Si quis nescit sydera arcturi . i. stellam quę dicitur arcturus . labi propinqua summo cardine. Et si quis nescit . cur legat . i. sequatur bootes tardus . i. tardus ad occasum plaustra . mergatque seras equore flammas . cum nimis celeres explicet ortus . stupebit legem ętheris alti.
So-uuér arcturum neuuéiz stân hára-uuíder dén nórd-kíbel . des hímeles . únde zíu signum bootis an démo arcturus stât . lángséimo fólgee demo uuágene . únde trâgo ze sédele gánge . únde áber spûotigo ûfkánge . tér uuúnderôt síh nôte . uuîo iz síh sô gezíhe . dâr óbe úns in hímele. Uuánda der nórd-kíbel íst óbe érdo . álso der súnt-kíbel íst únder érdo . bedíu negânt tíu zéichen nîeht in sédel . díu náhôst ímo suéibônt . álso arcti tûont . tîe die líute héizent uuágen. Tíu éteuuáz férrôr stânt . álso bootes tûot . tíu gâng ze éinero uuîlo in sédel . sô . dáz siu lúzzela fárt tûên únder érdo . uuíder díu siu tûont óbe érdo. Tér dés nîeht neuuéiz . tér mág síh is uuúnderôn. Duę arcti . dáz sínt duę ursę . ęlix únde cynosura. Elix Héizet tiu mêra . an déro síhet man septem stellas claras . tîe septentrio héizent. Téro fólgêt bootes . uuánda er hínder íro gât . únde so-uuára si bechêret íro posteriora . dâr síhet man bootem.