’od srung chos bzhi po ’di dag ni byang chub sems dpa’i dge ba’i rtsa ba’i chos thams cad sdud par ’gyur ba ste | bzhi gang zhe na | ’di lta ste | tshul ’chos pa med par dgon pa na gnas pa dang | lan du phan ’dogs par re ba med par ’gyur ba bsdu ba’i dngos po bzhi po dag dang | sems can thams cad la lus dang srog gtong zhing dam pa’i chos yongs su tshol ba dang | thos pa dang don gyis ngoms mi myong zhing dge ba’i rtsa ba thams cad yang dag par sdud pa’i brtson ’grus te | ’od srung chos bzhi po de dag ni byang chub sems dpa’i dge ba’i rtsa ba’i chos thams cad sdud par ’gyur ro || de la ’di skad ces bya ste
| dgon par gnas shing tshul ’chos rnam par spong || rgyal gsungs bsdu ba sems can rnams la byed |
| dam chos yongs su btsal ba brtsam byas nas || lus dang srog kyang yongs su gtong bar byed |
| dge ba’i rtsa ba shin tu mi nyung ba || yang dag bsgrub phyir rtag tu ngoms mi myong |
| dge ba’i chos rnams yang dag bsdu ba’i phyir dang || chos bzhi ’di dag bde bar gshegs pas gsungs ||