byams pa yang byang chub sems dpa’ sems dpa’ chen po gang gis thams cad nas thams cad du song ba’i phyogs bcu’i ’jig rten na stong gsum gyi stong chen po’i ’jig rten gyi khams gzhal du med pa’i gzhal du med pa | (6) grangs med pa’i grangs med pa | tshad med pa’i tshad med pa | bsam gyis mi khyab pa’i bsam gyis mi khyab pa | mtha’ yas mu med pa yod pa rnams kyi phyogs re re’i stong gsum gyi stong chen po’i ’jig rten gyi khams re rer ’das pa’i dus na gzhal du med pa’i gzhal du med pa | (7) grangs med pa’i grangs med pa | tshad med pa’i tshad med pa | bsam gyis mi khyab pa’i bsam gyis mi khyab pa | mtha’ yas mu med pa’i de bzhin gshegs pa dgra bcom pa yang dag par rdzogs pa’i sangs rgyas | lam chad pa ’jug pa chad pa | spros pa dang srid par (76b1) ’dren pa chad pa mchi ma zad pa tsher ma bcom pa khur shin tu bor ba bdag gi don rjes su thob pa srid par sbyor ba yongs su zad pa yang dag par kun shes pas sems shin tu rnam par grol ba sems thams cad kyi dbang dam pa’i pha rol tu son pa | phung po lhag ma med pa’i mya ngan las (2) ’das pa’i dbyings su yongs su mya ngan las ’das pa de dag gi sems dang po bskyed pa nas bzung ste bla na med pa yang dag par rdzogs pa’i byang chub mngon par rdzogs par sangs rgyas pa’i bar dang | phung po lhag ma med pa’i mya ngan las ’das pa’i dbyings su yongs su mya ngan las (3) ’das pa’i bar dang | dam pa’i chos nub par ma gyur pa’i bar te | de dag gi bar gyi sangs rgyas bcom ldan ’das de rnams kyi tshul khrims kyi phung po dang ting nge ’dzin gyi phung po dang shes rab kyi phung po dang rnam par grol ba’i phung po dang rnam par grol ba’i ye shes gzigs (4) pa’i phung pa dang | pha rol tu phyin pa drug dang ldan pa’i dge ba’i rtsa ba gang dag yin pa dag dang | sangs rgyas kyi yon tan phun sum tshogs pa dang ldan pa’i dge ba’i rtsa ba rnams dang | stobs dang mi ’jigs pa’i pha rol tu phyin pa dang ldan pa’i dge ba’i rtsa ba dang | de bzhin (5) du mngon par shes pa’i pha rol tu phyin pa dang ldan pa dang yongs su shes pa’i pha rol tu phyin pa dang ldan pa dang | smon lam gyi pha rol tu phyin pa dang ldan pa dang | thams cad mkhyen pa’i ye shes phun sum tshogs pa dang ldan pa’i dge ba’i rtsa ba gang yin pa rnams dang | phan par (6) bzhed pa gang yin pa dang byams pa chen po gang yin pa dang snying rje chen po gang yin pa dang sangs rgyas kyi yon tan gzhal du med pa grangs med pa gang yin pa dang | bla na med pa yang dag par rdzogs pa’i byang chub gang yin pa dang | bla na med pa yang dag par rdzogs pa’i byang chub (7) kyi bde ba gang yin pa dang | chos thams cad la dbang phyug gi pha rol tu phyin pa gang yin pa dang | zil gyis mnon pa dpag tu med pa dang thams cad zil gyis non pa’i rdzu ’phrul mngon par ’du byed pa’i mchog gang yin pa dang | sgrib pa med pa ma chags pa thogs pa med pa (77a1) mnyam pa med pa mi mnyam pa dang mnyam pa dpe med pa dpag tu med pa de bzhin gshegs pa’i yang dag pa ci lta ba’i ye shes kyi stobs gang yin pa dang stobs kyi nang na sangs rgyas kyi ye shes kyi stobs gang yin pa dang | sangs rgyas kyi ye shes dang gzigs pa (2) gang yin pa dang | stobs bcu’i pha rol tu phyin pa gang yin pa dang | mi ’jigs pa bzhi mchog tu yongs su rdzogs par khong du chud pa gang yin pa dang | chos thams cad don dam par mngon par sgrub pas chos khong du chud pa gang yin pa dang | chos kyi ’khor lo rab tu (3) bskor ba gang yin pa dang | chos kyi sgron ma thogs pa dang chos kyi rnga rdung ba dang chos kyi dung ’bud pa dang chos kyi dung sgrogs pa dang chos kyi ral gri ’debs pa dang chos kyi char ’bebs pa dang chos kyi mchod sbyin sbyin pa dang chos kyi sbyin pas sems can thams cad yang dag par tshim (4) par mdzad cing yang dag par stobs pa dang | gang yang chos bstan pa de dag dang sangs rgyas kyi chos rnams sam rang sangs rgyas kyi chos rnams sam nyan thos kyi chos rnams la | gang dag btul ba dang bslabs pa dang mos par gyur pa dang nges par gyur pa dang rdzogs pa’i byang (5) chub la gzhol bar gyur pa gang dag yin pa de dag thams cad kyi dge ba’i rtsa ba gang yin pa rnams dang | sangs rgyas bcom ldan ’das de dag gis byang chub sems dpa’ sems dpa’ chen po gang dag bla na med pa yang dag par rdzogs pa’i byang chub tu lung bstan pa de dag gi pha (6) rol tu phyin pa drug dang ldan pa’i dge ba’i rtsa ba gang yin pa rnams dang | gang zag rang sangs rgyas kyi theg pa can gang dag rang sangs rgyas kyi byang chub la lung bstan pa de dag thams cad kyi dge ba’i rtsa ba gang yin pa rnams dang | gang zag nyan thos kyi theg pa can rnams kyi sbyin pa (7) las byung ba’i bsod nams bya ba’i dngos po dang tshul khrims las byung ba’i bsod nams bya ba’i dngos po dang bsgoms pa las byung ba’i bsod nams bya ba’i dngos po gang yin pa dang | slob pa’i zag pa med pa’i dge ba’i rtsa ba gang yin pa rnams dang | mi slob pa’i zag pa med (77b1) pa’i dge ba’i rtsa ba gang yin pa rnams dang | so so’i skye bo gang dag gis chos de dag la dge ba’i rtsa ba bskrun pa rnams dang | sangs rgyas bcom ldan ’das de dag gi ’khor bzhi po dge slong rnams dang dge slong ma rnams dang dge bsnyen rnams dang dge bsnyen ma rnams kyi sbyin pa las (2) byung ba’i bsod nams bya ba’i dngos po dang tshul khrims las byung ba’i bsod nams bya ba’i dngos po dang bsgoms pa las byung ba’i bsod nams bya ba’i dngos po gang yin pa rnams dang | der sangs rgyas bcom ldan ’das chos ston pa de dag la lha dang klu dang gnod sbyin dang dri za dang lha ma (3) yin dang nam mkha’ lding dang mi ’am ci dang lto ’phye chen po dang mi dang mi ma yin pa gang dag dang byol song gi skye gnas su song ba’i sems can gang de dag thams cad kyis dge ba’i rtsa ba bskrun pa gang yin pa rnams dang | sangs rgyas bcom ldan ’das de dag yongs su mya ngan las ’da’ ba (4) la yang gang gis dge ba’i rtsa ba bskrun pa gang dag yin pa dang | sangs rgyas bcom ldan ’das de dag yongs su mya ngan las ’das pa la yang gang gis dge ba’i rtsa ba bskrun pa gang dag yin pa dang | sangs rgyas bcom ldan ’das la brten pa dang chos la brten pa dang dge ’dun (5) rnams la brten pa dang yid kyis bsgoms pa’i gang zag dag la brten nas dge ba’i rtsa ba bskrun pa gang yin pa’i dge ba’i rtsa ba de dag thams cad ma lus shing lus pa med par gcig tu mngon par bsdus te bsdoms shing gzhal nas rjes su yi rang ba’i mchog gis rjes su yi rang ste | dam pa dang (6) gtso bo dang rab dang rab mchog dang gya nom pa dang bla ma dang bla na med pa dang gong na med pa dang mnyam pa med pa dang mi mnyam pa dang mnyam pa’i rjes su yi rang bas rjes su yi rang la de ltar rjes su yi rang nas rjes su yi rang ba dang ldan pa’i bsod nams bya ba’i dngos po de bla na med pa yang dag par rdzogs (7) pa’i byang chub tu yongs su bsngo’o zhes bla na med pa yang dag par rdzogs pa’i byang chub sgrub par gyur cig snyam pas ngag tu brjod par bya ba yin te | de la gang zag byang chub sems dpa’i theg pa can dag dngos po gang dag dang dmigs pa gang dag dang rnam pa gang dag gis yongs su (78a1) bsngo zhing sems de skyed pa na cig dngos po de dag dang dmigs pa de dag dang rnam pa de dag ci ltar mtshan mar byas pa de bzhin du dmigs sam | de skad ces smras pa dang | byang chub sems dpa’ sems dpa’ chen po byams pas gnas brtan tshe dang ldan pa rab (2) ’byor la ’di skad ces smras so ||