daṅ por mṅon par mtho ba’i chos | | phyis ni ṅes par legs ’byuṅ ba | |
gaṅ phyir mṅon par mtho thob nas | | rim gyis ṅes par legs pa ’oṅ | |

de lta bu la dgoṅs nas ’phags pa chos kyi gral rims śom par mdzad pa na sems can snod du gyur pa rnams la thabs mi ñams par bya ba’i phyir | gaṅ źig la | daṅ po mṅon par mtho ba’i chos | | źes bya ba la sogs pa chos kyi go rims ston par mdzad do | | gaṅ źig la źes pa ni mṅon par mtho ba’i chos gaṅ źig la gnas na thos pa daṅ bsam pa la sogs pa’i rim gyis dus phyis ṅes par legs pa ’byuṅ ba bsam gtan daṅ śes rab kyi mtshan ñid ’byuṅ źiṅ srid pa’o | | daṅ por źes pa ni sṅar ro | | mṅon par mtho ba’i rgyu yin pa’i phyir mṅon par mtho ba ste | rgyu la ’bras bu btags pa’i phyir | | dper na tshe ni mar yin no | | źes pa lta bu’o | | ’di ga las śe na | de la mṅon mtho bde bas te | | źes ’byuṅ ba’i phyir ro | | bde ba ni chos yin par rigs pa ma yin te | de’i ’bras bu yin pa’i phyir ro | | ṅes par legs pa la de bźin du brjod par bya’o | | chos ni bśad pa’i mtshan ñid ’jig rten pa’i phun sum tshogs pa la gnas pa’i bde ba thob pa daṅ mthun pa’i sbyin pa daṅ | tshul khrims la sogs pa’i mtshan ñid do | | chos rnam pa gñi ga’i yaṅ ’bras bu ’brel pa mi slu ba ston pa na ’bras bu sgrub par byed pa kho na’i chos ston par mdzad do | | mṅon par mtho ba daṅ ṅes par legs pa sṅar bśad pa’i dgoṅs pa tshigs su bcad pas bśad pa de ma śes pa’i phyir gal te ’ga’ źig ’di skad ces ci’i phyir rim pa ’di la brten źes smra na | de’i phyir rgyu | gaṅ phyir mṅon par mtho thob nas | | źes bya ba la sogs pa smos te | rgyu gaṅ gi phyir thob ciṅ rñed nas so | | rim ni rim pa’o | | rim gyis źes bya ba ni rim pa la brten nas te | nas źes bya ba ni mi mṅon par byas pa’i lṅa pa yin no | | yaṅ na rim gyis źes bya ba rim pas źes gsum pa’i don yin no | | ’oṅ bar ni ’oṅ bar ’gyur ba’o | | bzlog pa ni sṅar bśad pa yin no | |