rgya gar skad du: ārya akṣa ya ma ti nirde śa ṭī kā, bod skad du: ’phags pa blo gros mi zad pas bstan pa rgya cher ’grel pa.
tshig gi mnga’ bdag ’jam dpal gzhon nur gyur pa la phyag ’tshal lo.
ston pa’i gtso bo sangs rgyas bcom ldan dang, bstan pa ’jug byung dam pa’i chos mchog dang, ’chad du ’jug dang ’chad pa ’khor gyi gtso, shā ri’i bu dang blo gros mi zad dang, gzhan yang mtshan smos ’di dag gis mtshon pa’i, ’gro ba gsum gyi bla ma dkon mchog gsum, phyogs dus kun na bzhugs pa ma lus la, spyi bo sa la gtugs te phyag ’tshal nas, spyod pa gang gis ’phags rnams nges ’byung tshul, thabs mkhas ’dus pa chen po nges pa ’di, bdag pas blo zhan rnams la phan gdags phyir, bla ma’i lung las brten te tshig tsam dbye.
’di la dgos pa dang, brjod par bya ba dang, ’brel pa dang, bsdus pa’i don dang, tshig gi don rnam pa ’di lngas bshad par bya’o. de la mdo sde’i dgos pa ni mi gnas pa’i mya ngan las ’das pa ste, de thabs ’dis thob par byed pa’i phyir ro. brjod par bya ba ni mi zad pa brgyad cu ste: de la mi zad pa brgyad cu ni sems bskyed pa dang, bsam pa dang, sbyor ba dang, lhag pa’i bsam pa dang, pha rol tu phyin pa drug dang, tshad med pa bzhi dang, mngon par shes pa lnga dang, bsdu ba’i dngos po bzhi dang, so so yang dag par rig pa bzhi dang, rton pa bzhi dang, bsod nams kyi tshogs dang, ye shes kyi tshogs dang, byang chub kyi phyogs sum cu rtsa bdun dang, zhi gnas dang, lhag mthong dang, gzungs dang, spobs pa dang, chos kyi mdo bzhi dang, bgrod pa gcig gi lam du gyur pa dang, thabs la mkhas pa’o. ’brel pa ni de gnyis ’brel pa ste, thabs dang thabs can du gyur pa’i phyir ro. bsdus pa’i don ni rnam pa bcu dgu ste: gleng gzhi dang, gleng bslang ba dang, chos rnams kyi gzhi dang, de’i ’bras bu dang, bdag dang gzhan gyi don byed pa dang, snying brtse ba dang, yo byad dang, yongs su smin par bya ba’i mthu dang, bstan par bya ba’i mthu ’thob pa dang, de’i thabs shes pa dang, tshogs kyi lam dang, sbyor ba’i lam dang, mthong ba’i lam dang, sgom pa’i lam dang, der sbyor bar byed pa dang, lung bstan pa thob pa dang, de thob par bya ba rnam par gzhag pa dang, rang byang chub dang, chos kyi ’khor lo bskor ba ste; de la bsdus pa’i don bstan pa ni mdo sde’i don bde bar zin par bya ba’i phyir ro. de la ’di skad bdag gis thos pa zhes bya ba nas brtsams te, tshad med brjod du med pa’i byang chub sems dpa’ dang thabs gcig go zhes bya ba yan chad kyis gleng gzhi bstan to, de nas bcom ldan ’das byang chub sems dpa’i spyod pa la ’jug pa zhes bya ba nas brtsams te, chos nyan pa’i phyir ’dus so zhes bya ba yan chad kyis gleng bslang ba bstan to, de nas tshe dang ldan pa sha ra dva ti’i bus zhes bya ba nas brtsams te, ’di ni byang chub sems dpa’ rnams kyi sems mi zad pa’o zhes bya ba yan chad kyis chos rnams kyi gzhi bstan to, gzhan yang sha ra dva ti’i bu byang chub sems dpa’ rnams kyi bsam pa mi zad pa zhes bya ba nas brtsams te, ’di ni lhag pa’i bsam pa mi zad pa’o zhes bya ba yan chad bsam pa dang, sbyor ba dang, lhag pa’i bsam pa gsum gyis de’i ’bras bu bstan to, de nas tshe dang ldan pa sha ra dva ti’i bus zhes bya ba nas brtsams te, sngon gyi sbyangs pa byas pa stong phrag sum cu rtsa gnyis mi skye ba’i chos la bzod pa thob pa yan chad pha rol tu phyin pa drug gis bdag dang gzhan gyi don byed pa bstan to, de nas byang chub sems dpa’ blo gros mi zad pas zhes bya ba nas brtsams te, btsun pa sha ra dva ti’i bu byang chub sems dpa’ rnams kyi btang snyoms mi zad pa zhes bya ba yan chad kyis snying brtse bstan to, gzhan yang btsun pa sha ra dva ti’i bu zhes bya ba nas brtsams te, byang chub sems dpa’ rnams kyi mngon par shes pa lnga mi zad pa zhes bya ba yan chad kyis yo byad (4a) bstan to, gzhan yang btsun pa sha ra dva ti’i bu zhes bya ba nas brtsams te, bsdu ba’i dngos po bzhi mi zad pa zhes bya ba yan chad kyis yongs su smin par bya ba’i mthu bstan to, gzhan yang btsun pa sha ra dva ti’i bu zhes bya ba nas brtsams te, so so yang dag par rig pa bzhi mi zad pa zhes bya ba yan chad kyis bstan par bya ba’i mthu ’thob pa bstan to, gzhan yang btsun pa sha ra dva ti’i bu zhes bya ba nas brtsams te, rton pa bzhi mi zad pa zhes bya ba yan chad kyis de’i thabs shes pa bstan to, gzhan yang btsun pa sha ra dva ti’i bu zhes bya ba nas brtsams te, bsod nams dang ye shes kyi tshogs mi zad pa’o zhes bya ba yan chad kyis tshogs kyi lam bstan to, btsun pa sha ra dva ti’i bu zhes bya ba nas brtsams te, ’di dag ni byang chub sems dpa’ rnams kyi stobs mi zad pa’o zhes bya ba yan chad kyis sbyor ba’i lam bstan to, gzhan yang btsun pa sha ra dva ti’i bu zhes bya ba nas brtsams te, byang chub kyi yan lag bdun no zhes bya ba yan chad kyis mthong ba’i lam bstan to, gzhan yang btsun pa sha ra dva ti’i bu zhes bya ba nas brtsams te, lam mi zad pa’o zhes bya ba yan chad kyis sgom pa’i lam bstan to, gzhan yang btsun pa sha ra dva ti’i bu zhes bya ba nas brtsams te, zhi gnas dang lhag mthong mi zad pa’o zhes bya ba yan chad kyis der sbyor bar byed pa bstan to, gzhan yang btsun pa sha ra dva ti’i bu zhes bya ba nas brtsams te, gzungs dang spobs pa mi zad pa zhes bya ba yan chad kyis lung bstan pa thob pa bstan to, gzhan yang btsun pa sha ra dva ti’i bu zhes bya ba nas brtsams te, chos kyi mdo bzhi mi zad pa zhes bya ba yan chad kyis de thob pa rnam par gzhag pa bstan to, gzhan yang btsun pa sha ra dva ti’i bu zhes bya ba nas brtsams te, bgrod pa gcig pa’i lam mi zad pa zhes bya ba yan chad kyis rang byang chub bstan to, gzhan yang btsun pa sha ra dva ti’i bu zhes bya ba nas brtsams te, thabs mi zad pa zhes bya ba yan chad kyis chos kyi ’khor lo rab tu bskor ba bstan to.
tshig gi don ni bsdus pa’i don rig par bya ba’i phyir te, ’di skad bdag gis thos pa dus gcig na zhes bya ba la sogs pa’i don rgyas par ston pa gang yin pa’o.
Title
