’od srung bzhi po ’di dag ni byang chub sems dpa’ dmu rgod de | bzhi gang zhe na | ’di lta ste | thos pa la gces pa ’dor ba’i chos su gnas shing chos kyi rjes su ’thun pa’i chos sgrub pa la nan tan du mi byed pa yin || rjes su bstan pa la gces pa ’dor ba’i chos su gnas shing slob dpon dang mkhan po la sri zhu mi byed pa yin | dam bcas pa las nyams kyang dad pas byin pa la kun du spyod de | dad pas byin pa log par ltung bar byed pa yin | byang chub sems dpa’ dul ba cang shes rnams mthong na mi gus shing nga rgyal ’dzin pa yin te | ’od srung bzhi po de dag ni byang chub sems dpa’ dmu rgod do || de la ’di skad ces bya ste
| thos pas rgod pa gnas par byed pa yin || rjes su bstan pa’i chos nyid rtogs mi ’gyur |
| de ni chos kun gces pa ’dor ba sten || ’phags pa rnams la nam yang sri zhu med |
| dam bcas nyams kyang dad pas byin pa yi || kha zas rnams la de ni rtag tu za |
| byang chub sems dpa’ cang shes thob pa dag || mthong bar gyur na gus par mi byed cing |
| dmu rgod de ni nga rgyal ’phel bar byed || byang chub sems dpa’ nga rgyal bcag mi sten |
| ’di dag dmu rgod bde bar gshegs pas gsungs || de dag rgyal sras rnams kyis yongs su spang ||