’od srung chos bzhi po ’di dag ni byang chub sems dpa’i shes rab chen por ’gyur ba ste | bzhi gang zhe na | ’di lta ste | chos dang chos smra ba la gus pa dang bcas pa yin | zang zig med pa’i sems kyis rnyed pa dang bkur sti dang | tshigs su bcad pa la mi re bar ji ltar thos pa dang | ji ltar khong du chud pa’i chos rnams gzhan dag la rgya cher yang dag par rab tu ston par byed pa yin | mang du thos pa las shes rab ’byung bar rig nas mgo’am gos la me ’bar ba bzhin du thos pa yongs su tshol zhing ji ltar thos pa’i chos rnams ’dzin par byed pa yin | nan tan snying por byed kyi smra ba dang brjod pa’i tshig lhur len pa ma yin pa ste | ’od srung chos bzhi po ’di dag ni byang chub sems dpa’i shes rab chen por ’gyur ba’o || de la ’di skad ces bya ste
| chos smra ba la gus dang bcas pa yin || zang zing med cing rnyed dang bkur sti la |
| re ba med cing tshig bcad mi sems par || ji ltar thos pa’i chos rnams gzhan la ston |
| thos la shes rab ’byung bar des rig nas || mgo la ’bar bzhin rtag tu thos pa tshol |
| de ni ji ltar thos pa’i chos rnams ’dzin || chos bzung nas ni nan tan bya phyir gnas |
| mkhas de nan tan snying por byed pa yin || tshig lhur mi len smra ba lhur mi len |
mkhas pas chos bzhi ’di dag bsten byas na || rgyal bas bsngags pa’i shes rab thob par ’gyur ||