dran pa nye bar gzhag pa bzhis legs par rnam par bsams pa’i lus kyis bstan pa yang dag pa’i slob bas ’gro ba || rdzu ’phrul gyi rkang pa’i mgyogs pa’i shugs dang ldan pa dbang pos legs par brtags pas lta ba ngan pa’i shing yon po med pa | stobs kyi shugs yang dag par ’byung bas bar shag shig med pa | byang chub kyi yan lag gis ’gro ba rnam par dag pa | gcugs can dgra nyon mongs pa’i bdud kyi lam ’dor bar byed pa | lam du ’jug par byed pa | pha rol gyi ngogs su phyin par byed pa | mu stegs can ngan pa’i mu stegs ’dor bar byed pa | zhi gnas kyi nges par sems pa brtan pa | lhag mthong gis sbyor ba mtha’ gnyis la ma chags par ’jug pa | rgyu’i chos dang yang dag par ldan pa | sgra grags pa yangs shing rgya che la mi zad cing tshad med pa tshur shog | dam pa’i chos kyi gru chen po mya ngan las ’das pa’i grong khyer du ’gro ba bde bar ’gro ba | ’jigs pa med par ’gro ba lam du ’gro ba || ’jig tshogs la lta ba ’dor bar zhugs la tshu rol gyi ’gram nas pha rol gyi ’gram du lta ba thams cad sel ba | gtse ba med pa’i mya ngan las ’das par myur du song shig ces phyogs bcur sgras go bar byed pa ste |