Mais pour quoy s’eschaufe elle par si grant desirier a trouver les couvertez notez de verité ? Scet elle que elle ait cogneu ce que elle requiert angoisseusement a cognoistre ? Mais qui est cil qui se travaille a savoir les chosez cogneuez ? Ou se elle ne les scet, que quiert cele avugle ? Car qui est cil qui desire ce dont il ne scet riens, ou qui est cil qui puisse suivre les chosez non seuez ? Et se il les quiert, ou les trouvera il ? Qui est cil qui puisse cognoistre la forme trouvee que il mescognoist ? Ou se la pensee des hommes, quant elle regardoit la haute pensee de dieu, avoit elle cogneu ensemble la somme des chosez et chascune par soy ? Ores quant elle est reposte en l’ocurté des membrez, n’a elle pas du tout oublié soy meismes et retient la somme des chosez et pert les singularitéz ?