Quondam attulit . i. habuit porticus . s. athenis . nimium obscuros senes.
Taz uuîtchélle ze athenis . ínnôta íu . dîe hárto tîef-tâhtigen álten . i. stoicos philosophos. Plato atheniensis philosophus . sáz pî athenis in achademia uilla . dâr sîn éigen uuás . únde lêrta sîne iúngeren únz án sîn énde. Nâh sînemo énde téiltôn sie síh. Súme uuúrten dâr ze léibo . únde hîezen achademici . súme begóndôn uuállôn . únde hîezen peripathetici . súme fûoren in athenas ciuitatem . únde hîezen stoici. Tén námen gáb ín stoa . dáz chît porticus . in démo sie dâr sâzen . únde íro uuîstûom áhtotôn.
Qui credant . i. qui crederent sensus et imaginationes . inprimi mentibus . e corporibus extimis.
Tîe-dir uuízen uuóltôn . mánnoliches mûote ána-getân uuérden . sensus únde imagines . fóne dien ûzerên corporibus. Homines únde arbores . montes únde flumina . únde állíu corpora . díu ûzeren-hálb únsêr sínt . tûont únsih ze fínf uuîsôn ferstân. Uués ferstûondîn uuír . úbe síu neuuârîn ? Uuáz máhtîn uuír séhen . álde grîfen . âne corpora ? Únde úbe íro bílde neuuârîn . uuáz píldotîn uuír dánne in únserên mûoten ? Ába dien corporibus chómendo . gedríngent sie ín daz mûot. Tára hábent sie uuég . túrh tie sensus. Uuîo uuérdent sie ána-getân únserên mûoten ? Táz tûont sie sô . dáz uuír síu lîdên . náls síu únsih . únde síu únsih ána-uuérdent . náls uuír síu. Síu gébent úns kesíht . únde gehôreda . dóh man chéde . dáz uuír síu geséhên . únde gehôrên.
Ut mos est quondam figere pressas litteras ęquore paginę celeri stilo quę nullas habeat notas.
Álso dero geblânetûn tábelûn bûohstába . gerízzôt uuérdent mít kríffele. Tabella íst kelîh temo mûote . kríffel corporibus . literę demo bílde.