi rnam pa daṅ | ’bru’i rnam pa thams cad kyaṅ mes tshig go | groṅ pa’i mi gaṅ dag zoṅ thogs te yul gźan du doṅ ba dag kyaṅ de na kha cig ni rgya mtsho chen por gru bo che źig par gyur || kha cig ni zoṅ zoṅ ma yin par (7) gyur | kha cig ni de ñid du tshul ma yin pas sdug bsṅal bar gyur | kha cig ni de ñid du ’khod de tshig kyaṅ mi ster ro | ñe du dag kyaṅ gcig ni dus la bab | kha cig ni bros || kha cig ni de ñid na ’khod de tshig kyaṅ mi ster ro || bran daṅ | bran mo daṅ | las byed pa daṅ | źo śas (20a1) ’tsho ba dag kyaṅ kha cig ni dus la bab | kha cig ni bros | kha cig ni de ñid na ’khod de tshig kyaṅ mi ster ro || khyim bdag rtogs ldan gyi sṅon gyi bran mo rgan mo gcig pu źig legs ’oṅs kyi bsñen bkur byed ciṅ ’dug pa des legs ’oṅs khye’u ’i grwar yi ge daṅ yig ’bru (2) slob tu phul lo | rgan mo des bsams pa | khyim bdag rtogs ldan gyi khyim nor du ma daṅ ldan pa yoṅs su zad ciṅ mthar thug par gyur na gaṅ gi bsod nams med pas de ltar gyur pa ci bdag gi ’am ’on te legs ’oṅs kyi bsod nams med pas de ltar gyur pa blta’o sñam nas ji tsam (3) na des legs ’oṅs kyi miṅ gis phru rtog btsugs pa daṅ de chud zos par gyur ciṅ | bdag gi miṅ gis phru rtog btsugs pa daṅ de tshos par gyur ciṅ | bdag gi miṅ gis phru rtog btsugs pa daṅ de tshos par gyur nas des bsams pa | ’di ni sems can skal chad cig yin pas ’di’i le lan gyis khyim bdag rtogs ldan gyi khyim nor du ma daṅ ldan pa tshul ma (4) yin pas chud zos par gyur pas bdag kyaṅ ’di’i le lan gyis tshul ma yin pas sdug bsṅal bar ’gyur ba gaṅ yin pa de lta bu’i gnas yod par ’gyur gor ma chag na ’di la ji ltar bya sñam nas des bsams pa | ’bros so sñam nas rgan mo des kyaṅ de na gces pa cuṅ zad ci yod pa de (5) dag khyer te bros so || khyim stoṅ pa der khyi dag źugs nas zas zos te ’thab par brtsams pa daṅ | mi g-yon can źig phyogs de nas ’gro ba des khyim de nas khyi dag ’thab pa’i sgra thos nas des bsams pa | khyim bdag rtogs ldan gyi khyim stoṅ par gyur tam ci na ’di ltar ’di na (6) khyi dag ’thab ciṅ ’khod | bdag gis je blta’o sñam nas de der źugs pa daṅ | ji tsam na khyi rkun phal po che dag ’thab ciṅ ’dug gi mi ni ’ga’ yaṅ med de stoṅ par mthoṅ nas des de nas lhag rol gyi lhag ma cuṅ zad ci yod ba de dag khyer te soṅ ṅo | de’i ’og tu legs ’oṅs (7) zan bza’o sñam nas khye ’u’i grwa nas ’oṅs te de der źugs pa daṅ | ji tsam na stoṅ par mthoṅ nas des ma ma ma la źes bos na ’ga’ yaṅ lan ’debs pa med nas de daṅ ha caṅ thag mi riṅ ba na ñe du’i khyim źig yod pa der źugs pa daṅ | ji tsam na der yaṅ khyim mi dag ’thab mo byuṅ (20b1) bar gyur to | gaṅ gi tshe de dag ’thab mo źi bar gyur pa de’i tshe na gcig la gcig smras pa | śes ldan dag bdag gis sṅan chad khyod mthoṅ na sñiṅ du sdug na deṅ bdag gis khyod mthoṅ na khyod bsad do sñam du sems so || gźan dag kyaṅ gcig la gcig de skad zer nas de dag (2) gis bsams pa | ’dir gźan ’ga’ źig ma ’oṅs sam blta’o sñam nas de dag gis bltas na ji tsam na legs ’oṅs der ’oṅs pa mthoṅ nas de dag gis smras pa | śes ldan dag ’di ni legs ’oṅs ma yin gyi ñes ’oṅs yin te | ’di’i le lan gyis bdag cag ’thab mo (3) byuṅ bar gyur to źes de dag gis bskrad de de gźan du soṅ ba daṅ | der yaṅ de dag de bźin du gyur nas de dag gis kyaṅ de skad smras te de bskrad de btaṅ ṅo || de mu lto ba dag gi naṅ du źugs pa daṅ | ji tsam na mu lto ba de dag kyaṅ lag pa stoṅ pa daṅ | sbraṅ phor stoṅ par gyur te phyir (4) lhags nas de dag gis smras pa | śes ldan dag bdag cag sṅon chad gaṅ du źugs pa der lag pa gaṅ ba daṅ | sbraṅ phor gaṅ bar gyur te phyir ’oṅ na | deṅ bdag cag lag pa stoṅ ba daṅ | spraṅ phor stoṅ par gyur te phyir lhags pa ’di la rgyu ci yod | de dag gis smras pa | (5) bdag cag gi naṅ du sems can skal chad ’ga’ źig źugs pas des na bdag cag lag stoṅ pa daṅ | spraṅ phor stoṅ par gyur te phyir lhags so || yaṅ de dag gis smras pa | brtag par byas bdag cag kha gñis su bcad de ’jug par bya’o źes de dag gis kha gñis su bcad de (6) źugs pa daṅ | gaṅ dag gi naṅ du legs ’oṅs źugs pa de dag lag pa stoṅ pa daṅ | spraṅ phor stoṅ par gyur te lhags so || de dag gis kyaṅ kha gñis su bcad de źugs pa daṅ | gaṅ dag gi naṅ du legs ’oṅs źugs pa de dag lag pa stoṅs pa daṅ | spraṅ phor stoṅ par (7) gyur te lhags so | de dag gis kyaṅ yaṅ kha gñis su bcad de źugs pa daṅ | yaṅ de ltar gyur to || de dag gis kyaṅ yaṅ daṅ yaṅ du kha gñis su bcad de źugs pa daṅ | de lta de ltar gyur nas ji tsam na legs ’oṅs daṅ mu lto ba gźan cig daṅ gñis lhan cig źugs pa (21a1) yaṅ so sor bye ba daṅ legs ’oṅs ni lag pa stoṅ pa daṅ | sbraṅ phor stoṅ par gyur te ’oṅs la gźan thams cad lag pa gaṅ ba daṅ | sbraṅ phor gaṅ bar gyur te ’oṅs nas de dag gis smras pa | sems can skal chad ’di bdag cag gi naṅ du źugs pas des na (2) bdag cag lag pa stoṅ pa daṅ | sbraṅ phor stoṅ par gyur te lhags so źes de dag gis legs ’oṅs śin tu brdegs te bskrad do || mñan yod na khyim bdag rtogs ldan gyi chuṅ po grogs khyim bdag cig ’dug pa de zoṅ thogs te chu srin byis pa gsod kyi rir phyin nas khyim (3) bdag des legs ’oṅs lag na spraṅ phor thogs te | sraṅ du soṅ ba mthoṅ nas des bźin gzugs las de ṅo śes nas des de la smras pa | bu khyod khyim bdag rtogs ldan gyi bu ma yin nam | legs ’oṅs kyis smras pa yin no || des smras pa | khyod kyi pha ma gñis gar (4) soṅ | legs ’oṅs kyis smras pa | dus la bab bo || des smras pa | de’i khyim daṅ | baṅ mdzod kyi rnam pa daṅ | źiṅ gi rnam pa daṅ | nor gyi rnam par daṅ | ’bru’i rnam pa dag ga re | legs ’oṅs kyis smras pa | thams cad mes tshig go | des smras pa | groṅ pa’i (5) mi gaṅ dag zoṅ thogs te yul gźan du doṅ pa dag gar doṅ | legs ’oṅs kyis smras pa | kha cig ni rgya mtsho chen por gru bo che źig par gyur | kha cig ni zoṅ zoṅ ma yin par gyur | kha cig ni de ñid du tshul ma yin pas sdug bsṅal bar gyur | kha cig ni de ñid du ’khod de (6) tshig kyaṅ mi ster ro || des smras pa | ñe du dag gar doṅ | legs ’oṅs kyis smras pa | kha cig ni dus la bab | kha cig ni bros | kha cig ni de ñid na ’khod de tshig kyaṅ mi ster ro || des smras pa | bran daṅ | bram mo daṅ | las byed pa daṅ | źo śas ’tsho ba dag gar doṅ (7) legs ’oṅs kyis smras pa | kha cig ni dus la bab | kha cig ni bros | kha cig ni de ñid na ’khod de tshig kyaṅ mi ster ro || khyim bdag des de thos nas mchims brnabs te ’dug nas des smras pa | bu kho bo daṅ lhan cig mñan yod du ’doṅ ṅo || legs ’oṅs kyis smras pa | (21b1) pha bdag der soṅ na cir ’gyur | des smras pa | bu de na khyim bdag mgon med zas sbyin ’dug pa de’i bus khyod kyi sriṅ mo chuṅ mar blaṅs pas khyod der soṅ na sriṅ mo de khyod la mkho ba stobs par ’gyur ro || legs ’oṅs kyis smras pa | pha ’gro’o || khyim bdag des legs (2) ’oṅs la kār+śā pa ṇa gñis byin te smras pa | bu kho bo zor sgyur gyi bar du khyod re źig ’di gñis za źiṅ sdod cig | legs ’oṅs kyis kār ṣā pa ṇa de gñis gos kyi grwar phur te bźag pa daṅ | des las kyi rnam par smin pas de gñis kyaṅ brjed par gyur to || khyim bdag des zoṅ (3) bsgyur te rin blaṅs nas legs ’oṅs khrid de ’phags pa daṅ | legs ’oṅs kyaṅ de daṅ lhan cig ’phags so || ji tsam na don mthun de dag ’thab par brtsams śiṅ glaṅ dag kyaṅ ’thab par brtsams nas de dag gis smras pa | śes ldan dag bdag cag sṅan cad gcig gis (4) gcig mthoṅ na sñiṅ du sdug na deṅ bdag cag gcig gis gcig mthoṅ na ’thab par brtsams śiṅ glaṅ dag kyaṅ gcig gis gcig mthoṅ na ’thab par rtsom pa las na | mal ’dir ñes ’oṅs de ma ’oṅs sam źes bltas pa daṅ | ji tsam na de dag gis legs ’oṅs der ’oṅs pa (5) mthoṅ nas de dag gis smras pa | śes ldan dag ’di ni legs ’oṅs ma yin gyi ñes ’oṅs yin te | ’di’i le lan gyis bdag cag ’thab par brtsams śiṅ | glaṅ dag kyaṅ ’thab par rtsom mo źes de dag gis de bskrad par brtsams pa daṅ | khyim bdag des smras pa | śes (6) ldan dag ’di ni kho bo’i chuṅ po grogs kyi bu yin gyis ’di ma bskrad cig | de dag gis smras pa | khyim bdag khyod ni don mthun la dbaṅ ba yin mod kyi || bdag cag ’di daṅ lhan cig ’gro mi phod de || gal te ’di ’gro na bdag cag mi ’gro’o || khyim bdag des legs ’oṅs (7) la smras pa | bu khyod phyi bźin ’braṅ źiṅ śog śig daṅ | kho bos khyod kyi phyir zan gźag par bya’o || legs ’oṅs phyi bźin ’braṅ źiṅ ’oṅ ba na khyim bdag des kyaṅ de’i don du zan ’jog par byed ciṅ kha cig ni sa gźi la sas g-yogs te ’jog par byed | kha cig ni śid (22a1) ljon pa’i yal ga dag la lo ma dag gis g-yogs te ’jog par byed do | de’i zan gaṅ dag sa gźi la sas g-yogs te bźag pa de dag ni wa dag gis zos | gaṅ dag śiṅ ljon pa’i yal ga dag la lo ma dag gis g-yogs te bźag pa de dag ni bya dag daṅ (2) spre’u dag gis zos nas legs ’oṅs kyis cuṅ zad ni thob | phal cher mi thob nas de śin tu ñam ṅa bas ’tsho źiṅ ’gro’o || srid pa tha ma pa’i sems can zag pa zaṅ pa ma thob par bar ma dor rgyun chad ciṅ dus byed par ’gyur pa ni gnas ma yin skabs ma yin te | de ni gnas (3) me dpas legs ’oṅs mthar gyis mñan yod du phyin nas | mñan yod kyi phyi rol khron pa’i kha na ṅal so źiṅ ’dug go || legs ’oṅs kyi sriṅ mo khyim bdag mgon med zas sbyin gyi mna’ ma byed pa de’i bu mo mṅag gźug ma chu bu ma thogs te khron pa de’i druṅ du chu chur soṅ ba daṅ | (4) des legs ’oṅs bźin gzugs las ṅo śes nas des de la smras pa | jo co khyod chu srin byis pa gsod kyi ri pa khyim bdag rtogs ldan gyi bu legs ’oṅs ma lags sam | sriṅ mo yin no || jo co khyod kyi yab yum gñis gar bźud | dus la bab bo || de’i khyim daṅ | baṅ mdzod (5) kyi rnam pa daṅ | źiṅ gi rnam pa daṅ | nor gyi rnam pa daṅ | ’bru’i rnam pa dag gar mchis | thams cad mes tshig go | groṅ pa’i mi gaṅ dag zoṅ thogs te yul gźan du mchis pa dag gar mchis | kha cig ni rgya mtsho chen por gru bo che źig par gyur | kha cig ni zoṅ zoṅ ma (6) yin par gyur | kha cig ni de ñid du tshul ma yin pas sdug bsṅal bar gyur || kha cig ni de ñid du ’khod de tshig kyaṅ mi ster ro || ñe du dag gar mchis | kha cig ni dus la bab | kha cig ni bros | kha cig ni de ñid na ’khod de tshig kyaṅ mi ster ro | bran daṅ | bran mo daṅ | las (7) byed pa daṅ | źo śas ’tsho ba dag gar mchis | kha cig ni dus la bab | kha cig ni bros | kha cig ni de ñid na ’khod de tshig kyaṅ mi ster ro || bu mo des de thos nas de mchi mas brnaṅs te ’dug nas des legs ’oṅs la smras pa | jo bo bdag gis khyod kyi lcam mo la sbran gyi bar (22b1) du re źig ’di ñid na gźes śig ces smras te bu mo de soṅ nas jo mo la smras pa | jo mo khyod kyi dral po byon no || des smras pa | zoṅ ji lta bus byon | bu mos smras pa | jo mo khar ba daṅ | ral rul daṅ | spraṅ phor gyis byon no || des bu mo de’i lag tu gos dag daṅ | kār ṣā pa ṇa dag bskur nas smras pa | (2) jo co la ’di skad ces sṅa ma ’di tsam je gsol źiṅ mnobs śig daṅ slad kyis gal te dbon po dag daṅ | dbon mo dag daṅ mjal bar gyur na de dag kār+śā pa ṇa ji sñed cig ’bul bar ’gyur bas khyod ñe du dag gis glo bas bas par mi ’gyur ro źes gyis śig | bu mo de der soṅ ste (3) legs ’oṅs la gos dag daṅ | kāR+śā pa ṇa dag phul nas smras pa || jo co lcam gyi mchid nas sṅa ma ’di tsam je gsol źiṅ mnobs śig daṅ slad kyis gal te dbon po dag daṅ | dbon mo dag daṅ mjal bar gyur na | de dag kāR+śā pa ṇa ji sñed cig ’bul bar ’gyur bas khyod ñe du dag (4) gis glo bas bas par mi ’gyur ro źes mchi’o źes smras te soṅ ṅo | legs ’oṅs kyis pas mas pa | khyim bdag mgon med zas sbyin ni ñe du’i ’khor rgya che ba yin la | bdag kyaṅ sṅon ñe du’i ’khor rgya che ba yin pas da de re soṅ na de dag bdag la gtam ’dri bas riṅ du thogs (5) par ’gyur źiṅ des bdag ltogs te ’chi bar ’gyur gyis je g-yar sus bza’ źiṅ ’graṅs nas der soṅ ste | ñe du’i tshogs dag la bde bar so sor kun dga’ bar bya’o sñam nas de chaṅ pa’i khyim du soṅ ste | des ji tsam gyis ra ro bar ’gyur ba de tsam gyi chaṅ sar par ’thugs nas de (6) ra ro ste skyed mos tshal du soṅ nas ñal lo || mñan yod na skyed mos tshal ’joms pa’i mi dag skyed mos tshal ñug par byed ciṅ | de dag gis gal te mi gñid log pa mthoṅ na de rkaṅ pas sgul bar byed ciṅ gal te sad na ni de la ’di skad ces | kye naṅ rje khyod kyis mñan yod na (7) skyes mos tshal ’joms pa’i mi dag skyed mos tshal ñug par byed ciṅ de dag mi gñid log pa ’joms par byed do źes ma thos sam | loṅs la soṅ śig ces zer ro || gal te ma sad na ni bcom ste ’doṅ bar byed pas skyed mos tshal ’joms pa’i mi de dag der lhags te legs (23a1) ’oṅs ñal ba mthoṅ nas de dag gis de rkaṅ pas bsgul na ma sad nas ji tsam na de dag gis de bcom ste doṅ ṅo | ji tsam na legs ’oṅs sad pa daṅ bdag ñid bcom par mthoṅ nas des ral rul de dag ñid gyon te ’dug go | de’i sriṅ mos bsams pa | ci’i phyir (2) bdag gi miṅ po de yun riṅ du thogs sñam nas des bu mo mṅag gźug ma mṅags te ltar btaṅ ba daṅ de der soṅ ste bltas na ju tsam na bcom par mthoṅ nas | bu mo de soṅ ste jo mo la smras pa | jo mo jo co bcom ste sṅon gyi cha lugs ñid kyis bźugs so | sriṅ mos bsams pa (3) de ni sems can skal chad cig yin pas de’i le lan gyis khyim bdag rtogs ldan gyi khyim nor du ma daṅ ldan pa tshul ma yin pas da gal te bdag gis de ’dir bcug par gyur na bdag gi gyos po’i khyim yaṅ de’i le lan gyis tshul ma yin pas sdug bsṅal (4) bar ’gyur ba gaṅ yin pa de lta bu’i gnas yod par ’gyur ro sñam nas des de yal bar bor ro || legs ’oṅs kyis kyaṅ las kyi sgrib pas de brjed nas de mu lto ba dag gi naṅ du źugs pa | ji tsam na mu lto ba de dag kyaṅ lag pa stoṅ pa daṅ | sbraṅ phor stoṅ par gyur te (5) phyir lhags nas de dag gis smras pa | śes ldan dag bdag cag sṅon cad gar źugs pa der lag pa gaṅ ba daṅ | spraṅ phor gaṅ bar gyur te phyir ’oṅ na deṅ bdag cag lag pa stoṅ pa daṅ | spraṅ phor stoṅ par gyur te phyir lhags pa ’di la rgyu ci yod || de dag gis smras pa | bdag (6) cag gi naṅ du sems can skal chad ’ga’ źig źugs pas des na bdag chag lag pa stoṅ pa daṅ | spraṅ phor stoṅ par gyur te phyin lhags so || yaṅ de dag gis smras pa | brtag par byas bdag cag kha gñis su bcad de ’jug par bya’o źes de dag gis kha gñis su bcad (7) de źugs pa daṅ | gaṅ dag gi naṅ du legs ’ogs źugs pa de dag lag pa stoṅ pa daṅ | spraṅ phor stoṅ par gyur te lhags so | de dag gis kyaṅ kha gñis su bcad de źugs pa daṅ | gaṅ dag gi naṅ du legs ’oṅs źugs pa de dag lag pa stoṅ pa daṅ | spraṅ phor stoṅ (23b1) par gyur te lhags so || de dag gis kyaṅ yaṅ kha gñis su bcad de źugs pa daṅ yaṅ de ltar gyur to | dedaga gis kyaṅ yaṅ daṅ yaṅ du kha gñis su bcad de źugs pa daṅ | de lta de ltar gyur nas ji tsam na legs ’oṅs daṅ mu lto ba gźan cig daṅ gñis lhan cig źugs pa (2) yaṅ so sor bye ba daṅ | legs ’oṅs ni lag pa stoṅ pa daṅ | sbraṅ phor stoṅ par gyur te ’oṅs la | gźan thams cad lag pa gaṅ ba daṅ | sbraṅ phor gaṅ bar gyur te ’oṅs nas de dag gis smras pa | sems can skal chad ’di bdag cag gi naṅ du źugs pas des na bdag cag (3) lag pa stoṅ pa daṅ | sbraṅ phor stoṅ par gyur te lhags so źes de dag gis legs ’oṅs śin tu brdegs te spraṅ phor gyis de’i klad pa bcom nas ñes ’oṅs khyod phar soṅ śig ces smras te bskrad do || khyim bdag mgon med zas sbyin gyis saṅs rgyas la sogs pa dge sloṅ gi dge (4) ’dun khyim gźan du gdugs tshod la spyan draṅs nas | des źo śas ’tsho ba dag la bsgo ba | śes ldan dag ji srid du saṅs rgyas la sogs pa dge sloṅ gi dge ’dun gyis gdugs tshod la gsol gyi bar du ma lto ba ’ga’ yaṅ ’jug tu ma gźug śig | de dag la phyis sbyin (5) par bya’o || de na mu lto bas ’jug par brtsams pa na sgo bas de dag phyir bzlog pa daṅ | de dag gis smras pa | kye naṅ rje kho bo cag gi miṅ gis khyim bdag bzaṅ byin gyi miṅ mgon med zas sbyin źes bya bar grags pa yin na ci’i phyir khyod kho bo cag phyir zlog par byed | yaṅ de (6) dag gis smras pa | śes ldan dag bdag cag gi naṅ du yaṅ ñes ’oṅs de źugs par ma gyur tam ltos śig ces de dag gis bltas pa daṅ | ji tsam na de dag gis legs ’oṅs der źugs pa mthoṅ nas de dag gis smras pa | ñes ’oṅs de ’di yin no źes de dag gis legs (7) ’oṅs śin tu brdegs te spraṅ phor gyis de’i klad pa bcom nas de dag gis lag pa daṅ | rkaṅ pa dag nas bzuṅ ste khrid nas phyag dar gyi phuṅ po’i steṅ du bźag ste ñes ’oṅs khyod ’dir ’dug śig ces smras pa daṅ | legs ’oṅs phyag dar gyi phuṅ po de’i steṅ na du źiṅ ’dug go | (24a1) de nas bcom ldan ’das sṅa dro śam thabs gsol lhuṅ bzed daṅ chos gos bsnams te | dge sloṅ gi tshogs kyis yoṅs su bskor ciṅ dge sloṅ gi dge ’dun gyis mdun du bdar te khyim bdag mgon med zas sbyin gyi gnas sa gal ba de logs su gśegs pa daṅ | (2) bcom ldan ’das kyis legs ’oṅs phyag dar gyi phuṅ po’i steṅ na klaṅ pa źom nas khrag ’dzag ciṅ du źiṅ ’dug pa gzigs so || gzigs nas kyaṅ dge sloṅ rnams la bka’ stsal pa | dge sloṅ dag ’di ltar srid pa tham pa’i sems can yaṅ gnas skabs ’di lta bur gyur pas srid (3) pa dag gis ṅoms par bya źiṅ srid pa’i yo byad dag gis kyaṅ ṅoms par bya’o | de nas bcom ldan ’das kyis tshe daṅ ldan pa kun dga’ bo la bka’ stsal pa | kun dga’ bo khyod kyis legs ’oṅs la lhuṅ bzed kyi lhag ma gźag par bya’o || de nas bcom ldan ’das khyim (4) bdag mgon med zas sbyin gyi gnas sa ga la ba der gśegs te byon nas dge sloṅ gi dge ’dun gyi goṅ du gdan bśams pa ñid la bźugs so || de nas khyim bdag mgon med zas sbyin gyis saṅs rgyas la sogs pa dge sloṅ gi dge ’dun bde bar bźugs par rig nas (5) bca’ ba daṅ | bza’ ba gtsaṅ źiṅ bsod pas raṅ gi lag nas tshim par byed | stobs par byed do || rnam graṅs du mar bca’ ba daṅ | bza’ ba gtsaṅ źiṅ bsod pas raṅ gi lag nas tshim par byas śiṅ bstabs nas bcom ldan ’das gdugs tshod gsol ciṅ phyag bcabs (6) lhuṅ bzed bźag par rig nas stan ches dma’ ba źiṅ blaṅs te bcom ldan ’das kyi spyan sṅar chos mñan pa’i phyir ’dug go | tshe daṅ ldan pa kun dga’ bos legs ’oṅs la lhuṅ bzed kyi lhag ma gźag pa brjed do || saṅs rgyas bcom ldan ’das rnams ni bsñel ba mi mṅa’ (7) ba’i chos ñid can yin pas bcom ldan ’das kyis legs ’oṅs la lhuṅ bzed kyi lhag ma gźag pa mdzad do || de nas tshe daṅ ldan pa kun dga’ bos bcom ldan ’das kyi lhuṅ bzed kyi pham phabs blaṅ bar brtsams pa daṅ | ji tsam na tshe daṅ ldan pa kun dga’ bos bcom (24b1) ldan ’das kyis bdag la legs ’oṅs la lhuṅ bzed kyi lhag ma źog śig ces bka’ stsal pa | brjed pa dran nas des ṅu bar brtsams pa daṅ | bcom ldan ’das kyis bka’ stsal pa | kun dga’ bo khyod ci’i phyir ru || btsun pa bdag gis legs ’oṅs la lhuṅ bzed kyi (2) lhag ma gźag pa bskyud de bdag gis bcom ldan ’das kyi bka’ bcag go || kun dga’ bo khyod kyis ṅa’i bka’ bcag pa ma yin gyis ’di ltar legs ’oṅs ñid kyi las kyi sgrib pas khyod kyis de la lhuṅ bzed kyi lhag ma gźag pa brjed par gyur to || kun dga’ bo khyod soṅ la (3) legs ’oṅs bos śig | de soṅ ste legs ’oṅs legs ’oṅs źes bos pa daṅ | du ma dag gis aṅ źes lan btab ciṅ de dag gis bsams pa | deṅ bcom ldan ’das ’jig rten gsum gyi bla mas gaṅ la dgoṅs sñam mo || tshe daṅ ldan pa kun dga’ bo phyir log ste (4) gsol pa | btsun pa bdag gis legs ’oṅs legs ’oṅs źes bos na | du ma dag gis aṅ źes lan btab na gaṅ mchi par bgyi || kun dga’ bo soṅ la ’di skad ces | chu srin byis pa gsod kyi ri pa khyim bdag rtogs ldan gyi bu | legs ’oṅs gaṅ yin pa da tshur (5) śog ces bos śig | tshe daṅ ldan pa kun dga’ bo soṅ ste de skad bos pa daṅ | legs ’oṅs kyis bdag gi miṅ dran nas des tshigs su bcad pa dag smras pa |

legs ’oṅs sgra ’di bskyud gyur na || ga las ’dir ni mchis par gyur ||
ṅes par ma legs zad gyur (6) ciṅ || legs par byuṅ bar gyur yaṅ dag ||

gaṅ dag khyod la skyabs mchis pa || de dag mgon ni kun mkhyen lags ||
gaṅ dag khyod kyi gsuṅ dga’ daṅ || ’phags pa de dag legs ’oṅs lags ||

bdag ni skal daṅ bral ba ste || rtsa lag kun gyis spaṅs (7) gyur ciṅ ||
brtse gnas draṅ po’i gnas thob pa || mya ṅan zuṅ rṅus gzir ba lags ||

tshe daṅ ldan pa kun dga’ bos de khrid de źugs nas gsol pa | btsun pa legs ’oṅs de ’di lags so || bcom ldan ’das kyis bka’ stsal pa | bu khyod bcom ldan ’das (25a1) kyi lhuṅ bzed kyi pham phabs za’am | bcom ldan ’das ’tshal lo || bcom ldan ’das kyis de la lhuṅ bzed kyi pham phabs stsal ba daṅ | ji tsam na des ñuṅ dur mthoṅ nas des bsams pa | bdag la bcom ldan ’das ’jig rten gsum gyi bla mas brgya (2) lam na dgoṅs su zin kyaṅ lhuṅ bzed kyi pham phabs chuṅ ṅu źig bźag go sñam mo || bcom ldan ’das kyis de’i sems thugs kyis mkhyen nas bka’ stsal pa | bu legs ’oṅs gal te khyod ri rab tsam gyi kham dag daṅ | rgya mtsho chen po tsam gyi ltos za bar byed na (3) yaṅ ji srid du khyod tshim par ma gyur pa de srid du de bźin gśegs pa’i lhuṅ bzed kyi pham phabs zad par mi ’gyur ro || des bcom ldan ’das kyi lhuṅ bzed kyi pham phabs zos pa daṅ | de tshim par gyur nas des bcom ldan ’das kyi źal du blta bar brtsams pa daṅ | (4) bcom ldan ’das kyis bka’ stsal pa | bu legs ’oṅs tshim mam | bcom ldan ’das tshim mo || kham tha ma loṅ śig daṅ mi snaṅ bar gyur ro || des de blaṅs nas mi snaṅ bar gyur to || khyim bdag mgon med zas sbyin gyis gsol ba | bcom ldan ’das ’di su lags | (5) bcom ldan ’das kyis bka’ stsal pa | khyim bdag chu srin byis pa gsod kyi ri pa khyim bdag rtogs ldan gyi bu yin no || bcom ldan ’das ’o na bdag gi chuṅ po grogs kyi bu lags so || khyim bdag de yin no || de nas bcom ldan ’das kyis yon bśad pa mdzad (6) nas gdan las bźeṅs te gśegs pa daṅ | srid pa tha ma pa’i sems can de bcom ldan ’das kyi slad bźin rjes su ’braṅ źiṅ soṅ nas bcom ldan ’das gtsug lag khaṅ du gśegs te dge sloṅ gi dge ’dun gyi goṅ du gdan bśams pa ñid la bźugs pa (7) daṅ | legs ’oṅs kyaṅ bcom ldan ’das kyi źabs gñis la mgo bos phyag ’tshal te mtha’ gcig tu ’dug go | bcom ldan ’das kyis de’i las sbyaṅ bar bya’o sñam du dgoṅs nas | de nas bcom ldan ’das kyis legs ’oṅs la bka’ stsal pa | legs ’oṅs (25b1) khyod la kāR+śā pa ṇa dag yod dam | bcom ldan ’das ma mchis so || bcom ldan ’das kyis bka’ stsal pa | bu gos kyi grar ltos śig | des bltas pa daṅ | ji tsam na kāR+śā pa ṇa gñis yod pa mthoṅ nas des gsol pa | bcom ldan ’das mchis so || bcom ldan ’das (2) kyis bka’ stsal pa | bu soṅ la kun dga’ ra ba pa rgyal bu dum pa’i gan nas ut+pa la sṅon po dag khyer te śog śig | des bcom ldan ’das bka’ bźin ’tshal źes bcom ldan ’das las mñan nas kun dga’ ra ba pa rgyal bu dum pa ga la ba der soṅ pa daṅ | rgyal bu dum | (3) pas de thag riṅ po kho na nas ’oṅ ba mthoṅ nas des bsams pa | ñes ’oṅs ’di ga śed nas ’dir ’oṅs pas bdag la gnod pa ’byuṅ bar ’gyur ba gaṅ yin pa de lta bu’i gnas yod par ’gyur ro sñam nas | des smras pa | ñes ’oṅs kun dga’i ra bar ma ’jug śig | (4) legs ’oṅs kyis tshigs su bcad pa smras pa |

bdag ni ut+pala mi sgrub ste ||
pad ma bdag la dgos pa med ||
kho bo kun mkhyen grags ldan pa ||
thub pa’i dbaṅ po’i pho ña yin ||

dum pas tshigs su bcad pa smras pa |

gal te thub pa źi bdag ñid ||
lha mi rnams (5) kyi mchod gnas kyi ||
mchod pa’i gnas kyis ches mchod pa’i ||
pho ña lags na tshur gśegs spyon ||

dum pas smras pa | khyod saṅs rgyas kyi pho ña yin nam | legs ’ogs kyis smras pa | kho bo saṅs rgyas kyi pho ña yin no || don ci’i phyir ’oṅs | ut+pala dag gi (6) phyir ’oṅs so | soṅ la ji sñed ’dod pa de sñed khyer te soṅ śig | legs ’oṅs kyis ut+pala sṅon po dag gi khur khyer te bcom ldan ’das kyi spyan sṅar soṅ ba daṅ | bcom ldan ’das kyis bka’ stsal pa | legs ’oṅs dge sloṅ rnams la brims śig | legs (7) ’oṅs kyis dge sloṅ rnams la ut+pala sṅon po dag brim par brtsam pa daṅ | dge sloṅ daṅ mi len nas bcom ldan ’das kyis bka’ stsal pa | dge sloṅ dag dri źim po thams cad ni mig la phan źiṅ ’di’i las sbyaṅ bar yaṅ byas loṅ śig | dge sloṅ rnams kyis (26a1) me tog de dag blaṅs so || legs ’oṅs kyi sṅon zad par sṅon po’i skye mched bskyed pas de rgan pa’i mtha’ logs na ’dug pas dge sloṅ rnams kyi lag na ut+pala sṅon po dag thogs pa de dag mthoṅ ṅo || mthoṅ nas kyaṅ zad par sṅon po’i skye mched mṅon du gyur (2) nas | bcom ldan ’das kyis bka’ stsal pa | legs ’oṅs khyod ci’i phyir rab tu mi ’byuṅ | bcom ldan ’das bdag rab tu ’byuṅ ṅo | bcom ldan ’das kyis de rab tu phyuṅ | rdzogs par bsñen par mdzad nas bcom ldan ’das kyis de la gdams ṅag stsal to | (3) de de ltar rab tu byuṅ nas gcig pu dben par bag yod pa rtun pa daṅ ldan pa bdag ñid btaṅ bar gnas pa na rigs kyi bu dag gaṅ gi phyir skra daṅ kha spu bregs te gos ṅur smrig dag bgos nas yaṅ dag pa kho nar dad bas khyim nas khyim med par rab tu ’byuṅ bar byed pa | (4) tshaṅs par spyod pa’i mtha’ bla na med pa de tshe de ñid la raṅ gi mṅon par śes pas mṅon sum du byas te bsgrubs nas bdag gi skye ba zad do || tshaṅs par spyod pa spyad do || bya ba byas so | srid pa ’di las gźan mi śes so źes go bar byed ciṅ dag bcom pa khams gsum (5) pa las ’dod chags daṅ bral ba | bod pa daṅ gser du mñam pa | nam mkha’ daṅ lag mthil du mtshuṅs pa’i sems daṅ ldan pa | tsan dan bźag pa lta bu rig pas sgo ṅa’i spubs dral bar gyur ciṅ | rig pa daṅ | mṅon par śes pa daṅ | so so yaṅ dag par (6) rig pa thob pa | srid pa daṅ ’dod pa’i rñed pa daṅ bkur sti la rgyab kyis phyogs pa | dbaṅ po daṅ ñe dbaṅ daṅ bcas pa’i lha rnams kyis mchod par bya ba daṅ | rjed par bya ba daṅ | mṅon du smra bar bya bar gyur to || de nas tshe daṅ ldan pa legs ’oṅs kyis dgra (7) bcom pa ñid thob nas rnam par grol ba’i dga’ ba daṅ bde ba ñams su myoṅ ba na | de’i tshe tshigs su bcad pa dag smras pa |

dpa’ bo de ñid gzigs pa yis || thabs kyi źags pas bdag bciṅs te ||
glaṅ chen rgas pa ’dam phyuṅ ltar || thugs rjes sdug (26b1) bsṅal ’dam nas phyuṅ ||

bdag ni sṅan cad legs ’oṅs gyur || de yi ’og tu ñes ’oṅs lags ||
da ni thub dbaṅ khyod gsuṅ gis || gsal bar legs ’oṅs ñid du gyur ||

kun mkhyen lcags ’dra bdag gis ni || khyod kyi gsuṅ mchog thos gyur nas ||
da ni gser (2) daṅ ’dra ba yi || zag pa med pa’i lus kyaṅ thob ||

rin chen la sogs ’thob pa daṅ || mtho ris thar pa ’tshal ba yis ||
rtag tu phan pa bźed pa yi || dge bśes bsten par bgyi ba bzaṅ || ||

’dul ba rnam par ’byed pa | bam po drug bcu rtsa lṅa pa | (3) gaṅ gi tshe tshe daṅ ldan pa legs ’oṅs legs par gsuṅs par gsuṅs pa’i chos ’dul ba la rab tu byuṅ ba de’i tshe na gźan mu stegs can dag śes ldan dag | dge sbyoṅ go.o ta ma na re ṅa’i bstan pa ni kun du mdzes pa yin no źes zer na ’di ltar ñes ’oṅs la sogs pa mu lto ba dag kyaṅ rab tu (4) ’byin par byed na | de’i bstan pa ji ltar kun du mdzes pa yin źes smod par byed | phyar ka gtoṅ bar byed | kha zer bar byed nas | bcom ldan ’das kyis dgoṅs pa | ñan thos chen po ri rab lta bu la skye bo phal po che’i tshogs dag smas pa skyed par byed pas ’di’i (5) yon tan bsgrag par bya na gaṅ du bya | gaṅ du skyes śiṅ gaṅ du rdib pa de ñid du bya’o sñam du dgoṅs so || de nas bcom ldan ’das kyis tshe daṅ ldan pa kun dga’ bo la bka’ stsal pa | kun dga’ bo soṅ la dge sloṅ rnams la de bźin gśegs pa ṅan spoṅ gi bu dag tu (6) ljoṅs rgyur gśegs kyis khyed cag las gaṅ de bźin gśegs pa daṅ thabs cig ṅan spoṅ gi bu dag tu ljoṅs rgyur ’gro bar spro ba des chos gos dag loṅ śig ces sgo śig | tshe daṅ ldan pa kun dga’ bos btsun pa bka’ bźin ’tshal źes bcom ldan ’das las mñan nas (7) dge sloṅ rnams la tshe daṅ ldan pa dag bcom ldan ’das ṅan spoṅ gi bu dag tu ljoṅs rgyur gśegs kyis khyed cag las gaṅ bcom ldan ’das daṅ thabs cig tu ṅan spoṅ gi bu dag tu ljoṅs rgyur ’gro bar spro ba des chos gos dag loṅ śig ces bsgo’o || de nas bcom ldan (27a1) ’das dul ba | ’khor dul ba daṅ ldan pa | źi ba | ’khor źi ba daṅ ldan pa | grol ba | ’khor grol ba daṅ ldan pa | dbugs phyin pa | ’khor dbugs phyin pa daṅ ldan pa | thul ba | ’khor thul ba daṅ ldan pa | dgra bcom pa | ’khor dgra (2) bcom pa daṅ ldan pa | ’dod chags daṅ bral ba | ’khor ’dod chags daṅ bral ba daṅ ldan pa | mdzes pa | ’khor mdzes pa daṅ ldan pa | khyu mchog ltar ba laṅ gi tshogs kyis yoṅs su bskor ba | glaṅ po che ltar po che’i phru gu’i tshogs kyis yoṅs su bskor ba | (3) seṅ ge ltar mche ba can gyi tshogs kyis yoṅs su bskor ba | ṅag pa’i rgyal po ltar ṅaṅ pa’i tshogs kyis yoṅs su bskor ba | nam mkha’ ldiṅ ltar bya’i tshogs kyis yoṅs su bskor ba | bram ze ltar slob ma’i tshogs kyis yoṅs su bskor ba | sman pa mkhas pa ltar (4) nad pa’i tshogs kyis yoṅs su bskor ba | dpa’ bo ltar ru pa’i tshogs kyis yoṅs su bskor ba | sa mkhan ltar lam du źugs pa’i tshogs kyis yoṅs su bskor ba | ded dpon ltar tshoṅ pa’i tshogs kyis yoṅs su bskor ba | tshoṅ dpon ltar ’khor gyi tshogs kyis (5) yoṅs su bskor ba | mkhar gyi rgyal po ltar blon po’i tshogs kyis yoṅs su bskor ba | ’khor los sgyur ba ltar bu stoṅ gi tshogs kyis yoṅs su bskor ba | zla ba ltar rgyu skar gyi tshogs kyis yoṅs su bskor ba | ñi ma ltar ’od zer stoṅ gi tshogs kyis yoṅs su bskor ba | (6) yul ’khor sruṅ ltar dri za’i tshogs kyis yoṅs su bskor ba | ’phags skyes po ltar grul bum gyi tshogs kyis yoṅs su bskor ba | mig mi bzaṅ ltar klu’i tshogs kyis yoṅs su bskor ba | nor sbyin ltar gdon sbyin gyi tshogs kyis yoṅs su bskor ba | thags zaṅs (7) ris ltar lha ma yin gyi tshogs kyis yoṅs su bskor ba | brgya byin ltar sum bcu rtsa gsum pa’i tshogs kyis yoṅs su bskor ba | tshaṅs pa ltar tshaṅs ris kyi tshogs kyis yoṅs su bskor ba | dbaṅ po rnams kyis śin tu dul ba | spyod lam daṅ spyod pa la ’khrugs pa | (27b1) chu gter ltar tiṅ ṅe ba | sprin ltar chu daṅ bcas pa | glaṅ po che’i rgyal po ltar dregs pa daṅ bral ba | skyes bu chen po’i mtshan sum bcu rtsa gñis kyis legs par brgyan pa | dpe byad bzaṅ po brgyad bcus sku rnam par mdzes pa | ’od ’dom gaṅ gis sku brgyan pa | ñi ma (2) stoṅ bas lhag pa’i ’od daṅ ldan pa | rin po che’i ri bo ’gro ba ltar kun du bzaṅ ba | stobs bcu daṅ | mi ’jigs pa bźi daṅ | ma ’dres pa’i dran pa ñe bar gźag pa gsum daṅ | thugs rje chen po daṅ ldan pa | kun śes kauṇ+ḍi n+ya daṅ | rta thul daṅ | bzaṅ ldan (3) daṅ | rlaṅs pa daṅ | miṅ chen daṅ | grags pa daṅ | gaṅ po daṅ | dri med daṅ | ba laṅ bdag daṅ | lag bzaṅs la sogs pa ñan thos chen po de dag daṅ | gźan yaṅ dge sloṅ gi dge ’dun maṅ pos yoṅs su bskor ciṅ mdun du bdar te ṅan spoṅ gi bu dag tu chu (4) srin byis pa gsod kyi ri gal ba de logs su ljoṅs rgyu źiṅ gśegs pa na | chu srin byis pa gsod kyi ri ra byon nas chu srin byis pa gsod kyi ri la ’jigs ruṅ gi tshal ri dgas kyi nags na bźugs so || chu srin byis pa gsod kyi ri pa’i bram ze daṅ khyim bdag gis bcom ldan (5) ’das ṅan spoṅ gi bu dag tu ljoṅs rgyu źiṅ gśegs pa na | chu srin byis pa gsod kyi rir byon nas | chu srin byis pa gsod kyi ri la ’jigs ruṅ gi tshal ri dgas kyi na gas na bźugs źes thos so | thos nas kyaṅ tshogs nas tshogs su | byiṅs nas byiṅs su ’dus (6) śiṅ lhags te chu srin byis pa gsod kyi ri nas byuṅ ste | bcom ldan ’das ga la ba der doṅ ste phyin nas bcom ldan ’das kyi źabs gñis la mgo bos phyag ’tshal te mtha’ gcig tu ’khod do || mtha’ gcig tu ’khod tu ’khod nas bcom ldan ’das chu srin byis pa gsod kyi ri (7) pa’i bram ze daṅ khyim bdag rnams la chos daṅ ldan pa’i bka’ mchid kyis yaṅ dag par stod par mdzad | yaṅ dag par ’dzin du ’jud par mdzad | yaṅ dag par gzeṅs stod par mdzad | yaṅ dag par rab tu dga’ bar mdzad do | rnam graṅs du mar chos daṅ ldan (28a1) pa’i bka’ mchid kyis yaṅ dag par bstan | yaṅ dag par ’dzin du bcug | yaṅ dag par gzeṅs bstod | yaṅ dag par rab tu dga’ bar mdzad nas caṅ mi gsuṅ ṅo || de nas chu srin byis pa gsod gyi ri ba’i bram ze daṅ khyim bdag rnams stan las laṅs te | (2) bcom ldan ’das ga la ba de logs su thal mo sbyar ba btud nas | bcom ldan ’das la ’di skad ces gsol to | bcom ldan ’das dge sloṅ gi dge ’dun daṅ bcas pas saṅ bdag cag gi sdum par gdugs tshod gsol bar ci gnaṅ | bcom ldan ’das kyis chu srin byis (3) pa gsod kyi ri pa’i bram ze daṅ khyim bdag rnams la caṅ mi gsuṅ bas gnaṅ ṅo | de nas chu srin byis pa gsod kyi ri pa’i bram ze daṅ khyim bdag rnams kyis bcom ldan ’das kyis caṅ mi gsuṅ bas gnaṅ bar rig nas | bcom ldan ’das kyis źabs la mgo bos phyag ’tshal te (4) bcom ldan ’das kyi spyan sṅa nas doṅ ṅo || de nas chu srin byis pa gsod kyi ri ba’i bram ze daṅ khyim bdag rnams kyis de ñid kyi mtshan mo bca’ ba daṅ bza’ ba gtsaṅ źiṅ bsod pa dag sta gon byas nas naṅ par sṅar laṅs te gdan bśams śiṅ chu ra bźag nas | bcom ldan (5) ’das la spyan ’dren gyis | btsun pa gdugs tshod g-yar dgoṅs ’tshal na bcom ldan ’das kyis da de’i dus la bab par dgoṅs su gsol źes spyan draṅs so || de nas bcom ldan ’das sṅa dro śam thabs gsol | lhuṅ bzed daṅ chos gos bsnams te | dge sloṅ (6) gi tshogs kyis yoṅs su bskor ciṅ dge sloṅ gi dge ’dun gyis mdun du bdar nas | chu srin byin pas gsod kyi ri pa’i bram ze daṅ khyim bdag rnams kyi bkad sa ga la ba der gśegs te byon nas | dge sloṅ gi dge ’dun gyi goṅ du gdan bśams pa ñid la bźugs so | (7) de nas chu srin byis pa gsod kyi ri pa’i bram ze daṅ khyim bdag rnams kyis bcom ldan ’das daṅ | dge sloṅ gi dge ’dun bde bar bźugs par rig nas | bca’ ba daṅ bza’ ba gtsaṅ źiṅ bsod pas raṅ gi lag nas tshim par byed | stobs par byed do || rnam (28b1) graṅs du mar bca’ ba daṅ bza’ ba gtsaṅ źiṅ bsod pas raṅ gi lag nas tshim par byas śiṅ bstabs nas | bcom ldan ’das gdugs tshod gsol źiṅ phyag bcabs | lhuṅ bzed bźag par rig nas stan ches dma’ ba dag blaṅs te | bcom ldan ’das kyi spyan sṅar (2) chos mñan pa’i phyir ’khod do || ’khod nas bcom ldan ’das la chu srin byis pa gsod kyi ri ba’i bram ze daṅ khyim bdag rnams kyis ’di skad zes gsol to || btsun pa bcom ldan ’das kyis klu gdug pa daṅ | gnod sbyin gdug pa sog ma med daṅ | ’brog gnas (3) la sogs pa de daṅ de dag kyaṅ btul na | btsun pa klu a mra’i chu ṅogs pa ’di yun riṅ po nas bdag cag khon ma mchis pa rnams la khon du ’dzin | mi ’gran pa rnams la ’gran tshol | mi ’khu ba rnams la ’khu bar bgyid ciṅ lo thog ’khruṅs so ’tshal ma ruṅ bar (4) bgyid na | kye ma bcom ldan ’das kyis rje su thugs brtse ba’i slad du klu a mra’i chu ṅogs pa ’di gdul du gsol | bcom ldan ’das kyis chu srin byis pa gsod kyi ri pa’i bram ze daṅ khyim bdag rnams la caṅ mi gsuṅ bas gnaṅ ṅo || de nas bcom ldan ’das chu srin (5) byis pa gsod kyi ri pa’i bram ze daṅ khyim bdag rnams la chos daṅ ldan pa’i bka’ mchid kyis yaṅ dag par ston par mdzad | yaṅ dag par ’dzin du ’jud par mdzad | yaṅ dag par gzeṅs stod par mdzad | yaṅ dag bar rab tu dga’ bar mdzad do | rnam graṅs du (6) mar chos daṅ ldan pa’i bka’ mchid kyis yaṅ dag par bstan | yaṅ dag par ’dzin du bcug | yaṅ dag par gzeṅs bstod | yaṅ dag par rab tu dga’ bar mdzad nas gdan las bźeṅs te gśegs so || de nas bcom ldan ladasa gtsug lag khaṅ ga la ba (7) der gśegs te byon nas dge sloṅ gi dge ’dun gyi goṅ du gdan bśams pa ñid la bźugs so || bźugs nas bcom ldan ’das kyis tshe daṅ ldan pa kun dga’ bo la bka’ stsal pa | kun dga’ bo soṅ la dge sloṅ rnams la khyed cag las gaṅ klu a mra’i chu ṅogs pa (29a1) ’dul bar spro ba des tshul śiṅ loṅ śig ces bsgo la dge ’dun la tshul śiṅ brims śig | tshe daṅ ldan pa kun dga’ bos btsun pa bka’ bźin ’tshal źes bcom ldan ’das las mñan nas | dge sloṅ rnams la khyed cag las gaṅ klu a mra’i chu ṅogs pa ’dul (2) bar sgro ba des tshul śiṅ loṅ śig ces bsgo ste dge ’dun la tshul śiṅ brim par brtsams pa daṅ | bcom ldan ’das kyis tshul śiṅ ma bźes nas dge sloṅ gnas brtan gnas brtan dag gis bsams pa | bcom ldan ’das kyis ci’i slad du tshul śiṅ ma bźes sñam du (3) bsams na | tshe daṅ ldan pa legs ’oṅs kyi yon tan bsgrag par bźed par rig nas de dag gis kyaṅ tshul śiṅ ma blaṅs so || tshe daṅ ldan pa legs ’oṅs kyis bsams pa | bcom ldan ’das daṅ | dge sloṅ gnas brtan gnas brtan dag gis ci’i slad du tshul śiṅ ma (4) bźes sñam du bsams na | bdag gi yon tan bsgrag par bźed par rig nas ston pa’i thugs la dgoṅs pa yoṅs su rdzogs par bya’o sñam nas | des stan phyed las ’phags te glaṅ po che’i sna lta bu’i lag pa brkyaṅ nas tshul śiṅ blaṅs so || de nas bcom ldan (5) ’das kyis tshe daṅ ldan pa kun dga’ bo la bka’ stsal pa | kun dga’ bo dge sloṅ gnas brtan gaṅ gis tshul śiṅ blaṅs | btsun pa tshe daṅ ldan pa legs ’oṅs kyis blaṅs so || bcom ldan ’das kyis bka’ stsal pa | kun dga’ bo soṅ la dge sloṅ (6) legs ’oṅs la ’di skad ces | de ni klu gdug pa yin gyis khyod kyis lus kyi dbaṅ po bsruṅ bar bya’o źes gyis śig | tshe daṅ ldan pa kun dga’ bos btsun pa bka’ bźin ’tshal źes bcom ldan ’das las mñan nas | tshe daṅ ldan pa legs ’oṅs la smras pa | (7) tshe daṅ ldan pa legs ’oṅs | bcom ldan ’das kyis bka’ stsal pa | de ni klu gdug pa yin gyis khyod kyis lus kyi dbaṅ po bsruṅ bar bya’o źes byuṅ ṅo || tshe daṅ ldan pa legs ’oṅs kyis smras pa | btsun pa kun dga’ bo ston pa’i bka’ mñan pas bka’ (29b1) bźin ’tshal | gźan du na klu a mra’i chu ṅogs pa lta bu śa stag gis ’dzam bu’i gliṅ ’di lta ste | dper na bu ram śiṅ gi tshal lam | ’dam bu’i tshal lam | ’od ma’i tshal bźin du gaṅ bar gyur kyaṅ de dag gis bdag gi spu’i rtse mo tsam yaṅ g-yo bar mi nus na (2) lus kyi dbaṅ po ’gag par lta ga la nus te | ’di ltar bdag gis bcom ldan ’das kyi spyan sṅar rdzu ’phrul gyi rkaṅ pa bźi po dag kun du bsten ciṅ goms par byas | lan maṅ du byas pa’i phyir ro || de nas tshe daṅ ldan pa legs ’oṅs de ñid kyi mtshan mo ’das nas sṅa dro śam (3) thabs bgos | lhuṅ bzed daṅ chos gos thogs te chu srin byis pa gsod kyi ri ra bsod sñoms la źugs so || chu srin byis pa gsod kyi rir bsod sñoms brgyus nas klu a mra’i chu ṅogs pa’i gnas ga la ba der soṅ ba daṅ | klu a mra’i chu ṅogs pas tshe daṅ ldan pa legs ’oṅs (4) thag riṅ po kho na nas ’oṅ ba mthoṅ ṅo || mthoṅ nas kyaṅ des bsams pa | dge sbyoṅ ’dis bdag śi bar gtam thos sam | ci na bdag gi gnas su ’oṅ | re źig ’di ni glo bur ba yin gyis ’oṅ du chug śig sñam mo || de nas tshe daṅ ldan pa legs ’oṅs kyis chu (5) tshags daṅ lhuṅ bzed mtha’ gcig tu bźag ste | snam sbyar sprugs nas rkaṅ pa gñis bkrus śiṅ lag pa gñis bsñal te chu btsags nas lo ma lhags pa dag blaṅs te ’dug nas zas kyi bya ba bya bar brtsams so || de nas tshe daṅ ldan pa legs ’oṅs kyis zas kyi bya (6) ba byas nas bsams pa | klu gdug pa ni ’khrug par ma byas nas dul ba’i gnas su mi ruṅ bas ’di ni klu gdug pa yin pas ’khrug par bya’o sñam nas des lhuṅ bzed kyi khrud ma’i chu de de’i rdziṅ der blugs pa daṅ | klu a mra’i chu ṅogs pa de ’khrugs (7) nas des bsams pa | bdag gis dge sbyoṅ ’di ’oṅ ba daṅ za ba yaṅ yal bar bor na bdag la brñas te bdag gi gnas su khrud ma’i chu lṅugs par byed pas dge sbyoṅ ’di ni ñe bar ma źi ba źig yin no sñam nas | de khros te steṅ gi nam mkha’ la mṅon par ’phags nas (30a1) ’brug sgra chen po phyuṅ ste | tshe daṅ ldan pa legs ’oṅs kyi steṅ du rdo rje rtse gcig pa daṅ | ’khor lo daṅ | mda’ bo che daṅ | mtshon rtse gcig pa la sogs pa mtshon cha sna tshogs dbab par brtsams pa daṅ | tshe daṅ ldan pa legs ’oṅs byams (2) pa’i tiṅ ṅe ‘dzin la źugs pas mtshon cha de dag lha’i me tog ut+pala daṅ | pad ma daṅ | ku mu da daṅ | pad ma dkar po dag tu gyur te | tshe daṅ ldan pa legs ’oṅs kyi lus la ’bab bo || klu a mra’i chu ṅogs pas me ma dag gi char dbab par brtsams pa daṅ | tshe daṅ ldan (3) pa legs ’oṅs byams pa’i tiṅ ṅe ‘dzin la źugs pas me ma dag de dag lha’i me tog man da ra ka ni dag tu gyur te | tshe daṅ ldan pa legs ’oṅs kyi lus la ’bab bo || klu a mra’i chu ṅogs pas phyag dar gyi char dbab par brtsams pa daṅ | tshe daṅ ldan pa legs ’oṅs (4) byams pa’i tiṅ ṅe ‘dzin la źugs pas phyag dar de dag lha’i a ga ru’i phye ma dag daṅ | tsan dan gyi phye ma dag daṅ | rgya spos kyi phye ma dag daṅ | ta ma la’i lo ma’i phye ma dag tu gyur te | tshe daṅ ldan pa legs ’oṅs kyi lus la ’bab bo || klu a mra’i chu ṅogs pas khro (5) ba’i mthus du ba gtul ba daṅ | tshe daṅ ldan pa legs ’oṅs kyis kyaṅ rdzu ’phrul gyi mthus du pa gtul to || klu a mra’i chu ṅogs pas khro ba’i mthus me sbar ba daṅ | tshe daṅ ldan pa legs ’oṅs me’i khams la sñoms par źugs so || de na klu a mra’i chu ṅogs pa’i khro (6) ba’i mthu daṅ | tshe daṅ ldan pa legs ’oṅs kyi rdzu ’phrul gyi mthus snaṅ ba chen po byuṅ bar gyur nas | chu srin byis pa gsod kyi ri pa’i bram ze daṅ khyim bdag rnams kyis smras pa | śes ldan dag ’di ni bcom ldan ’das klu a mra’i chu ṅogs pa ’dul bar mdzad pa yin no | (7) de nas bcom ldan ’das kyis dge sloṅ rnams la bka’ stsal pa | dge sloṅ dag ṅa’i ñan thos kyi dge sloṅ yaṅ daṅ yaṅ du me’i khams la sñoms par ’jug pa rnams kyi naṅ na ’di lta ste | dge sloṅ legs ’oṅs ’di mchog yin no || gaṅ gi tshe klu a mra’i chu ṅogs pa mtshon (30b1) thams cad zad par gyur pa de’i tshe na des ’bros par brtsams pa daṅ | tshe daṅ ldan pa legs ’oṅs kyis kun du me mṅon par sprul nas | klu a mra’i chu ṅogs pas tshe daṅ ldan pa legs ’oṅs kyi rkaṅ pa’i druṅ ’ba’ źig źi bar mthoṅ ba ma gtogs par thams cad kun du (2) ’bar | rab tu ’bar | kun du rab tu ’bar źiṅ me lce gcig tu gyur par mthoṅ nas de tshe daṅ ldan pa legs ’oṅs ga la ba der soṅ ste phyin nas | tshe daṅ ldan pa legs ’oṅs la ’di skad ces smras so || btsun pa legs ’oṅs ci’i slad du bdag la tho ’tsham par mdzad | rga (3) ba’i chos can kho bo khyod la tho ’tsham pa ma yin gyi | khyod kho bo la tho ’tsham ste | gal te kho bos yon tan gyi tshogs ’di lta bu thob par ma gyur du zin na khyod kyis deṅ kho bo miṅ las lhag ma ma lus par byed par ’gyur ro || des smras pa | btsun pa legs ’oṅs pa dag (4) gis ci bgyi ba bka’ stsal du gsol | bźin bzaṅs tshur śog | bcom ldan ’das kyi spyan sṅar soṅ la skyabs su ’gro ba daṅ | bslab pa’i gźi dag loṅ śig | de nas tshe daṅ ldan pa legs ’oṅs kyis klu a mra’i chu ṅogs pa lhuṅ bzed du bcug nas bcom ldan ’das (5) ga la ba der soṅ ste phyin nas | bcom ldan ’das kyi źabs gñis la mgo bos phyag ’tshal te mtha’ gcig tu ’dug go | mtha’ gcig tu ’dug nas bcom ldan ’das la tshe daṅ ldan pa legs ’oṅs kyis ’di skad ces gsol to || btsun pa klu a mra’i chu ṅogs pa de (6) ’di lags so || bcom ldan ’das kyis bka’ stsal pa | bźin bzaṅs khyod re źig sṅon gyi ñes par spyad pas | da ltar dud ’gro’i skye gnas ṅan par skyes śiṅ | drag śul can lag pa dmar ba | snun pa daṅ rab tu snun pa la źugs pa | gźan gyi srog (7) ’phrog pa | gźan gyi srog gcod du ’jud pa | gźan gyi srog gcod pas ’tsho bar byed pa yin pas | khyod ’di nas śi ’phos pa’i ’gro ba ni cir ’gyur skye ba ni cir ’gyur | tshe phyi ma ni cir ’gyur | bcom ldan ’das bdag gis ji ltar bgyi ba bka’ stsal du gsol (31a1) bźin bzaṅs khyod tshur śog la ṅa’i spyan sṅar skyabs su ’gro ba daṅ | bslab pa’i gźi dag loṅ la chu srin byis pa gsod kyi ri pa’i bram ze daṅ khyim bdag rnams la mi ’jigs pa byin cig | btsun pa bdag bcom ldan ’das kyi spyan sṅar skyabs su mchi ba daṅ | bslab (2) pa’i gźi dag len ciṅ | deṅ slan cad nas chu srin byis pa gsod kyi ri pa’i bram ze daṅ khyim bdag rnams la mi ’jigs pa stsol to || de nas chu srin byis pa gsod kyi ri pa’i bram ze daṅ khyim bdag rnams bya mo lam maṅ po thogs nas | bcom ldan ’das ga la ba der doṅ ste phyin (3) nas | bcom ldan ’das kyi źabs gñis la mgo bos phyag ’tshal te mtha’ gcig tu ’khod do || mtha’ gcig tu ’khod nas bcom ldan ’das la chu srin byis pa gsod kyi ri ba’i bram ze dag khyim bdag rnams kyis ’di skad ces gsol to || btsun pa bcom ldan ’das kyis (4) klu a mra’i chu ṅogs pa btul tam | bcom ldan ’das kyis bka’ stsal pa | ṅas klu a mra’i chu ṅogs pa ma btul te dge sloṅ legs ’oṅs kyis klu a mra’i chu ṅogs pa btul to || btsun pa legs ’oṅs gaṅ gis chu srin byis pa gsod gyi ri pa khyim bdag rtogs (5) ldan gyi bu legs ’oṅs kyis so || de na kha cig gis smras pa | bdag cag gi phu nu bo’i bu yin no || kha cig gis smras pa | bdag cag gi źaṅ po yin no || kha cig gis smras pa | bdag cag gi źaṅ po yin no || kha cig gis smras pa | bdag cag gi chuṅ (6) po grogs kyi bu yin no źes de dag gis de la bya mo lab maṅ po phul lo | de nas chu srin byis pa gsod kyi ri pa’i bram ze daṅ khyim bdag rnams stan las laṅs te | bla gos phrag pa gcig tu byas nas | bcom ldan ’das ga la bde logs su thal mo sbyar ba btud de (7) bcom ldan ’das la ’di skad ces gsol to || bcom ldan ’das dge sloṅ gi dge ’dun daṅ bcas pas btsun pa legs ’oṅs las brten te dguṅ bdun du bdag cag gi mchod pa’i dbaṅ du bgyis pa’i gdugs tshod gsol bar ci gnaṅ | bcom ldan ’das kyis chu srin (31b1) byis pa gsod kyi ri pa’i bram ze daṅ khyim bdag rnams la caṅ mi gsuṅ bas gnaṅ ṅo | de nas chu srin byis pa gsod kyi ri pa’i bram ze daṅ khyim bdag rnams kyis bcom ldan ’das kyis caṅ mi gsuṅ bas gnaṅ bar rig nas | bcom ldan ’das kyi źabs gñis la mgo bos (2) phyag ’tshal te bcom ldan ’das kyi spyan sṅa nas doṅ ṅo || chu srin byis pa gsod kyi ri la khyim bdag rtogs ldan gyi chuṅ po grogs bram ze sbrul khas sdigs pa źig ’dug pa de klu a mra’i chu ṅogs pa’i ’jigs pas bros te mñan yod du soṅ ba de ko sa lar byaṅ ba’i rgyal po gsal (3) rgyal gyis glaṅ po che’i chaṅ ba’i blar bskos te bźag go | de bya ba źig gi phyir chu srin byis pa gsod kyi rir phyin pa daṅ | des ji ltar khyim bdag rtogs ldan gyi bu btsun pa legs ’oṅs kyis klu a mra’i chu ṅogs pa btul ba thos so || thos nas kyaṅ tshe daṅ ldan pa legs ’oṅs ga lab (4) der soṅ ste phyin nas tshe daṅ ldan pa legs ’oṅs kyi rkaṅ pa gñis la mgo bos phyag ’tshal te mtha’ gcig tu ’dug go | mtha’ gcig tu ’dug nas tshe daṅ ldan pa legs ’oṅs la bram ze des ’di skad ces smras so || btsun pa legs ’oṅs kyis saṅ bdag gi sdum par gdugs (5) tshod gsol bar ci gnaṅ | bram ze chu srin byis pa gsod kyi ri ba’i bram ze daṅ khyim bdag rnams kyis kho bo las brten nas saṅs rgyas la sogs pa dge sloṅ gi dge ’dun zag bdun du mchod pa’i dbaṅ du byas pa’i ’dugs tshod la spyan draṅs kyis mi ’tshal lo || bram zes smras pa | (6) gal te khyod kyis da mi gnaṅ na | gaṅ gi tshe khyod mñan yod du byon par gyur pa de’i tshe na khyod kyis daṅ po kho nar bdag gi bsod sñoms gsol ba mdzod cig | tshe daṅ ldan pa legs ’oṅs kyis de ltar bya’o źes smras nas de laṅs te soṅ ṅo | de nas bcom ldan ’das chu srin byis pa (7) bsod kyi rir ci dgyes par bźugs nas | mñan yod gaṅ ba de logs su ljoṅs rgyu źiṅ gśegs te | mthar gyis rgyu źiṅ gśegs pa na mñan yod du byon nas | mñan yod na rgyal byed kyi tshal mgon med zas sbyin gyi kun dga’ ra ba na bźugs so || khyim bdag (32a1) mgon med zas sbyin gyis bcom ldan ’das ṅan spoṅ gi bu dag tu ljoṅs rgyu źiṅ gśegs pa na mñan yod du byon nas | mñan yod na rgyal byed kyi tshal bdag gi kun dga’ ra ba na bźugs źes thos so || thos nas kyaṅ mñan yod nas byuṅ nas bcom ldan ’das ga la ba der soṅ ste phyin (2) nas bcom ldan ’das kyi źabs gñis la mgo bos phyag ’tshal te mtha’ gcig tu ’dug go | mtha’ gcig tu ’dug nas | bcom ldan ’das khyim bdag mgon med zas sbyin la chos daṅ ldan pa’i bka’ mchid kyis yaṅ dag par ston par mdzad | yaṅ dag par ’dzin du ’jud par (3) mdzad | yaṅ dag par gzeṅs stod par mdzad | yaṅ dag par rab tu dga’ bar mdzad do || rnam graṅs du mar chos daṅ ldan pa’i bka’ mchid kyis yaṅ dag par bstan | yaṅ dag par ’dzin du bcug | yaṅ dag par gzeṅs bstod | yaṅ dag par rab tu dga’ (4) bar mdzad nas caṅ mi gsuṅ ṅo || de nas khyim bdag mgon med zas sbyin stan las laṅs te || bcom ldan ’das ga la ba de logs su thal mo sbyar ba btud nas bcom ldan ’das la ’di skad ces gsol to || bcom ldan ’das dge sloṅ gi dge ’dun daṅ bcas pas saṅ (5) bdag gi sdum par gdugs tshod gsol bar ci gnaṅ | bcom ldan ’das kyis khyim bdag mgon med zas sbyin la caṅ mi gsuṅ bas gnaṅ ṅo | de nas khyim bdag mgon med zas sbyin gyis bcom ldan ’das kyis caṅ mi gsuṅ bas gnaṅ bar rig nas | bcom ldan ’das kyi źabs (6) gñis la mgo bos phyag ’tshal te bcom ldan ’das kyi spyan sṅa nas soṅ ṅo | bram ze sprul khas sdigs pa des bcom ldan ’das ṅan spoṅ gi bu dag tu ljoṅs rgyu źiṅ gśegs pa na mñan yod du byon nas mñan yod na rgyal byed kyi tshal mgon med zas sbyin gyi kun dga’ ra ba na bźugs źes thos so | (7) thos nas kyaṅ tshe daṅ ldan pa legs ’oṅs ga la ba der soṅ ste phyin nas | tshe daṅ ldan pa legs ’oṅs kyi rkaṅ pa gñis la mgo bos phyag ’tshal te mtha’ gcig tu ’dug go || mtha’ gcig tu ’dug nas tshe daṅ ldan pa legs ’oṅs bram ze de la chos daṅ ldan pa’i gtam gyis yaṅ dag par ston par (32b1) byed | yaṅ dag par ’dzin du ’jud par byed | yaṅ dag par gzeṅs stod par byed | yaṅ dag par rab tu dga’ bar byed do | rnam graṅs du mar chos daṅ ldan pa’i gtam gyis yaṅ dag par bstan | yaṅ dag par ’dzin du bcug | yaṅ dag par gzeṅs bstod | yaṅ dag par rab (2) tu dga’ bar byas nas caṅ mi smra’o || de nas bram ze de stan las laṅs te tshe daṅ ldan pa legs ’oṅs ga la ba de logs su thal mo sbyar ba btud nas | tshe daṅ ldan pa legs ’oṅs la ’di skad ces smras so || btsun pa legs ’oṅs kyis saṅ bdag gi sdum par gdugs tshod (3) gsol bar ci gnaṅ | bram ze bcom ldan ’das la źu’o || de nas bcom ldan ’das la tshe daṅ ldan pa legs ’oṅs kyis ’di skad ces gsol to || bcom ldan ’das bram ze de bdag gi gan du mchis te bdag saṅ sdum pa gźan du ’tshal ma la g-yar ’dren na mchid kyis ’tshal (4) lam | bcom ldan ’das kyis bka’ stsal pa | sṅar mgron du bos pas bdag gir bya’o | tshe daṅ ldan pa legs ’oṅs kyis bram ze de la caṅ mi smra bas daṅ du blaṅs so || de nas bram ze des tshe daṅ ldan pa legs ’oṅs kyis caṅ mi smra bar daṅ du blaṅs par rig nas | tshe daṅ (5) ldan pa legs ’oṅs kyi rkaṅ pa gñis la mgo bos phyag ’tshal te tshe daṅ ldan pa legs ’oṅs kyi druṅ nas soṅ ṅo || de nas khyim bdag mgon med zas sbyin gyis | de ñid kyi mtshan mo bca’ ba daṅ bza’ ba gtsaṅ źiṅ bsod pa dag sta gon byed du bcug nas | nad par sṅar laṅs (6) te gdan bśams śiṅ chu ra bźag nas | bcom ldan ’das la spyan ’dren gyis btsun pa gdugs tshod g-yar dgoṅs ’tshal na | bcom ldan ’das kyis da de’i dus la bab par dgoṅs su gsol źes spyan draṅs so || de nas bcom ldan ’das sṅa dro śam thabs gsol | (7) lhuṅ bzed daṅ chos gos bsnams te dge sloṅ gi tshogs kyis yoṅs su bskor ciṅ | dge sloṅ gi dge ’dun gyis mdun du bdar nas | khyim bdag mgon med zas sbyin gyi bkad sa ga la ba der gśegs te byon nas | dge sloṅ gi dge ’dun gyi goṅ du gdan bśams pa ñid la (33a1) bźugs so || bram ze des kyaṅ tshe daṅ ldan pa legs ’oṅs kyi kha zas bsod pa sta gon byas so || de nas tshe daṅ ldan pa legs ’oṅs kyaṅ sṅa dro śam thabs bgos | lhuṅ bzed daṅ chos gos thogs nas | bram ze de’i bkad sa ga la ba der soṅ ste phyin nas stan (2) bśams pa ñid la ’dug go || de nas bram ze des tshe daṅ ldan pa legs ’oṅs bde bar ’dug par rig nas | tshe daṅ ldan pa legs ’oṅs kha zas bsod pas tshim par byas so || bram ze des bsams pa | btsun pa legs ’oṅs kyis kha zas bsod pa zos pas ’ju (3) bar mi nus so sñam du rig nas | tshe daṅ ldan pa legs ’oṅs la ’di skad ces smras so | btsun pa legs ’oṅs saṅ nas gsol lam || des smras pa | ’thuṅ ṅo | bram ze des glaṅ po che’i chaṅ gi naṅ du mdzub mo bcug te skom gyi naṅ du krog krog dkrugs te | tshe daṅ (4) ldan pa legs ’oṅs la phul lo || dgra bcom pa dag ni ma bsams par śes pa daṅ mthoṅ ba mi ’jug pas | tshe daṅ ldan pa legs ’oṅs kyis des ’thuṅs te | yon bśad pa byas nas stan las laṅs te soṅ ṅo || de mñan yod kyi sraṅ re ldes g-yogs pa las (5) thal nas ñi ma’i ’od zer dag gis lus la thog pa daṅ | ra ro nas de chaṅ gis myos pa’i śugs kyis sa la sgyel to || saṅs rgyas bcom ldan ’das rnams ni bsñel ba mi mṅa’ ba’i chos ñid can yin pas bcom ldan ’das kyis der lo ma ma yin pa’i spyil bu źig sprul (6) pa mdzad de bkab bo || de nas khyim bdag mgon med zas sbyin gyis saṅs rgyas la sogs pa dge sloṅ gi dge ’dun bde bar bźugs par rig nas bca’ ba daṅ bza’ ba gtsaṅ źiṅ bsod pas raṅ gi lag nas tshim par byed stobs par byed do | rnam graṅs du mar bca’ ba (7) daṅ bza’ ba gtsaṅ źiṅ bsod pas raṅ gi lag nas tshim par byas śiṅ bstabs nas | bcom ldan ’das gdugs tshod gsol ciṅ phyag bcabs lhuṅ bzed bźag par rig nas | stan ches dma’ ba źig blaṅs te | bcom ldan ’das kyi spyan sṅar chos mñan pa’i phyir (33b1) ’dug go || de nas bcom ldan ’das khyim bdag mgon med zas sbyin la chos daṅ ldan pa’i bka’ mchid kyis yaṅ dag par stod par mdzad | yaṅ dag par ’dzin du ’jud par mdzad | yaṅ dag par gzeṅs stod par mdzad | yaṅ dag par rab tu dga’ bar mdzad do | rnam (2) graṅs du mar chos daṅ ldan pa’i bka’ mchid kyis yaṅ dag par bstan | yaṅ dag par ’dzin du bcug | yaṅ dag par gzeṅs bstod | yaṅ dag par rab tu dga’ bar mdzad nas yon bśad pa mdzad de | gdan las bźeṅs te gśegs nas phyogs der byon to || de nas (3) bcom ldan ’das kyis rdzu ’phrul mṅon par ’du mdzad pa de btul nas dge sloṅ rnams la bka’ stsal pa | dge sloṅ dag ’di ni gaṅ gis klu a mra’i chu ṅogs pa btul ba’i dge sloṅ legs ’oṅs źes bya ba de yin na | dge sloṅ dag ji sñam du sems | dge sloṅ legs ’oṅs (4) ’dis da ltar sgrul phrug kyaṅ thul bar nus sam | btsun pa rṅo mi thog go || dge sloṅ dag de ltar na ñes dmigs ’di daṅ gźan dag kyaṅ myos par ’gyur ba ’thuṅ ba las ’byuṅ bas dge sloṅ dag ṅa la ston pa’o źes zer ba dag gis myos par ’gyur ba tha na rtswa’i rtse mos kyaṅ btuṅ (5) bar mi bya źiṅ blud par yaṅ mi bya’o || de nas bcom ldan ’das kyis tshe daṅ ldan pa legs ’oṅs sad par mdzad nas bka’ stsal pa | legs ’oṅs ci’i phyir ’di ltar gyur | bcom ldan ’das ma bsams so | bde bar gśegs pa ma bsams so || de nas bcom ldan (6) ’das gtsug lag khaṅ du gśegs te byon nas | dge sloṅ gi dge ’dun gyi goṅ du gdan bśams pa ñid la bźugs so | bźugs nas bcom ldan ’das kyis dge sloṅ rnams la bka’ stsal pa | dge sloṅ dag de lta bas na phan yon bcu yaṅ dag par gzigs pas (7) ’dul ba la ñan thos rnams kyi bslab pa’i gźi bca’ bar bya ste źes bya ba la sogs pa sṅa ma bźin no | ṅa’i ñan thos rnams kyis ’dul ba la bslab pa’i gźi ’di ltar gdon par bya ste | ’bru’i chaṅ daṅ | bcos pa’i chaṅ myos par ’gyur ba ’thuṅ na ltuṅ byed do || ’bru’i (34a1) chaṅ źes bya ba ni chan gyi btuṅ ba daṅ | phye’i btuṅ ba daṅ | phye’i btuṅ ba daṅ | phabs kyi btuṅ ba’o || bcos pa’i chaṅ źes bya ba ni rtsa ba’i btuṅ ba daṅ | sdoṅ bu’i btuṅ ba daṅ | ’dab ma’i btuṅ ba daṅ | me tog gi btuṅ ba daṅ | ’bras bu’i btuṅ ba’o || de gñi ga bsres pa (2) ni ’bru’i chaṅ daṅ bcos pa’i chaṅ źes bya ba’o || de ’thuṅ na źes bya ba ni mgul du mid na’o || ltuṅ byed do źes bya ba ni sems can dmyal ba daṅ | dud ’gro daṅ | yi dgas ṅan soṅ daṅ | ṅan ’gro daṅ | log par ltuṅ ba dag tu sreg par byed | ’tshod par byed | ltuṅ (3) bar byed do || gźan yaṅ ji srid du ltuṅ ba de ma bśags śiṅ so sor ma bśags na dge ba’i chos rnams la sgrib par byed pa ste | des nas ltuṅ byed do źes gsuṅs so || de la ltuṅ bar ji ltar ’gyur źe na | dge sloṅ myos par ’gyur ba’i kha dog daṅ ldan pa daṅ | myos par (4) ’gyur ba’i dri daṅ ldan pa daṅ | myos par ’gyur ba’i ro daṅ ldan pa daṅ | myos par ’gyur ba’i myaṅ ba daṅ ldan pa ’thuṅ na | ’thuṅs nas myos par ’gyur na ltuṅ byed du ’gyur la || ’thuṅs nas myos par mi ’gyur na ñes byas su ’gyur ro || dge sloṅ myos par ’gyur ba’i kha dog (5) daṅ ldan pa daṅ | myos par ’gyur ba’i dri daṅ ldan pa daṅ | myos par ’gyur ba’i ro daṅ ldan pa ’thuṅ na | ’thuṅs nas myos par ’gyur na ltuṅ byed du ’gyur la | ’thuṅs nas myos par mi ’gyur na ñes byas ’gyur ro || dge sloṅ myos par ’gyur ba’i kha dog daṅ ldan pa daṅ | (6) myos par ’gyur ba’i dri daṅ ldan pa ’thuṅ na | ’thuṅs nas myos par ’gyur na ltuṅ byed du ’gyur la | ’thuṅs nas myos par mi ’gyur na ñes byas su ’gyur ro || myos par ’gyur ba’i kha dog ’ba’ źig ma ’dres pa daṅ ldan pa ’thuṅ ba la ni ltuṅ ba med de de yaṅ tshwa ñid du gyur (7) ba’o || dge sloṅ ’bru’i chaṅ ’thuṅ na ltuṅ byed du ’gyur ro || bcos pa’i chaṅ ’thuṅ na ltuṅ byed du ’gyur ro || ’bru’i chaṅ daṅ bcos pa’i chad ’thuṅ na ltuṅ byed du ’gyur ro || dge sloṅ ’bru’i chaṅ gi nu rtsi ’thuṅ na ltuṅ byed du ’gyur ro || dge sloṅ spaṅ ma zan ltuṅ byed du ’gyur ro || (34b1) dge sloṅ tshigs ma zan ltuṅ byed du ’gyur ro || dge sloṅ phabs kyi chaṅ bu za na ñes byas su ’gyur ro || dge sloṅ me tog daṅ ’bras bu myos par ’gyur ba dag za na ñes byas su ’gyur ro || bskol ba ’thuṅ ba daṅ | kha’i nad yod pa la sman pa’i luṅ gis khur bar srel ba daṅ | (2) lus dag skud pa la ltuṅ ba med do || las daṅ po pa daṅ | smyos pa daṅ | sems ’khrugs pa daṅ | tshor ba dag gis ñen pa la ltuṅ ba med do || dge sloṅ rnams the tshom thams cad gcod pa saṅs rgyas bcom ldan ’das la źus pa | btsun pa tshe daṅ (3) ldan pa legs ’oṅs kyis las ci bgyis na las de’i rnam par smin pas phyug pa | nor maṅ la loṅs spyod che ba’i khyim du skyes | las ci bgyis na las de’i rnam par smin pas mu lto ba rnams kyi naṅ du źugs śiṅ | ñes ’oṅs źes bgyi ba’i miṅ du gyur | las ci bgyis na (4) las de’i rnam par smin pas bcom ldan ’das kyi bstan pa la rab tu byuṅ nas ñon moṅs pa thams cad spaṅs pas dgra bcom pa ñid mṅon du bgyis | bcom ldan ’das kyis bka’ stsal pa | dge sloṅ dag rigs kyi bu legs ’oṅs ñid kyis las tshogs rñed pa | rkyen (5) yoṅs su bsgyur ba | ’od pa bźin du ñe bar gnas pa | gdon mi za bar ’byuṅ bar ’gyur ba dag byas śiṅ bsags pas legs ’oṅs ñid kyis las byas śiṅ bsags pa dag gźan su źig gis so sor myog bar ’gyur | dge sloṅ dag las byas śiṅ bsags pa dag ni (6) phyi rol gyi sa’i khams la rnam par smin par mi ’gyur | chu’i khams la mi ’gyur | me’i khams la mi ’gyur | rluṅ gi khams la mi ’gyur gyi | ’di ltar las dge ba daṅ mi dge ba byas śiṅ bsags pa dag ni zin pa’i phuṅ po daṅ | khams daṅ | skye mched dag la (7) rnam par smin par ’gyur te | las rnams bskal ba brgyar yaṅ ni | chud mi za ba’aṅ tshogs daṅ dus | rñed na lus can rnams la ni | ’bras bu dag tu ’gyur ba ñid | dge sloṅ dag sṅon byuṅ ba ’das pa’i dus na ri brags śig na khyim bdag phyug ba | nor maṅ (35a1) ba | loṅs spyod che ba źig ’dug pa de ’khor daṅ bcas te skyed mos tshal gyis ra byuṅ ṅo || saṅs rgyas rnams ’byuṅ ba med pa’i tshe raṅ saṅs rgyas dman pa daṅ | bkren pa la rjes su sñiṅ brtse ba | bas mtha’i gnas mal la dga’ ba | bse ru lta bu gcig pu (2) ’jig rten gyi yon gnas su gyur pa dag ’jig rten du byuṅ ṅo || raṅ saṅs rgyas na bźi ga ri brags der bsod sñoms la źugs pa daṅ | khyim bdag des raṅ saṅs rgyas de thag riṅ po kho na nas mthoṅ nas | des źo sas ’tsho ba rnams la bsgo ba | śes ldan dag rab tu byuṅ ba (3) ’di skrod cig | de dag las ’ga’ yaṅ raṅ saṅs rgyas de skrod par spro ba med nas | khyim bdag des spyos te stan las laṅs nas raṅ ñid kyis raṅ saṅs rgyas de’i gña’ ba nas bzuṅ ste bskrad nas smras pa | ñes ’oṅs mu lto ba rnams kyi naṅ du źugs śig ces phul ba daṅ | (4) phyag der gyi phuṅ po’i naṅ du skyel to || raṅ saṅs rgyas bdag ñid chen po des bsams pa | khyim bdag ñon moṅs pa ’di ha caṅ smas pa daṅ | ñams par gyur na mi ruṅ gis ’di la lag nas draṅ ba sbyin no sñam nas | des daṅ pa’i rgyal po ’dab ma brkyaṅ ba ltar steṅ gi nam (5) mkha’ la mṅon par ’phags nas ’bar ba daṅ | gsal ba daṅ | char ’bebs pa daṅ | glog ’byin pa’i cho ’phrul dag bya bar brtsams so || so so’i skye bo ni rdzu ’phrul la myur du sems gtod par byed pa yin pas khyim bdag de śiṅ ljon pa rtsa ba nas bcad pa bźin (6) du raṅ saṅs rgyas de’i rkaṅ pa gñis kyi druṅ du ’gyel nas smras pa | yon gnas yaṅ dag par gyur pa mar gśegs su gsol | mar gśegs su gsol | ñon moṅs pa’i ’dam du byiṅ ba bdag gi sug pa nas draṅ bstsal du gsol | raṅ saṅs rgyas de khyim bdag (7) de la rjes su sñiṅ brtse ba’i phyir steṅ gi nam mkha’ las śod du babs so || khyim bdag des de la mchod pa byas nas rkaṅ pa gñis la mgo bos phyag ’tshal te | smon lam ’di skad ces | bdag yon gnas yaṅ dag par gyur pa ’di lta bu la gnod pa byas pa gaṅ yin pa’i (35b1) las de’i cha daṅ mthun par mi ’gyur bar mchod pa byas pa gaṅ yin pa’i dge ba’i rtsa ba ’dis bdag phyug pa | nor maṅ ba | loṅs spyod che ba’i khyim du skye źiṅ | ’di bas ches khyad par du ’phags pa’i ston pa mñes par byed ciṅ thugs byuṅ bar mi byed pa’i yon tan gyi rnam pa de (2) lta bu thob par gyur cig ces smon lam btab bo || dge sloṅ dag de la de’i tshe de’i dus na khyim bdag gaṅ yin pa de ni legs ’oṅs ’di yin te | ’dis raṅ saṅs rgyas de la mchod pa byas nas smon lam btab pa gaṅ yin pa’i las de’i rnam par smin pas ni da ltar phyug la nor maṅ ba | (3) loṅs spyod che ba’i khyim du skyes so || gnod pa byas pa daṅ ñes ’oṅs źes brjod pa gaṅ yin pa’i las de’i rnam par smin pas ni bskal bar sems can dmyal ba chen po mnar med par gsuṅs nas las de ñid kyi lhag mas tshe rabs lṅa brgyar mu lto ba ñid kyis ’phyan par gyur ciṅ (4) ñes ’oṅs źes bya bar gyur te || da ltar gyi bar du yaṅ mu lto ba rnams kyi naṅ du źugs śiṅ | ñes ’oṅs źes bya ba’i miṅ du gyur to || bdag yon gnas yaṅ dag par gyur pa ’di lta bu la gnod par byas pa gaṅ yin pa’i las de’i cha daṅ mthun par mi ’gyur bar ’di bas ches khyad (5) bar du ’phags pa’i ston pa mñes par byed ciṅ | thugs byuṅ bar mi byed pa’i yon tan gyi rnam pa de lta bu thob par gyur cig ces smon lam btab pa gaṅ yin pa’i las de’i rnam par smin bas ni ṅa’i bstan pa la rab tu byuṅ nas | ñon moṅs pa thams cad spaṅs pas dgra (6) bcom pa ñid mṅon du byas śiṅ | ’dis raṅ saṅs rgyas bye ba phrag ’bum bas ches khyad par du ’phags pa’i ston pa ṅa mñes par byas śiṅ thugs byuṅ bar ma byas so || btsun pa tshe daṅ ldan pa legs ’oṅs kyis las ci bgyis na | las de’i rnam par smin pas bcom (7) ldan ’das kyis yaṅ dag yaṅ du me’i khams la sñoms par ’jug pa rnams kyis mchog tu bstan | de yaṅ smon lam gyi dbaṅ gis te | gaṅ du smon lam btab ce na | dge sloṅ dag sṅon byuṅ ba ’das pa’i dus na bskal pa chen po bzaṅ po ’di ñid la skye dgu’i tshe lo ñi khri thub pa na (36a1) ston pa de bźin gśegs pa dgra bcom pa yaṅ dag par rdzogs pa’i saṅs rgyas rig pa daṅ źabs su ldan pa | bde bar gśegs pa | ’jig rten mkhyen pa | skyes bu ’dul ba’i kha lo sgyur ba bla na med pa | lha daṅ mi rnams kyi ston pa saṅs rgyas bcom (2) ldan ’das ’od sruṅ ’jig rten du byuṅ ste | de bārā ṇa sa na draṅ sroṅ smra ba ri dgas kyi nags na ñe bar brten ciṅ bźugs so || de’i bstan pa la ’di rab tu byuṅ nas dge sloṅ gaṅ gis de rab tu phyuṅ ba’i dge sloṅ de de bźin gśegs pa yaṅ dag par rdzogs pa’i saṅs rgyas ’od sruṅ (3) gis yaṅ daṅ yaṅ du me’i khams la sñoms par ’jug pa rnams kyi mchog tu bstan to || de na ’dis tshe ji srid par tshaṅs par spyod pa spyad na yon tan gyi tshogs ’ga’ yaṅ ma thob nas | de’i ’og tu ’chi ba’i tshe smon lam ’di skad ces | bdag gis bcom ldan ’das de bźin (4) gśegs pa yaṅ dag par rdzogs pa’i saṅs rgyas yon gnas bla na med pa ’od sruṅ la tshe ji srid par tshaṅs par spyod pa spyad na yon tan gyi tshogs ’ga’ yaṅ ma thob ste | bdag gis tshe ji srid par tshaṅs par spyod pa spyad pa’i dge ba’i rtsa ba ’dis bcom ldan ’das de bźin (5) gśegs pa yaṅ dag par rdzogs pa’i saṅs rgyas ’od sruṅ gis bram ze’i khye’u bla ma la bram ze’i khye’u khyod la ’oṅs pa’i dus na skye dgu’i tshe lo brgya thub pa na de bźin gśegs pa dgra bcom pa yaṅ dag par rdzogs pa’i saṅs rgyas rig pa daṅ źabs su ldan pa | bde bar (6) gśegs pa | ’jig rten mkhyen pa | skyes bu ’dul ba’i kha lo sgyur ba bla na med pa | lha daṅ mi rnams kyi ston pa | saṅs rgyas bcom ldan ’das śākya thub pa źes bya bar ’gyur ro źes luṅ bstan pa’i bstan pa la bdag rab tu byuṅ nas ñon moṅs pa thams cad spaṅs pas dgra (7) bcom pa ñid mṅon du byed ciṅ | ji ltar mkhan po ’di bcom ldan ’das de bźin gśegs pa yaṅ dag par rdzogs pa’i saṅs rgyas ’od sruṅ gis yaṅ daṅ yaṅ du me’i khams la sñoms par ’jug pa rnams kyi mchog tu bstan pa de bźin du | bdag kyaṅ bcom ldan ’das śākya (36b1) thub pa | śākya ’i seṅ ge | śākya ’i rgyal po’i gtso bo des yaṅ dag yaṅ du me’i khams la sñoms par ’jug pa rnams kyi mchog tu bstan par gyur cig ces smon lam gdab par brtsams pas smon lam de’i dbaṅ gis da ltar de bźin gśegs pas yaṅ daṅ yaṅ du me’i khams la (2) sñoms par ’jug pa rnams kyi mchog tu bstan to || dge sloṅ dag de ltar na las gcig tu gnag pa rnams kyi rnam par smin pa ni gcig tu gnag pa yin la | las gcig tu dkar ba rnams kyi rnam par smin pa yaṅ gcig tu dkar ba yin | las ’dren ma rnams kyi rnam par smin (3) pa yaṅ ’dren ma yin no || dge sloṅ dag de lta bas na las gcig tu gnag pa rnams daṅ ’dren ma rnams spaṅs te | las gcig tu dkar ba rnams la brtsal bar bya ste | dge sloṅ dag khyed kyis de ltar bslab par bya’o || myos par ’gyur ba ’thuṅ ba’i ltuṅ byed de bdun bcu (4) rtsa dgu pa rdzogs s+ho || ||

bar sdom la |
źi bar ral pa nor bu daṅ ||
sman pa dge ’dun lto daṅ skas ||
za daṅ ñes gyur gtum mo daṅ ||
gźon nu lhuṅ bzed stobs rnams so ||

Permanent link

http://www2.hf.uio.no/common/apps/permlink/permlink.php?app=polyglotta&context=ctext&uid=0154f9f1-0039-11e4-a105-001cc4ddf0f4

ā	ī	ū	ṛ	ṝ	ḷ
ḹ	’	ṃ	ḥ	ṅ	ñ
ṭ	ḍ	ṇ	ṣ	ś	ź
š	č	ǰ	γ

Choose languages

Choose images, etc.

Choose languages

Choose display