’jam dpal gyis gsol pa | bcom ldan ’das dbaṅ po lṅa rnams ji ltar blta bar bgyi | bcom ldan ’das kyis bka’ stsal pa | ’jam dpal gaṅ gis chos thams cad raṅ bźin gyis ma byuṅ ba’i phyir | ma skyes par mthoṅ na | de ni dad pa’i dbaṅ po’o || ’jam dpal gaṅ gis ñe ba daṅ riṅ ba’i ’du śes daṅ bral ba’i phyir | chos thams cad la sems mi gtoṅ na | de ni brtson ’grus kyi dbaṅ po’o || ’jam dpal gaṅ dmigs pa daṅ bral ba’i phyir | chos thams cad yid la mi byed ciṅ dran pa la mi ’dogs na | de ni dran pa’i dbaṅ po’o || ’jam dpal gaṅ chos thams cad la mi sems pa ’di ni tiṅ ṅe ’dzin gyi dbaṅ po’o || ’jam dpal gaṅ gis chos thams cad skye ba daṅ ’jig pa daṅ bral źiṅ śes pa daṅ mi śes pa daṅ bral ba ste | raṅ bźin gyis stoṅ par mthoṅ na | de ni śes rab kyi dbaṅ po’o || ’jam dpal dbaṅ po lṅa dag ni de ltar blta’o ||