’od srung bzhi po ’di dag ni byang chub sems dpa’i dge ba’i bshes gnyen te | bzhi gang zhe na | ’di lta ste | byang chub kyi lam rton pa’i phyir slong ba byang chub sems dpa’i dge ba’i bshes gnyen dang | thos pa’i shes rab rton pa’i phyir chos smra ba byang chub sems dpa’i dge ba’i bshes gnyen dang | dge ba’i rtsa ba thams cad rton pa’i phyir rab tu ’byung ba yang dag par ’dzin du ’jug pa byang chub sems dpa’i dge ba’i bshes gnyen dang | sangs rgyas kyi chos thams cad rton pa’i phyir sangs rgyas bcom ldan ’das rnams byang chub sems dpa’i dge ba’i bshes gnyen te || ’od srung bzhi po de dag ni byang chub sems dpa’i dge ba’i bshes gnyen no || de la ’di skad ces bya ste
| byang chub yongs su rton phyir len pa po || sbyin byed rnams kyi dge ba’i bshes gnyen yin |
| chos don smra ba thos dag shes rab byed || dge ba’i bshes gnyen yin par bde gshegs gsungs |
| gang dag rab ’byung yang dag ’dzin ’jug pa || de dag dge rtsa yin pas bshes gnyen gsungs |
| rdzogs sangs rgyas kyi lam ni rton pa’i phyir || sangs rgyas rnams ni bde gshegs sras kyi bshes |
| rgyal bas bsngags pa bzhi po ’di dag ni || bde gshegs sras kyi dge ba’i bshes gnyen te |
| ’di dag bsten cing rtag tu bag yod na || bde gshegs bstan pa’i byang chub ’thob par ’gyur ||