’od srung byang chub sems dpa’ chos bzhi dang ldan pa’i dge ba’i chos skyes shing byung ba rnams yongs su zad par ’gyur te | dge ba’i chos de dag gis rgyas par mi ’gyur ro || bzhi gang zhe na | ’di lta ste | mngon pa’i nga rgyal gyis ’jig rten rgyang phan pa’i gsang tshig tshol ba dang | rnyed pa dang bkur sti la lhag par zhen pas khyim la lta ba dang | byang chub sems dpa’ la rnam par sdang zhing skur ba ’debs pa dang | ma thos pa dang ma zin pa’i mdo sde rnams spong ba ste | ’od srung byang chub sems dpa’ chos bzhi po de dag dang ldan pa’i dge ba’i chos skyes shing byung ba rnams yongs su zad par ’gyur te || dge ba’i chos de dag gi rgyas par mi ’gyur ro || de la ’di skad ces bya ste
| nga rgyal gyis ni ’jig rten rgyang phan tshol || rnyed kyi phyir ni khyim la sbyor bar byed |
| byang chub sems dpa’ sangs rgyas sras la sdang || de dag bsngags min kun tu smra bar byed |
| de ni ma thos pa dang ma zin mdo || bde bar gshegs pas gsungs pa spong bar byed |
| chos ’di dag dang ldan par gyur pa ni || dge ba’i chos kyis rgyas par mi ’gyur ro |
| de ltas byang chub sems dpa’ mkhas pas yis || chos bzhi ’di dag rgyang srid rnam par spong |
| ’di dag bsten na byang chub rab ring ste || gnam sa ring bas shin tu ring bar ’gyur ||