’od srung chos bzhi po ’di dag ni byang chub sems dpa’i shes rab yongs su nyams par ’gyur ba ste | bzhi gang zhe na | ’di lta ste | chos dang chos smra ba la mi gus pa yin | chos la ser sna byed cing chos la slob dpon gyi dpe ma khyud byed pa yin | chos ’dod pa’i gang zag rnams la chos kyi bar chad byed cing ’dun pa zlog par byed | rnam par ’khrug par byed de | mi ston cing rab tu ’chab pa yin | mngon pa’i nga rgyal gyis bdag la bstod cing gzhan la smod pa yin te || ’od srung chos bzhi po de dag ni byang chub sems dpa’i shes rab yongs su nyams par ’gyur ba’o || de la ’di skad ces bya ste
| chos smra ba la gus pa med pa yin || chos la ser sna byed par gyur pa dang |
| chos la slob dpon dpe mkhyud byed pa yin || chos ’dod rnams la bgegs ni byed gyur cing |
| ’dun pa zlog la de bzhin rnam ’khrug byed || rgyal bas bsngags pa’i chos ni yong mi ston |
| le lo can de bdag bstod rtag tu brtson || gzhan la smod par byed la mngon par dga’ |
| chos bzhi ’di dag rgyal ba’i sras rnams kyi || shes rab nyams par ’gyur bar rgyal bas gsungs |
| chos bzhi ’di dag rab tu spang byas la || rgyal bas gsungs pa’i chos bzhi gzhan bsgom mo ||