|| da ni rnam pa gsum gyis ’bras bu la bstod pa las | re źig dpe med pa las bstod pa de las rgyu gaṅ gis dpe med pa ñid daṅ | rnam pa gaṅ gis daṅ | gaṅ daṅ bcas pas dpe (4)med ces bya ba ste | dbye ba gsum mo | | de la rgyu gaṅ gis dpe med pa ñid brñes pa ni | | mtho la phrag dog mi mdzad ciṅ | | źes bya ba’i tshigs su bcad pas de bśad par bya ste | mtho la phrag dog mi mdzad ciṅ | | dma’ la rṅan can mi mdzad la | | mñam la ’gran pa mi mṅa’ (5)bas | | khyod ni ’jig rten gtso bor gyur | | ’jig rten pa phal che ba thos pa daṅ tshul khrims la sogs pa’i khyad par daṅ ldan pa’i gaṅ zag rnams la phrag dog skye ste | gźan gyi yon tan bzod mi nus pa źes bya ba’i don to | | dma’ ba rnams la rṅan can ni rṅan can gyi blo daṅ | (6)mñam pa daṅ bcas pa la ’gran pa ni phan tshun zil gyis gnon pa yin no | | bcom ldan ’das kyaṅ byaṅ chub sems dpa’i gnas skabs su mtho ba rnams la phrag dog mi mdzad de | yon tan kun du ’dzin pa’i phyir ro | | dma’ ba la rṅan can mi mdzad pa ni de rnams la yaṅ yon tan (7)yaṅ dag par stsal ba’i phyir ro | | mñam la ’gran pa mi mṅa’ ba ni ñe bar blaṅs pa’i yon tan rnams brtan par mdzad pa’i phyir ro | | ’gran pas ni bar chad du ’gyur źes bya ba’o | | rgyu gsum po de rnams kyis khyod ces pa ni bcom ldan ’das ’jig rten gyi gtso bor gyur pa ni | dpe (131b1)med pa ñid thob par gyur źes bya ba’i don to |