Et pererrans gelidum corpus uisu . non tinxit ora lacrimis.
Únde er nîeht netrânda . dâr er íro erstórchenêten bóteh állen eruuárteta.
Sed censor . i. iudex esse potuit extincti decoris . i. corporis.
Núbe chóstare uuésen máhta . sînero erslágenôn mûoter lído. Suetonius ságet . táz er sînero mûoter díccho uergében uuólti . uuánda sî ín sînero síto inchónda. Tô ímo dés nespûota . únde sî dára-gágene uuás antidotis premunita . dô hîez er sia gladio sláhen. Târ-míte uuás ín fúre-uuízze állero íro lído . pedíu gîeng er úber sia tôta . únde ergréifôta sia álla . únde dúrh-uuárteta sia álle . únde chád tô . dáz súmeliche íro líde uuârîn uuóla gescáffen . súmeliche únelo.