[Pāyantika 90]
saṅs rgyas bcom ldan (214b1) las mñan yod na rgyal byed kyi tshal mgon med zas sbyin gyi kun dga’ ra ba na bźugs so || tshe daṅ ldan pa ñe dga’ bzo mkhan gyi gan du soṅ ste || yud tsam źig gtam ’dre bas ’dug nas smras pa || bźin bzaṅs bde bar gśegs pa’i chos gos kyi tshad kyi chos gos (2) ’tshem nus sam || des smras pa || ’phags pa khyod la bde bar gśegs pa’i chos gos kyi tshad kyi chos gos kyis ci bya || des smras pa | bkren pa khyod la ’dir ci ’god || gal te gla ’dod na tshems śig | des bsams pa | ’di zer ba ma ñes te || bdag la ’dir (3) ci ’god || bdag la gla dgos kyis btsem mo sñam du rig nas smras pa | ’phags pa btsem mo || des de la ras daṅ gla byin pa daṅ | des de btsems so || ñe dga’ de las cuṅ źig gyon te lhag ma phrag pas khyer te ’phags pa daṅ | de dge sloṅ źig gis mthoṅ nas des (4) smras pa | gnas brtan gtur bu gzigs śig daṅ || ṅal sor gźug go || ñe dga’ sa smras pa | tshe daṅ ldan pa ’di gtur bu ma yin no || ’on ci lags | bde bar gśegs pa’i chos gos so || gnas brtan khyod bde bar gśegs pa’i chos gos gyon du ruṅ (5) ṅam | dgra bo dag gi gña’ ba rdog pas mnan na ruṅ ṅo || gnas brtan la yaṅ dgra bo dag yod dam | je daṅ por khyod kho bo’i dgra bo’i thu bo yin te || des na kho bo bde bar gśegs pa’i chos gos gyon pa mi bzod do || dge sloṅ don ñuṅ du dag ci’i phyir dge sloṅ dag (6) bde bar gśegs pa’i chos gos kyi tshad kyi chos gos ’chaṅ bar byed ces smod par byed || phyar ka gtoṅ bar byed | kha zer bar byed pa’i skabs de dge sloṅ rnams kyis bcom ldan ’das la gsol to || de nas bcom ldan ’das kyis byuṅ ba ’di daṅ | gleṅ gźi (7) ’di daṅ | skabs ’di la dge sloṅ gi dge ’dun bsdu ba mdzad do źes bya ba la sogs pa sṅa ma bźin no || saṅs rgyas bcom ldan ’das rnams ni mkhyen bźin du rmed par mdzad pa ste źes bya ba la sogs pa yaṅ sṅa ma bźin te || saṅs rgyas bcom ldan ’das kyis ñe (215a1) dga’ la rmas pa | ñe dga’ khyod bde bar gśegs pa’i chos gos kyi tshad kyis chos gos byed du ’jug pa bden nam || btsun pa mad do || saṅs rgyas bcom ldan ’das kyis dge sbyoṅ gi tshul yin pa rjes su mthun pa ma yin pa ruṅ ba ma yin pa || tshul daṅ (2) mthun pa ma yin pa de ni rab tu byuṅ bas bya ba ma yin no źes rnam par smad pa mdzad do || de nas bcom ldan ’das kyis rnam graṅs du mas rnam par smad nas dge sloṅ rnams la bka’ stsal pa || dge sloṅ dag de lta bas na phan yon bcu yaṅ dag par gzigs pas ’dul ba (3) la ñan thos rnams kyi bslab pa’i gźi bca’ bar bya ste źes bya ba la sogs pa sṅa ma bźin no || ṅa’i ñan thos rnams kyis ’dul ba la bslab pa’i gźi ’di ltar gdon par bya ste || yaṅ dge sloṅ gaṅ bde bar gśegs pa’i chos gos kyi tshad kyi chos gos byed du ’jug na (4) ltuṅ byed do źes bcom ldan ’das kyis ’dul ba ñan thos rnams kyi bslab pa’i gźi de ltar bca’ bar mdzad do || bcom ldan ’das kyis yaṅ dge sloṅ gaṅ gśegs pa’i chos gos kyi tshad kyi chos gos byed du ’jug na ltuṅ byed do źes ’dul ba la ñan thos (5) rnams kyi bslab pa’i gźi de ltar bca’ ba mdzad pa daṅ | tshe daṅ ldan pa ñe dga’ sa lhag pa byed du bcug nas dge sloṅ don ñuṅ du dag bcom ldan ’das kyis yaṅ dge sloṅ gaṅ bde bar gśegs pa’i chos gos kyi tshad kyi chos gos byed du ’jug na ltuṅ byed do źes ’dul ba la (6) ñan thos rnams kyi bslab pa’i gźi de ltar bca’ ba mdzad na || ci’i phyir dge sloṅ dag de bas lhag par byed du ’jug ces smod par byed | phyar ka gtoṅ bar byed || kha zer bar byed pa’i skabs de dge sloṅ rnams kyis bcom ldan ’das la gsol ba daṅ | bcom ldan (7) ’das kyis bka’ stsal pa | dge sloṅ dag de lta bas na sṅa ma ni bcas pa yin la | ’di ni rjes su bcas pa yin te | ṅa’i ñan thos rnams kyis ’dul ba la bslab pa’i gźi ’di ltar gdon par bya ste || yaṅ dge sloṅ gaṅ bde bar gśegs pa’i chos gos kyi tshad kyi chos (215b1) gos byed du ’jug gam || bde bar gśegs pa’i chos gos las lhag pa byed du ’jug na ltuṅ byed do || de la bde bar gśegs pa’i chos gos kyi tshad ni ’di yin te || srid du bde bar gśegs pa’i mtho bcu || źeṅ du mtho drug ste || de la ’di ni bde (2) par gśegs pa’i chos gos kyi tshad do || yaṅ dge sloṅ gaṅ źes bya ba ni śākya ’i bu ñe dga’ ’am | gźan yaṅ de lta bu gaṅ yin pa’o || bde bar gśegs pa źes bya ba ni ston pa’o || de’i chos gos kyi tshad kyi źes bya ba ni bde bar gśegs pa’i chos gos (3) kyi tshad gaṅ yin pa de’i ’o || chos gos źes bya ba ni bdun po bal gos daṅ | śa na’i gos daṅ | zar ma’i gos daṅ || ko tam pa’i gos daṅ | du gu la’i gos daṅ || ras bal gyi gos daṅ | ñi ’og gi gos dag las gaṅ yaṅ ruṅ ba’o || byed du ’jug (4) gam źes bya ba ni bdag ñid sam gźan no || bde bar gśegs pa’i chos gos las lhag par byed du ’jug na źes bya ba ni de’i goṅ ma’o || ltuṅ byed do źes bya ba ni sems can dmyal ba daṅ || dud ’gro daṅ | yi dgas ṅan soṅ daṅ | ṅan ’gro daṅ || log par ltuṅ (5) ba dag tu sreg par byed | ’tshod par byed | ltuṅ bar byed pa’o || gźan yaṅ ji srid du ltuṅ ba de ma bśags śiṅ so sor ma bśags na dge ba’i chos rnams la sgrib par byed pa ste || des nas ltuṅ byed do źes gsuṅs so || de la bde bar gśegs pa’i chos gos kyi (6) tshad ni ’di yin te || srid du bde bar gśegs pa’i mtho bcu | źeṅ du mtho drug ste | de la ’di ni bde bar gśegs pa’i chos gos kyi tshad do źes bya ba la | bde bar gśegs pa’i mtho bcu gaṅ yin pa de la ni tshad daṅ ldan pa’i khru bcwa lṅa’o || bde bar gśegs (7) pa’i mtho drug gaṅ yin pa de la ni tshad daṅ ldan pa’i khru dgu’o || de la ltuṅ bar ji ltar ’gyur źe na | dge sloṅ gis ji tsam cuṅ zad bde bar gśegs pa’i chos gos kyi tshad kyi gos sam | bde bar gśegs pa’i chos gos las lhag pa’i chos gos byed du ’jug (216a1) na thams cad du ltuṅ byed du ’gyur ro || las daṅ po ba daṅ | smyos pa daṅ | sems ’khrugs pa daṅ | tshor ba dag gis ñen pa la ltuṅ ba med do || bde bar gśegs pa’i chos gos kyi tshad las gyur pa’i ltuṅ byed de dgu bcu pa rdzogs s+ho || || ltuṅ (2) byed ’ba’ źig tu ’gyur ba rnams rdzogs s+ho || || ’dul ba rnam par ’byed pa | bam po brgyad bcu pa |

.