|| shes rab kyi pha rol tu phyin pa brgyad stong pa | bam po lnga pa | bcom ldan ’das ’di lta ste dper na rin thang ma mchis pa’i nor bu rin po che yon tan ’di lta bu’i ngo bo ’di dag dang ldan pa zhig mchis te | ’di lta ste de gang dang (4) gang du bzhag pa de dang der mi dang mi ma lags pa dag gis glags rnyed par mi ’gyur | gang dang gang du skyes pa ’am bud med la la mi ma lags pas zin pa de dang der nor bu rin po che chen po de stsal ma thag tu mi ma lags pa de de nas ’byer | bser mas gzir cing (5) rgyas pa’i lus la nor bu rin po che bzhag na yang de’i bser ma de tshar gcod de mi ’phel ba dang zhi bar bgyid mkhris pas tsha bar gyur pa’i lus la bzhag na yang de’i mkhris pa de yang tshar gcod de mi ’phel ba dang zhi bar bgyid | bad kan gyis yongs su rgyas shing kun tu gzir (6) ba’i steng du bzhag na yang de’i bad kan de yang tshar gcod de mi ’phel ba dang zhi bar bgyid | ’dus pa’i nad kyis sdug bsngal ba’i lus pa bzhag na yang de’i ’dus pa’i nad de yang tshar gcod de mi ’phel ba dang zhi bar bgyid | mtshan mo mun pa mun nag gi nang du ni snang bar (7) bgyid | tsha ba’i tshe na yang sa phyogs gang du bzhag pa’i sa phyogs de bsil bar ’gyur | grang ba’i tshe na yang sa phyogs gang du bzhag pa’i sa phyogs de dro bar ’gyur ro ||