[Naiḥsargika 3]
saṅs rgyas bcom ldan ’das mñan yod na rgyal byed kyi tshal mgon med zas sbyin gyi kun dga’ ra ba na bźugs so || de’i tshe na dge sloṅ rnams la gos maṅ ba ñid ’di lta bu ’di byuṅ ste | dge sloṅ gaṅ yaṅ (3) ruṅ bas gos sṅon po źig rñed na des de byed du mi ’jud par de gaṅ gi tshe ’di daṅ ’dra ba rñed par gyur pa de’i tshe gos byed du gźug go sñam du re bas de ’jog par byed ciṅ | sṅon po ji lta ba bźin du ser po daṅ | dmar po daṅ | stug po daṅ | srab mo yaṅ de bźin no || dge sloṅ (4) don ñuṅ du dag ci’i phyir dge sloṅ rnams gos maṅ ba ñid ’di lta bu ’di byuṅ ste | dge sloṅ gaṅ yaṅ ruṅ bas gos sṅon po źig rñed na des de byed du mi ’jud par de gaṅ gi tshe ’di daṅ ’dra ba rñed par gyur pa de’i tshe gos byed du gźug go sñam du re bas de ’jog par byed ciṅ sṅon po ji lta (5) ba bźin du ser po daṅ | dmar po daṅ | stug po daṅ | srab mo yaṅ de bźin no || źes smod par byed | phyar ka gtoṅ bar byed | kha zer bar byed pa’i skabs de dge sloṅ rnams kyis bcom ldan ’das la gsol to || de nas bcom ldan ’das kyis byuṅ ba ’di daṅ | gleṅ (6) gźi ’di daṅ | skabs ’di la dge sloṅ gi dge ’dun bsdu ba mdzad do źes bya ba la sogs pa sṅa ma bźin no || saṅs rgyas bcom ldan ’das rnams ni mkhyen bźin du rmed par mdzad pa ste źes bya ba la sogs pa yaṅ sṅa ma bźin te | saṅs rgyas bcom ldan ’das kyis dge sloṅ (7) rab tu maṅ po dag la rmas pa | dge sloṅ dag khyed la gos maṅ ba ñid ’di lta bu ’di byuṅ ste | dge sloṅ gaṅ yaṅ ruṅ bas gos sṅon po źig rñed na des de byed du mi ’jud par de gaṅ gi tshe ’di ’dra ba rñed par gyur pa de’i tshe gos byed du ’jug go sñam du re bas de ’jog par byed (59a1) ciṅ | sṅon po ji lta bźin du ser po daṅ | dmar po daṅ | stug po daṅ | srab mo yaṅ de bźin du bden nam | btsun pa mad do || saṅs rgyas bcom ldan ’das kyis ’dod pa che ba daṅ | chog mi śes pa daṅ | gso dka’ ba daṅ | dgaṅ dka’ ba (2) rnam par smad par mdzad do || de nas bcom ldan ’das kyis ’dod pa chuṅ ba’i bsṅags pa brjod ciṅ | chog śes pa daṅ | gso slo ba daṅ | dgaṅ sla ba daṅ | phri ba daṅ | yo byad bsñuṅs pa daṅ | sbyaṅs pa’i yon tan rnams daṅ | mdzes pa ñid daṅ | drod rig (3) pa’i bsṅags pa brjod nas dge sloṅ rnams la bka’ stsal pa | dge sloṅ dag de lta bas na phan yon bcu yaṅ dag par gzigs pas ’dul ba la ñan thos rnams kyi bslab pa’i gźi bca’ bar bya ste źes bya ba la sogs pa yaṅ sṅa ma bźin no || ṅa’i ñan thos rnams kyis (4) ’dul ba la bslab pa’i gźi ’di ltar gdon par bya ste | dge sloṅ chos gos zin pas sra brkyaṅ phyuṅ na dus ma yin pa’i gos śig rñed la ’dod na dge sloṅ des gos de blaṅ bar bya’o || blaṅs nas gal te laṅs na myur ba kho nar gos su bya ste bcaṅ bar bya’o || gal te mi (5) laṅs la kha ma laṅs pa kha skoṅ pa’i gos la re ba yod na dge sloṅ des gos de zla ba gcig gi mthar gźag par bya’o || de las ’das par ’jog na spaṅ ba’i ltuṅ byed do || dge sloṅ źes bya ba ni chos ’di pa’o || chos gos zin pas sra brkyaṅ phyuṅ na źes bya ba ni chos gos zin la (6) sra brkyaṅ ma phyuṅ ba yaṅ yod | chos gos ma zin la sra brkyaṅ phyuṅ ba yaṅ yod | chos gos zin ciṅ sra brkyaṅ phyuṅ ba yaṅ yod | chos gos ma zin ciṅ sra brkyaṅ ma phyuṅ ba yaṅ yod de | mu bźir bcad pa sṅa ma bźin no || dus ma yin pa’i gos śig ces bya ba la dge sloṅ gis (7) gos kyi dus ni gaṅ yin | dus ma yin pa ni gaṅ yin źe na | sra brkyaṅ btiṅ ba’i gnas na ni ston zla ’briṅ po ña nas dpyid zla ra ba ña’i par gyi zla ba de dag ni gos kyi dus yin la | de phan cad ni dus ma yin no || sra brkyaṅ ma btiṅ ba’i gnas na ni thams cad dus ma yin no || rñed (59b1) la źes bya ba ni gźan las so || ’dod na źes bya ba ni gal te don du gñer na’o || dge sloṅ des gos de blaṅ bar bya’o źes bya ba ni bdag gir bya’o || gal te laṅs na źes bya ba ni gal te chog na’o || myur ba kho nar gos su byas te bcaṅ bar bya’o źes bya ba ni mi bsgyaṅ (2) ba kho nar byin gyis brlab tu ruṅ bar byas te’o || kham laṅs pa kha skoṅ ba’o źes bya ba ni snam sbyar ram | bla gos sam | mthaṅ gos kha ma laṅs pa kha skoṅ ba’i’o || gos la re ba yod na źes bya ba ni dge sloṅ la mas bdag la gos sbyin pa’i re ba’am | pha’am | phu nu’am | (3) sriṅ mo’am | slob dpon nam | mkhan pos bdag la gos sbyin pa’i re ba’am | lo lṅa’i dus ston gyi tshe’am | lo drug gi dus ston gyi tshe’am | gtsug phud ’dreg pa’i dus ston gyi tshe’am | gnas khaṅ gi dus ston gyi tshe’am | dus ston chen po’i tshe rñed du re ba yod na’o || (4) dge sloṅ des gos de zla ba gcig gi mthar gźag par bya’o źes bya ba ni zla ba gcig gi mtha’ tshun chad du’o || de las ’das par ’jog na źes bya ba ni de las thal bar ro || spaṅ ba’i ltuṅ byed do źes bya ba ni dṅos po de spaṅs nas ltuṅ byed kyi ltuṅ ba bśags par bya ba ste | (5) des na spaṅ ba’i ltuṅ byed do źes gsuṅs so || de la ltuṅ bar ji ltar ’gyur źe na || ||

.