Id est . ut nihil prorsus spatii iudicetur habere . si conferatur ad magnitudinem cȩlestis globi. Íh méino . dáz sî mícheli nîeht nehábet . uuíder déro mícheli des hímiles. Aristotiles lêret in cathegoriis . dáz punctum sî ána-uáng linee . únde ûz-lâz . únde íro partes mít puncto únderskídôt uuérden . únde dóh punctum fóre lúzzeli nehéin téil nesî dero linee. Uuáz mág mínneren sîn . dánne dáz neuuéder nehábet . léngi nóh préiti ? Sîd iz an linea déro terminus iz íst . nehéinen téil nehábet . sô neíst iz óuh nehéin téil dés circuli . dés medietas iz íst. Ze déro sélbûn uuîs . nehábet óuh tiu érda nehéina mícheli . uuíder demo hímele . dés punctum sî ist.