Nam uera sententia est . nihil ex nihilo existere. Íst áleuuâr dáz man chît . fóne nîehte nîeht uuérden. Cui nemo umquam ueterum refragatus est. Tés álle únsere fórderen iáhen. Quamquam illi id non de operante principio . s. dicerent. So-uuîo sie dáz nesprâchîn fóne demo ánagénne . állíu díng ûzer nîehte uuúrchentemo. Sed de materiali subiecto. Núbe fóne sâmháftemo dínge. Tíu sínt sâmháfte . díu sâmen hábent . únde âne dén uuérden nemúgen. Sô arbores sínt únde herbę . únde állíu animatia. Tíu héizent subiecta . quia subiciuntur accidentibus suis. Quatuor elementa sínt íro állero sâmo . únde íro materia. Sed hoc iecerint . s. ueteres . quasi quoddam fundamentum omnium rationum de natura. Únde sie dáz fúndament légetîn . únde zéigotîn . állero rédôn . únde állero ántuuúrto . déro sie gâben fóne dero natura. Sô getân gechôse . héizet ypallage . dáz ér chît fundamentum rationum . fúre rationem fundamenti. Táz íst certa ratio fundamenti . omnium naturarum . dáz sie châden . nihil ex nihilo existere. Naturę sô arbores sínt únde hérbę . únde állíu corpora . dîe neuuérdent nîeht stúzzelingûn . sîe hábent ételicha materiam . dánnân siu uuérdent . tîa héizet er fundamentum. Keskíhet ín óuh îeht . tés íst ételîh causa. Tíu íst áber fundamentum. Ételîh ratio íst îo tóugeníu álde óffeníu . uuáz íro fundamentum sî . uuánnân siu uuérdên . álde uuánnân ín îeht keskéhe.