de nas bcom ldan ’das la ’jam dpal gźon nur gyur pa daṅ | byaṅ chub sems dpa’ sems dpa’ chen po byams pas ’di skad ces gsol to || bcom ldan ’das slad ma’i dus lṅa brgya pa tha ma la ci nas kyaṅ chos kyi rnam graṅs ’di rgyas par ’gyur źiṅ skye bo maṅ po’i sug par phyin par ’gyur ba daṅ | de la bdud dam bdud kyi ris kyi lha dag gis glags rñed par mi ’gyur ba de ltar byin gyis brlab tu gsol || de nas bcom ldan ’das kyis chos kyi rnam graṅs ’di byin gyis brlab pa’i phyir g-yas g-yon du gzigs so || bcom ldan ’das kyis de ltar gzigs ma thag tu de’i tshe phyogs bcur saṅs rgyas kyi źiṅ gaṅ gā’i kluṅ gi bye ma rñed rnam pa drug tu g-yos par gyur | rab tu g-yos par gyur | kun tu g-yos par gyur to || de’i tshe bcom ldan ’das kyis chos kyi rnam graṅs ’di byin gyis brlab pa mdzad de | saṅs rgyas bcom ldan ’das gźan dag gis kyaṅ ’jig rten gyi khams gaṅ gā’i kluṅ gi bye ma sñed dag nas chos kyi rnam graṅs ’di byin gyis brlabs so || bcom ldan ’das kyis chos kyi rnam graṅs ’di bstan pa’i tshe phyogs bcu na gaṅ gā’i kluṅ gi bye ma ji sñed yod la de bas kyaṅ śin tu maṅ ba’i sems can rnams kyis mi skye ba’i chos la bzod pa thob par gyur to || gaṅ dag ñan thos ñid la gnas par gyur pa daṅ | slob pa’i sa’am | mi slob pa’i sa la gnas par gyur pa dag ni smos kyaṅ mi smos so || de nas bcom ldan ’das la tshe daṅ ldan pa dga’ bos ’di skad ces gsol to || bcom ldan ’das chos kyi rnam graṅs ’di’i miṅ ci źes bgyi | ji ltar gzuṅ bar bgyi | bcom ldan ’das kyis bka’ stsal pa | dga’ bo de bas na chos kyi rnam graṅs ’di chos thams cad ’byuṅ ba med pa źes bya bar zuṅ śig | bcom ldan ’das kyis de skad ces bka’ stsal pa daṅ | ’jam dpal gźon nur gyur pa daṅ | byaṅ chub sems dpa’ byams pa daṅ | lha’i bu pad mo rnam par rol pa’i mṅon par śes pa daṅ | byaṅ chub sems dpa’i tshogs chen po de daṅ | dge sloṅ lṅa brgya tsam po de dag daṅ | tshe daṅ ldan pa kun dga’ bo daṅ | lha daṅ | mi daṅ | lha ma yin daṅ | dri zar bcas pa’i ’jig rten bcom ldan ’das kyis gsuṅs pa la yi raṅs te mṅon par dga’o ||