[Naiḥsargika 20]
saṅs rgyas bcom ldan ’das mñan yod na rgyal byed kyi tshal mgon med zas sbyin gyi kun dga’ ra ba na bźugs so || (4) de’i tshe na dge sloṅ drug sde dag ño ’tshoṅ rnam pa sna tshogs byed de | len par byed | gtoṅ bar byed | ño bar byed | ’tshoṅ bar byed do || ji ltar len par byed ce na | gaṅ gi tshe ljoṅs su lo legs śiṅ groṅ khyer du lo ñes pa de’i tshe na ljoṅs nas groṅ khyer du len par byed (5) de | de ltar len par byed do || ji ltar gtoṅ bar byed ce na | gaṅ gi tshe groṅ khyer du lo legs śiṅ ljoṅs su lo ñes pa de’i tshe na groṅ khyer nas ljoṅs su gtoṅ bar byed de | de ltar gtod par byed do || ji ltar ño bar byed ce na | gaṅ gi tshe rin chuṅ ba de’i tshe na ño bar byed (6) de | de ltar ño bar byed do || ji ltar ’tshoṅ bar byed ce na | gaṅ gi tshe rin che ba de’i tshe na ’tshoṅ bar byed de | de ltar ’tshoṅ bar byed do || gźan mu stegs can dag śes ldan dag śākya ’i bu’i dge sbyoṅ rnams ni ma log ma spaṅs so sor ma spaṅs pa yin te | ’di ltar ño (7) ’tshoṅ rnam pa sna tshogs byed de | len par byed | gtoṅ bar byed | ño bar byed | ’tshoṅ bar byed ciṅ bram ze daṅ | khyim bdag rnams kyaṅ ño ’tshoṅ rnam pa sna tshogs byed de | len par byed | gtoṅ bar byed | ño bar byed | ’tshoṅ bar byed na śākya ’i bu’i dge sbyoṅ rnams (156a1) daṅ | bram ze daṅ | khyim bdag ’di dag la bye brag ni ci yod | bsam pa ni ci yod | tha dad du bya ba ni ci yod | su źig dge sbyoṅ mgo reg ’di dag la bsod sñoms sbyin pa daṅ bya bar sems źes smod par byed | phyar ka gtoṅ bar byed | kha zer bar byed pa’i (2) skabs de dge sloṅ rnams kyis bcom ldan ’das la gsol to || de nas bcom ldan ’das kyis byuṅ ba ’di daṅ | gleṅ gźi ’di daṅ | skabs ’di la dge sloṅ gi dge ’dun bsdu ba mdzad do źes bya ba la sogs pa sṅa ma bźin no || saṅs rgyas bcom ldan ’das rnams (3) ni mkhyen bźin du rmed par mdzad pa ste źes bya ba la sogs pa yaṅ sṅa ma bźin te | saṅs rgyas bcom ldan ’das kyis dge sloṅ drug sde dag la rmas pa | dge sloṅ dag khyed ño ’tshoṅ rnam pa sna tshogs byed de | len par byed | gtoṅ bar byed | ño bar byed | ’tshoṅ (4) bar byed pa bden nam | btsun pa mad do || saṅs rgyas bcom ldan ’das kyis dge sbyoṅ gi tshul ma yin pa | rjes su mthun pa ma yin pa | ruṅ ba ma yin pa | tshul daṅ mthun pa ma yin pa de ni rab tu byuṅ bas bya ba ma yin no źes rnam par smad par mdzad do || (5) de nas bcom ldan ’das kyis rnam graṅs du mas rnam par smad nas dge sloṅ rnams la bka’ stsal pa | dge sloṅ dag de lta bas na phan yon bcu yaṅ dag par gzigs pas ’dul ba la ñan thos rnams kyi bslab pa’i gźi bca’ bar bya ste źes bya ba la sogs pa sṅa ma (6) bźin no || ṅa’i ñan thos rnams kyis ’dul ba la bslab pa’i gźi ’di ltar gdon par bya ste | yaṅ dge sloṅ gaṅ ño ’tshoṅ rnam pa sna tshogs byed na spaṅ ba’i ltuṅ byed do || yaṅ dge sloṅ gaṅ źes bya ba ni drug sde dag gam | gźan yaṅ de lta bu gaṅ yin pa’o || ño ’tshoṅ (7) rnam pa sna tshogs źes bya ba ni rnam pa maṅ po’o || byed na źes bya ba ni len par byed pa daṅ | gtoṅ bar byed pa daṅ | ño bar byed pa daṅ | ’tshoṅ bar byed pa dag lhag par spyod par byed na’o || spaṅ ba’i ltuṅ byed do źes bya ba ni dṅos po de spaṅs nas ltuṅ byed kyi ltuṅ ba (156b1) bśags par bya ste | des na spaṅ ba’i ltuṅ byed do źes gsuṅs so || de la ltuṅ bar ji ltar ’gyur źe na | dge sloṅ gis rñed pa ’dod pas ño bar byed | ’tshoṅ bar byed na ño bar byed pa la ñes byas su ’gyur la | ’ tshoṅ pa la spaṅ ba’i ltuṅ byed du ’gyur ro || dge sloṅ gis (2) rñed pa ’dod pas ño bar byed ciṅ rñed pa mi ’dod pas ’tshoṅ bar byed na | ño bar byed pa la ñes byas su ’gyur la | ’tshoṅ bar byed pa la ltuṅ ba med do || dge sloṅ gis rñed pa mi ’dod pas ño bar byed ciṅ rñed pa ’dod pas ’tshoṅ bar byed na ño bar byed pa la ltuṅ ba med la | ’tshoṅ bar (3) byed pa la spaṅ ba’i ltuṅ byed du ’gyur ro || dge sloṅ gis rñed pa mi ’dod pas ño bar byed ciṅ rñed pa mi ’dod pas ’tshoṅ bar byed na gñis ka la ltuṅ ba med do || yul gźan gyi sbyor bas sṅa ma’i rgyud sbyoṅ bar byed pa la ltuṅ ba med do źes bcom ldan ’das kyis ’dul ba la ñan (4) thos rnams kyi bslab pa’i gźi bca’ ba mdzad do || saṅs rgyas bcom ldan ’das yaṅs pa can na spre’u rdziṅ gi ’gram na khaṅ pa brtsegs pa’i khaṅ bzaṅs na bźugs so || de’i tshe na byaṅ lam pa’i tshoṅ pa lam gyi bgrod par źugs pa dag gis gtsug lag khaṅ rta babs mthon (5) po daṅ ldan pa | skar khuṅ daṅ | skar khuṅ dra ba can daṅ | lan kan gyis brgyan pa | mig daṅ sñiṅ ’phrog pa mtho ris kyi them skas su gyur pa dag mthoṅ nas de dag dad par gyur te | de dag gtsug lag khaṅ du doṅ nas dge sloṅ rnams la ’di skad ces smras so || ’phags (6) pa dag bdag cag gis dge ’dun la mchod ston bgyi’o || dge sloṅ rnams kyis smras pa | mchod ston gyi yo byad dag khyer te śeg śig | de dag gis smras pa | bdag cag blo bur du lhags pa dag lags te | ’di ltar bdag cag rin ’bul gyis khyed kyis ’bras (7) dag stsol cig | bcom ldan ’das kyis bslab pa’i gźi bca’ ba mdzad pas bdag cag ’bras dag mi ’tshoṅ ṅo źes zer ba’i skabs de dge sloṅ rnams kyis bcom ldan ’das la gsol pa daṅ | bcom ldan ’das kyis bka’ stsal pa | de ltar mi bya bar ’di ltar gaṅ (157a1) dag dge ’dun gyi phyir mchod ston byed pa de la rin gyis ’bras sbyin par bya’o || dge sloṅ dag ri ba khon sbyin nas bcom ldan ’das kyis bka’ stsal pa | gaṅ gtsug lag khaṅ de ñid du mchod ston byed pa de la ’theb daṅ bcas pa sbyin par bya’o || bcom ldan (2) ’das kyis rin gyis ’bras sbyin par bya’o źes bca’ ba mdzad pas maṅ po dag mchod ston byed nas thams cad la byin na ’bras dag spyad pas spyi buṅs chad par gyur pa’i skabs de dge sloṅ rnams kyis bcom ldan ’das la gsol pa daṅ | bcom ldan ’das kyis bka’ stsal pa | de ltar (3) mi bya bar ’di ltar rin ṅes ’bras gźan dag ño bar bya’o || ’bras rñiṅ pa dag kyaṅ so sor brtags nas gal te srog chags med na dus su btsoṅs te ’bras sar pas baṅ ba dag dgaṅ bar bya’o || las daṅ po ba daṅ | smyos pa daṅ | sems ’khrugs pa daṅ | tshor ba (4) dag gis ñen pa la ltuṅ ba med do || ño ’tshoṅ byed pa’i spaṅ ba ste ñi śu pa rdzogs s+ho || ||

.