atha kho āyasmā Ānando yena bhagavā ten’ upasaṃkami, upasaṃkamitvā bhagavantaṃ abhivādetvā ekamantaṃ nisīdi, ekamantaṃ nisinno kho āyasmā Ānando bhagavantaṃ etad avoca:
esā bhante Mahāpajāpatī Gotamī sunehi pādehi ... rudamānā bahi dvārakoṭṭhake ṭhitā na bhagavā anujānāti mātugāmassa tathāgatappavedite dhammavinaye agārasmā anagāriyaṃ pabbajjan ti:
sādhu bhante labheyya mātugāmo tathāgatappavedite dhammavinaye agārasmā anagāriyaṃ pabbajjan ti.
alaṃ Ānanda mā te rucci mātugāmassa tathāgatappavedite dhammavinaye agārasmā anagāriyaṃ pabbajjā 'ti.
dutiyam pi kho āyasmā Ānando bhagavantaṃ etad avoca:
sādhu bhante ... pabbajjan ti.
alaṃ Ānanda mā ... pabbajjā 'ti.
tatiyam pi kho āyasmā Ānando bhagavantaṃ ... pabbajjan ti.
alaṃ Ānanda mā ... pabbajjā 'ti.
atha kho āyasmā Ānando na bhagavā anujānāti mātugāmassa tathāgatappavedite dhammavinaye agārasmā anagāriyaṃ pabbajjaṃ, yan nūnāhaṃ aññena pi pariyāyena bhagavantaṃ yāceyyaṃ mātugāmassa ... pabbajjan ti.
atha kho āyasmā Ānando bhagavantaṃ {etad} avoca:
bhabbo nu kho bhante mātugāmo tathāgatappavedite dhammavinaye agārasmā anagāriyaṃ pabbajitvā sotāpattiphalaṃ vā sakadāgāmiphalaṃ vā anāgāmiphalaṃ vā arahattaṃ vā sacchikātun ti.
bhabbo Ānanda mātugāmo tathāgatappavedite dhammavinaye agārasmā anagāriyaṃ pabbajitvā sotāpattiphalam pi sakadāgāmiphalam pi anāgāmiphalam pi arahattam pi sacchikātun ti.
sace bhante bhabbo mātugāmo tathāgatappavedite dhammavinaye ... arahattam pi sacchikātuṃ, bahūpakārā bhante Mahāpajāpatī Gotamī bhagavato mātucchā (255) āpādikā posikā khīrassa dāyikā bhagavantaṃ janettiyā kālaṃkatāya thaññaṃ pāyesi:
sādhu bhante labheyya mātugāmo tathāgatappavedite dhammavinaye agārasmā anagāriyaṃ pabbajjan ti. |3|
atha kho āyasmā Ānando yena bhagavā ten’ upasaṃkami, upasaṃkamitvā bhagavantaṃ abhivādetvā ekamantaṃ nisīdi, ekamantaṃ nisinno kho āyasmā Ānando bhagavantaṃ etad avoca:
paṭiggahitā bhante Mahāpajāpatigotamiyā aṭṭha garudhammā, upasampannā bhagavato mātucchā 'ti.
sace Ānanda nālabhissa mātugāmo tathāgatappavedite dhammavinaye agārasmā anagāriyaṃ pabbajjaṃ, ciraṭṭhitikaṃ Ānanda brahmacariyaṃ abhavissa, vassasahassaṃ saddhammo tiṭṭheyya.
yato ca kho Ānanda mātugāmo tathāgatappavedite dhammavinaye agārasmā anagāriyaṃ pabbajito, na dāni Ānanda brahmacariyaṃ ciraṭṭhitikaṃ bhavissati, pañc’ eva dāni Ānanda vassasatāni saddhammo ṭhassati.
seyyathāpi Ānanda yāni kānici kulāni bahutthikāni appapurisakāni tāni suppadhaṃsiyāni honti corehi kumbhatthenakehi, evam eva kho Ānanda yasmiṃ dhammavinaye labhati mātugāmo agārasmā anagāriyaṃ pabbajjaṃ na taṃ brahmacariyaṃ ciraṭṭhitikaṃ hoti.
seyyathāpi Ānanda sampanne sālikkhette setaṭṭhikā nāma rogajāti nipatati evan taṃ sālikkhettaṃ na ciraṭṭhitikaṃ hoti, evam eva kho Ānanda yasmiṃ dhammavinaye labhati mātugāmo agārasmā anagāriyaṃ pabbajjaṃ na taṃ brahmacariyaṃ ciraṭṭhitikaṃ hoti.
seyyathāpi Ānanda sampanne ucchukkhette mañjeṭṭhikā nāma rogajāti nipatati evan taṃ ucchukkhettaṃ na ciraṭṭhitikaṃ hoti, evam eva kho Ānanda yasmiṃ ... hoti.
seyyathāpi Ānanda puriso mahato taḷākassa paṭigacc’ eva ālim bandheyya yāvad eva udakassa anatikkamanāya, evam eva kho Ānanda mayā paṭigacc’ eva bhikkhunīnaṃ aṭṭha garudhammā paññattā yāvajīvaṃ anatikkamanīyā 'ti. |6|
atha kho tā bhikkhuniyo Mahāpajāpatiṃ Gotamiṃ etad avocuṃ:
ayyā anupasampannā, may’ amhā upasampannā, evaṃ hi bhagavatā paññattaṃ:
bhikkhūhi bhikkhuniyo upasampādetabbā 'ti.
atha kho Mahāpajāpatī Gotamī yenāyasmā Ānando ten’ upasaṃkami, upasaṃkamitvā āyasmantaṃ Ānandaṃ abhivādetvā ekamantaṃ aṭṭhāsi, ekamantaṃ ṭhitā kho Mahāpajāpatī Gotamī āyasmantaṃ Ānandaṃ etad avoca:
imā maṃ bhante Ānanda bhikkhuniyo evam āhaṃsu:
ayyā anupasampannā, may’ amhā upasampannā, evaṃ hi bhagavatā paññattaṃ:
bhikkhūhi bhikkhuniyo upasampādetabbā 'ti.
atha kho āyasmā Ānando yena bhagavā ten’ upasaṃkami, upasaṃkamitvā bhagavantaṃ abhivādetvā ekamantaṃ nisīdi, ekamantaṃ nisinno kho āyasmā Ānando bhagavantaṃ etad avoca:
Mahāpajāpatī bhante Gotamī evam āha:
imā maṃ bhante Ānanda ... upasampādetabbā 'ti.
yadaggena Ānanda Mahāpajāpatigotamiyā aṭṭha garudhammā paṭiggahitā, tad eva sā upasampannā 'ti. |2|
atha kho Mahāpajāpatī Gotamī yenāyasmā Ānando ten’ upasaṃkami, upasaṃkamitvā āyasmantaṃ Ānandaṃ abhivādetvā ekamantaṃ aṭṭhāsi, ekamantaṃ ṭhitā kho Mahāpajāpatī Gotamī āyasmantaṃ Ānandaṃ etad avoca:
ekāhaṃ bhante Ānanda bhagavantaṃ varaṃ yācāmi:
sādhu bhante bhagavā anujāneyya bhikkhūnañ ca bhikkhunīnañ ca yathāvuḍḍhaṃ abhivādanaṃ paccuṭṭhānaṃ añjalikammaṃ sāmīcikamman ti.
atha kho āyasmā Ānando yena bhagavā ten' upasaṃkami, upasaṃkamitvā bhagavantaṃ abhivādetvā ekamantaṃ nisīdi, ekamantaṃ nisinno kho āyasmā Ānando bhagavantaṃ etad avoca:
Mahāpajāpatī bhante Gotamī evam āha:
ekāhaṃ ... sāmīcikamman ti.
aṭṭhānam etaṃ Ānanda (258) anavakāso yaṃ tathāgato anujāneyya mātugāmassa abhivādanaṃ paccuṭṭhānaṃ añjalikammaṃ sāmīcikammaṃ.
ime hi nāma Ānanda aññatitthiyā durakkhātadhammā mātugāmassa abhivādanaṃ paccuṭṭhānaṃ añjalikammaṃ sāmīcikammaṃ na karissanti, kim aṅga pana tathāgato anujānissati mātugāmassa abhivādanaṃ paccuṭṭhānaṃ añjalikammaṃ sāmīcikamman ti.
atha kho bhagavā etasmiṃ nidāne dhammiṃ kathaṃ katvā bhikkhū āmantesi:
na bhikkhave mātugāmassa abhivādanaṃ paccuṭṭhānaṃ añjalikammaṃ sāmīcikammaṃ kātabbaṃ.
yo kareyya, āpatti dukkaṭassā 'ti.
atha kho Mahāpajāpatī Gotamī yena bhagavā ten' upasaṃkami, upasaṃkamitvā bhagavantaṃ abhivādetvā ekamantaṃ aṭṭhāsi, ekamantaṃ ṭhitā kho Mahāpajāpatī Gotamī bhagavantaṃ etad avoca:
sādhu bhante bhagavā saṃkhittena dhammaṃ desetu yam ahaṃ bhagavato dhammaṃ sutvā ekā vūpakaṭṭhā appamattā ātāpinī pahitattā vihareyyan ti.
ye kho tvaṃ Gotami dhamme jāneyyāsi:
ime dhammā sārāgāya saṃvattanti no virāgāya, saññogāya saṃvattanti no visaññogāya, ācayāya saṃvattanti no apacayāya, mahicchatāya saṃvattanti no appicchatāya, asantuṭṭhiyā saṃvattanti no santuṭṭhiyā, saṃgaṇikāya saṃvattanti no pavivekāya, kosajjāya saṃvattanti no viriyārambhāya, (259) dubbharatāya saṃvattanti no subharatāya:
ekaṃsena Gotami dhāreyyāsi n’ eso dhammo n’ eso vinayo n’ etaṃ satthu sāsanan ti.
ye ca kho tvaṃ Gotami dhamme jāneyyāsi:
ime dhammā virāgāya saṃvattanti no sārāgāya, visaññogāya saṃvattanti no saññogāya, apacayāya saṃvattanti no ācayāya, appicchatāya saṃvattanti no mahicchatāya, santuṭṭhiyā saṃvattanti no asantuṭṭhiyā, pavivekāya saṃvattanti no saṃgaṇikāya, viriyārambhāya saṃvattanti no kosajjāya, subharatāya saṃvattanti no dubbharatāya:
ekaṃsena Gotami dhāreyyāsi eso dhammo eso vinayo etaṃ satthu sāsanan ti.
tena kho pana samayena bhikkhunīnaṃ pātimokkhaṃ na uddisiyati.
bhagavato etam atthaṃ ārocesuṃ.
anujānāmi bhikkhave bhikkhunīnaṃ pātimokkhaṃ uddisitun ti.
atha kho bhikkhunīnaṃ etad ahosi:
kena nu kho bhikkhunīnaṃ pātimokkhaṃ uddisitabban ti.
bhagavato etam atthaṃ ārocesuṃ.
anujānāmi bhikkhave bhikkhūhi bhikkhunīnaṃ pātimokkhaṃ uddisitun ti.
tena kho pana samayena bhikkhū bhikkhunūpassayaṃ upasaṃkamitvā bhikkhunīnaṃ pātimokkhaṃ uddisanti.
manussā ujjhāyanti khīyanti vipācenti:
jāyāyo imā imesaṃ, jāriyo imā imesaṃ, idān’ ime imāhi saddhiṃ abhiramissantīti.
assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ.
atha kho te bhikkhū bhagavato etam atthaṃ ārocesuṃ.
na bhikkhave bhikkhūhi bhikkhunīnaṃ pātimokkhaṃ uddisitabbaṃ.
yo uddiseyya, āpatti dukkaṭassa.
anujānāmi bhikkhave bhikkhunīhi bhikkhunīnaṃ pātimokkhaṃ uddisitun ti.
bhikkhuniyo na jānanti evam pi pātimokkhaṃ uddisitabban ti.
bhagavato etam atthaṃ ārocesuṃ.
anujānāmi bhikkhave bhikkhūhi bhikkhunīnaṃ ācikkhituṃ evaṃ pātimokkhaṃ uddiseyyāthā 'ti. |1|
tena kho pana samayena bhikkhuniyo āpattiṃ na paṭikaronti.
bhagavato etam atthaṃ ārocesuṃ.
na bhikkhave bhikkhuniyā āpatti na paṭikātabbā.
yā na paṭikareyya, āpatti dukkaṭassā 'ti.
bhikkhuniyo na jānanti evam pi āpatti paṭikātabbā 'ti.
bhagavato etam atthaṃ ārocesuṃ.
anujānāmi bhikkhave bhikkhūhi bhikkhunīnaṃ ācikkhituṃ evaṃ āpattiṃ paṭikareyyāthā 'ti.
(260) atha kho bhikkhūnaṃ etad ahosi:
kena nu kho bhikkhunīnaṃ āpatti paṭiggahetabbā 'ti.
bhagavato etam atthaṃ ārocesuṃ.
anujānāmi bhikkhave bhikkhūhi bhikkhunīnaṃ āpattiṃ paṭiggahetun ti.
tena kho pana samayena bhikkhuniyo rathiyāpi vyūhe pi siṅghāṭake pi bhikkhuṃ passitvā pattaṃ bhūmiyaṃ nikkhipitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā āpattiṃ paṭikaronti.
manussā ujjhāyanti khīyanti vipācenti:
jāyāyo imā imesaṃ, jāriyo imā imesaṃ, rattiṃ vimānetvā idāni khamāpentīti.
bhagavato etam atthaṃ ārocesuṃ.
na bhikkhave bhikkhūhi bhikkhunīnaṃ āpatti paṭiggahetabbā.
yo paṭigaṇheyya, āpatti dukkaṭassa.
anujānāmi bhikkhave bhikkhunīhi bhikkhunīnaṃ āpattiṃ paṭiggahetun ti.
bhikkhuniyo na jānanti evam pi āpatti paṭiggahetabbā 'ti.
bhagavato etam atthaṃ ārocesuṃ.
anujānāmi bhikkhave bhikkhūhi bhikkhunīnaṃ ācikkhituṃ evaṃ āpattiṃ paṭigaṇheyyāthā 'ti. |2|
tena kho pana samayena bhikkhunīnaṃ kammaṃ na kariyati.
bhagavato etam atthaṃ ārocesuṃ.
anujānāmi bhikkhave bhikkhunīnaṃ kammaṃ kātun ti.
atha kho bhikkhūnaṃ etad ahosi:
kena nu kho bhikkhunīnaṃ kammaṃ kātabban ti.
bhagavato etam atthaṃ ārocesuṃ.
anujānāmi bhikkhave bhikkhūhi bhikkhunīnaṃ kammaṃ kātun ti.
tena kho pana samayena katakammā bhikkhuniyo rathiyāpi vyūhe pi siṅghāṭake pi bhikkhuṃ passitvā pattaṃ bhūmiyaṃ nikkhipitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā khamāpenti evaṃ nūna kātabban ti maññamānā.
manussā tath’ eva ujjhāyanti khīyanti vipācenti:
jāyāyo imā imesaṃ, jāriyo imā imesaṃ, rattiṃ vimānetvā idāni khamāpentīti.
bhagavato etam atthaṃ ārocesuṃ.
na bhikkhave bhikkhūhi bhikkhunīnaṃ kammaṃ kātabbaṃ.
yo kareyya, āpatti dukkaṭassa.
anujānāmi bhikkhave bhikkhunīhi bhikkhunīnaṃ kammaṃ kātun ti.
bhikkhuniyo na jānanti evam pi kammaṃ kātabban ti.
bhagavato etam atthaṃ ārocesuṃ.
anujānāmi bhikkhave bhikkhūhi bhikkhunīnaṃ ācikkhituṃ evaṃ kammaṃ kareyyāthā 'ti. |3|
atha kho bhagavā Vesāliyaṃ yathābhirantaṃ viharitvā yena Sāvatthi tena cārikaṃ pakkāmi, anupubbena cārikañ caramāno yena Sāvatthi tad avasari.
tatra sudaṃ bhagavā Sāvatthiyaṃ viharati Jetavane Anāthapiṇḍikassa (262) ārāme.
tena kho pana samayena chabbaggiyā bhikkhū bhikkhuniyo kaddamodakena osiñcanti app eva nāma amhesu sārajjeyyun ti.
bhagavato etam atthaṃ ārocesuṃ.
na bhikkhave bhikkhunā bhikkhuniyo kaddamodakena osiñcitabbā.
yo osiñceyya, āpatti dukkaṭassa.
anujānāmi bhikkhave tassa bhikkhuno daṇḍakammaṃ kātun ti.
atha kho bhikkhūnaṃ etad ahosi:
kin nu kho daṇḍakammaṃ kātabban ti.
bhagavato etam atthaṃ ārocesuṃ.
avandiyo so bhikkhave bhikkhu bhikkhunīsaṃghena kātabbo 'ti.
tena kho pana samayena chabbaggiyā bhikkhū kāyaṃ vivaritvā bhikkhunīnaṃ dassenti ūruṃ vivaritvā bhikkhunīnaṃ dassenti aṅgajātaṃ vivaritvā bhikkhunīnaṃ dassenti bhikkhuniyo obhāsanti bhikkhunīhi saddhiṃ sampayojenti app eva nāma amhesu sārajjeyyun ti.
bhagavato etam atthaṃ ārocesuṃ.
na bhikkhave bhikkhunā kāyo vivaritvā bhikkhunīnaṃ dassetabbo, na ūru vivaritvā bhikkhunīnaṃ dassetabbo, na aṅgajātaṃ vivaritvā bhikkhunīnaṃ dassetabbaṃ, na bhikkhuniyo obhāsitabbā, na bhikkhunīhi saddhiṃ sampayojetabbaṃ.
yo sampayojeyya, āpatti dukkaṭassa.
anujānāmi bhikkhave tassa bhikkhuno daṇḍakammaṃ kātun ti.
atha kho bhikkhūnaṃ etad ahosi:
kin nu kho daṇḍakammaṃ kātabban ti.
bhagavato etam atthaṃ ārocesuṃ.
avandiyo so bhikkhave bhikkhu bhikkhunīsaṃghena kātabbo 'ti. |1|
tena kho pana samayena chabbaggiyā bhikkhuniyo bhikkhū kaddamodakena osiñcanti app eva nāma amhesu sārajjeyyun ti.
bhagavato etam atthaṃ ārocesuṃ.
na bhikkhave bhikkhuniyā bhikkhū kaddamodakena osiñcitabbā.
yā osiñceyya, āpatti dukkaṭassa.
anujānāmi bhikkhave tassā bhikkhuniyā daṇḍakammaṃ kātun ti.
atha kho bhikkhūnaṃ etad ahosi:
kin nu kho daṇḍakammaṃ kātabban ti.
bhagavato etam atthaṃ ārocesuṃ.
anujānāmi bhikkhave āvaraṇaṃ kātun ti.
āvaraṇe kate na ādiyanti.
bhagavato etam atthaṃ ārocesuṃ.
anujānāmi bhikkhave ovādaṃ ṭhapetun ti.
tena kho pana samayena chabbaggiyā bhikkhuniyo kāyaṃ vivaritvā bhikkhūnaṃ dassenti thanaṃ vivaritvā bhikkhūnaṃ dassenti ūruṃ vivaritvā bhikkhūnaṃ dassenti aṅgajātaṃ vivaritvā bhikkhūnaṃ dassenti bhikkhū obhāsanti (263) bhikkhūhi saddhiṃ sampayojenti app eva nāma amhesu sārajjeyyun ti.
bhagavato etam atthaṃ ārocesuṃ.
na bhikkhave bhikkhuniyā kāyo vivaritvā bhikkhūnaṃ dassetabbo, na thanaṃ vivaritvā bhikkhūnaṃ dassetabbaṃ, na ūru vivaritvā bhikkhūnaṃ dassetabbo, na aṅgajātaṃ vivaritvā bhikkhūnaṃ dassetabbaṃ, na bhikkhū obhāsitabbā, na bhikkhūhi saddhiṃ sampayojetabbaṃ.
yā sampayojeyya, āpatti dukkaṭassa.
anujānāmi bhikkhave tassā bhikkhuniyā daṇḍakammaṃ kātun ti.
atha kho bhikkhūnaṃ etad ahosi:
kin nu kho daṇḍakammaṃ kātabban ti.
bhagavato etam atthaṃ ārocesuṃ.
anujānāmi bhikkhave āvaraṇaṃ kātun ti.
āvaraṇe kāte na ādiyanti.
bhagavato etam atthaṃ ārocesuṃ.
anujānāmi bhikkhave ovādaṃ ṭhapetun ti. |2|
atha kho bhikkhūnaṃ etad ahosi:
kappati nu kho ovādaṭhapitāya bhikkhuniyā saddhiṃ uposatho kātuṃ na nu kho kappatīti.
bhagavato etam atthaṃ ārocesuṃ.
na bhikkhave ovādaṭhapitāya bhikkhuniyā saddhiṃ uposatho kātabbo yāva na taṃ adhikaraṇaṃ vūpasantaṃ hotīti.
tena kho pana samayena āyasmā Udāyi ovādaṃ ṭhapetvā cārikaṃ pakkāmi.
bhikkhuniyo ujjhāyanti khīyanti vipācenti:
kathaṃ hi nāma ayyo Udāyi ovādaṃ ṭhapetvā cārikaṃ pakkamissatīti.
bhagavato etam atthaṃ ārocesuṃ.
na bhikkhave ovādaṃ ṭhapetvā cārikā pakkamitabbā.
yo pakkameyya, āpatti dukkaṭassā 'ti.
tena kho pana samayena bālā avyattā ovādaṃ ṭhapenti.
bhagavato etam atthaṃ ārocesuṃ.
na bhikkhave bālena avyattena ovādo ṭhapetabbo.
yo ṭhapeyya, āpatti dukkaṭassā 'ti.
tena kho pana samayena bhikkhū avatthusmiṃ akāraṇe ovādaṃ ṭhapenti.
bhagavato etam atthaṃ ārocesuṃ.
na bhikkhave avatthusmiṃ akāraṇe ovādo ṭhapetabbo.
yo ṭhapeyya, āpatti dukkaṭassā 'ti.
tena kho pana samayena bhikkhū ovādaṃ ṭhapetvā vinicchayaṃ na denti.
bhagavato etam atthaṃ ārocesuṃ.
na bhikkhave ovādaṃ ṭhapetvā vinicchayo na dātabbo.
yo na dadeyya, āpatti dukkaṭassā 'ti. |3|
tena kho pana samayena bhikkhuniyo ovādaṃ na gacchanti.
bhagavato etam atthaṃ ārocesuṃ.
na bhikkhave bhikkhuniyā ovādo na gantabbo.
yā na gaccheyya, yathādhammo kāretabbo 'ti.
tena kho pana samayena sabbo bhikkhunīsaṃgho ovādaṃ gacchati.
manussā ujjhāyanti (264) khīyanti vipācenti:
jāyāyo imā imesaṃ, jāriyo imā imesaṃ, idān’ ime imāhi saddhiṃ abhiramissantīti.
bhagavato etam atthaṃ ārocesuṃ.
na bhikkhave sabbena bhikkhunīsaṃghena ovādo gantabbo.
gaccheyya ceva, āpatti dukkaṭassa.
anujānāmi bhikkhave catūhi pañcahi bhikkhunīhi ovādaṃ gantun ti.
tena kho pana samayena catasso pañca bhikkhuniyo ovādaṃ gacchanti.
manussā tath’ eva ujjhāyanti khīyanti vipācenti:
jāyāyo ... abhiramissantīti.
bhagavato etam atthaṃ ārocesuṃ.
na bhikkhave catūhi pañcahi bhikkhunīhi ovādo gantabbo.
gaccheyyuñ ceva, āpatti dukkaṭassa.
anujānāmi bhikkhave dve tisso bhikkhunīhi ovādaṃ gantuṃ:
ekaṃ bhikkhuṃ upasaṃkamitvā ekaṃsaṃ uttarāsaṅgaṃ karitvā pāde vanditvā ukkuṭikaṃ nisīditvā añjaliṃ paggahetvā evam assa vacanīyo:
bhikkhunīsaṃgho ayya bhikkhusaṃghassa pāde vandati ovādūpasaṃkamanañ ca yācati, labhatu kira ayya bhikkhunīsaṃgho ovādūpasaṃkamanan ti.
tena bhikkhunā pātimokkhuddesako upasaṃkamitvā evam assa vacanīyo:
bhikkhunīsaṃgho bhante bhikkhusaṃghassa pāde vandati ovādūpasaṃkamanañ ca yācati, labhatu kira bhante bhikkhunīsaṃgho ovādūpasaṃkamanan ti.
pātimokkhuddesakena vattabbo:
atthi koci bhikkhu bhikkhunovādako sammato 'ti.
sace hoti koci bhikkhu bhikkhunovādako sammato, pātimokkhuddesakena vattabbo:
itthannāmo bhikkhu bhikkhunovādako sammato, taṃ bhikkhunīsaṃgho upasaṃkamatū 'ti.
sace na hoti koci bhikkhu bhikkhunovādako sammato, pātimokkhuddesakena vattabbo:
ko āyasmā ussahati bhikkhuniyo ovaditun ti.
sace koci ussahati bhikkhuniyo ovadituṃ so ca hoti aṭṭhah’ aṅgehi samannāgato, sammannitvā vattabbo:
itthannāmo bhikkhu bhikkhunovādako sammato, taṃ bhikkhunīsaṃgho upasaṃkamatū 'ti.
sace na koci ussahati bhikkhuniyo ovadituṃ, pātimokkhuddesakena vattabbo:
n’ atthi koci bhikkhu bhikkhunovādako sammato, pāsādikena bhikkhunīsaṃgho sampādetū 'ti. |4|
tena kho pana samayena bhikkhū ovādaṃ na gaṇhanti.
bhagavato etam atthaṃ ārocesuṃ.
na bhikkhave ovādo na gahetabbo.
yo na gaṇheyya, āpatti dukkaṭassā 'ti.
tena kho pana samayena aññataro bhikkhu bālo hoti, taṃ bhikkhuniyo upasaṃkamitvā etad avocuṃ:
ovādaṃ ayya gaṇhā-(265)hīti.
ahañ hi bhagini bālo, kathāhaṃ ovādaṃ gaṇhāmīti.
gaṇhāh’ ayya ovādaṃ, evañ hi bhagavatā paññattaṃ:
bhikkhūhi bhikkhunīnaṃ ovādo gahetabbo 'ti.
bhagavato etam atthaṃ ārocesuṃ.
anujānāmi bhikkhave ṭhapetvā bālaṃ avasesehi ovādaṃ gahetun ti.
tena kho pana samayena aññataro bhikkhu gilāno hoti, taṃ bhikkhuniyo upasaṃkamitvā etad avocuṃ:
ahañ hi bhagini gilāno, kathāhaṃ ovādaṃ gaṇhāmīti.
gaṇhāh’ ayya ovādaṃ, evañ hi bhagavatā paññattaṃ:
ṭhapetvā bālaṃ avasesehi ovādo gahetabbo 'ti.
bhagavato etam atthaṃ ārocesuṃ.
anujānāmi bhikkhave ṭhapetvā bālaṃ ṭhapetvā gilānaṃ avasesehi ovādaṃ gahetun ti.
tena kho pana samayena aññataro bhikkhu gamiko hoti, taṃ bhikkhuniyo upasaṃkamitvā etad avocuṃ:
ahañ hi bhagini gamiko, kathāhaṃ ovādaṃ gaṇhāmīti.
gaṇhāh’ ayya ovādaṃ, evañ hi bhagavatā paññattaṃ:
ṭhapetvā bālaṃ ṭhapetvā gilānaṃ avasesehi ovādo gahetabbo 'ti.
bhagavato etam atthaṃ ārocesuṃ.
anujānāmi bhikkhave ṭhapetvā bālaṃ ṭhapetvā gilānaṃ ṭhapetvā gamikaṃ avasesehi ovādaṃ gahetun ti.
tena kho pana samayena aññataro bhikkhu araññe viharati, taṃ bhikkhuniyo upasaṃkamitvā etad avocuṃ:
ahañ hi bhagini araññe viharāmi, kathāhaṃ ovādaṃ gaṇhāmīti.
gaṇhāh' ayya ovādaṃ, evañ hi bhagavatā paññattaṃ:
ṭhapetvā bālaṃ ṭhapetvā gilānaṃ ṭhapetvā gamikaṃ avasesehi ovādo gahetabbo 'ti.
bhagavato etam atthaṃ ārocesuṃ.
anujānāmi bhikkhave āraññakena bhikkhunā ovādaṃ gahetuṃ saṃketaṃ ca kātuṃ atra paṭiharissāmīti.
tena kho pana samayena bhikkhū ovādaṃ gahetvā na ārocenti.
bhagavato etam atthaṃ ārocesuṃ.
na bhikkhave ovādo na ārocetabbo.
yo na āroceyya, āpatti dukkaṭassā 'ti.
tena kho pana samayena bhikkhū ovādaṃ gahetvā na paccāharanti.
bhagavato etam atthaṃ ārocesuṃ.
na bhikkhave ovādo na paccāharitabbo.
yo na paccāhareyya, āpatti dukkaṭassā 'ti.
tena kho pana samayena bhikkhuniyo saṃketaṃ na gacchanti.
bhagavato etam atthaṃ ārocesuṃ.
na bhikkhave bhikkhuniyā saṃketaṃ na gantabbaṃ.
yā na gaccheyya, āpatti dukkaṭassā 'ti. |5|
(266) tena kho pana samayena bhikkhuniyo dīghāni kāyabandhanāni dhārenti, teh’ eva pāsuke namenti.
manussā ujjhāyanti khīyanti vipācenti:
seyyathāpi gihikāmabhoginiyo 'ti.
bhagavato etam atthaṃ ārocesuṃ.
na bhikkhave bhikkhuniyā dīghaṃ kāyabandhanaṃ dhāretabbaṃ.
yā dhāreyya, āpatti dukkaṭassa.
anujānāmi bhikkhave bhikkhuniyā ekapariyākataṃ kāyabandhanaṃ.
na ca tena pāsukā nametabbā.
yā nameyya, āpatti dukkaṭassā 'ti.
tena kho pana samayena bhikkhuniyo vilivena paṭṭena pāsuke namenti, cammapaṭṭena pāsuke namenti, dussapaṭṭena pāsuke namenti, dussaveṇiyā p. n., dussavaṭṭiyā p. n., colapaṭṭena p. n., colaveṇiyā p. n., colavaṭṭiyā p. n., suttaveṇiyā p. n., suttavaṭṭiyā pāsuke namenti.
manussā ujjhāyanti khīyanti vipācenti:
seyyathāpi gihikāmabhoginiyo 'ti.
bhagavato etam atthaṃ ārocesuṃ.
na bhikkhave bhikkhuniyā vilivena paṭṭena pāsukā nametabbā, na cammapaṭṭena p. n., na dussapaṭṭena p. n., na dussaveṇiyā p. n., na dussavaṭṭiyā p. n., na colapaṭṭena p. n., na colaveṇiyā p. n., na colavaṭṭiyā p. n., na suttaveṇiyā p. n., na suttavaṭṭiyā pāsukā nametabbā.
yā nameyya, āpatti dukkaṭassā 'ti. |1|
tena kho pana samayena bhikkhuniyo aṭṭhillena jaghanaṃ ghaṃsāpenti, gohanukena jaghanaṃ koṭṭāpenti, hatthaṃ koṭṭāpenti, hatthakocchaṃ koṭṭāpenti, pādaṃ koṭṭāpenti, pādakocchaṃ koṭṭāpenti, ūruṃ koṭṭāpenti, mukhaṃ koṭṭāpenti, dantamaṃsaṃ koṭṭāpenti.
manussā ujjhāyanti khīyanti vipācenti:
seyyathāpi gihikāmabhoginiyo 'ti.
bhagavato etam atthaṃ ārocesuṃ.
na bhikkhave bhikkhuniyā aṭṭhillena jaghanaṃ ghaṃsāpetabbaṃ, na gohanukena jaghanaṃ koṭṭāpetabbaṃ, na hattho koṭṭāpetabbo, na hatthakoccho koṭṭāpetabbo, na pādo koṭṭāpetabbo, na pādakoccho koṭṭāpetabbo, na ūru koṭṭāpetabbo, na mukhaṃ koṭṭāpetabbaṃ, na dantamaṃsaṃ koṭṭāpetabbaṃ.
yā koṭṭāpeyya, āpatti dukkaṭassā 'ti. |2|
tena kho pana samayena chabbaggiyā bhikkhuniyo avaṅgaṃ karonti visesakaṃ karonti olokanakena olokenti sāloke tiṭṭhanti sanaccaṃ kārāpenti vesiṃ vuṭṭhāpenti pānāgāraṃ ṭhapenti sūnaṃ ṭhapenti āpaṇaṃ pasārenti vaḍḍhiṃ payojenti vaṇijjaṃ payojenti dāsaṃ upaṭṭhāpenti dāsiṃ upaṭṭhāpenti kammakaraṃ upaṭṭhāpenti kammakariṃ upaṭṭhāpenti tiracchānagataṃ upaṭṭhāpenti harītakapaṇṇikaṃ pakiṇanti namatakaṃ dhārenti.
manussā ujjhāyanti ... gihikāmabhoginiyo 'ti.
bhagavato etam atthaṃ ārocesuṃ.
na bhikkhave bhikkhuniyā avaṅgaṃ kātabbaṃ, na visesakaṃ kātabbaṃ, na olokanakena oloketabbaṃ, na sāloke tiṭṭhātabbaṃ, na sanaccaṃ kārāpetabbaṃ, na vesī vuṭṭhāpetabbā, na pānāgāraṃ ṭhapetabbaṃ, na sūnā ṭhapetabbā, na āpaṇo pasāretabbo, na vaḍḍhi payojetabbā, na vaṇijjā payojetabbā, na dāso upaṭṭhāpetabbo, {na} dāsī upaṭṭhāpetabbā, na kammakaro upaṭṭhāpetabbo, na kammakarī upaṭṭhāpetabbā, na tiracchānagato upaṭṭhāpetabbo, na harītakapaṇṇikaṃ pakiṇitabbaṃ, na namatakaṃ dhāretabbaṃ.
yā dhāreyya, āpatti dukkaṭassā 'ti. |4|
tena kho pana samayena aññatarā bhikkhunī kālaṃ karontī evam āha:
mam’ accayena mayhaṃ parikkhāro saṃghassa hotū 'ti.
tattha bhikkhū ca bhikkhuniyo ca (268) vivadanti amhākaṃ hoti amhākaṃ hotīti.
bhagavato etam atthaṃ ārocesuṃ.
bhikkhunī ce bhikkhave kālaṃ karontī evaṃ vadeyya:
mam’ accayena mayhaṃ parikkhāro saṃghassa hotū 'ti, anissaro tattha bhikkhusaṃgho, bhikkhunīsaṃghass’ eva taṃ.
sikkhamānā ce bhikkhave --pe-sāmaṇerī ce bhikkhave kālaṃ karontī ... anissaro tattha bhikkhusaṃgho, bhikkhunīsaṃghass’ eva taṃ.
bhikkhu ce bhikkhave kālaṃ karonto ... anissaro tattha bhikkhunīsaṃgho, bhikkhusaṃghass’ eva taṃ.
sāmaṇero ce bhikkhave --pe-- upāsako ce bhikkhave, upāsikā ce bhikkhave, añño ce bhikkhave koci kālaṃ karonto evaṃ vadeyya:
mam' accayena mayhaṃ parikkhāro saṃghassa hotū 'ti, anissaro tattha bhikkhunīsaṃgho, bhikkhusaṃghass’ eva tan ti.
tena kho pana samayena aññatarā itthi pavutthapatikā jārena gabbhinī hoti, sā gabbhaṃ pātetvā kulupikaṃ bhikkhuniṃ etad avoca:
hand’ ayye imaṃ gabbhaṃ pattena nīharā 'ti.
atha kho sā bhikkhunī taṃ gabbhaṃ patte pakkhipitvā saṃghāṭiyā paṭicchādetvā agamāsi.
tena kho pana samayena aññatarena piṇḍacārikena bhikkhunā samādānaṃ kataṃ hoti:
yāhaṃ paṭhamaṃ bhikkhaṃ labhissāmi na adatvā bhikkhussa vā bhikkhuniyā vā paribhuñjissāmīti.
atha kho so bhikkhu taṃ bhikkhuniṃ passitvā etad avoca:
handa bhagini bhikkhaṃ paṭigaṇhā 'ti.
dutiyam pi kho ... tatiyam pi kho so bhikkhu taṃ bhikkhuniṃ etad avoca ... alaṃ ayyā 'ti.
mayā kho bhagini samādānaṃ kataṃ:
yāhaṃ paṭhamaṃ bhikkhaṃ labhissāmi na adatvā bhikkhussa vā bhikkhuniyā vā paribhuñjissāmīti.
(269) handa bhagini bhikkhaṃ paṭigaṇhā 'ti.
atha kho sā bhikkhunī tena bhikkhunā nippīḷiyamānā nīharitvā pattaṃ dassesi:
pass’ ayya patte gabbhaṃ mā ca kassaci ārocesīti.
atha kho so bhikkhu ujjhāyati khīyati vipāceti:
kathaṃ hi nāma bhikkhunī pattena gabbhaṃ nīharissatīti.
atha kho so bhikkhu bhikkhūnaṃ etam atthaṃ ārocesi.
ye te bhikkhū appicchā te ujjhāyanti khīyanti vipācenti:
kathaṃ hi nāma bhikkhunī pattena gabbhaṃ nīharissatīti.
bhagavato etam atthaṃ ārocesuṃ.
na bhikkhave bhikkhuniyā pattena gabbho nīharitabbo.
yā nīhareyya, āpatti dukkaṭassa.
anujānāmi bhikkhave bhikkhuniyā bhikkhuṃ passitvā nīharitvā pattaṃ dassetun ti. |1|
tena kho pana samayena manussā bhikkhūnaṃ āmisaṃ denti, bhikkhū bhikkhunīnaṃ denti.
manussā ujjhāyanti khīyanti vipācenti:
kathaṃ hi nāma bhaddantā attano pari (270) bhogatthāya dinnaṃ aññesaṃ dassanti, mayam ha na jānāma dānaṃ dātun ti.
bhagavato etam atthaṃ ārocesuṃ.
na bhikkhave attano paribhogatthāya dinnaṃ aññesaṃ dātabbaṃ.
yo dadeyya, āpatti dukkaṭassā 'ti.
tena kho pana samayena bhikkhūnaṃ āmisaṃ ussannaṃ hoti.
bhagavato etam atthaṃ ārocesuṃ.
anujānāmi bhikkhave saṃghassa dātun ti.
bāḷhataraṃ ussannaṃ hoti.
bhagavato etam atthaṃ ārocesuṃ.
anujānāmi bhikkhave puggalikam pi dātun ti.
tena kho pana samayena bhikkhūnaṃ sannidhikataṃ āmisaṃ ussannaṃ hoti.
bhagavato etam atthaṃ ārocesuṃ.
anujānāmi bhikkhave bhikkhūnaṃ sannidhiṃ bhikkhunīhi bhikkhūhi paṭiggahāpetvā paribhuñjitun ti. |1|
tena kho pana samayena manussā bhikkhunīnaṃ āmisaṃ denti, bhikkhuniyo bhikkhūnaṃ denti.
manussā ujjhāyanti khīyanti vipācenti:
kathaṃ hi nāma bhikkhuniyo attano paribhogatthāya dinnaṃ aññesaṃ dassanti, mayam ha na jānāma dānaṃ dātun ti.
bhagavato etam atthaṃ ārocesuṃ.
na bhikkhave bhikkhuniyā attano paribhogatthāya dinnaṃ aññesaṃ dātabbaṃ.
yā dadeyya, āpatti dukkaṭassā 'ti.
tena kho pana samayena bhikkhunīnaṃ āmisaṃ ussannaṃ hoti.
bhagavato etam atthaṃ ārocesuṃ.
anujānāmi bhikkhave saṃghassa dātun ti.
bāḷhataraṃ ussannaṃ hoti.
bhagavato etam atthaṃ ārocesuṃ.
anujānāmi bhikkhave puggalikam pi dātun ti.
tena kho pana samayena bhikkhunīnaṃ sannidhikataṃ āmisaṃ ussannaṃ hoti.
bhagavato etam atthaṃ ārocesuṃ.
anujānāmi bhikkhave bhikkhunīnaṃ sannidhiṃ bhikkhūhi bhikkhunīhi paṭiggahāpetvā paribhuñjitun ti. |2|
tena kho pana samayena utuniyo bhikkhuniyo onaddhamañcaṃ onaddhapīṭhaṃ abhinisīdanti pi abhinipajjanti pi, senāsanaṃ lohitena makkhiyati.
bhagavato etam atthaṃ ārocesuṃ.
na bhikkhave (271) bhikkhuniyā onaddhamañcaṃ onaddhapīṭhaṃ abhinisīditabbaṃ abhinipajjitabbaṃ.
yā abhinisīdeyya vā abhinipajjeyya vā, āpatti dukkaṭassa.
anujānāmi bhikkhave āvasathacīvaran ti.
āvasathacīvaraṃ lohitena makkhiyati.
bhagavato etam atthaṃ ārocesuṃ.
anujānāmi bhikkhave āṇicolakan ti.
bhagavato etam atthaṃ ārocesuṃ.
anujānāmi bhikkhave suttakena bandhitvā ūruyā bandhitun ti.
bhagavato etam atthaṃ ārocesuṃ.
anujānāmi bhikkhave saṃvelliyaṃ kaṭisuttakan ti.
tena kho pana samayena chabbaggiyā bhikkhuniyo sabbakālaṃ kaṭisuttakaṃ dhārenti.
manussā ujjhāyanti ... gihikāmabhoginiyo 'ti.
bhagavato etam atthaṃ ārocesuṃ.
na bhikkhave bhikkhuniyā sabbakālaṃ kaṭisuttakaṃ dhāretabbaṃ.
yā dhāreyya, āpatti dukkaṭassa.
anujānāmi bhikkhave utuniyā kaṭisuttakan ti. |2|
tena kho pana samayena upasampannāyo dissanti animittāpi nimittamattāpi alohitāpi dhuvalohitāpi dhuvacolāpi paggharantī pi sikhariṇī pi itthipaṇḍikāpi vepurisikāpi sambhinnāpi ubhatovyañjanāpi.
bhagavato etam atthaṃ ārocesuṃ.
anujānāmi bhikkhave upasampādentiyā catuvīsatiṃ antarāyike dhamme pucchituṃ.
evañ ca pana bhikkhave pucchitabbā:
na 'si animittā, na 'si nimittamattā, na 'si alohitā, na 'si dhuvalohitā, na 'si dhuvacolā, na 'si paggharantī, na 'si sikhariṇī, na 'si itthipaṇḍikā, na 'si vepurisikā, na 'si sambhinnā, na 'si ubhatovyañjanā, santi te evarūpā ābādhā:
kuṭṭhaṃ, gaṇḍo, kilāso, soso, apamāro; manussāsi, itthi 'si, bhujissāsi, anaṇāsi, na 'si rājabhaṭī, anuññātāsi mātāpitūhi sāmikena, paripuṇṇavīsativassāsi, paripuṇṇan te pattacīvaraṃ, kiṃnāmāsi, kānāmā te pavattinīti. |1|
tena kho pana samayena bhikkhū bhikkhunīnaṃ antarāyike dhamme pucchanti, upasampadāpekkhāyo vitthāyanti maṅkū honti na sakkonti vissajjetuṃ.
bhagavato etam atthaṃ ārocesuṃ.
anujānāmi bhikkhave ekatoupasampannāya bhikkhunīsaṃghe visuddhāya bhikkhusaṃghe upasampadan ti.
tena kho pana samayena bhikkhuniyo ananusiṭṭhā upasampadāpekkhāyo antarāyike dhamme pucchanti.
upasampadā (272) pekkhāyo vitthāyanti maṅkū honti na sakkonti vissajjetuṃ.
bhagavato etam atthaṃ ārocesuṃ.
anujānāmi bhikkhave paṭhamaṃ anusāsitvā pacchā antarāyike dhamme pucchitun ti.
tatth’ eva saṃghamajjhe anusāsanti, upasampadāpekkhāyo tath’ eva vitthāyanti maṅkū honti na sakkonti vissajjetuṃ.
bhagavato etam atthaṃ ārocesuṃ.
anujānāmi bhikkhave ekamantaṃ anusāsitvā saṃghamajjhe antarāyike dhamme pucchituṃ.
evañ ca pana bhikkhave anusāsitabbā:
paṭhamaṃ upajjhaṃ gāhāpetabbā, upajjhaṃ gāhāpetvā pattacīvaraṃ ācikkhitabbaṃ, ayan te patto, ayaṃ saṃghāṭi, ayaṃ uttarāsaṅgo, ayaṃ antaravāsako, idaṃ saṃkacchikaṃ, ayaṃ udakasāṭikā, gaccha amumhi okāse tiṭṭhāhīti. |2|
bhagavato etam atthaṃ ārocesuṃ.
na bhikkhave asammatāya anusāsitabbā.
yā anusāseyya, āpatti dukkaṭassa.
anujānāmi bhikkhave sammatāya anusāsituṃ.
evañ ca pana bhikkhave sammannitabbā:
attanā vā attānaṃ sammannitabbaṃ parāya vā parā sammannitabbā.
kathañ ca attanā vā attānaṃ sammannitabbaṃ.
vyattāya bhikkhuniyā paṭibalāya saṃgho ñāpetabbo:
itthannāmā itthannāmāya ayyāya upasampadāpekkhā.
yadi saṃghassa pattakallaṃ, ahaṃ itthannāmaṃ anusāseyyan ti.
evaṃ attanā vā attānaṃ sammannitabbaṃ.
kathañ ca parāya vā parā sammannitabbā.
vyattāya bhikkhuniyā paṭibalāya saṃgho ñāpetabbo:
itthannāmā itthannāmāya ayyāya {upasampadāpekkhā}.
yadi saṃghassa pattakallaṃ, itthannāmā itthannāmaṃ anusāseyyā 'ti.
evaṃ parāya vā parā sammannitabbā. |4|
tāya sammatāya bhikkhuniyā upasampadāpekkhā upasaṃkamitvā evam assa vacanīyā:
ayaṃ te saccakālo bhūtakālo.
yaṃ jātaṃ taṃ saṃghamajjhe pucchante santaṃ atthīti vattabbaṃ, asantaṃ n’ atthīti vattabbaṃ.
mā kho vitthāsi, mā kho maṅku ahosi.
na 'si animittā ... kānāmā te pavatti-(273)nīti.
anusāsikāya paṭhamataraṃ āgantvā saṃgho ñāpetabbo:
itthannāmā itthannāmāya ayyāya upasampadāpekkhā.
yadi saṃghassa pattakallaṃ, itthannāmā āgaccheyyā 'ti.
ekaṃsaṃ uttarāsaṅgaṃ kārāpetvā bhikkhunīnaṃ pāde vandāpetvā ukkuṭikaṃ nisīdāpetvā añjaliṃ paggaṇhāpetvā upasampadaṃ yācāpetabbā:
saṃghaṃ ayye upasampadaṃ yācāmi, ullumpatu maṃ ayye saṃgho anukampaṃ upādāya, dutiyam pi ayye ..., tatiyam pi ayye saṃghaṃ upasampadaṃ yācāmi, ullumpatu maṃ ayye saṃgho anukampaṃ upādāyā 'ti. |5|
tāvad eva ādāya bhikkhusaṃghaṃ upasaṃkamitvā ekaṃsaṃ uttarāsaṅgaṃ kārāpetvā bhikkhūnaṃ pāde vandāpetvā ukkuṭikaṃ nisīdāpetvā añjaliṃ paggaṇhāpetvā upasampadaṃ yācāpetabbā:
ahaṃ ayyā itthannāmā itthannāmāya ayyāya upa (274) sampadāpekkhā ekatoupasampannā bhikkhunīsaṃghe visuddhā saṃghaṃ ayyā upasampadaṃ yācāmi, ullumpatu maṃ ayyā saṃgho anukampaṃ upādāya.
ahaṃ ayyā itthannāmā ... visuddhā dutiyam pi ..., ahaṃ ayyā itthannāmā ... visuddhā tatiyam pi ayyā saṃghaṃ upasampadaṃ yācāmi, ullumpatu maṃ ayyā saṃgho anukampaṃ upādāyā 'ti.
vyattena bhikkhunā paṭibalena saṃgho ñāpetabbo:
ayaṃ itthannāmā itthannāmāya upasampadāpekkhā ekatoupasampannā bhikkhunīsaṃghe visuddhā.
itthannāmā saṃghaṃ upasampadaṃ yācati itthannāmāya pavattiniyā.
yadi saṃghassa pattakallaṃ, saṃgho itthannāmaṃ upasampādeyya itthannāmāya pavattiniyā.
ayaṃ ... yācati itthannāmāya pavattiniyā.
saṃgho itthannāmaṃ upasampādeti itthannāmāya pavattiniyā.
yassāyasmato khamati itthannāmāya upasampadā itthannāmāya pavattiniyā so tuṇh' assa.
yassa na kkhamati so bhāseyya.
dutiyam pi etam atthaṃ vadāmi --pe--, tatiyam pi etam atthaṃ vadāmi:
upasampannā saṃghena itthannāmā itthannāmāya pavattiniyā.
tāvad eva chāyā metabbā, utupamāṇaṃ ācikkhitabbaṃ, divasabhāgo ācikkhitabbo, saṃgīti ācikkhitabbā, bhikkhuniyo vattabbā:
imissā tayo ca nissaye aṭṭha ca akaraṇīyāni acikkheyyāthā 'ti. |8|
(275) tena kho pana samayena bhikkhuniyo na pavārenti.
bhagavato etam atthaṃ ārocesuṃ.
na bhikkhave bhikkhuniyā na pavāretabbaṃ.
yā na pavāreyya yathādhammo kāretabbo 'ti.
tena kho pana samayena bhikkhuniyo attanā pavāretvā bhikkhusaṃghe na pavārenti.
bhagavato etam atthaṃ ārocesuṃ.
na bhikkhave bhikkhuniyā attanā pavāretvā bhikkhusaṃghe na pavāretabbaṃ.
yā na pavāreyya yathādhammo kāretabbo 'ti.
tena kho pana samayena bhikkhuniyo bhikkhūhi saddhiṃ ekato pavārentiyo kolāhalaṃ akaṃsu.
bhagavato etam atthaṃ ārocesuṃ.
na bhikkhave bhikkhuniyā bhikkhūhi saddhiṃ ekato pavāretabbaṃ.
yā pavāreyya, āpatti dukkaṭassā 'ti.
tena kho pana samayena bhikkhuniyo purebhattaṃ pavārentiyo kālaṃ vītināmesuṃ.
bhagavato etam atthaṃ ārocesuṃ.
anujānāmi bhikkhave pacchābhattaṃ pavāretun ti.
pacchābhattaṃ pavārentiyo vikāle ahesuṃ.
bhagavato etam atthaṃ ārocesuṃ.
anujānāmi bhikkhave ajjatanā pavāretvā aparajju bhikkhusaṃghaṃ pavāretun ti. |1|
tena kho pana samayena bhikkhuniyo bhikkhūnaṃ uposathaṃ ṭhapenti pavāraṇaṃ ṭhapenti savacanīyaṃ karonti anuvādaṃ ṭhapenti okāsaṃ kārenti codenti sārenti.
bhagavato etam atthaṃ ārocesuṃ.
na bhikkhave bhikkhuniyā bhikkhussa uposatho ṭhapetabbo:
ṭhapito pi aṭhapito, ṭhapentiyā āpatti dukkaṭassa.
ṭhapitāpi aṭhapitā, ṭhapentiyā āpatti dukkaṭassa.
katam pi akataṃ, karontiyā āpatti dukkaṭassa.
ṭhapito pi aṭhapito, ṭhapentiyā āpatti dukkaṭassa.
kārito pi akārito, kārentiyā āpatti dukkaṭassa.
codito pi acodito, codentiyā āpatti dukkaṭassa.
sārito pi asārito, sārentiyā āpatti dukkaṭassā 'ti.
tena kho pana samayena bhikkhū bhikkhunīnaṃ uposathaṃ ṭhapenti ... sārenti.
bhagavato etam atthaṃ ārocesuṃ.
anujānāmi bhikkhave bhikkhunā bhikkhuniyā uposathaṃ ṭhapetuṃ:
ṭhapito pi suṭhapito, ṭhapentassa anāpatti; ...; sāretuṃ:
sāritāpi susāritā, sārentassa anāpattīti.
tena kho pana samayena chabbaggiyā bhikkhuniyo yānena yāyanti itthiyuttena pi purisantarena purisayuttena pi itthantarena.
seyyathāpi Gaṅgāmahiyāyā 'ti.
bhagavato etam atthaṃ ārocesuṃ.
na bhikkhave bhikkhuniyā yānena yāyitabbaṃ.
yā yāyeyya, yathādhammo kāretabbo 'ti.
tena kho pana samayena aññatarā bhikkhunī gilānā hoti, na sakkoti padasā gantuṃ.
bhagavato etam atthaṃ ārocesuṃ.
anujānāmi bhikkhave gilānāya yānan ti.
atha kho bhikkhunīnaṃ etad ahosi:
itthiyuttan nu kho purisayuttan nu kho 'ti.
bhagavato etam atthaṃ ārocesuṃ.
anujānāmi bhikkhave itthiyuttaṃ purisayuttaṃ hatthavaṭṭakan ti.
tena kho pana samayena aññatarāya bhikkhuniyā yānugghātena bāḷhataraṃ aphāsu ahosi.
(277) bhagavato etam atthaṃ ārocesuṃ.
anujānāmi bhikkhave sivikaṃ pāṭaṅkin ti.
tāya dūtāya bhikkhuniyā saṃghaṃ upasaṃkamitvā ekaṃsaṃ uttarāsaṅgaṃ karitvā bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evam assa vacanīyo:
itthannāmā ayyā itthannāmāya ayyāya upasampadāpekkhā ekatoupasampannā bhikkhunīsaṃghe visuddhā, sā kenacid eva antarāyena nāgacchati.
itthannāmā ayyā saṃghaṃ upasampadaṃ yācati, ullumpatu taṃ ayyā saṃgho anukampaṃ upādāya.
itthannāmā ... nāgacchati.
dutiyam pi ayyā itthannāmā saṃghaṃ upasampadaṃ yācati ... upādāya.
itthannāmā ... nāgacchati.
tatiyam pi ayyā itthannāmā saṃghaṃ upasampadaṃ yācati ... upādāyā 'ti.
vyattena bhikkhunā paṭibalena saṃgho ñāpetabbo:
itthannāmā itthannāmāya upasampadāpekkhā ekatoupasampannā bhikkhunīsaṃghe visuddhā, sā kenacid eva antarāyena nāgacchati.
itthannāmā saṃghaṃ upasampadaṃ yācati itthannāmāya pavattiniyā.
yadi saṃghassa pattakallaṃ, saṃgho itthannāmaṃ upasampādeyya itthannāmāya pavattiniyā.
suṇātu (278) me bhante saṃgho.
itthannāmā itthannāmāya upasampadāpekkhā ... pavattiniyā.
saṃgho itthannāmaṃ upasampādeti itthannāmāya pavattiniyā.
yassāyasmato khamati itthannāmāya upasampadā itthannāmāya pavattiniyā, so tuṇh’ assa.
yassa na kkhamati so bhāseyya.
dutiyam pi etam atthaṃ vadāmi ..., tatiyam pi etam atthaṃ vadāmi:
suṇātu me ... so bhāseyya.
upasampannā saṃghena itthannāmā itthannāmāya pavattiniyā.
tāvad eva chāyā metabbā, utupamāṇaṃ ācikkhitabbaṃ, divasabhāgo ācikkhitabbo, saṃgīti ācikkhitabbā, bhikkhuniyo vattabbā:
tassā tayo ca nissaye aṭṭha ca akaraṇīyāni ācikkheyyāthā 'ti. |3|
tena kho pana samayena aññatarā itthi sannisinnagabbhā bhikkhunīsu pabbajitā hoti, tassā pabbajite gabbho vuṭṭhāsi.
atha kho tassā bhikkhuniyā etad ahosi:
kathan nu kho mayā imasmiṃ dārake paṭipajjitabban ti.
bhagavato etam atthaṃ ārocesuṃ.
anujānāmi bhikkhave posetuṃ yāva so dārako viññutaṃ pāpuṇātīti.
atha kho tassā bhikkhuniyā etad ahosi:
mayā ca na labbhā ekikāya vatthuṃ, aññāya ca bhikkhuniyā na labbhā dārakena saha vatthuṃ.
kathaṃ nu kho mayā paṭipajjitabban ti.
bhagavato etam atthaṃ ārocesuṃ.
anujānāmi bhikkhave ekaṃ bhikkhuniṃ sammannitvā (279) tassā bhikkhuniyā dutiyaṃ dātuṃ.
evañ ca pana bhikkhave sammannitabbā:
paṭhamaṃ bhikkhunī yācitabbā, yācitvā vyattāya bhikkhuniyā paṭibalāya saṃgho ñāpetabbo:
yadi saṃghassa pattakallaṃ, saṃgho itthannāmaṃ bhikkhuniṃ sammanneyya itthannāmāya bhikkhuniyā dutiyaṃ.
saṃgho itthannāmaṃ bhikkhuniṃ sammannati itthannāmāya bhikkhuniyā dutiyaṃ.
yassā ayyāya khamati itthannāmāya bhikkhuniyā sammuti itthannāmāya bhikkhuniyā dutiyāya, sā tuṇh’ assa.
yassā na kkhamati sā bhāseyya.
sammatā saṃghena itthannāmā bhikkhunī itthannāmāya bhikkhuniyā dutiyā.
khamati ... dhārayāmīti. |1|
tena kho pana samayena bhikkhuniyo cuṇṇena nahāyanti.
manussā ujjhāyanti ... gihikāmabhoginiyo 'ti.
bhagavato etam atthaṃ ārocesuṃ.
na bhikkhave bhikkhuniyā cuṇṇena nahāyitabbaṃ.
yā nahāyeyya, āpatti dukkaṭassa.
anujānāmi bhikkhave kukkusaṃ mattikan ti.
tena kho pana samayena bhikkhuniyo vāsitikāya mattikāya nahāyanti.
manussā ujjhāyanti ... gihikāmabhoginiyo 'ti.
bhagavato etam atthaṃ ārocesuṃ.
na bhikkhave bhikkhuniyā vāsitikāya mattikāya nahāyitabbaṃ.
yā nahāyeyya, āpatti dukkaṭassa.
anujānāmi bhikkhave pakatimattikan ti.
tena kho pana samayena bhikkhuniyo jantāghare nahāyantiyo kolāhalaṃ akaṃsu.
bhagavato etam atthaṃ ārocesuṃ.
na bhikkhave bhikkhuniyā jantāghare nahāyitabbaṃ.
yā nahāyeyya, āpatti dukkaṭassā 'ti.
tena kho pana samayena bhikkhuniyo paṭisote nahāyanti dhārāsamphassaṃ sādiyantā.
bhagavato etam atthaṃ ārocesuṃ.
na bhikkhave bhikkhuniyā paṭisote nahāyitabbaṃ.
yā nahāyeyya, āpatti dukkaṭassā 'ti.
tena kho pana samayena bhikkhuniyo atitthe nahāyanti, dhuttā dūsenti.
bhagavato etam atthaṃ ārocesuṃ.
na bhikkhave bhikkhuniyā atitthe nahāyitabbaṃ.
yā nahāyeyya, āpatti dukkaṭassā 'ti.
tena kho pana samayena bhikkhuniyo purisatitthe nahāyanti.
manussā ujjhāyanti ... gihikāmabhoginiyo 'ti.
bhagavato (281) etam atthaṃ ārocesuṃ.
na bhikkhave bhikkhuniyā purisatitthe nahāyitabbaṃ.
yā nahāyeyya, āpatti dukkaṭassa.
anujānāmi bhikkhave mahilātitthe nahāyitun ti. |4|
tassa uddānaṃ: pabbajjaṃ Gotamī yāci, n’ anuññāsi tathāgato.
Kapilavatthu Vesāliṃ agamāsi vināyako. | rajokiṇṇe koṭṭhakesu Ānandassa pavedayi.
bhabbo 'ti nayato yāci, mātā 'ti posikā 'ti ca. | vassasataṃ tadahu ca, abhikkhu, paccāsiṃsanā, pavāraṇā, garudhammā, dve vassā, anakkosanā, | ovāden’ aṭṭha te dhammā yāvajīvānuvattanā.
garudhammapaṭiggaho sā 'v’ assā upasampadā. | vassasahassaṃ pañc’ eva kumbhathenakā setaṭṭhi mañcaṭṭhika-upamāhi:
evaṃ saddhammahiṃsanā. | āḷiṃ bandheyya pā eva: puna saddhammasaṇṭhiti.
upasampādetuṃ, ayyā, yathāvuḍḍhābhivādanā, | na karissanti kim eva, sādhāraṇāsādhāraṇaṃ, ovādaṃ, pātimokkhañ ca, kena nu kho, upassayaṃ, | na jānanti ca ācikkhi, na karonti ca, bhikkhuhi, paṭiggahetuṃ bhikkhuhi, bhikkhunīhi paṭiggaho, | ācikkhi, kammaṃ, bhikkhūhi, ujjhāyanti, bhikkhunīhi vā, ācikkhituṃ, bhaṇḍanañ ca, ropetvā, Uppalāya ca, | Sāvatthiyā, kaddamoda, avandi, kāya-ūru ca aṅgajātañ ca obhāsaṃ sampayojenti vaggikā, | avandiyo daṇḍakammaṃ, bhikkhuniyo tathā puna, āvaraṇañ ca, ovādaṃ, kappati nu kho, pakkamati, | bālā, 'vatthu, vinicchayo, ovādaṃ, saṃgho pañcahi, duve tisso, na gaṇhanti, bālā, gilāna-gamikaṃ, | āraññakā, nārocenti, na paccāgacchanti ca, dīghaṃ, viliva-cammaṃ ca, dussā ca, veṇi, vaṭṭi ca, coḷaveṇi ca, vaṭṭi ca, suttaveṇi ca, vaṭṭikā, | aṭṭhillaṃ, gohanukena, hatthakocchaṃ, pari tathā, ūru-mukhaṃ, dantamaṃsaṃ, ālimpā, madda-cuṇṇanā, | lañchenti, aṅgarāgañ ca, mukharāgaṃ, tathā duve, avaṅga-vises', oloke, sālokena, sanaccena ca, |
(282) vesī, pānāgāraṃ, sunaṃ, āpaṇaṃ, vaḍḍhi, vāṇijā, dāsaṃ, dāsiṃ, kammakaraṃ, kammakariṃ upaṭṭhahaṃ, | tiracchāna-harītaki, sandhārayanti namatakaṃ.
nīlaṃ pītaṃ lohitakaṃ {mañcaṭṭha-kaṇhacīvaro} | mahāraṅga-mahānāma-acchinnā dīgham eva ca, puppha-pala-kañcukañ ca tirīṭakañ c’ eva dhārayyaṃ. | bhikkhunī sikkhamānāya sāmaṇerāya apaccaye niyyādite parikkhāre bhikkhunī c’ eva issarā. | bhikkhussa sāmaṇerassa upāsakass’ upāsikā aññesañ ca parikkhāre niyyante bhikkhu issarā. | Malle, gabbhaṃ, pattamūlaṃ, byañjanaṃ, āmisena ca, ussannañ ca, bāḷhataraṃ, sannidhikataṃ āmisaṃ, | bhikkhūnaṃ yādisaṃ heṭṭhaṃ bhikkhunīnaṃ tathā kare, senāsanaṃ, utuniyo, makkhiyati, paṭāni ca, | chijjanti, sabbakālañ ca, animittādi dissare nimittā 'lohitā c’ eva tath’ eva dhuvalohitā | dhuvacoḷaṃ paggharaṇi sīkharaṇ’ itthipaṇḍakā vepurisi ca sambhinnā ubhatobyañjanā ca yā. | animitt’ ādito katvā yāva ubhatobyañjanā etaṃ peyyālato heṭṭhā, kuṭṭhaṃ gaṇḍo kilāsi ca | sos’ apamāro mānusī itthi 'si bhujissāsi ca anaṇā na rājabhaṭī anuññātā ca vīsati | paripuṇṇā ca kinnāmā kānāmā te pavattinī:
catuvīs’ antarāyānaṃ pucchitvā upasampadā. | vitthāyanti, anusiṭṭhā, saṃghamajjhe tath’ eva ca, upajjhā gāha, saṃghāṭi uttar’ -antaravāsako | saṃkaccha-dakasāṭi ca, ācikkhitvāna pesaye, bālā, asammat', ekato, yāce, pucch’ antarāyikā, | ekatoupasampannā, bhikkhusaṃghe tathā puna, chāyā utu-divasā ca saṃgīti tayo nissaye | aṭṭh’ akaraṇiyāni, kālaṃ, sabbattha aṭṭha vā, na pavārenti bhikkhuniyo, bhikkhusaṃghaṃ tath’ eva ca, | kolāhalaṃ, purebhattaṃ, vikāle ca, kolāhalaṃ.
uposathaṃ pavāraṇaṃ savacani anuvādanaṃ | okāsaṃ code sārenti:
tath’ eva bhikkhū bhikkhunī:
anuññātaṃ mahesinā | yānaṃ, gilāna-yuttañ ca, yānugghāt,’ Aḍḍhakāsikā, bhikkhu sikkhā sāmaṇera-sāmaṇerī ca bālāya, | (283)
araññe, upāsakena uddosito, upassayaṃ, na sammati navakammaṃ, nisinnagabbhā, ekikā, | sāgārañ ca, garudhammaṃ, paccakkhāya ca, saṃkami, abhivādana-kesā ca nakhā ca {vakakammanā,} | pallaṅkena, gilānā ca, vaccaṃ, cuṇṇena, vāsitaṃ, jantāghare, paṭisote, atitthe, purisena ca. | Mahāgotamī āyāci Ānando cāpi yoniso.
parisā catasso honti pabbajjaṃ jinasāsane. | saṃvegajananatthāya saddhammassa ca buddhiyā āturassā va bhesajjaṃ evaṃ buddhena desitaṃ. | evaṃ viditā saddhamme mātugāmāpi itarā 40 tāyanti accutaṃ ṭhānaṃ yattha gantvā na socare 'ti.
http://www2.hf.uio.no/common/apps/permlink/permlink.php?app=polyglotta&context=ctext&uid=128800a9-05a1-11e7-9707-0050569f23b2
Complete text