de dag gzugs dang | sgra dang | dri dang | ro dang | reg bya rnams las cis ’byung ba mi shes shing khong du mi chud do || de dag gis nge pa shes shing khong du ma chud pas grong dang | grong khyer dang | grong rdal dang | ljongs dang | yul ’khor dang | rgyal po’i pho brang ’khor dag tu song na yang gzugs dang | sgra dang | dri dang | ro dang | reg bya rnams kyis gnod par ’gyur ro || gal te de dag dgon pa na gnas pa las ’chi ba’i dus byas par gyur na ’jig rten pa’i sdom pa la gnas pa de dag mtho ris kyi ’jig rten du skye bar ’gyur te || der yang de dag lha’i ’dod pa’i yon tan lnga po dag gis gnod par ’gyur ro || de dag de nas shi ’phos nas ngan song bzhi las yongs su ma grol bar ’gyur te || bzhi gang zhe na | ’di lta ste | sems can dmyal ba dang | dud ’gro’i skye gnas dang | gshin rje’i ’jig rten dang | lha ma yin no || ’od srung de ltar na dge slong khyi rdo la snyegs pa dang mtshungs pa dag yin no ||