sangs rgyas kyi mdzad pa lhun gyis grub pa ni rgyun ma chad cing zhes bya bas rgyun mi ’chad par sbyor ba’i yon tan bstan te, de bzhin gshegs pa’i mdzad pa bstan pa ’di la ma zhugs pa’i sems can rnams bstan pa ’di la gzud pa dang, btsud pa rnams yongs su smin par mdzad pa dang, smin pa rnams rnam par grol bar mdzad pa la ’bad cing rtsol mi dgos par lhun gyis grub pa nyīd du gyur cing sems can gyi mtha’ ji srid yod kyi bar du mdzad pa de gsum yongs su mi gtong bas rgyun mi ’chad par sbyor ba zhes bya’o.
rnam pa gnyis su na tshig de dag gis bcom ldan ’das kyi yon tan rnam pa bzhi bstan te, 1) mngon par byang chub pa’i yon tan dang, 2) chos ’chad pa’i yon tan dang, 3) mthu’i yon tan dang, 4) bdag dang gzhan gyi don mi nyams pa’i yon tan no.
1) de la bcom ldan ’das chos thams cad mnyam pa nyid ni mngon par rdzogs par sangs rgyas zhes bya bas mngon par byang chub pa’i yon tan bstan te, mngon par byang chub pa yang rnam pa gnyis te, a) chos thams cad mngon par byang chub pa dang, b) mnyam pa nyid mngon par byang chub pa’o; de la a) chos thams cad mngon par byang chub pa ni ming dang mtshan ma dang rnam par rtog pa rnams phyin ci ma log par thugs su chud pa’o; b) mnyam pa nyid mngon par byang chub pa ni de bzhin nyid thugs su chud pa ste; de la a) chos thams cad mngon par byang chub pas ni thogs pa med pa’i ye shes dang ldan par bstan te, b) de bzhin nyid mngon par byang chub pas ni chags pa med pa’i ye shes dang ldan par bstan to.
2) chos kyi ’khor lo rab tu bskor, slob ma shin tu dul ba mtha’ yas pa’i tshogs ni mnga’ zhes pa’i tshig ’di gnyis kyis chos ’chad pa’i yon tan bstan to.
3) chos thams cad la dbang ni brnyes zhes bya ba la sogs pa’i tshig bzhis mthu’i yon tan bstan te, mthu yang skabs ’dir mngon par shes pa drug po rdzu ’phrul dang, lha’i mig dang, gzhan gyi sems shes pa dang, lha’i rna ba dang, sngon gyi gnas dran pa dang, ’chi ’pho dang skye ba shes pa dang, zag pa zad pa mngon par shes pa la bya ste. de la chos thams cad la dbang brnyes pas rdzu ’phrul gyi mngon par shes pa bstan te, lha’i mig gis kyang thag ring po na ’dug pa’i dngos po mngon sum du mthong ba la sogs pa’i sgo nas chos thams cad la dbang brnyes pa’i phyir rdzu ’phrul gyi nang du bsdu’o; sems can thams cad kyi bsam pa’i tshul ni shin tu mkhyen pas gzhan gyi sems shes pa dang lha’i rna ba dang sngon gyi gnas dran pa gsum bstan to; dbang po dam pa’i mchog ni brnyes pa dang sems can thams cad kyi nyon mongs pa’i bag chags kyi mtshams sbyor ba ’joms pa la mkhas pa gnyis kyis zag pa zad pa’i mngon par shes pa bstan te, zag pa ni nyon mongs pa la bya’o. de la zad pa yang gnyen po dang spang bar bya ba gnyis kyis bstan te, gnyen po ni dbang po’i mchog go; spang bar bya ba ni nyon mongs pa’i bag chags so.
4) sangs rgyas kyi mdzad pa lhun gyis grub par rgyun ma chad ces bya bas bdag dang gzhan gyi don mi nyams pa’ yon tan bstan to.
rnam pa gsum du na bcom ldan ’das chos thams cad kyi mnyam pa nyid ni mngon par rdzogs par sangs rgyas zhes bya ba la sogs pas sangs rgyas bcom ldan ’das kyi yon tan rnam pa brgyad bstan te, brgyad gang zhe na? 1) bdag gi don phun sum tshogs pa dang, 2) gzhan gyi don phun sum tshogs pa dang, 3) ’khor phun sum tshogs pa dang, 4) mthu phun sum tshogs pa dang, 5) thabs mkhas pa phun sum tshogs pa dang, 6) ’dogs pa phun sum tshogs pa dang, 7) bya ba rdzogs pa phun sum tshogs pa dang, 8) skyes bu’i mthu’i sbyor ba phun sum tshogs pa’i yon tan rnams bstan te, mdo’i tshig brgyad dang go rims bzhin sbyar ro.