’od srung bzhi po ’di dag ni byang chub sems dpa’ drang po’i drang ba’i mtshan nyid yin te bzhi gang zhe na | ’di lta ste | ltung ba byung ba rnams mi ’chab cing rjod de rnam par ’byed pa dang | ’chags pas kun nas ldang ba med pa yin | de’i bden pa’i tshig gang gis rgyal srid stor ba’am | nor yul ba ’jam | srog gi bar chad du ’gyur yang bden pa’i tshig mi mkhyud cing gzhan nas gzhan du sgyur ba’i tshig mi smra ba yin | gzhan gyis gnod par bya ba skur ba dang | mtshang ’dru ba dang | smod pa dang | bshung ba dang | sdigs pa dang | rdeg pa dang | gsod pa dang | ’ching bar byed pa’i nyes pa thams cad la bdag gis nyes par sems shing las kyi rnam par smin pa la rton pas gzhan dag la mi ’khrug cing ’khon du ’dzin pa med pa yin | de dad pa la rab tu gnas pa yin te | bsam pa yongs su dag pa’i phyir thams cad dad par mi ’gyur ba’i sangs rgyas kyi chos la mngon par dad pa ste | ’od srung bzhi po de dag ni byang chub sems dpa’ drang po’i drang ba’i mtshan nyid yin no || de la ’di skad ces bya ste
| ltung ba byung ba ’chab par mi byed kyi || rjod cing rnam par ’byed de nyes par ’dod |
| nor dang rgyal srid phyir dang srog phyir yang || ’du shes bsgyur te brdzun pa’i tshig mi smra |
| skur dang smod dang bshung dang gsod pa dang || ’ching bar byed dang go rar bcug pa la |
| bdag gis nyes sems gzhan la ’khrug mi byed || las ni bdag gir bya bas ’khon mi ’dzin |
| de ni bde gshegs rnams kyi byang chub dang || dad la gnas shing bsam pa dag ldan pa |
| ’di dag drang ba’i mtshan du sangs rgyas gsungs || sems can mchog gis rab tu bsten par bya ||