dge slong lnga brgya po de dag gis ’di skad ces smras so || tshe dang ldan pa dag kho bo cag kyang bcom ldan ’das kyis chos bshad pa la mi ’jug ste | ma rtogs ma mos shing skrag ste kun tu dngangs | kun tu rab tu dngangs par gyur to || de’i phyir kho bo cag kyang dgon pa’i gnas rnams su bsam gtan gyi bde ba la reg par gnas pa rnams kyis gnas par bya’o || sprul pa dag gis smras pa tshe dang ldan pa dag de’i phyir bdag cag yang dag par bgro bar bya’o || rtsod par mi bya’o || rtsod pa med pa lhur len pa ni dge sbyong gi chos so || tshe dang ldan pa dag gang ’di yongs su mya ngan las ’das pa zhes bya ba gang yongs su mya ngan las ’da’ bar ’gyur ba’i chos de gang | lus ’di la bdag gam | sems can nam | srog gam | skye ba po’am | skyes bu’am | gang zag gam | shed las skyes sam | shed bu ’am | gang yongs su mya ngan las ’da’ bar ’gyur || gang zad pas yongs su mya ngan las ’da’ |