bram zes smras pa | bdag khyod la gus par bgyid do || tshe daṅ ldan pa ’char kas smras pa || kho bo khyim pa las (2) bsñen bkur bdag gir mi byed kyi | kho bo ni rab tu byuṅ ba las bsñen bkur bdag gir byed do || des smras pa | bdag rab tu ’byuṅ ṅo | tshe daṅ ldan pa ’char kas smras pa | rab tu phyuṅ śig ces des der rab tu phyuṅ | rdzogs par bsñen par byas te gdams (3) ṅag byin no || de de ltar rab tu byuṅ nas gcig pu dben pa bag yod pa | brtun pa daṅ ldan pa bdag ñid btaṅ bar gnas so || gcig pu dben pa bag yod pa | brtun pa daṅ ldan pa bdag ñid btaṅ bar gnas pa na | rigs kyi bu dag gaṅ gi phyir skra daṅ kha spu bregs (4) te gos ṅur smrig dag bgos nas | yaṅ dag par kho nar dad pas khyim nas khyim med par rab tu ’byuṅ bar byed pa | tshaṅs par spyod pa’i mtha’ bla na med pa | de tshe de ñid la raṅ gi mṅon par śes pas mṅon sum du byas te bsgrubs nas bdag gi skye bzad do || tshaṅs par (5) spyod pa spyad do || bya ba byas so || srid pa ’di las gźan mi śes so źes go bar byed ciṅ | dgra bcom pa khams gsum pa las ’dod chags daṅ bral ba | boṅ ba daṅ gser du mñam pa || nam mkha’ daṅ lag mthil du mtshuṅs pa’i sems daṅ ldan pa | (6) tsan dan bźag pa lta bur rig pos sgo ṅa’i sbubs dral bar gyur ciṅ | rig pa daṅ | mṅon par śes pa daṅ | so so yaṅ dag par rig pa thob pa | srid pa daṅ ’dod pa’i rñed pa daṅ | bkur sti la rgyab kyis phyogs pa | dbaṅ po daṅ ñe dbaṅ daṅ bcas pa’i lha (7) rnams kyis mchod par bya ba daṅ | rjed par bya ba daṅ | mṅon du smra bar bya bar gyur to | tshe daṅ ldan pa ’char kas bsams pa | gaṅ gdul ba’i dus yin sñam na | yul mi’i gyad gcig gis yul dag tu gyad rnams brdabs nas mñan yod du ’oṅs te | mñan (63b1) yod na slo khar rkaṅ pa brkyaṅ ste bdug ciṅ | de gaṅ la la ’oṅ ba de la ’di skad ces | yaṅ na ni kho ba la stobs rgol cig | yaṅ na ni kho bo’i rlig bar du soṅ śig ces zer ro || de na skye bo phal po che’i tshogs ’du ba dag las | ’ga’ yaṅ de la stobs kyaṅ mi (2) rgol | de’i rlig bar du yaṅ mi ’gro’o || tshe daṅ ldan pa ’char kas bsams pa | gyad de gdul ba’i dus yin no sñam nas | tshe daṅ ldan pa ’char ka phyogs der soṅ ste smras pa | ’di su źig yin | skye bo phal po che’i tshogs kyis smras pa | gyad ’di’i (3) mchid nas ’di skad ces | yaṅ na ni kho bo la stobs rgol cig | yaṅ na ni kho bo’i rlig bar du soṅ śig ces mchi’o || tshe daṅ ldan pa ’char kas de la smras pa | ci je kho bo daṅ lhan cig stobs bya’am | ’on te kho bos brdabs pa’i gyad gsum po gaṅ dag (4) yin pa de dag daṅ lhan cig stobs ’gyed | des smras pa | khyod kyis brdabs pa’i gyad gsum po gaṅ dag yin pa de dag daṅ lhan cig stobs bya’o || tshe daṅ ldan pa ’char kas smras pa | kho bos ’dod chags kyi gyad brdabs | źe sdaṅ gi gyad brdabs | gti (5) mug gi gyad brdabs kyis | khyod de dag daṅ lhan cig stobs khye śig ces | tshe daṅ ldan pa ’char kas de btul nas des de rab tu phyuṅ | rdzogs par bsñen par byas te gdams ṅan byin no || de de ltar rab tu byuṅ nas gcig pu dben ba bag yod pa | brtun pa (6) daṅ ldan pa bdag ñid btaṅ bar gnas so | gcig pu dben pa bag yod pa | brtun pa daṅ ldan pa bdag ñid btaṅ bar gnas pa na | rigs kyi bu dag gaṅ gi phyir skra daṅ kha spu bregs te | gos ṅur smrig dag bgos nas | yaṅ dag pa kho nar dad pas khyim nas khyim (7) med par rab tu ’byuṅ bar byed pa | tshaṅs par spyod pa’i mtha’ bla na med pa de tshe de ñid la raṅ gi mṅon bar śes pas mṅon sum du byas te bsgrubs na | bdag gi skye ba zad do || tshaṅs par spyod pa spyod do || bya ba byas so || srid pa ’di las gźan mi śes so (64a1) źes go bar byed ciṅ | dgra bcom pa khams gsum pa las ’dod chags daṅ bral ba | boṅ ba daṅ gser du mñam pa | nam mkha’ daṅ lag mthil du mtshuṅs pa’i sems daṅ ldan pa | tsan dan bźag pa lta bu rig pas sgo ṅa’i (2) sbubs dral bar gyur ciṅ | rig pa daṅ | mṅon par śes pa daṅ | so so yaṅ dag par rig pa thob pa | srid pa daṅ ’dod pa’i rñed pa daṅ | bkur sti la rgyab kyis phyogs pa | dbaṅ po daṅ | ñe dbaṅ daṅ bcas pa’i lha rnams kyis mchod par bya (3) ba daṅ | rjed par bya ba daṅ | mṅon du smra bar bya bar gyur to | gtum mo des bu’i chuṅ ma blaṅs nas | dus gźan źig na gtum mo yaṅ dus la bab | de’i khyim thab kyaṅ dus la bab bo || gtum mo’i bu de kha ton gyi źor la yul gźan du soṅ ṅo || (4) gtum mo’i mna’ ma de gos daṅ zas bzaṅ źiṅ źim pa la loṅs spyod spyod pas | ñon moṅs pa dag gis gduṅs par gyur nas | des bu mo mṅag gźug ma la smras pa | bu mo soṅ la skyes pa lus brtan pa | mkhraṅ ba | dam pa ’ga’ ci snaṅ tshol cig daṅ de (5) daṅ lhan cig dga’ mgur spyad par bya’o || bu mo mṅag gźug mas smras pa | jo mo khyod kyi gyos po daṅ sgyug mo gñis ni bden pa mthoṅ ba lags na | khyod draṅ sroṅ gi khyim ’di lta bur byon na ñes par spyod pa de lta bu ji ltar bgyir ruṅ | draṅ sroṅ gi khyim gyi mi sñan (6) pa skyed par mdzad dam ci | des smras pa | kwa’i khyod la bsam pa des ci bya | je soṅ la khrid de śog śig | gal te khrid de ma ’oṅs na khyod la mtshams chen po gcad par bya’o || bu mos bsams pa | bu zan ma’i bu mo ’dis draṅ sroṅ gi khyim btsog gis (7) dgaṅ bar chad de | bdag la dka’ ba med kyis dgug go sñam nas | de sraṅ du soṅ ba dag | des de na chom rkun pa’i dmag dpon lus brtan pa | mkhraṅ ba dam pa źig mthoṅ nas | des de la smras pa | kye btsun po khyod kho mo’i jo mo daṅ lhan cig dga’ (64b1) mgur spyod phod dam | des smras pa | phod do || des de khrid de jo mo daṅ sprad nas | de de daṅ lhan cig dga’ mgur spyod par byed do || tshe daṅ ldan pa ’char ka des dus daṅ dus su ’gro bas de mthoṅ nas | tshe daṅ ldan pa ’char kas bsams pa | bud med kyi (2) yul ’di ni ’dod chags spyod pa źig yin no sñam nas | des de la ’dod chags kyi bsṅags pa ma yin pa brjod do || des bsams pa | ’phags pa ’char ka ni gźan gyi sems śes pa la mkhas pa yin pas des bdag ’phrigs kyis | gal te de ma bsad na (3) des bdag gi khyim thab la byas śiṅ | de bdag la gnod pa byed par ’gyur du ’oṅ gis | bdag gis de bsad do sñam nas | des chom rkun pa’i dmag dpon la smras pa | ’phags pa ’char ka ni gźan gyi sems śes pa la mkhas pa yin pas | des bdag (4) cag ’phrigs kyis | gal te de ma bsad na bdag gi khyim thab la byas śiṅ | de bdag cag la gnod pa byed par ’gyur du ’oṅ gis | khyod kyis de sod cig | chom rkun pa’i dmag dpon gyis smras pa | kho bo de mi gsod de | de ni ko sa lar byuṅ ba’i rgyal po (5) gsal rgyal gyi ni chuṅ po grogs | btsun mo phreṅ ldan ma’i ni slob dpon yin gyis | kho bos de bsad par gyur na kho bo rgyal pos rgya skyegs kyi khaṅ par bcug ste | bsregs pas ’chi bar bya dgos pa gaṅ yin pa de lta bu’i gnas yod par ’gyur ro || des smras pa | (6) gal te khyod de gsod na de lta na legs | gal te mi gsod na khyod phyin chad kho mo’i khyim du ’jug par mi bya’o || ’dod pa sten pa dag gis ni sdig pa’i chos mi bya ba ci yaṅ med pas chom rkun pa’i dmag dpon des smras pa | gal te de gźan gyi sems śes pa la mkhas pa (7) yin na kho bos ji ltar gsad par bya | des smras pa | thabs kyi rnam pa źig bya’o źes des dus ma yin par tshe daṅ ldan pa ’char ka’i gan du mṅag pa btaṅ ste | btsun pa ’char ka bdag bro ’tshal bar gyur na khyod kyis bdag gzigs par ci gnaṅ źes spriṅ ṅo || dgra (65a1) bcom pa dag ni ma bsams par śes pa daṅ mthoṅ ba mi ’jug bas | tshe daṅ ldan pa ’char ka yaṅ dus ma yin par źugs te | de la chos bstan pa byas nas de phyir ’byuṅ bar brtsams pa daṅ | des smras pa | ’phags pa bdag khyod mthoṅ na glo ba dga’ (2) bas yud tsam źig bźugs su gsol źes | des tshe daṅ ldan pa ’char ka ji srid kyis śin tu nam sros par gyur pa de srid du bzuṅ nas | chom rkun pa’i dmag dpon yaṅ ral gri śubs nas phyuṅ ste sgo na sdod do || de nas tshe daṅ ldan pa ’char ka phyir byuṅ ba daṅ | chom rkun pa’i (3) dmag dpon sñiṅ rje med pa’i sems daṅ ldan pa | ’jig rten pha rol btad ba des tshe daṅ ldan pa ’char ka’i mgo druṅ ba nas bcad de sa la bsgyel to || de ’phags pa gsod ciṅ ’dug pa bud med rgan mo źig gis mthoṅ nas | des smras pa | gzu lums byed pa ’di su źig yin | (4) chom rkun pa’i dmag dpon gyis smras pa | su la yaṅ ma zer cig | kho bos khyod kyaṅ ’di’i gnas skabs lta bur byas par gyur ta re | de skrag nas ’phral du smra ma phod de | bdag ñid chen po ’di’i rjes gcod pa ’ga’ źig phyis ’oṅ graṅ sñam nas || de ñid na caṅ mi smra bar (5) ’dug go | sñiṅ rje med pa’i sems daṅ ldan pa ’jig rten pha rol btaṅ ba de gñis kyis tshe daṅ ldan pa ’char ka’i lus de phyag dar gyi phuṅ po źig tu sbas te bźag go | de’i ñin mo gso sbyoṅ gi źal ta ba rgan pa’i mtha’ logs su ’dug ste smras pa | ’ga’ źig gis btsun pa (6) ’char ka’i ’dun pa blaṅs sam | btsun pa ’char ka med do || de nas bcom ldan ’das kyis dge sloṅ rnams la bka’ stsal pa | dge sloṅ dag khyim dad par byed pa rnams kyi mchog de bsad kyis | chos gos dag loṅ śig daṅ de’i lus la mchod pa bya’o || bcom ldan (7) ’das ’phags pa daṅ ji tsam na mñan yod kyi sgo chod nas | bcom ldan ’das kyis gser gyi ’od lta bu’i ’od btaṅ ba mdzad pa daṅ | des mñan yod thams cad gser btso ma’i ’od lta bus snaṅ bar gyur to || ko sa lar byuṅ ba’i rgyal po gsal rgyal gyis bsams pa | ci’i (65b1) phyir mñan yod thams cad gser btso ma’i ’od lta bus snaṅ bar gyur sñam nas | des yaṅ bsams pa | bcom ldan ’das gśegs par bźed gor ma chag sñam nas | de btsun mo’i ’khor daṅ bcas pas mñan yod kyi lde mig khyer te | sgo phye ba daṅ bcom ldan ’das (2) mñan yod du gśegs so || ko sa lar byuṅ ba’i rgyal po gsal rgyal gyis bsams pa | ci’i phyir bcom ldan ’das dus ma yin par mñan yod du gśegs sñam na | saṅs rgyas bcom ldan ’das rnams ni bsñen par dka’ ba daṅ | bzod par dka’ ba yin pas (3) des saṅs rgyas bcom ldan ’das la źu bar ma nus so || bcom ldan ’das ñan thos kyi dge ’dun daṅ bcas pa mdun du gśegs nas ko sa lar byuṅ ba’i rgyal po gsal rgyal btsun mo’i ’khor daṅ bcas pa bcom ldan ’das kyi slad bźin slad bźin du rjes su ’braṅ źiṅ soṅ ba daṅ | (4) ji tsam na | phyag dar gyi phuṅ po’i phyogs der byon to || de nas bcom ldan ’das kyis dge sloṅ rnams la bka’ stsal pa | dge sloṅ dag khyim pa dad par byed pa rnams kyi mchog de ’dir sbas kyis phyuṅ śig | de phyuṅ ba daṅ de na gaṅ dag tshe daṅ ldan pa ’char ka la brten nas | (5) ’phags pa’i bden pa dag mthoṅ ba de dag gis gsol pa | ’di bdag cag gi dge ba’i bśes gñen lags na | bcom ldan ’das kyis bdag can ’di’i lus la mchod pa bgyid par ci gnaṅ | bcom ldan ’das kyis ma gnaṅ ṅo || ko sa lar byuṅ ba’i rgyal (6) po gsal rgyal gyis gsol pa | ’di bdag gi chuṅ po grogs lags na | bcom ldan ’das kyis bdag ’di’i lus la mchod pa bgyid par ci gnaṅ | bcom ldan ’das kyis ma gnaṅ ṅo || btsun mo phreṅ ldan mas gsol pa | ’di bdag gi slob dpon (7) lags na | bcom ldan ’das kyis bdag ’di’i lus la mchod pa bgyid par ci gnaṅ | bcom ldan ’das kyis gnaṅ ṅo || de nas btsun mo phreṅ ldan mas | tshe daṅ ldan pa ’char ka’i lus de sa dkar gyis dril phyi byed du bcug nas | spos chus (66a1) ’khrur bcug ste | ras kha dog sna tshogs dag gis khyogs spyil brgyan nas | der bcug ste bźag go | de nas bcom ldan ’das ñan thos kyi dge ’dun daṅ bcas pa mdun du gśegs nas | rgyal po btsun mo’i ’khor daṅ bcas pa de’i phyi (2) bźin phyi bźin du rjes su ’phraṅ źiṅ soṅ ste || sa phyogs go skabs yaṅs pa źig tu bźag nas | btsun mo phreṅ ldan mas spos kyi śiṅ thams cad kyis phuṅ por bcer te bsregs nas | phuṅ po de ’o mas źi bar byas te | rus pa de dag gser gyi bum par bcug nas (3) lam po che’i bźi mdor lus kyi mchod rten rtsig tu bcug ste | gdugs daṅ | rgyal mtshan | ba dan bsgreṅ źiṅ | dri daṅ | phreṅ ba rgyu daṅ | bdug spos daṅ | phye ma daṅ | sil sñan dag gis mchod pa byas | rkaṅ pa gñis la phyag ’tshal nas | (4) bcom ldan ’das kyis yon bśad pa mdzad de gśegs so || de nas bcom ldan ’das gtsug lag khaṅ du byon nas | dge sloṅ gi dge ’dun gyi goṅ du gdan bśams pa ñid la bźugs so || bźugs nas bcom ldan ’das kyis dge sloṅ rnams la bka’ stsal | (5) pa | dge sloṅ dag ñes dmigs ’di daṅ gźan dag kyaṅ | dge sloṅ dag dus ma yin par groṅ du ’jug pa las gyur pas | dge sloṅ dag de lta bas na phan yon bcu yaṅ dag par gzigs pas | ’dul ba la ñan thos rnams kyi bslab pa’i gźi bca’ bar bya ste źes bya (6) ba la sogs pa sṅa ma bźin no || ṅa’i ñan thos rnams kyis ’dul ba la bslab pa’i gźi ’di ltar gdon par bya ste | yaṅ dge sloṅ gaṅ dus ma yin par groṅ du ’jug na ltuṅ byed do źes bcom ldan ’das kyis ’dul ba la ñan thos rnams kyi bslab pa’i gźi de ltar bca’ ba mdzad do || (7) dge sloṅ nad ṅan can dag ’khod pa dag gis yun riṅ du ’dug par mi nus pa nas | dge sloṅ nad g-yog dag gis kyaṅ nad pa dag gi bya ba ñams par byed | dge sloṅ źal ta byed pa dag gis kyaṅ dge ’dun gyi bya ba ñams par byed pa’i skabs de dge sloṅ rnams kyis bcom ldan (66b1) ’das la gsol ba daṅ | bcom ldan ’das kyis bka’ stsal pa | de lta bas na dge sloṅ ’dug pa la smras te ’gro bar bya’o || bcom ldan ’das kyis dge sloṅ ’dug pa la smra bar bya’o źes bka’ stsal nas | dge sloṅ źig gis khyim gźan du lhuṅ bzed daṅ chos gos (2) bźag nas | ji tsam na der me śor nas dge sloṅ des der ’gro bar brtsams te | de lam gyi phyed du son pa daṅ | bdag gis dge sloṅ ’dug pa lam smras so sñam pa’i dran pa skyes nas de phyir log ste | ji srid du dge sloṅ ’dug pa la smra bar byed pa de srid du de’i lhuṅ bzed (3) daṅ chos gos tshig nas des der soṅ ba daṅ | khyim bdag gis smras pa | ’phags pa khyod ci’i slad du khyod ’phyis te byon | des na khyod kyi lhuṅ bzed daṅ chos gos tshig gi | gal te khyod myur du byon par gyur na khyod kyi lhuṅ bzed daṅ chos gos tshig bar mi ’gyur ro źes zer (4) źiṅ | dge sloṅ de yaṅ phoṅs par gyur pa’i skabs de dge sloṅ rnams kyis bcom ldan ’das la gsol pa daṅ | bcom ldan ’das kyis bka’ stsal pa | de lta bas na de ’dra ba’i rkyen ma gtogs so || de nas bcom ldan ’das kyis bslab pa ’dod pa daṅ | bslab pa la (5) gus pa daṅ | bslab pa la yo byad bsñuṅs pa’i bsṅags pa brjod nas dge sloṅ rnams la de daṅ mthun pa daṅ | de’i śas che ba daṅ | de daṅ ’tsham ba’i chos daṅ ldan pa’i bka’ mchid mdzad nas dge sloṅ rnams la bka’ stsal pa | dge sloṅ dag de lta bas na sṅa ma ni bcas pa (6) yin la | ’di ni gnaṅ ba yin te | ṅa’i ñan thos kyis ’dul ba la bslab pa’i gźi ’di ltar gdon par bya ste | yaṅ dge sloṅ gaṅ dus ma yin par groṅ du ’jug ciṅ dge sloṅ ’dug pa la mi smra na de ’dra ba’i rkyen ma gtogs te lhuṅ byed do || yaṅ dge sloṅ gaṅ źes bya ba ni chos ’di (7) pa’am | gźan yaṅ de lta bu gaṅ yin pa’o || dus ma yin par źes bya ba ni dus ma yin pa gñis su ste | skya reṅs ma śar ba daṅ phyed yol bar ro || groṅ du źes bya ba ni gaṅ na sraṅ daṅ | bźi mdo daṅ | sum mdo dag yod bar do || ’jug ciṅ źes bya ba ni ’gro (67a1) źiṅ ṅo || dge sloṅ ’dug pa la mi smra na źes bya ba ni de na dge sloṅ gaṅ ’dug ba la’o || de ’dra ba’i rkyen ma gtogs te źes bya ba ni de ’dra ba’i rkyen bźag ste’o || ltuṅ byed do źes bya ba ni sems can dmyal ba daṅ | dud ’gro daṅ | yi dgas ṅan soṅ daṅ | (2) ṅan ’gro log par ltuṅ ba dag tu sreg par byed | ’tshod par byed | ltuṅ bar byed pa’o || gźan yaṅ ji srid du ltuṅ ba de ma bśags śiṅ so sor ma bśags na dge ba’i chos rnams la sgrib par byed pa ste | des na ltuṅ byed do źes gsuṅs so || de la ltuṅ bar ji ltar (3) ’gyur źe na | dge sloṅ gis dus ma yin pa la dus ma yin par ’du śes pas groṅ du ’jug na ltuṅ byed du ’gyur ro || dus ma yin pa la yid gñis za bas groṅ du ’jug na ltuṅ byed du ’gyur ro || dus la dus ma yin par ’du śes pas | groṅ du ’jug na ñes byas su ’gyur (4) ro|| dus la yid gñis za bas groṅ du ’jug na ñes byas su ’gyur ro || las daṅ po pa daṅ | smyos pa daṅ | sems ’khrugs pa daṅ | tshor ba ’khrugs pa daṅ | tshor ba dag gis ñen pa la ltuṅ ba med do || btsun mo phreṅ ldan mas ko sa lar byuṅ ba’i rgyal po gsal rgyal la smras pa | lhas (5) dge sloṅ rnams la ni gźon nu’i yoṅs su spaṅ ba stsal | dge sloṅ ma rnams la ni btsun mo’i ’khor gyi yoṅs su spaṅ ba stsal ciṅ | ’phags pa ’char ka lha’i ni chuṅ po grogs lags | bdag gi ni slob dpon lags te | dge sloṅ rab tu grags pa de lta bu yaṅ btsan thoṅ (6) du bkum na dge sloṅ rab tu ma grags pa gźan dag la bka’ mchid kyaṅ su rmed par ’gyur | ltas ’phags pa ’char ka de sus ’gums su stsal ba daṅ sus bkum pa bkas rma bar ci gnaṅ | ko sa lar byuṅ ba’i rgyal po gsal rgyal gyis źo śas ’tsho ba dag la bsgo ba | śes (7) ldan dag deṅ la ’phags pa ’char ka de sus gsod du bcug pa daṅ | sus bsad pa smros śig | de dag de rmed ciṅ phyogs der doṅ ba daṅ | de dag gis de na bud med rgan mo de mthoṅ źiṅ | des ni de dag mthoṅ źiṅ | des ni de dag ma mthoṅ ba na | bud med rgan mo des byuṅ rgyal du smras pa | phyogs (67b1) ’dir khyim dad par byed pa rnams kyi mchog de sbas pa ni de daṅ de dag gis bsad do || de dag gis de thos nas smras pa | rgan mo ci zer | rgan mo des smras pa | caṅ mi zer ro || de dag gis de bzuṅ ste bsdigs nas | de sus bsad smros śig ces byas pa daṅ | des (2) bram ze’i bu mo ’dis gsoṅ du bcug go | chom rkun pa’i dmag dpon ’dis bsad do || de dag gis kyaṅ bsdigs te | ci de gñis kho nar zad dam źes rmas pa daṅ | des smras pa | gźan yaṅ g-yon can lṅa brgya yod do || rgyal po’i mi de dag (3) gis bram ze’i bu mo de daṅ | chom rkun pa’i dmag dpon de daṅ | g-yon can lṅa brgya po de dag bzuṅ ste rgyal po la phul nas smras pa | lha ’phags pa ’char ka ni bram ze’i bu mo ’dis ’gums su stsal te | chom rkun pa’i dmag dpon ’dis bkum mo || g-yon (4) can lṅa brgya po ’di dag gi dmag dpon ni ’di lags so | rgyal pos smras pa | śes ldan dag deṅ la bram ze’i bu mo ’di rte’u dmu rgod kyi rkaṅ pa gñis la thogs śig | chom rkun pa’i dmag dpon ’di ni rgya skyegs kyi khaṅ par chug la sregs śig | g-yon can (5) lṅa brgya po ’di dag ni lag pa daṅ rkaṅ pa daṅ chod cig | de dag gis bram ze’i bu mo de ni rte’u dmu rgod kyi rkaṅ pa gñis la btags so || chom rkun pa’i dmag dpon de ni rgya skyegs kyi khaṅ par bcug ste bsregs so || g-yon can lṅa brgya po de dag ni lag pa daṅ rkaṅ pa (6) dag bcad do || dge sloṅ rnams the tshom skyes nas | the tshom thams cad gcod pa saṅs rgyas bcom ldan ’aṅs la źus pa | btsun pa tshe daṅ ldan pa ’char kas las ci bgyis na | las de’i rnam par smin pas sdaṅ ba ma mchis pa daṅ | gnod pa ma bgyis (7) bźin du de gñis kyis bkum par gyur ciṅ | de gñis kyaṅ bkum par gyur | g-yon can lṅa brgya po dag kyaṅ pa lag pa daṅ rkaṅ pa dag bkum par gyur | bcom ldan ’das kyis bka’ stsal pa | dge sloṅ dag de dag ñid kyis las tshogs rñed pa | rkyen yoṅs su (68a1) bsgyur ba | ’od pa bźin du ñe bar gnas pa gdon mi za bar ’gyur ba dag byas śiṅ bsags pas | de dag ñid kyis las byas śiṅ bsags pa dag gźan su źig gis so sor myoṅ bar ’gyur | dge sloṅ dag las byas śiṅ bsags pa dag ni phyi (2) rol gyi sa’i khams la rnam par smin par mi ’gyur | chu’i khams la mi ’gyur | me’i khams la mi ’gyur | rluṅ gi khams la mi ’gyur gyi | ’di ltar las dge ba daṅ mi dge ba byas śiṅ bsags pa dag ni zin pa’i phuṅ po daṅ | khams daṅ skye mched dag la rnam par (3) smin par ’gyur te | las rnams bskal ba brgyar yaṅ ni || chud mi za ba’aṅ tshogs daṅ dus | rñed na lus can rnams la ni || ’bras bu dag tu ’gyur ba ñid || dge sloṅ dag sṅon byuṅ ba ’das pa’i dus na bā rā ṇa sī na rgyal po tshaṅs byin źes bya bas rgyal srid byed du bcug (4) pa’i tshe ñam ṅa ba daṅ bcas pa’i dus khyud ba na mu stegs can dag gis lo bcu gñis su than pa ’byuṅ ṅo źes luṅ bstan nas | rgyal po tshaṅs byin gis dril bsgrag pa byed du bcug ste | gaṅ la lo bcu gñis kyi zan yod pa de ni ’dug śig | gaṅ la med pa de ni soṅ śig ces (5) bsgo’o || de’i mdun na ’don de bram ze’i khye’u lṅa brgya tsam bram ze’i gsaṅ tshig klog tu ’jud pa de la bram ze’i khye’u de dag gis smras pa | mkhan po bdag cag la lo bcu gñis kyi ’tshal ma la mchis kyis bdag cag mchi’o || des smras pa | bu dag ’khod cig daṅ kho (6) bos khyed la mkho ba bstabs par bya’o || rgyal po tshaṅs byin gyi rmi lam na bdag gi rgyu ma dag gis groṅ khyer thams cad dkris par mthoṅ ṅo || mthoṅ nas kyaṅ de gźi ’dis bdag rgyal srid las ñams pa’am | tshe’i bar chad ’byuṅ ba’am | gcig tu mi ’gyur graṅ sñam du ’jigs pa (7) skyes par gyur nas | des rmi lam de mdun na ’don de la bzlas pa daṅ | mdun na ’don des bsams pa | lhas rmi lam bzaṅ po źig gzigs mod kyis | ’on kyaṅ bram ze’i khye’u dag gi rñed pa’i bar chad du gyur na mi ruṅ gis || ṅan par bsñad par bya’o sñam nas | (68b1) des rgyal po la smras pa | lhas rmi lam ṅan pa źig gzigs pas | gźi ’dis rgyal srid las ñams pa’am | sku tshe’i bar chad ’byuṅ ba ’am gcig tu ’gyur ro || rgyal pos smras pa | ’di la ci źig bya | des smras pa | lha ba laṅ gi mchod sbyin stsal (2) bar bgyi’o || rgyal pos smras pa | de ltar bya’o | des ba laṅ stoṅ phrag du ma dag bsogs pa daṅ | rgyal po phyir byuṅ nas rgyal pos ba laṅ de dag mthoṅ ba daṅ | ba laṅ de dag gis ba laṅ gi’u sgra chen po phyuṅ ṅo || rgyal pos de dag mthoṅ źiṅ thos nas || de sñiṅ (3) rje skyes te mdun na ’don la smras pa | ’di dag thams cad gsad par bya’am | mdun na ’don gyis bsams pa | rgyal po ’di dag thams cad bsad par mi ’dod do sñam nas | des smras pa | lha thams cad dgum par mi bgyi’o || de’i tshe na rṅa bran źig rṅa bran mo (4) źig la rgyab rgal byed nas mdun na ’don gyis smras pa | lha rṅa bran mo ’di gñis dgum par bgyi’o || bram ze’i khye’u de dag gis kyaṅ lag pa brkyaṅ ste | ’di gñis lags so źes bstan nas | de gñis bśas pa na sems g-yos pa | bdag cag (5) gñis sdaṅ ba med pa daṅ | gnod pa ma byas bźin du bsad pa gaṅ yin pa de thams cad ni mdun na ’don ’di daṅ | bram ze’i bu lṅa brgya po ’di dag gi le lan yin gyis | bdag cag gñis gaṅ daṅ gaṅ du skyes pa na | bdag cag gñis kyis mdun na ’don ’di sdaṅ ba (6) med pa daṅ | gnod pa ma byas bźin du gsod pa daṅ | bram ze’i khye’u lṅa brgya po ’di dag kyaṅ lag pa daṅ rkaṅ pa dag gcod du ’jud par gyur cig ces sñam du dam bcas so || dge sloṅ dag de’i tshe de’i dus na rgyal po tshaṅs byin gaṅ yin pa de ni da ltar ko sa lar byuṅ ba’i rgyal (7) po gsal rgyal yin no || de’i tshe de’i dus na rgyal po tshaṅs byin gyi btsun mo gaṅ yin pa de ni da ltar btsun mo phreṅ ldan ma yin no || de’i tshe de’i na mdun na ’don gaṅ yin pa de ni da ltar dge sloṅ ’char ka yin no || de’i tshe de’i dus na bram ze’i khye’u lṅa brgya po gaṅ dag yin (69a1) pa de dag ni da ltar g-yon can lṅa brgya po dag yin no || de’i tshe de’i dus na rṅa bran gaṅ yin pa de ni da ltar chom rkun pa’i dmag dpon yin no || de’i tshe de’i dus na rṅa bran mo gaṅ yin pa de ni da ltar bram ze’i bu mo yin te || mdun na ’don de daṅ bram ze’i khye’u lṅa brgya po de dag (2) gis rṅa bran daṅ rṅa bran mo de gñis sdaṅ ba med pa daṅ | gnod pa ma byas bźin du gsod du bcug pa’i las de’i rnam par smin pas da ltar yaṅ chom rkun pa’i dmag dpon ’di daṅ | bram ze’i bu mo ’di gñis kyis ’char ka daṅ | g-yon can lṅa brgya po dag sdaṅ ba med pa daṅ | (3) gnod pa ma byas bźin du gsod du bcug go | btsun pa tshe daṅ ldan pa ’char kas las ci źig bgyis na | las de’i rnam par smin pas phyug pa | nor maṅ pa | loṅs spyod che ba’i khyim du skyes | las ci bgyis na des bcom ldan ’das kyi spyan sṅar rab tu byuṅ nas | ñon (4) moṅs pa thams cad spaṅs pas dgra bcom pa ñid mṅon sum du bgyis || las ci źig bgyis na des dgra bcom pa ñid thob kyaṅ mtshon gyis yoṅs su mya ṅan las ’das | bcom ldan ’das kyis bka’ stsal pa | dge sloṅ dag rigs kyi bu ’char ka ñid kyis las tshogs rñed (5) pa | rkyen yoṅs su bsgyur ba | ’od pa bźin du ñe bar gnas pa | gdon mi za bar ’byuṅ bar ’gyur ba dag byas śiṅ bsags pas | ’char ka ñid kyis byas śiṅ bsags pa dag gźan su źig gis so sor myoṅ bar ’gyur || dge sloṅ dag las byas śiṅ bsags pa (6) dag ni phyi rol gyi sa’i khams la rnam par smin par mi ’gyur | chu’i khams la mi ’gyur | me’i khams la mi ’gyur || rluṅ gi khams la mi ’gyur gyi | ’di ltar las dge ba daṅ mi dge ba byas śiṅ bsags pa dag ni zin pa’i phuṅ po daṅ | khams daṅ | skye mched dag (7) la rnam par smin par ’gyur te | las rnams bskal pa brgyar yaṅ ni || chud mi za ba’aṅ tshogs daṅ dus || rñed na lus can rnams la ni | ’bras bu dag tu ’gyur ba ñid || dge sloṅ dag sṅon byuṅ ba ’das pa’i dus na saṅs rgyas rnams ’byuṅ ba med pa’i tshe | raṅ saṅs (69b1) rgyas dman pa daṅ bkren pa la rjes su sñiṅ brtse ba | bas mtha’i mtha’i gnas mal la dga’ ba | bse ru lta bu gcig pu ’jig rten gyi yon gnas su gyur pa ’jig rten du byuṅ ṅo || ji tsam na ri brags śig na rṅon pa źig ’dug ste | ri brags de daṅ ha caṅ mi riṅ ba źig na (2) ri dgas daṅ bya maṅ po dag gi rten du gyur pa mtshe’u źig yod pa der rṅon pa de ñi ma re re źiṅ ri dgas daṅ | bya maṅ po dag druṅs dbyuṅ ba’i phyir daṅ | ñams par bya ba’i phyir daṅ | tshul ma yin pas sdug bsṅal bar bya ba’i phyir rṅon spyad daṅ | rñi daṅ rñoṅ maṅ po dag (3) ’dzugs par byed do || de’i rṅon spyad daṅ | rñi daṅ rñoṅ de dag kyaṅ don yod pa yin no || ji tsam dus gźan źiṅ na raṅ saṅs rgyas śiṅ ljoṅs rgyu źiṅ soṅ ba na ri brags der phyin nas | lha’i gnas śig tu mtshan mo gnas par khas blaṅs nas | de sṅa dro śam thabs (4) bgos | lhuṅ bzed daṅ chos gos thogs te ri brags der bsod sñoms la źugs so || der bsod sñoms brgyus nas bsams pa | lha’i gnas ’di ñin mo rgyun lugs maṅ ba yin gyis || ri brags kyi phyi rol gyi gnas źi ba źig tu bsod sñoms bza’o sñam nas | (5) de ri brags nas byuṅ ste | ’di ni źi ba’o ’di ni źi ba’o źes mtshe’u da ga la ba der soṅ ste phyin nas | lhuṅ bzed daṅ chu tshags mtha’ gcig tu bźag ste | rkaṅ pa gñis bkrus nas lag pa gñis bsñal te chu btsags nas | lo ma lhags pa dag blaṅs te ’dug nas zas (6) kyi bya ba byas te lag pa gñis bsñal nas | kha bkrus te lhuṅ bzed daṅ chu tshags gnas ji lta ba bźin du bźag nas | rkaṅ pa gñis bkrus te śiṅ druṅ źig tu brten nas | braṅ ’gro’i rgyal po ñal ba’i lus bskyil ba ltar skyil mo kruṅ bcas te spyod lam źi bar ’dug pa daṅ | (7) de’i ñin mo mi’i dris ri dgas gcig kyaṅ ma zin to || de nas rṅon pa de naṅ par sṅar laṅs te | mtshe’u de ga la ba der soṅ nas des rṅon spyad daṅ | rñi daṅ | rñoṅ de dag byul bar brtsams pa daṅ | ri dgas gcig kyaṅ ma mthoṅ nas | de ’di sñam du sems te | (70a1) bdag gi rṅon spyad daṅ | rñi daṅ | rñoṅ ’di dag don yod pa yin na || gaṅ gi phyir der ri dgas gcig kyaṅ ma zin pa ’di’i rgyu gaṅ yin sñam nas | des mtshe’u de’i than kor byul bar brtsams pa daṅ | mi’i rjes mthoṅ nas de rjes de’i phyi bźin du soṅ ba daṅ | (2) raṅ saṅs rgyas spyod lam źi bas ’dug pa de mthoṅ nas des bsams pa | rab tu byuṅ ba sems źi ba ’di dag gnas ’di lta bu dag tu mṅon par dga’ bar byed pas | gal te bdag gis ’di’i srog bcad par ma byas nas | ’di dag gis ṅes par bdag gi ’tsho ba gcod par (3) byed kyis | rnam pa thams cad du ’di gsad par bya’o sñam nas | sñiṅ rje med pa’i sems daṅ ldan pa ’jig rten pha rol btaṅ ba des mda’ dug can gyis gźu rṅa’i dbyibs ’dra bar rna druṅ du thug par bkaṅ ste raṅ saṅs rgyas de’i gnad du bsnun to || raṅ saṅs rgyas bdag ñid (4) chen po des bsams pa | rṅon pa ñon moṅs pa ’di ha caṅ smas pa daṅ ñams par gyur na mi ruṅ gis | da ’di la lag nas draṅ ba źig bya’o sñam nas | des daṅ pa’i rgyal po ’dab ma brkyaṅ ba ltar steṅ gi nam mkha’ la mṅon par ’phags nas ’bar ba daṅ | gsal ba (5) daṅ | bar ’bebs pa daṅ | glog ’byin pa’i cho ’phrul dag bya bar brtsams so || so so’i skye bo ni rdzu ’phrul la myur du sems gtod par byed pa yin pas | rṅon pa de śiṅ ljon pa rtsa ba nas bcad pa bźin du raṅ saṅs rgyas de’i rkaṅ pa gñis kyi druṅ du ’gyel nas (6) smras pa | yon gnas yaṅ dag par gyur pa mar gśegs su gsol | mar gśegs su gsol | ñon moṅs pa’i ’dam du byiṅ ba bdag gi sug pa nas draṅ ba stsal du gsol | raṅ saṅs rgyas de rṅon pa de la rjes su sñiṅ brtse ba’i phyir || steṅ gi nam mkha’ (7) las śod du babs so || de nas rṅon pa des zug rṅu med par byas te | rma lhan gyis glan nas smras pa | ’phags pa sdum par gśegs su gsol | gal ta ’dir gser gyi lhan pas glan par mdzad na || de yaṅ bdag gis sbyar bar bgyi’o || raṅ saṅs rgyas kyis (70b1) bsams pa | bdag gis rnag gi lus ’dis thob par bya ba gaṅ yin pa thob zin pas | de’i phyir da ni phuṅ po’i lhag ma med pa’i mya ṅan las ’das pa’i dbyiṅs su ’jug par bya’o sñam nas | de rṅon pa de ñid kyi mdun du yaṅ nam mkha’i dkyil du ’phags te | cho ’phrul (2) rnam pa sna tshogs dag rnam par bstan nas | phuṅ po’i lhag ma med pa’i mya ṅan las ’das pa’i dbyiṅs su yoṅs su mya ṅan las ’das so || rṅon pa de nor daṅ ldan pa yin pas | des spos kyi śiṅ thams cad kyis phuṅ por bcer te bsregs nas | phuṅ po de ’o mas (3) źi bar byas te | rus pa de dag gser gyi bum par bcu gnas | lam po che’i bźi mdor lus kyi mchod rten rtsig tu bcug ste | gdugs daṅ | rgyal mtshan daṅ | ba dan dag bsgreṅ źiṅ | dri daṅ | phreṅ ba rgyu daṅ | bdug spos daṅ | phye ma daṅ | sil (4) sñan dag gis mchod pa byas nas | rkaṅ pa gñis la phyag ’tshal te smon lam ’di skad ces | bdag yon gnas yaṅ dag par gyur pa ’di lta bu la gnod pa byas pa gaṅ yin pa’i las de’i cha daṅ mthun par ma gyur par mchod par byas pa gaṅ yin pa’i dge ba’i rtsa ba ’dis | (5) bdag phyug ba | nor maṅ ba | loṅs spyod che ba’i khyim du skye bar gyur cig ces btab bo || dge sloṅ dag de la de’i tshe de’i dus na | rṅon pa gaṅ yin pa de ni ’char ka ’di yin te | des raṅ saṅs rgyas kyi gnad du maṅ ’dug can gyis bsnun pa gaṅ yin pa’i las de’i (6) rnam par smin pas | bskal par sems can dmyal ba chen po mnar med par gduṅs nas | las de ñid kyi lhag mas tshe rabs lṅa brgyar mtshe’u ’gram de ñid du ri dgas su skyes śiṅ | mtshon gyis dus la bab ste | da ltar gyi bar du yaṅ dgra bcom pa thob kyaṅ (7) de mtshon gyis yoṅs su mya ṅan las ’das so || mchod pa byas nas smon lam btab pa gaṅ yin pa des ni da ltar phyug pa | nor maṅ ba | loṅs spyod che ba’i khyim du skyes so || btsun pa tshe daṅ ldan pa ’char kas las ci bgyis na | las de’i rnam par smin las (71a1) ’di dus la bab pa’i lus phyag dar gyi phuṅ por sbas pa daṅ | ’dis ston pa mñes par bgyis śiṅ | thugs byuṅ bar ma bgyis pa daṅ | ’di dus la bab pa’i lus la ston pa ñan thos kyi dge ’dun daṅ bcas pa daṅ | rgyal po’i btsun mo ’khor (2) daṅ bcas pas | lus kyi mchod pa bgyis pa de lta bu’i yon tan gyi tshogs thob par gyur | dge sloṅ dag ’char ka ñid kyis las tshogs rñed pa | rkyen yoṅs su bsgyur ba | ’od pa bźin du ñe bar gnas pa | gdon mi za bar ’byuṅ bar ’gyur ba dag byas (3) śiṅ bsags pas | ’char ka ñid kyis las byas śiṅ bsags pa dag gźan su źig gis so sor myoṅ bar ’gyur | dge sloṅ dag las byas śiṅ bsags pa dag ni | phyi rol gyi sa’i khams la rnam par smin par mi ’gyur | chu’i khams la mi ’gyur | me’i (4) khams la mi ’gyur | rluṅ gi khams la mi ’gyur gyi | ’di ltar las dge ba daṅ | mi dge ba byas śiṅ bsags pa dag ni zin pa’i phuṅ po daṅ | khams daṅ | skye mched dag la rnam par smin par ’gyur te | las rnam bskal ba brgyar yaṅ ni || chud mi (5) za ba’aṅ tshogs daṅ dus | rñed na lus can rnams la ni || ’bras bu dag tu ’gyur ba ñid | dge sloṅ dag sṅon byuṅ ba ’das pa’i dus na saṅs rgyas rnams ’byuṅ ba med pa’i tshe | raṅ saṅs rgyas dman pa daṅ | bkren pa la rjes su sñiṅ brtse ba | bas mtha’i (6) gnas mal la dga’ ba | bse ru lta bu gcig pu ’jig rten gyi yon gnas su gyur pa dag ’jig rten du byuṅ ṅo || gaṅs kyi sul źig na raṅ saṅs rgyas lṅa brgya gnas te | de na raṅ saṅs rgyas gcig cig na bar gyur nas gźan dag gis de la smras pa | khyod bźud la (7) sman pa la rmos te cho ga mdzod cig | de ri brags gźan źig tu soṅ nas mtshan mo rdza mkhan gyi ra ba źig tu gnas par khas blaṅs pa daṅ | de mtshan mo na bar gyur nas dus la bab bo || rdza mkhan des de mthoṅ nas des bsams pa | rab tu byuṅ ba ’di rdza so btaṅ ba daṅ | ma (71b1) btaṅ ba dag gi naṅ du dus la bab pas ’jig rten ni gtsaṅ sbra ’dod pa yin pas | gal te skye bo dag gis tshor bar gyur na ’ga’ yaṅ snod ño bar mi ’gyur ro sñam nas | des raṅ saṅs rgyas kyi lus de phyag dag gyi phuṅ po źig tu sbas te bźag go | raṅ saṅs rgyas gźan dag (2) gis bsams pa | bdag cag gi tshaṅs pa mtshuṅs par spyod pa de gar soṅ sñam nas bltas pa daṅ | ji tsam na yoṅs su mya ṅan las ’das par mthoṅ nas de dag gis de ñid nas spos kyi śiṅ dag steṅ gi nam mkha’ las khyer te ’oṅs nas rdza mkhan gyir bar babs pa daṅ | (3) rdza mkhan gyis de dag mthoṅ nas | des smras pa | ’phags pa dag gar gśegs | de dag gis smras pa | tshaṅs pa mtshuṅs par spyod pa la mchod par byed du’o || rdza mkhan gyis smras pa | ’dis kyaṅ khyod kyi yon tan gyi tshogs lta bu dag thob bam | de dag (4) gis smras pa | thob bo || rdza mkhan gyis smras pa | bdag gis ’di la bkur sti ma lags pa bgyis pas | da bkur sti bgyi ba’i bar du yud tsam źig gźes su gsol | de soṅ ste rgyal po la smras pa | lta bdag gi ra bar rab tu byuṅ ba brtul źugs (5) grub pa źig dus la bab kyis | lhas de la bkur sti mdzad du gsol | rgyal po btsun mo’i ’khor daṅ bcas pa phyir byuṅ nas | des raṅ saṅs rgyas kyi lus de spos kyi śiṅ thams cad kyi phuṅ por bcer te bsregs nas phuṅ po de ’o mas źi bar byas te rus pa de (6) dag gser gyi bum par bcug nas lam po che’i bźi mdor lus kyi mchod rten rtsig tu bcug ste | gdugs daṅ | rgyal mtshan daṅ | ba dan bsgreṅ źiṅ | dri daṅ | phreṅ ba rgyu daṅ | bdug spos daṅ | phye ma daṅ | sil sñan dag gis mchod par byas so || rdza mkhan des (7) rkaṅ pa gñis la phyag ’tshal te smon lam ’di skad ces | bdag yon gnas yaṅ dag par gyur pa ’di lta bu la gnod pa byas pa gaṅ yin pa’i las de’i cha daṅ mthun par ma gyur par mchod par byas pa gaṅ yin pa’i dge ba’i rtsa ba ’dis | bdag ’di bas ches khyad par du ’phags (72a1) pa’i ston pa mñes par byed ciṅ thugs byuṅ bar byed par mi ’gyur ba daṅ | bdag dus la bab pa’i lus la yaṅ ston pa ñan thos kyi dge ’dun daṅ bcas pa daṅ | rgyal po’i btsun mo’i ’khor daṅ bcas pa mchod pa mdzad par gyur cig ces btab bo || dge (2) sloṅ dag de’i tshe de’i dus na rdza mkhan gaṅ yin pa de ni da ltar dge sloṅ ’char ka ’di yin te | ’dis de’i tshe raṅ saṅs rgyas de dus la bab pa’i lus de phyag dar gyi phuṅ por sbas pa’i las de’i rnam par smin pas ni da ltar ’di dus la bab pa’i pa’i lus phyag dar gyi phuṅ por sbas so || ’dis (3) de’i tshe raṅ saṅs rgyas kyi lus de la mchod pa byas te smon lam de skad btab pa’i las de’i rnam par smin pas ni da ltar ’dis raṅ saṅs rgyas bye ba phrag ’bum pas ches khyad par du ’phags pa’i ston pa ṅa mñes par byas śiṅ thugs byuṅ bar ma byas te | ’di dus la bab pa’i lus la (4) ston pa ñan thos kyi dge ’dun daṅ bcas pa daṅ | rgyal po’i btsun mo ’khor daṅ bcas pas lus kyi mchod pa byas par gyur to || btsun pa tshe daṅ ldan pa ’char kas las ci bgyis na las de’i rnam par smin pas bcom ldan ’das kyis khyim dad par bgyid pa rnams kyi mchog tu bstan | (5) de ni smon lam gyi dbaṅ gis te | gaṅ du smon lam btab ce na | dge sloṅ dag sṅon byuṅ ba ’das pa’i dus na bskal pa chen po bzaṅ po ’di ñid la skye dgu’i tshe lo ñi khri thub pa na | ston pa de bźin gśegs pa dgra bcom pa yaṅ dag par rdzogs pa’i saṅs rgyas rig pa daṅ źabs (6) su ldan pa | bde bar gśegs pa | ’jig rten mkhyen pa | skyes bu ’dul ba’i kha lo sgyur ba bla na med pa | lha daṅ mi rnams kyi ston pa saṅs rgyas bcom ldan ’das ’od sruṅ ’jig rten du byuṅ ste | de bā rā ṇa sī na draṅ sroṅ smra ba ri dgas kyi nags na ñe bar brten ciṅ bźugs (7) so | de’i bstan pa la ’di rab tu byuṅ nas dge sloṅ de de bźin gśegs pa yaṅ dag par rdzogs pa’i saṅs rgyas ’od sruṅ gis khyim dad par byed pa rnams kyi mchog tu bstan to || de na ’dis tshe ji srid par tshaṅs par spyod pa spyad na yon tan gyi tshogs (72b1) ’gal yaṅ ma thob nas de’i ’og tu mchi ba’i tshe smon lam ’di skad ces | bdag gis bcom ldan ’das de bźin gśegs pa yaṅ dag par rdzogs pa’i saṅs rgyas yon gnas bla na med pa ’od sruṅ la tshe ji srid par tshaṅs par spyod pa spyad kyaṅ yon tan ’ga’ yaṅ ma thob ste | bdag gis (2) tshe ji srid par tshaṅs par spyod pa spyad pa’i dge ba’i rtsa ba ’dis bcom ldan ’das de bźin gśegs pa yaṅ dag par rdzogs pa’i saṅs rgyas ’od sruṅ gis bram ze’i khye’u bla ma la bram ze’i khye’u khyod ma ’oṅs pa’i dus na skye dgu’i tshe lo brgya thub pa na de bźin gśegs pa dgra bcom pa yaṅ dag (3) par rdzogs pa’i saṅs rgyas rig pa daṅ źabs su ldan pa | bde bar gśegs pa | ’jig rten mkhyen pa | skyes bu ’dul ba’i kha lo sgyur ba bla na med pa | lha daṅ mi rnams kyi ston pa saṅs rgyas bcom ldan ’das śākya thub pa źes bya bar ’gyur ro źes luṅ bstan pa de’i bstan pa la (4) bdag rab tu byuṅ nas ñon moṅs pa thams cad spaṅs pas dgra bcom pa ñid mṅon du byed ciṅ | ji ltar mkhan po ’di bcom ldan ’das de bźin gśegs pa yaṅ dag par rdzogs pa’i saṅs rgyas ’od sruṅ gis khyim dad par byed pa rnams kyi mchog tu bstan pa de bźin du bdag kyaṅ (5) bcom ldan ’das śākya thub pa | śākya ’i seṅ ge | śākya ’i rgyal po’i gtso bo des khyim dad par byed pa rnams kyi mchog tu bstan par gyur cig ces gdab par brtsams pas | smon lam de’i dbaṅ gis da ltar de bźin gśegs pas khyim dad par byed pa rnams kyi mchog (6) tu bstan to || dge sloṅ dag de ltar na las gcig tu gnag pa yin la | gcig tu dkar ba rnams kyi rnams kyi rnam par smin pa yaṅ gcig tu gnag pa yin la | gcig tu dkar ba rnams kyi rnam par smin pa yaṅ gcig tu dkar ba yin | las ’dren ma rnams kyi rnam par smin pa yaṅ ’dren ma yin no || dge (7) sloṅ dag de lta bas na las gcig tu gnag pa rnams daṅ | ’dren ma rnams spaṅs te las gcig tu dkar ba rnams la brtsal bar bya ste | dge sloṅ dag khyed kyis de ltar bslab par bya’o || dus ma yin par ’gro ba’i ltuṅ byed de brgyad bcu pa rdzogs s+ho ||| (73a1) | ’dul ba rnam par ’byed pa | bam po drug bcu rtsa brgyad pa |

.