’od srung byang chub sems dpa’ chos bzhi dang ldan na khyad par du ’gro bas yongs su mi nyams pa’i chos can du ’gyur te || bzhi gang zhe na ’di lta ste | ’di ltar pha rol tu phyin pa drug dang ldan pa byang chub sems dpa’i sde snod tshol ba la brtsams nas legs par thos pa tshol gyi nyes pa mi tshol te | sems can thams cad la nga rgyal med pa’i phyir sems khyi dang ’dra ba yin || chos kyi rnyed pas chog par ’dzin te | log pas ’tsho ba thams cad yongs su spangs shing ’phags pa’i rigs kyis chog par ’dzin pa yin || gzhan dag gi ltung ba byung ba dang ma byung ba mi gleng zhing gzhan dag gi ’khrul pa gzhan dang gzhan mi tshol ba yin | sangs rgyas kyi chos zab mo gang dag de’i blos mi rtogs pa de la sangs rgyas kyi byang chub ni mtha’ yas shing sems can mos pa tha dad pa rnams la de bzhin gshegs pa rnams kyi chos bstan pa ’jug ste | de bzhin gshegs pa nyid kyis mkhyen gyi bdag gis ni mi shes te | de bzhin gshegs pas mngon sum mo zhes byas nas mi spong ba ste | ’od srung byang chub sems dpa’ chos bzhi po de dag dang ldan na khyad par du ’gro bas yongs su mi nyams pa’i chos can du ’gyur ro || de la ’di skad ces bya ste
| de ni rtag tu pha rol phyin rnams dang || thabs la mkhas dang byang chub sde snod brtson |
| nga rgyal med pas khyi ’dra’i sems kyis su || sems can kun la nga rgyal bcag pa yin |
| chos dang ’thun pa’i rnyed pas chog sems shing || ’tsho ba yongs dag ’phags pa’i rigs la gnas |
| gzhan gyi ’khrul pa tshol bar mi byed cing || gzhan gyi ltung ba gleng bar mi byed do |
| gang la de yi blos ni mi rtogs pa || de la de bzhin gshegs pa mngon sum ste |
| bde gshegs bshad pa’i byang chub mtha’ yas pa || rgyal bas mkhyen gyi bdag gis mi shes so |
| chos bzhi ’di dag rig par gyur pa ni || ye shes khyad par ’phags mchog nyams mi ’gyur |
| chos ’di dag la rab tu gnas pa ni || rgyal bas bsngags pa’i byang chub rnyed mi dka’ ||