[Naiḥsargika 5]
saṅs rgyas bcom ldan ’das mñan yod na rgyal byed kyi tshal mgon med zas sbyin gyi kun dga’ ra ba na bźugs so || gaṅ (4) gi tshe bcom ldan ’das kyis dge sloṅ ma rnams kyis dgon par gnas pa ma bkag pa de’i tshe na dge sloṅ ma rnams kyaṅ dgon pa’i gnas su doṅ ste | bsam gtan daṅ | rnam par thar pa daṅ | tiṅ ṅe ‘dzin daṅ | sñoms par ’jug pa’i bde ba dag ñams su myoṅ (5) bar byed do || de nas dge sloṅ ma ut+pa la’i mdog ’khor lṅa brgya daṅ nags mun pa can ga la ba der soṅ ste phyin nas śiṅ ljon pa’i druṅ źig tu brten te skyil mo kruṅ phyed kyis ’dug nas bsam gtan daṅ | rnam par thar pa daṅ | tiṅ ṅe ‘dzin daṅ | sñoms par (6) ’jug pa’i bde ba dag ñams su myoṅ bar byed do || dge sloṅ ma de dag phye ma red mñan yod du ’jug ’dod nas smras pa | ’phags ma ut+pa la’i mdog bslaṅ bar bya’o || kha cig gis smras pa | ’phags ma ut+pa la’i mdog ni mthu che ba rdzu ’phrul che ba yin (7) pas daṅ po kho nar dbyar khaṅ du ’gro bar ’gyur ba’i gnas kyaṅ yod do źes zer nas de dag gis de ma bslaṅ ba kho nar doṅ ṅo || ut+pa la’i mdog kyaṅ phye ma red laṅs nas dge sloṅ ma de dag thams cad doṅ bar mthoṅ ba daṅ | des bsams pa | ci da ’gro ’am | ’on (97a1) te ’di ñid du ’dug sñam nas de de ñid du ’gog pa la sñoms par źugs so || g-yon can lṅa brgya tsam gyis las dag byas nas nags mun pa can du lhags te | de dag gis smras pa | bdag cag las ñis brgya lṅa bcus ni skal ba (2) dag bgo bar bya’o || ñis brgya lṅa bcus ni nags byul bar bya’o źes de dag las ñis brgya lṅa bcus ni skal ba dag bgo bar brtsams | ñis brgya lṅa bcus ni nags byul bar brtsams pa daṅ || de dag gis ut+pa la’i mdog ’dug pa mthoṅ ṅo || de (3) na kha cig na re śes ldan dag ’di ni tho yor źig yin no źes zer | kha cig na re ’di ni mi źig yin no źes zer | kha cig na re ’di ni dge sloṅ źig yin no źes zer ro || de na dge sloṅ gi rgyus śes pa źig ’dug pa des smras pa | ’di ni dge sloṅ ma źig (4) yin gyi dge sloṅ ni ma yin no || ji ltar śes | dge sloṅ dag ni skyil mo kruṅ gis ’dug la | dge sloṅ ma rnams ni skyil mo kruṅ byed kyis ’dug go || de dag ṅo mtshar skyes nas śes ldan dag ’di lta bu’i nags ’jigs su ruṅ ba’i naṅ na dge sloṅ ma gcig (5) bu mtshan mo gnas par khas blaṅs pa ltos źes zer ro || de dag dmag dpon gyi gan du soṅ ba daṅ | dmag dpon gyis de dag la dris pa | śes ldan dag khyed kyi nags mun pa can ’di na ṅo mtshar cuṅ zad mthoṅ ba yod dam mchis te | ’di lta bu’i nags (6) ’jigs su ruṅ ba’i naṅ na | dge sloṅ ma gcig pu mtshan mo gnas par khas blaṅs pa mchis so || de bltas ’doṅ ṅo źes de dag de’i druṅ du doṅ ba daṅ | dmag dpon gyis dge sloṅ ma ut+pa la’i mdog gzugs bzaṅ ba | blta na sdug pa | mdzes pa mthoṅ (7) ṅo || mthoṅ nas kyaṅ mṅon par dad par gyur nas de mṅon par dad pa skyes pas smras pa | kye ma dge sloṅ ma ’di ni gñig nas bzaṅ ba yin te | mtshan mo zla ñi mo ltar ’dug pa gaṅ yin pa daṅ | gzugs bzaṅ ba | blta na sdug pa | mdzes pa gaṅ yin pas so (97b1) źes de bslaṅ bar brtsams pa daṅ | de dag gis smras pa | ci’i phyir ’di sloṅ bar byed | zas sbyin par bya’o || dge sloṅ gi rgyus śes pa gcig gis smras pa | ’di ni dus ma yin par mi za’o || dmag dpon gyis smras pa | ci’i phyir | des smras (2) pa | ’di ni dus ma yin pa’i zas spaṅs pa yin no || dmag dpon gyis smras pa | kye ma dge sloṅ ma ’di ni gñis ka nas bzaṅ ba yin te | gzugs bzaṅ ba | blta na sdug pa | mdzes pa gaṅ yin pa daṅ | dus ma yin pa’i zas spaṅs pa gaṅ (3) yin pas so || yaṅ smras pa | ’di la chaṅ blud par bya’o || dge sloṅ gi rgyus śes pa des smras pa | ’di ni myos par ’gyur ba’i btuṅ ba spaṅs pa yin no || dmag dpon gyis smras pa | kye ma dge sloṅ ma ’di ni gñi gnas bzaṅ ba yin te | gzugs (4) bzaṅ ba | blta na sdug pa | mdzes pa gaṅ yin pa daṅ | myos par ’gyur ba’i btuṅ ba spaṅs pa gaṅ yin pas so || yaṅ smras pa | kho bos yon gnas kyi źiṅ ’di lta bu la bsod sñoms kyis bsgrub par ma nus so źes des ras yug chen po la ’os pa (5) gcig daṅ | bsod sñoms kyi phud cig phul nas śiṅ ljon pa’i yal ga la btags te bźag nas smras pa | ’phags ma ’di ltar khyod la mi mkhyen pa daṅ | mi gzigs pa daṅ | mi rig pa daṅ | rnam par mi mkhyen pa ci yaṅ mi mṅa’ bas bdag gis (6) khyod la bsod sñoms daṅ na bza’ ’di ’bul lo źes smras te soṅ ṅo || ut+pa la’i mdog naṅ par sṅar laṅs pas skye bo phal po che’i rjes śul mthoṅ nas des bsams pa daṅ | g-yon can lṅa brgya ñe par ’oṅs par mthoṅ nas mi mdzes pa ’ga’ źig rig par ma (7) byas sam sñam na ’ga’ yaṅ ma byas par mthoṅ ṅo || śiṅ ljon pa’i yal ga la ras yug chen daṅ | bsod sñoms btags te bźag pa mthoṅ nas des bsams pa | ’di ni dad par gyur pa rnams kyis dad pa’i dbaṅ du byas pa yin no sñam nas des bsams pa | (98a1) gal te byin len stobs pa la bsdad na bya’am | spre’us chud gzan par ’gyur bas bdag ni dge ’dun la bsod sñoms kyi phud ’bul ba yin la ’di ltar dge sloṅ rnams la mi ruṅ ba gaṅ yin pa de ni dge sloṅ ma rnams la ruṅ ba yin la | dge (2) sloṅ ma rnams la mi ruṅ ba gaṅ yin pa de ni dge sloṅ rnams la ruṅ ba yin pas bdag raṅ ñid kyis ’di khyer te | dge ’dun la bsod sñoms kyi phud ’bul du ’gro’o sñam nas des de khyer te rgyal byed kyi tshal du soṅ ṅo || drug sde rnams kyi kun du spyod pa ni drug sde las (3) gaṅ yaṅ ruṅ bas rgyal byed kyi tshal gyi sgo stoṅ par mi ’jog pas ñe dga’ rgyal byed kyi tshal gyi sgo na ’chag ciṅ ’dug pa des ut+pa la’i mdog mthoṅ nas smras pa | sriṅ mo ci’i phyir naṅ par sṅar mñan yod kyi sgo dag phye ste ’oṅs | des smras pa | bdag mñan yod du (4) ma mchis kyi | bdag mdaṅ sum nags mun pa can du mchis par khas blaṅs so || ñe dga’ sa smras pa | ñe dga’ ni ñin mo ñid nags mun pa can du źugs na yaṅ spu dag gyen du ’greṅ bar ’gyur ro || sriṅ mo khyer ba ’di ci yin | des smras pa | chom rkun pa (5) lṅa brgya tsam der mchis nas de dag dad par gyur pas bdag la dad pa’i dbaṅ du bgyis pa stsal to || sriṅ mo khyod ni chom rkun pas kyaṅ dad par bya ba yin gyi | gal te ñe dga’ de dag gis mthoṅ du zin na lcag rgod maṅ pos brdabs te khur tsa bar khrid par ’gyur ro || ’di (6) ltar gaṅ la ras yug chen ’di lta bu yod pa de ni gos sar pa las snam sbyar ñi ri ma byas te sems las chuṅ ṅus dge ba’i phyogs la tron byed par ’gyur ro || ’phags pa khyod ras yug chen ’di bźed dam | lha’i gnas kyi lhag ma bźin du’o || ’phags pa bdag (7) gis dge ’dun la bsod sñoms kyi phud phul te slar mchis pa’i bar du gźes śig daṅ | de’i ’og tu khyod la ras yug chen gsol lo || ñe dga’ sa bsams pa | lhuṅ bzed nag po can ’ga’ źig gis ’di la bslaṅs pa daṅ de la byin par ’gyur ro sñam nas | (98b1) sriṅ mo bdag gis bsod sñoms kyi phud len pa dag khrid de ’oṅ gis de’i bar du ’di ñid du sdod cig | ñe dga’ rgyal byed kyi tshal du źugs pa daṅ | des dge sloṅ bsod sñoms kyi phud len pa dag sñiṅ las chuṅ ṅur ’khod pa mthoṅ nas des smras pa | tshe daṅ ldan pa dag (2) sbyin bdag dag ni khur gyis ṅal źiṅ sdod la | khyed cag ni ’di na sñiṅ las chuṅ ṅur ’khod na tshur śog bsod sñoms kyi phud loṅ śig | de dag gis gźes sogs te doṅ ba daṅ | ut+pa la’i mdog gis de dag la bsod sñoms kyi phud phul nas ras yug chen sprugs (3) nas ñe dga’ la phul lo || ñe dga’ sa khyod sbyin pa ’dis sems kyi rgyan daṅ | sems kyi yo byad daṅ | rnal ’byor gyi tshogs daṅ | don gyi mchog daṅ | lha daṅ mi rnams kyi gos dag thob par gyur cig ces smras so || ut+pa la’i mdog gis bsams pa | ṅa (4) dbyar khaṅ du soṅ ste ci ruṅ | bcom ldan ’das kyi źabs la phyag ’tshal du ’gro bar bya’o sñam nas | de nas ut+pa la’i mdog bcom ldan ’das ga la ba der soṅ ste phyin nas bcom ldan ’das kyi źabs gñis la mgo bos phyag ’tshal te mtha’ gcig tu ’dug go || (5) de’i tshe na ut+pa la’i mdog gis chos gos lṅa ṅan ciṅ snam sbyar yaṅ rñiṅs par gyur nas | de na bcom ldan ’das kyis tshe daṅ ldan pa kun dga’ bo la bka’ stsal pa | kun dga’ bo dge sloṅ ma rnams kyis dbyar gyi gos kyi rñed pa ma grub bam | btsun pa grub (6) bo || ’o na ci’i phyir dge sloṅ ma ut+pa la’i mdog gi chos gos lṅa ṅan ciṅ snam sbyar yaṅ rñiṅs par gyur | btsun pa sriṅ mo ’di ni dad pa daṅ ldan źiṅ bzaṅ la dge ba’i bsam pa can lags te | ’dis saṅs rgyas sam | chos sam | dge ’dun nam | dge (7) sloṅ yid du ’thad pa dag la ma phul ba’am | yoṅs su ma btaṅ ba ci yaṅ ma mchis te | ’dis daṅ yaṅ ras yug chen rñed nas de yaṅ ’dis btsun pa ñe dga’ la stsol to || kun dga’ bo dge sloṅ dag dge sloṅ ma ñe du ma yin pa la gos lhag pa len tam | btsun (99a1) pa len to || kun dga’ bo dge sloṅ dag dge sloṅ ma ñe du ma yin pa la ’di sñam du ’di’i chos gos lṅa tshaṅ ṅam | ’on te ma tshaṅ sñam du mi sems par ’di ltar thob po cog len par byed kyi | ñe du la ni byin yaṅ len par mi byed do || de nas bcom (2) ldan ’das kyis tshe daṅ ldan pa kun dga’ bo la bka’ stsal pa | kun dga’ bo dge sloṅ ma ut+pa la’i mdog la gtsug lag khaṅ chen po nas chos gos lṅa byin cig | tshe daṅ ldan pa kun dga’ bos dge sloṅ ma ut+pa la’i mdog la gtsug lag khaṅ chen po nas chos (3) gos lṅa byin no || de nas bcom ldan ’das kyis byuṅ ba ’di daṅ | gleṅ gźi ’di daṅ | skabs ’di la dge sloṅ gi dge ’dun bsdu ba mdzad do || źes bya ba la sogs pa sṅa ma bźin no || ṅa’i ñan thos rnams kyis ’dul ba la bslab pa’i gźi ’di ltar gdon par (4) bya ste | yaṅ dge sloṅ gaṅ dge sloṅ ma ñe du ma yin pa las gos len na spaṅ ba’i ltuṅ byed do źes bcom ldan ’das kyis ’dul ba la ñan thos rnams kyi bslab pa’i gźi de ltar bca’ ba mdzad do || saṅs rgyas bcom ldan ’das mñan yod na rgyal byed kyi tshal (5) mgon med zas sbyin gyi kun dga’ ra ba na bźugs so || mñan yod na khyim bdag cig ’dug pa des rigs mñam pa las chuṅ ma blaṅs te | de de daṅ lhan cig rtse bar byed | dga’ bar byed | dga’ mgur spyod par byed do || de bdag gi khyim nor du ma daṅ ldan (6) na bdag gis ’jig rten pha rol gyi lam rgyags cuṅ zad kyaṅ ma khyer ro sñam nas lag pa la ’gram pa gtad de sems khoṅ du chud ciṅ ’dug pa chuṅ mas mthoṅ nas smras pa | rje’i sras khyod ci’i slad du phyag la ’gram pa gtad de sems khoṅ du chud ciṅ bźugs | bzaṅ (7) mo kho bo’i khyim nor du ma daṅ ldan na bdag gis ’jig rten pha rol gyi lam rgyags cuṅ zad kyaṅ ma khyer te | gal te bdag gis saṅs rgyas la sogs pa dge sloṅ gi dge ’dun bśos gsol te re re la ras bcos bu sar pa phrug ser bskon na des bdag gi ’jig rten pha rol | (99b1) gyi lam rgyags khyer bar ’gyur ro || chuṅ mas smras pa | rje’i sras de bźin mdzod cig | de nas khyim bdag de bcom ldan ’das ga la ba der soṅ ste phyin nas bcom ldan ’das kyi źabs gñis la mgo bos phyag ’tshal te mtha’ gcig tu ’dug go || mtha’ (2) gcig tu ’dug nas bcom ldan ’das kyis khyim bdag de la chos daṅ ldan pa’i gtam gyis yaṅ dag par ston par mdzad | yaṅ dag par ’dzin du ’jud par mdzad | yaṅ dag par gzeṅs stod par mdzad | yaṅ dag par rab tu dga’ bar mdzad de | rnam graṅs (3) du mas chos daṅ ldan pa’i gtam gyis yaṅ dag par bstan | yaṅ dag par ’dzin du bcug | yaṅ dag par gzeṅs bstod | yaṅ dag par rab tu dga’ bar mdzad nas caṅ mi gsuṅ ṅo || de nas khyim bdag de stan las laṅs nas bla gos phrag pa gcig tu byas (4) te bcom ldan ’das ga la ba de logs su thal mo sbyar ba btud nas bcom ldan ’das la ’di skad ces gsol to || bcom ldan ’das saṅ bdag gi sdum par dge sloṅ gi dge ’dun daṅ thabs cig tu gdugs tshod gsol bar ci gnaṅ | bcom ldan ’das kyis (5) khyim bdag de la caṅ mi gsuṅ bas gnaṅ ṅo || de nas khyim bdag des bcom ldan ’das kyis caṅ mi gsuṅ bas gnaṅ bar rig nas bcom ldan ’das kyis bka’ stsal pa la mṅon par dga’ ba daṅ rjes su yi raṅ bar byas te | bcom ldan ’das kyi źabs (6) gñis la mgo bos phyag ’tshal te bcom ldan ’das kyi spyan sṅa nas soṅ ṅo || de nas khyim bdag des de ñid kyi mtshan mo bca’ ba daṅ bza’ ba gtsaṅ źiṅ bsod pa legs par sbyar nas naṅ par sṅar laṅs te gdan bśams nas chu ra bźag ste | bcom ldan (7) ’das la spyan ’dren gyis | btsun pa gdugs tshod sbyar ba’i dus lags na | da bcom ldan ’das kyis de’i dus la bab par mkhyen par mdzad du gsol źes gdugs tshod la spyan draṅs so || de nas bcom ldan ’das sṅa dro śam thabs gsol | lhuṅ bzed daṅ (100a1) chos gos bsnams te dge sloṅ gi tshogs kyis yoṅs su bskor ciṅ dge sloṅ gi dge ’dun gyis mdun du bdar te | khyim bdag de’i bkad sa ga la ba der gśegs te byon nas | dge sloṅ gi dge ’dun gyi goṅ du gdan bśams pa ñid la bźugs (2) so || de nas khyim bdag des saṅs rgyas la sogs pa dge sloṅ gi dge ’dun bde bar bźugs par rig nas | Raṅa gi lag gis bca’ ba daṅ bza’ ba gtsaṅ źiṅ bsod pas tshim par byed | stobs par byed do || rnam graṅs du mas bca’ ba daṅ bza’ ba gtsaṅ źiṅ (3) bsod pas raṅ gi lag nas tshim par byas śiṅ bstabs nas | saṅs rgyas la sogs pa dge sloṅ gi dge ’dun re re la ras bcos bu sar pa phrugs re re gsol to || de nas khyim bdag des stan dma’ ba źig blaṅs nas bcom ldan ’das kyi spyan sṅar chos mñan (4) pa’i phyir ’dug go || de nas bcom ldan ’das kyis khyim bdag de la chos daṅ ldan pa’i gtam gyis yaṅ dag par ston par mdzad | yaṅ dag par ’dzin du ’jud par mdzad | yaṅ dag par gzeṅs stod par mdzad || yaṅ dag par rab tu dga’ bar mdzad de | rnam (5) graṅs du mas chos daṅ ldan pa’i gtam gyis yaṅ dag par bstan | yaṅ dag par ’dzin du bcug | yaṅ dag par gzeṅs bstod | yaṅ dag par rab tu dga’ bar mdzad nas gdan las bźeṅs te gśegs so || de nas khyim bdag des bcom ldan ’das kyi slad (6) bźin pha zad tsam du soṅ nas bcom ldan ’das kyi źabs gñis la mgo bos phyag ’tshal te | bcom ldan ’das la lan gsum bskor ba byas nas | bcom ldan ’das kyi spyan sṅa nas phyir log ste raṅ gi khyim ga la ba der soṅ nas phyin pa daṅ | steṅ gi khaṅ bzaṅs (7) kyi gźir gtogs pa na gtoṅ ba rjes su dran par sgom pa na chuṅ ma la smras pa | bzaṅ mo bdag cag gis ’jig rten pha rol gyi lam rgyags maṅ du khyer gyis mchog tu dga’ ba daṅ | rjes su yi raṅ bar gyis śig | chuṅ mas smras pa | rje’i sras kyis ni ’jig rten pha (100b1) rol gyi lam rgyags bsnams na | bdag gis ma ’tshal to || bzaṅ mo bdag cag gñis kyi loṅs spyod dag thun moṅ ma yin nam | rje’i sras ’di ltar skol cag gi loṅs spyod dag thun moṅ lags mod kyi ’on kyaṅ bdag gis kyaṅ skye dgu’i bdag mo chen mo gau ta mī (2) la sogs pa dge sloṅ ma’i dge ’dun bśos gsol te | chen po la ’os pa’i gos dag phul na de lta na bdag gis caṅ ’jig rten pha rol gyi lam rgyags ’tshal bar ’gyur ro || khyim bdag gis smras pa | bzaṅ mo ci sṅar sbyin pa byin pas phyis sbyin par byar med dam | de bźin (3) gyis śig | de nas khyim bdag gi chuṅ ma de skye dgu’i bdag mo chen mo gau ta mī ga la ba der soṅ ste phyin nas skye dgu’i bdag mo chen mo gau ta mī’i rkaṅ pa gñis la mgo bos phyag ’tshal te mtha’ gcig tu ’dug go || mtha’ gcig tu ’dug nas skye dgu’i bdag mo chen mo gau ta (4) mīsa khyim bdag gi chuṅ ma de la chos daṅ ldan pa’i gtam gyis yaṅ dag par ston par byed | yaṅ dag par ’dzin du ’jud par byed | yaṅ dag par gzeṅs stod par byed | yaṅ dag par rab tu dga’ bar byed de | rnam graṅs du mas chos daṅ ldan pa’i gtam gyis (5) yaṅ dag par bstan | yaṅ dag par ’dzin du bcug | yaṅ dag par gzeṅs bstod | yaṅ dag par rab tu dga’ bar byas nas caṅ mi smra’o || de nas khyim bdag gi chuṅ ma de stan las laṅs te skye dgu’i bdag mo chen mo gau ta mī ga la ba de logs su thal mo sbyar ba btud (6) nas skye dgu’i bdag mo chen mo gau ta mī la ’di skad ces smras so || ’phags ma saṅ bdag gi sdum par dge sloṅ ma’i dge ’dun daṅ thabs cig gdugs tshod gsol bar ci gnaṅ | skye dgu’i bdag mo chen mo gau ta mīsa khyim bdag gi chuṅ ma de la caṅ mi smra bas daṅ du (7) blaṅs so || de nas khyim bdag gi chuṅ ma des skye dgu’i bdag mo chen mo gau ta mīsa caṅ mi smra bas daṅ du blaṅs par rig nas skye dgu’i bdag mo chen mo gau ta mīsa smras pa la mṅon par dga’ ba daṅ rjes su yi raṅ ba byas te | skye dgu’i bdag mo chen mo gau ta mī’i rkaṅ pa (101a1) gñis la mgo bos phyag ’tshal nas skye dgu’i bdag mo chen mo gau ta mī’i druṅ nas soṅ ṅo || de nas khyim bdag gi chuṅ ma des de ñid kyi mtshan mo bca’ ba daṅ bza’ ba gtsaṅ źiṅ bsod pa legs par sbyar nas naṅ par sṅar laṅs te stan bśams nas chuṅ bźag (2) ste skye dgu’i bdag mo chen mo gau ta mī la spyan ’dren gyis ’phags ma gdugs tshod sbyar ba’i dus lags na | da ’phags mas de’i dus la bab par mkhyen par mdzad du gsol źes dro la bos so || de nas skye dgu’i bdag mo chen mo gau ta mī sṅa dro śam thabs bgos | lhuṅ bzed (3) daṅ chos gos thogs te dge sloṅ ma’i tshogs kyis yoṅs su bskor ciṅ | dge sloṅ ma’i dge ’dun gyis mdun du bdar te khyim bdag gi chuṅ ma de’i bkad sa ga la ba der soṅ ste phyin nas dge sloṅ ma’i dge ’dun gyi goṅ du stan bśams pa ñid la ’dug go || de nas khyim bdag (4) gi chuṅ ma des skye dgu’i bdag mo chen mo gau ta mī la sogs pa dge sloṅ ma’i dge ’dun bde bar ’dug par rig nas | raṅ gi lag nas bca’ ba daṅ bza’ ba gtsaṅ źiṅ bsod pas chim par byed | stobs par byed do || rnam graṅs du mas bca’ ba daṅ bza’ ba gtsaṅ źiṅ (5) bsod pas raṅ gi lag nas tshim par byas śiṅ bstabs nas | des chen po la ’os ba’i gos dag gi sprog ma phye nas chen po la ’os pa’i gos dag thogs te rgan pa’i mtha’ logs su ’dug go || de nas skye dgu’i bdag mo chen mo gau ta mī ’di sñam du sems te | bcom ldan (6) ’das kyis dge sloṅ ma rnams la chen po la ’os pa’i gos dag dgag pa mdzad pas gal te re źig blaṅs par gyur na ni bslab pa’i gźi ’khrugs par yaṅ ’gyur | gal te ma blaṅs na ni khyim bdag gi chuṅ ma’i bsod nams kyi bar chad daṅ | dge sloṅ ma’i dge ’dun gyi (7) rñed pa’i bar chad du ’gyur ro sñam mo || dge sloṅ ma rnams kyis bsams pa | kye ma ’phags ma skye dgu’i bdag mo chen mo gau ta mīsa chen po la ’os pa’i gos dag blaṅs par gyur cig | bdag cag gis blaṅs par gyur na bcom ldan ’das kyis kyaṅ dus lags pa’i slad (101b1) du gnaṅ bar ’gyur ro sñam mo || de nas skye dgu’i bdag mo chen mo gau ta mīsa chen po la ’os pa’i gos dag blaṅs nas | khyim bdag gi chuṅ ma la yon bśad pa byas te stan las laṅs te soṅ ste | bcom ldan ’das ga la ba der soṅ ste phyin pa daṅ | bcom ldan ’das kyi (2) źabs gñis la mgo bos phyag ’tshal te mtha’ gcig tu ’dug go || mtha’ gcig tu ’dug nas skye dgu’i bdag mo chen mo gau ta mīsa skabs de bcom ldan ’das la rgyas par gsol to || de skad ces gsol pa daṅ | bcom ldan ’das kyis skye dgu’i bdag mo chen mo gau ta (3) mī la ’di skad ces bka’ stsal to || gau ta mī ṅas gnaṅ ba gaṅ yin pa de khyod kyis śes pa legs so legs so || de lta bas naṅs dge sloṅ ma rnams kyis chen po la ’os pa’i gos dag blaṅs nas dge sloṅ rnams daṅ lhan cig brje bar bya ba rjes su gnaṅ ṅo || de nas (4) dge sloṅ ma bcu gñis sde dag gis gos de dag khyer te drug sde dag gi gan du doṅ nas smras pa | ’phags pa dag bcom ldan ’das kyis dge sloṅ ma rnams la chen po la ’os pa’i gos dag dgag pa mdzad de | bdag cag gis chen po la ’os pa’i gos rñed pa ’di dag khyed bźes (5) la bdag cag la ṅan bdag stsol cig | drug sde dag gis smras pa | sriṅ mo dge bdag cag la dge sloṅ ma’i ras ma dag dgos pa med de | de’i tshe yaṅ bdag cag byis pa rmoṅs pa mi gsal ba | mi mkhas pa dag la khur dag bslaṅ bar gyur gyis bdag cag mi len to || (6) dge sloṅ ma gźan dag dge sloṅ gnas brtan gnas brtan rnams kyi druṅ du doṅ ste smras pa | ’phags pa dag bcom ldan ’das kyis dge sloṅ ma rnams la chen po la ’os pa’i gos dag dgag pa mdzad de | bdag cag gis chen po la ’os pa’i gos rñed pa ’di dag khyed bźes (7) la | bdag cag la ṅan pa dman pa dag stsol cig | sriṅ mo dag bcom ldan ’das la źu’o źes zer ba’i skabs de dge sloṅ rnams kyis bcom ldan ’das la gsol pa daṅ | bcom ldan ’das kyis bka’ stsal pa | de lta bas na brjes pa ma gtogs te | de la brje ba (102a1) ni ’di yin te | de tsam gyis sam | ji tsam gyis dge sloṅ ma dga’ bar ’gyur bas brje bar bya’o || de nas bcom ldan ’das kyis bslab pa ’dod pa’i bsṅags pa brjod de | bslab pa la gus pa daṅ | bslab pa la yo byad bsñuṅs pa daṅ | sbyaṅs (2) pa’i yon tan daṅ | phri ba daṅ | drod rig pa’i bsṅags pa brjod do || dge sloṅ rnams la yaṅ de daṅ mthun pa daṅ | de daṅ ’tsham pa daṅ | de’i śas che ba daṅ | de daṅ ldan pa’i chos daṅ mthun pa’i bka’ mchid mdzad nas dge sloṅ rnams la bka’ stsal pa | dge sloṅ dag (3) de lta bas na sṅa ma ni bcas pa yin la | ’di ni gnaṅ ba yin te | ṅa’i ñan thos rnams kyis ’dul ba la bslab pa’i gźi ’di ltar gdon par bya ste | yaṅ dge sloṅ gaṅ dge sloṅ ma ñe du ma yin pa las gos len na brjes pa ma gtogs te spaṅ ba’i ltuṅ byed do || yaṅ dge sloṅ gaṅ (4) źes bya ba ni ñe dga’ ’am gźan yaṅ de lta bu gaṅ yin pa’o || dge sloṅ ma źes bya ba ni chos ’di ba’o || ñe du ma yin pa las źes bya ba ni phyi mo daṅ | mes po daṅ | phrugs kyi bdun pa tshun chad ñe du yin la de phan cad ni ñe du ma yin no || gos źes bya ba ni gos bdun po (5) bal gos daṅ | śa na’i gos daṅ | zar ma’i gos daṅ | du gu la’i gos daṅ | ras bal gyi gos daṅ | ko tam pa’i gos daṅ | ñi ’og gi gos las gaṅ yaṅ ruṅ ba’o || len na źes bya ba ni bdag gir byed na’o || brjes pa ma gtogs te źes bya ba ni brjes (6) pa bźag ste’o || spaṅ ba’i ltuṅ byed do źes bya ba ni dṅos po de spaṅs nas ltuṅ byed kyi ltuṅ ba bśags par bya ba ste | des na spaṅ ba’i ltuṅ byed do źes gsuṅs so || de la ltuṅ bar ji ltar ’gyur źe na | dge sloṅ gis dge sloṅ ma ñe du ma yin pa la ñe du ma yin pa’i ’du śes kyis (7) gos len na spaṅ ba’i ltuṅ byed du ’gyur ro || dge sloṅ gis dge sloṅ ma ñe du ma yin pa la yid gñis za bas gos lan na spaṅ ba’i ltuṅ byed du ’gyur ro || dge sloṅ gis dge sloṅ ma ñe du la ñe du ma yin pa’i ’du śes kyis gos len na ñes byas su ’gyur ro || dge sloṅ gis (102b1) dge sloṅ ma ñe du la yid gñis za bas gos len na ñes byas su ’gyur ro || dge ’dun la gos ’bul ba daṅ | legs par smra ba la ltuṅ ba med do || rdzogs par bsñen pa byed pa daṅ bor rlag byuṅ ba la ltuṅ ba med do || rin gyis len pa daṅ | brjes pa la ltuṅ ba med do || dge (2) sloṅ ma grags pa bsod nams che ba yin la | des dge sloṅ gi mdun du bźag nas ’di skad ces ’phags pa bdag la rdzas ’di lta bu dag mchis kyis | ’phags pas bdag la thugs brtse ba’i slad du bźes śig ces brjod de mi ltos par soṅ ba la ltuṅ ba med do || las daṅ po pa (3) daṅ | smyos pa daṅ | sems ’khrugs pa daṅ | tshor ba dag gis ñen pa la ltuṅ ba med do || len pa’i spaṅ ba ste lṅa pa rdzogs s+ho || ||

.