Respicite spatium cȩli . firmitudinem . celeritatem . et desinite aliquando uilia mirari. Uuártênt uuîo míchel der hímel sî . uuíder dien elephantis . uuîo féste únde stárh uuíder dien fárren . uuîo snél uuíder dien tigribus . únde nesî íuuih uuúnder dero smáhôn díngo. Sîd tiu érda míchel íst . únde dóh néheina comparationem néhabet ze demo hímile . uuér mág tánne sîna uuîti uuízen . únde sîna mícheli ? Sîd er dóh álso uuîtêr síh úmbe-uuérbet in uiginti quator horis . uuáz mág tánne sô snélles sîn . únde sô drâtes ? Sîd ín óuh tiu únméziga drâti neuerbríchet . uuáz mág tánne sô féstes ?