bcom ldan ’das rnam grangs ’dis stong gsum gyi stong chen po’i ’jig rten gyi khams kyi sems can thams cad lta zhog | bcom ldan ’das yang stong gsum (40a1) gyi stong chen po’i ’jig rten gyi khams gang gā’i klung gi bye ma snyed na sems can gang ji snyed mchis pa de dag thams cad kyis kyang sems can re res rin po che sna bdun gyi rang bzhin gyi mchod rten de bzhin gshegs pa’i ring bsrel gyi snying po can re re bgyid du stsal pa | (2) bgyid du stsal nas kyang sems can de dag re res mchod rten de dag thams cad bzhag ste | bskal pa ’am bskal pa bas lhag par sil snyan thams cad dang glu dbyangs thams cad dang gar thams cad dang rol mo dang pheg rdob pa thams cad dang lha’i me tog thams cad dang lha’i (3) bdug pa dang lha’i dri dang | lha’i phreng ba dang lha’i byug pa dang lha’i phye ma dang lha’i na bza’ dang lha’i gdugs dang lha’i rgyal mtshan dang lha’i dril bu dang lha’i ba dan thams cad dang khor yug tu lha’i mar me’i phreng ba dag dang lha’i mchod pa rnam pa mang po dag thams cad kyis mchod (4) par byed de | bkur stir bgyid bla mar bgyid rjed par bgyid mchod par bgyid ri mor bgyid bsnyen bkur bgyid pa bas | bcom ldan ’das rigs kyi bu ’am rigs kyi bu mo ’dis bsod nams ches mang du skyed de | gang shes rab kyi pha rol tu phyin pa ’di la mngon par dad de (5) rtog cing mos la sems dang bas byang chub tu sems bskyed nas | lhag pa’i bsam pas nyan pa dang ’dzin pa dang ’chang ba dang klog pa dang kun chub par bgyid pa dang rab tu ’don pa dang ston pa dang nye bar ston pa dang lung ’bogs pa dang kha ton bgyid pa dang gzhan dag la yang (6) rgya cher yang dag par ston pa dang ’di’i don rnam par ’grel pa dang yid kyis rdzas su rtog pa dang ci lta bur grub pa’i shes rab kyis ’dir yongs su dpyod par bgyid pa dang | sangs rgyas kyi tshul rgyun chad par ma gyur cig dam pa’i chos nub par ma gyur cig ces dam pa’i (7) chos yun ring du gnas par bgyi ba dang | tshul dang ma bral bas byang chub sems dpa’ sems dpa’ chen po rnams la phan gdags par sgrub pa bgyis par ’gyur bar chung ngu na glegs bam du chud par bgyis te ’chang dam bzhag la | shes rab kyi pha rol tu phyin pa de la me tog dang (40b1) bdug pa dang dri dang phreng ba dang byug pa dang phye ma dang na bza’ dang gdugs dang rgyal mtshan dang dril bu dang ba dan dag dang khor yug tu mar me’i phreng ba dag dang mchod pa rnam pa mang po dag gis mchod par byed de | bkur stir bgyid bla mar bgyid rjed par bgyid mchod par bgyid (2) ri mor bgyid bsnyen bkur bgyid na | bcom ldan ’das rigs kyi bu’am rigs kyi bu mo ’di nyid de bas bsod nams ches mang du skyed do ||