[Naiḥsargika 16]
saṅs rgyas bcom ldan ’das mñan yod na rgyal byed kyi tshal mgon med zas sbyin gyi kun dga’ ra ba na bźugs so || drug sde dag gis smras pa | dga’ bo ñe dga’ lhuṅ bzed nag po can ’di dag ni rkaṅ pa spre’u’i źag gis bskus te ’gro na yaṅ ’gro (4) bar chas pa’i rñed pa sgrub par byed | ’oṅ na yaṅ blo bur du ’oṅs pa’i rñed pa sgrub par byed ciṅ skye bo maṅ po dga’ ba daṅ | yid du ’oṅ bar yaṅ ’gyur ro || yu bu cag ni khro na pa’i rus sbal daṅ ’dra bar gar yaṅ mi ’doṅ | gaṅ nas kyaṅ mi ’oṅ bas rñed pa ’thob pa daṅ | (5) skye bo maṅ po dga’ ba daṅ | yid du ’oṅ bar ga la ’gyur gyis yu bu cag kyaṅ ’doṅ ṅo || gaṅ du ’doṅ | gaṅ du don mthun ’grub par ro || de dag gis bsams pa | gal te thams cad doṅ bar ’gyur na bdag cag gi ñe bar spyod pa’i khyim gaṅ dag yin pa de dag kyaṅ (6) lhuṅ bzed nag po can dag gis rjes su ’jug par byed par ’gyur gyis | bdag cag gis gcig bźag ste ’doṅ bar bya na su bźag par bya | btsun pa ’char ka’o || btsun pa ’char ka khyod ’di ñid du ’dug śig | kho bo cag ’doṅ bar bya’o || de bźin gyis śig ces (7) ’char ka de ñid du ’dug go || lṅa po dag gis don mthun btsal bar brtsams pa daṅ | de dag gis bal yul du ’gro ba’i don mthun mthoṅ nas | de’i druṅ du soṅ ste smras pa | bźin bzaṅs dag khyed gaṅ du ’phags | ’phags pa dag bal yul du’o || bźin (137a1) bzaṅs dag kho bo cag kyaṅ khyed daṅ lhan cig ’doṅ ṅo || ’phags pa dag bal yul ni rṅa mo’i rgyab ’dra ba lags pas | khyed cag der dgyes par mi ’gyur ro || bźin bzaṅs dag gal te de lta bu yin du zin kyaṅ | yul mthoṅ bar ’gyur bas (2) ’doṅ bar bya’o || ’phags pa dag gal te de ltan tshur sbyon bźud do || drug sde dag don mthun de dag daṅ lhan cig bal yul du ’phags nas mthar gyis bal yul du phyin pa daṅ | ñi ma gaṅ kho na la bal yul du phyin pa’i ñi ma de ñid la mṅon par mi dga’ bar gyur nas de (3) dag naṅ par sṅar laṅs te lam sraṅ du doṅ ba daṅ | tshoṅ pa dag gis drug sde dag mthoṅ nas de dag gi rkaṅ pa la phyag ’tshal te smras pa | ’phags pa dag bal yul ci ’dra | khyed cag mṅon par mi dgyes par ma gyur tam | bźin bzaṅs dag ñi ma gaṅ kho na la bal yul (4) du phyin pa’i ñi ma de ñid la mṅon par mi dga’ bar gyur to || ’phags pa dag bdag cag gis khyed la daṅ po kho na nas bal yul ni rṅa mo’i rgyab ’dra ba lags pas | khyed cag der dgyes par mi ’gyur ro źes ma bgyis sam | bźin bzaṅs dag ci de lta na ’gro’am ’doṅ (5) ṅo || ’phags pa dag bdag cag gis zoṅ ma bsgyur de de lta lags mod kyi ’on kyaṅ bdag cag daṅ bśes pa’i tshoṅ pa gźan dag mchis pa de dag gis zoṅ bsgyur bas de dag la gtad par bgyis de dag daṅ thabs cig bźud cig | drug sde dag gis smras pa | de ma noṅs (6) kyis de bźin bgyi’o || bal yul na bal daṅ ldoṅ ros gñis mod pas don mthun de dag gis bal gyis śiṅ rta bakaṅaste chas pa daṅ | drug sde dag kyaṅ don mthun de daṅ lhan cig ’phags so || drug sde dag gi kun du spyod pa ni rdul gyis ’jigs pas yaṅ na ni don (7) mthun gyi mdun du ’gro | yaṅ na ni phyi bźin ’braṅ źiṅ ’gro bas de dag don mthun gyi phyi bźin ’gro bar brtsams pa daṅ | ji tsam na tshoṅ pa de dag gi śiṅ rta’i srog śiṅ chag nas tshoṅ pa de dag gis bsams pa | gal te śiṅ rta’i srog śiṅ bcos na sgras chom rkun pa dag (137b1) ’oṅ bar ’gyur źiṅ de dag gis daṅ por bdag cag bsad par ’gyur la de’i ’og tu nor yaṅ phrogs par ’gyur gyis | bdag cag gis gces pa dag khyer te ’doṅ ṅo sñam nas yid mi dga’ źiṅ ’khod pa daṅ | drug sde dag lhags nas de dag gis smras pa | śes ldan dag ci’i (2) phyir yid mi dga’ źiṅ ’khod | ’phags pa dag śiṅ rta’i srog śiṅ chag ste gal te śiṅ rta’i srog śiṅ bcos na sgras chom rkun pa dag mchis par ’gyur źiṅ de dag gis daṅ por bdag cag bkum par ’gyur la | de’i ’og tu nor yaṅ phrogs par ’gyur bas bdag cag gis (3) gces pa dag ’tshal de mchi’o sñam nas yid mi dga’ źiṅ mchis so || bźin bzaṅs dag khyod kyis bal dag yoṅs su btaṅ ṅam | yoṅs su btaṅ ṅo || gal te khyed cag la mi gnod na źwa daṅ | lham sgrog gu can daṅ | stod kor naṅ tshaṅs can daṅ | rgya (4) caṅ daṅ | lcag pod daṅ | śur bu phre’u la sogs pa’i don du cuṅ źig bskur ro || ’phags pa dag bdag cag la ’dis ci bgyi | thams cad snoms śig | drug sde dag gis smras pa | dga’ bo ñe dga’ phyag dar khrod pa rñed do źes de dag gis lṅa car gyi lhuṅ (5) bzed daṅ chos gos dag gcig gis bskur nas | mi bźis de ñid las thag pa bkal de khur bo che ba bźi drags nas | de dag gis de khur te doṅ ṅo || de dag gis khur de dag khyer te ’phags pa daṅ | tshoṅ pa de dag gis drug sde dag bal gyi khur blaṅs te phyi bźin (6) ’oṅs pa mthoṅ nas smras pa | ’phags pa dag bdag cag gis gla mi dag khrid de mchi’o sñam du bsams nas | khyed cag gis pal ’di thams cad bsnams de byon gyis ’phags pa dag la gla gsol lo || bkren pa dag kho bo cag khyod kyi gla mi dag yin nam | (7) ’phags pa dag mad kyaṅ bźad gad bgyi’o || don mthun de’i naṅ na mu stegs can dag cig ’doṅ ba de dag gis smras pa | kye ma drug sde dag khyed cag gaṅ du khur ’jig par ’gyur | gaṅ du rñed pa ’grub par ’gyur | khyod kyi ma’i lto dral te der khur ’jig par ’gyur (138a1) źiṅ der rñed pa ’grub par ’gyur ro || drug sde dag gis smras pa | dga’ bo ñe dga’ gal te don mthun daṅ lhan cig ’doṅ na tho ’tsham pa maṅ du ’byuṅ gis don mthun gyi mdun du ’doṅ ṅo źes de dag don mthun gyi mdun du ’phags te doṅ ba daṅ | ri brags śig (2) na chom rkun pa gcad pa’i phyir yaṅ rgod kyi mi maṅ bo bkod ciṅ ’khod pa de dag gis de dag thag riṅ po kho na nas mthoṅ ṅo || mthoṅ nas kyaṅ ñam ṅa bar gyur nas de dag gis smras pa | śes ldan dag glaṅ po che daṅ bcas pa’i dmag byuṅ ṅo źes ri brags la de dag thams cad skrag (3) nas nags khrod du byer ro || de dag gi naṅ nas kha cig gis smras pa | ’di dag ni glaṅ po che daṅ bcas pa’i dmag ma yin gyi ’di ltar rṅa mo dag cig ’oṅ ba yin no || kha cig gis smras pa | ’di dag ni rṅa mo ma yin gyi ’di ltar glaṅ dag cig yin no || kha cig (4) gis smras pa | ’di dag ni glaṅ ma yin gyi ’di dag ni khur thogs pa dag cig yin no || de dag thag ñe bar gyur pa daṅ | yaṅ rgod de dag gis smras pa | ’phags pa dag khyed cag ’di lta bu’i khur dag thogs pas de’i phyir ri brags pa thams cad skrag ste nags (5) khrod du byer ro || bkren pa dag gal te chom rkun pa dag gis khyed cag de dag bred ṅas par śes par gyur na ñin mo’i ñi ma kho na la yaṅ bciṅs te nags khrod du khrid par ’gyur ro || dga’ bo ñe dga’ gal te lam du ’doṅ na tho ’tsham pa maṅ du ’byuṅ gis lam gol bar (6) ’doṅ ṅo || źes de dag lam gol bar źugs te doṅ ba daṅ | śo gam pa dag gis tshoṅ pa śo ga ma ’dral ba bsgugs pa’i phyir ’ge gu pa’i mi maṅ po dag bkod ciṅ ’khod pa de dag gis de dag mthoṅ nas smras pa | e ma’o tshoṅ pa śo gam ’dral ba dag ci’i phyir (7) śo gam dral te ’doṅ | bkren pa dag kho bo cag khyed kyi tshoṅ pa śo gam ’dral ba dag yin nam | khyed cag su yin | ’phags pa drug sde dag yin no || bźud cig de dag gis smras pa | dga’ bo ñe dga’ gal te rgyal byed gyi tshal gyi sgo nas źugs na (138b1) lhuṅ bzed nag po can dag las tho ’tsham pa maṅ du ’byuṅ gis sge’u chuṅ nas ’jug par bya’o źes de dag sge’u chuṅ nas źugs pa daṅ | rgan źugs źig gis mthoṅ nas des smras pa | e ma’o khur tsa ba dag ci’i phyir groṅ dral te ’jug par byed | rgan źugs kho bo cag (2) khyod kyi khur tsa ba dag yin nam | des smras pa khyed su yin | tshe daṅ ldan pa drug sde dag yin no || tshe daṅ ldan pa dag byon pa legs so byon pa legs so || de dag naṅ du źugs nas de dag gi bal gyi khur de dag bśig pa daṅ | ri rab gyi rnam pa ’dra ba’i phuṅ po chen (3) por rnam par gnas so || de dag la dge sloṅ rnams kyis smras pa | tshe daṅ ldan pa dag khyed cag khur ’di lta bu dag thogs nas khyed la tho ’tsham pa dag mi ’byuṅ ṅam | tshe daṅ ldan pa dag khyed ci kho bo cag gis bza’ ba kho na’i phyir kha mṅon par bsgrubs sam | gaṅ (4) kho bo cag la tho ’tsham par byed pa de la kho bo cag gis kyaṅ ñis gyur sbyin par bya’o || dge sloṅ dag don ñuṅ bdag ci’i phyir | dge sloṅ dag yan lag gaṅ gis ṅo tsha bar bya ba’i yag lag de ñid kyis kheṅs par byed ces smod par byed | phyar ka gtoṅ bar byed | kha (5) zer bar byed pa’i skabs de dge sloṅ rnams kyis bcom ldan ’das la gsol to || de nas bcom ldan ’das kyis byuṅ ba ’di daṅ | gleṅ gźi ’di daṅ | skabs ’di la dge sloṅ gi dge ’dun bsdu ba mdzad do źes bya ba la sogs pa sṅa ma bźin no || saṅs rgyas (6) bcom ldan ’das rnams ni mkhyen bźin du rmed par mdzad pa ste źes bya ba la sogs pa yaṅ sṅa ma bźin no || saṅs rgyas bcom ldan ’das kyis drug sde dag la rmas pa | dge sloṅ dag khyed kyis mi mdzes pa de lta bu de byas par gyur pa bden nam | btsun pa (7) mad do || saṅs rgyas bcom ldan ’das kyis dge sbyoṅ gi tshul ma yin pa | rjes su mthun pa ma yin pa | ruṅ ba ma yin pa | tshul daṅ mthun pa ma yin pa de ni rab tu byuṅ bas bya ba ma yin no źes rnam par smad pa mdzad do || de nas bcom ldan ’das kyis rnam (139a1) graṅs du mas rnam par smad pa mdzad nas | dge sloṅ rnams la bka’ stsal pa | dge sloṅ dag de lta bas na phan yon bcu yaṅ dag par gzigs pas ’dul ba la ñan thos rnams kyi bslab pa’i gźi bca’ bar bya ste źes bya ba la sogs pa sṅa ma (2) bźin no || ṅa’i ñan thos rnams kyis ’dul ba la bslab pa’i gźi ’di ltar gdon par bya ste | dge sloṅ lam du źugs pas lug bal dag rñed la ’dod na dge sloṅ des blaṅ bar bya’o || blaṅs nas khyer ba med na dpag tshad gsum gyi mtha’i bar du bdag ñid kyis bkur (3) bar bya’o || de las ’das par khyer na spaṅ ba’i ltuṅ byed do || dge sloṅ źes bya ba ni drug sde dag gam | gźan yaṅ de lta bu gaṅ yin pa’o || lam du źugs pas źes bya ba ni | dgon pa’i lam du źugs pas so || lug bal dag ces bya ba ni lug gi bal (4) dag go || rñed pa źes bya ba ni gźan las so || ’dod na źes bya ba ni gal te don du gñer na’o || dge sloṅ des blaṅ bar bya’o źes bya ba ni mnod par bya ba’o || blaṅs nas khyer ba med na źes bya ba ni ruṅ ba byed pa med na’o || dpag tshad gsum gyi mtha’i bar du źes bya ba ni (5) dpag tshad gsum gyi mthar thug pa’i bar tshun chad du’o || bdag ñid kyis bkur bar bya’o || źes bya ba ni bdag raṅ gis bkur bar bya ba’o || de las ’das par khyer na źes bya ba ni de las thal bar khyer na’o || spaṅ ba’i ltuṅ byed do źes bya ba ni dṅos po de spaṅs (6) nas ltuṅ byed kyi ltuṅ ba bśags par bya ba ste | des na spaṅ ba’i ltuṅ byed do źes gsuṅs so || de la ltuṅ bar ji ltar ’gyur źe na | dge sloṅ gis lug bal dag rñed la khyer ba med na bdag ñid kyis dpag tshad gsum gyi mtha’ las ’das par khyer na rgyaṅ grags phyed (7) du phyin na ñes byas su ’gyur la | rgyaṅ grags kyi mthar phyin na spaṅ ba’i ltuṅ byed du ’gyur ro || khyer ba yod bźin du bdag ñid kyis khyer na rtsom pa’i dus kho na na ñes byas su ’gyur la | rgyaṅ grags phyed du phyin na ñes byas su gźan gcig tu ’gyur | rgyaṅ grags (139b1) kyi mthar phyin na spaṅ ba’i ltuṅ byed du ’gyur ro || rdul phra rab drug la rdul phra mo gcig go || rdul phra mo drug la chu rdul gcig go || chu rdul drug la lcag rdul gcig go || lcag rdul drug la ri boṅ gi rdul gcig go || ri boṅ rdul drug la lug rdul gcig go || lug (2) rdul drug la glaṅ rdul gcig go || glaṅ rdul drug la ñi zer gyi rdul gcig go || ñi zer gyi rdul drug la sro ma gcig go || sro ma drug la śig gcig go || śig drug la nas gcig go || nas drug la sor gcig go || sor bźi drug la khru gaṅ ṅo || khru phyed daṅ (3) bźi la mi’i srid do || khru bźi la gźu’o || gźu lṅa brgya la rgyaṅ grags gcig go || rgyaṅ grags brgyad la dpag tshad gcig go || de la dge sloṅ dgon pa pa lam du źugs pas lug bal dag rñed la | de blaṅs te khyer ba med na rgyaṅ grags kyis chod pa’i groṅ bdun po (4) dag gi groṅ phyed du ni ñes byas su ’gyur la | groṅ gi mthar ni spaṅ ba’i ltuṅ byed du ’gyur ro || groṅ nas dgon pa’i lam du ’jug na rgyaṅ grags phyed phyed du ñes byas su ’gyur la | rgyaṅ grags re rer spaṅ ba’i ltuṅ byed du ’gyur ro || źwa daṅ | lham sgrog gu can daṅ | (5) stod kor naṅ tshaṅs can daṅ | rgya caṅ daṅ | lcag pod daṅ | śur bu phre’u la sogs pa’i don du de tsam dag khyer ba la ni ltuṅ ba med do || las daṅ po pa daṅ | smyos pa daṅ | sems ’khrugs pa daṅ | tshor bdag gis ñen pa la ltuṅ ba med do || bal thogs (6) pa’i spaṅ ba ste bcu drug pa rdzogs s+ho || ||

.