evaṃ kho bhikkhave suddhantaparivāso dātabbo, evaṃ parivāso dātabbo.
kathañ ca bhikkhave suddhantaparivāso dātabbo.
āpattipariyantaṃ na jānāti, rattipariyantaṃ na jānāti, āpattipariyantaṃ na sarati, rattipariyantaṃ na sarati, āpattipariyante vematiko, rattipariyante vematiko; suddhantaparivāso dātabbo.
āpattipariyantaṃ jānāti, rattip. na jānāti, āp. sarati, ratt. na sarati, āp. nibbematiko, ratt. vematiko; suddhantaparivāso dātabbo. āpattipariyantaṃ ekaccaṃ jānāti ekaccaṃ na jānāti, rattip. na jānāti, āp. ekaccaṃ sarati ekaccaṃ na sarati, ratt. na sarati, āp. ekacce vematiko ekacce nibbematiko, ratt. vematiko; suddhantaparivāso dātabbo. āpattipariyantaṃ na jānāti, rattip. ekaccaṃ jānāti ekaccaṃ na jānāti, āp. na sarati, ratt. ekaccaṃ sarati ekaccaṃ na sarati, āp. vematiko, ratt. ekacce vematiko ekacce nibbematiko; (060) suddhantaparivāso dātabbo. āpattipariyantaṃ jānāti, rattip. ekaccaṃ jānāti ekaccaṃ na jānāti, āp. sarati, ratt. ekaccaṃ sarati ekaccaṃ na sarati, āp. nibbematiko, ratt. ekacce vematiko ekacce nibbematiko; suddhantaparivāso dātabbo. āpattipariyantaṃ ekaccaṃ jānāti ekaccaṃ na jānāti, rattip. ekaccaṃ jānāti ekaccaṃ na jānāti, āp. ekaccaṃ sarati ekaccaṃ na sarati, ratt. ekaccaṃ sarati ekaccaṃ na sarati, āp. ekacce vematiko ekacce nibbematiko, ratt. ekacce vematiko ekacce nibbematiko; suddhantaparivāso dātabbo.
evaṃ kho bhikkhave suddhantaparivāso dātabbo. |3|