’phags pa rab ’byor gzhan yang byang chub sems dpa’ sems dpa’ chen pos ’das pa ci lta ba de bzhin du ma byon pa’i sangs rgyas bcom ldan ’das la ma chad (3) pa ’jug pa chad pa spros pa dang srid par ’dren pa chad pa gzhal du med cing grangs med pa de dag gi sems dang po bskyed pa nas bzung ste | bla na med pa yang dag par rdzogs pa’i byang chub mngon par rdzogs par ’tshang rgya bar ’gyur ba’i bar dang | phung po lhag ma med pa’i mya (4) ngan las ’das pa’i dbyings su yongs su mya ngan las ’da’ bar ’gyur ba’i bar dang | dam pa’i chos nub par mi ’gyur ba’i bar te | de dag gi bar gyi sangs rgyas bcom ldan ’das rnams kyi pha rol tu phyin pa dang ldan pa’i dge ba’i rtsa ba gang yin pa rnams dang | sangs (5) rgyas bcom ldan ’das de dag gi tshul khrims kyi phung po dang ting nge ’dzin gyi phung po dang shes rab kyi phung po dang rnam par grol ba’i phung po dang rnam par grol ba’i ye shes gzigs pa’i phung po gang yin pa rnams dang | phan par bzhed pa gang yin pa dang byams pa chen po gang yin pa (6) dang snying rje chen po gang yin pa dang sangs rgyas kyi yon tan gzhal du med cing grangs med pa gang yin pa rnams dang | sangs rgyas bcom ldan ’das de dag gis chos gang ’chad par ’gyur ba rnams dang chos de la slob par ’gyur ba gang yin pa rnams dang | lhag par (7) mos par ’gyur ba rnams dang gnas par ’gyur ba de dag gi dge ba’i rtsa ba gang yin pa rnams dang | sangs rgyas bcom ldan ’das de dag gis byang chub sems dpa’ gang dag bla na med pa yang dag par rdzogs pa’i byang chub tu lung ston par ’gyur ba de dag gi pha rol tu phyin pa drug (81a1) dang ldan pa’i dge ba’i rtsa ba gang yin pa rnams dang | sangs rgyas bcom ldan ’das de dag gis gang zag rang sangs rgyas kyi theg pa can dag rang sangs rgyas kyi byang chub la lung ston par ’gyur ba de dag gi dge ba’i rtsa ba gang yin pa rnams dang | gang (2) zag nyan thos kyi theg pa can rnams kyi sbyin pa las byung ba’i bsod nams bya ba’i dngos po dang tshul khrims las byung ba’i bsod nams bya ba’i dngos po dang bsgoms pa las byung ba’i bsod nams bya ba’i dngos po gang yin pa rnams dang slob pa’i zag pa med pa’i dge ba’i rtsa ba gang (3) yin pa rnams dang mi slob pa’i zag pa med pa’i dge ba’i rtsa ba gang yin pa rnams dang | chos de la so so’i skye bo gang dag gis dge ba’i rtsa ba bskrun par ’gyur ba dang | gang yang lha dang klu dang gnod sbyin dang dri za dang lha ma yin dang nam mkha’ lding dang mi ’am ci dang lto ’phye chen (4) po dang mi dang mi ma yin pa gang dag gis chos de thos par ’gyur ba dang thos nas kyang dge ba’i rtsa ba bskrun par ’gyur ba dang | gang yang byol song gi skye gnas su song ba’i sems can gang dag gis kyang chos de thos par ’gyur ba dang thos nas kyang dge ba’i rtsa ba dag bskrun par (5) ’gyur ba dang | sems can gang dag gis sangs rgyas bcom ldan ’das yongs su mya ngan las ’da’ ba dang | yongs su mya ngan las ’das pa de dag la dge ba’i rtsa ba bskrun par ’gyur ba de dag thams cad kyi dge ba’i rtsa ba gang dag yin pa de dag thams cad gcig tu bsdus te (6) bsdoms shing gzhal nas ma lus par byas te | rjes su yi rang bar bya ba ma lus pa la rjes su yi rang nas rjes su yi rang ba dang ldan pa’i bsod nams bya ba’i dngos po de bla na med pa yang dag par rdzogs pa’i byang chub tu yongs su sngo bar byed pa’i byang chub sems dpa’ sems dpa’ (7) chen po ci ltar ’du shes phyin ci log tu mi ’gyur sems phyin ci log tu mi ’gyur lta ba phyin ci log tu mi ’gyur zhe na | gal te byang chub sems dpa’ sems dpa’ chen po de sems gang gis gang yongs su bsngo ba’i sems de la sems su ’du shes par mi ’gyur na de ltar na byang chub (81b1) sems dpa’ sems dpa’ chen pos rjes su yi rang ba dang ldan pa’i bsod nams bya ba’i dngos po bla na med pa yang dag par rdzogs pa’i byang chub tu yongs su bsngos pa yin no ||