bcom ldan ’das kyis bka’ stsal pa: sha ra dva ti’i bu, de’i phyir legs par rab tu nyon la yid la zung shig dang, ngas khyod la bshad do. ’jig rten gyi khams de’i yon tan yongs su brjod pa dang, byang chub sems dpa’ de dag dang de bzhin gshegs pa de’i ming thos nas, dad pa dang mos pas de bzhin gshegs pa’i ye shes chags pa med cing sgrib pa med pa la mi skrag par bya’o, the tshom za bar mi bya’o;

sha ra dva ti’i bu de’i phyir legs par rab tu nyon la yid la zung shig dang ngas khyod la bshad do zhes bya ba la de’i phyir zhes bya ba ni gong du dris pa’i don rnams kyi phyir te, de dag de bshad na gal te legs par nyan rab tu nyan yid la ’dzin na ngas bshad gyis, gzhan du chos bshad pa’i char phab pa don med par ’gyur bas na mi bshad do zhes bya ba’i don to. legs par nyon zhes bya ba ni rna lhogs la sems rtse gcig tu nyon cig ces bya ba’i tha tshig go. rab tu nyon zhes bya ba ni bshad pa rnams phyin ci ma log par zung shig ces bya ba’i don to. yid la zung shig ces bya ba ni ma brjed par gyis shig ces bya ba’i don to. snod kha phub pa dang, mi gtsang bas gang ba dang, zhabs rdol ba lta bur mi ’gyur bar bya ba’i phyir ro. dris pa lan glan pa ’di na bzhugs pa’i de bzhin gshegs pas ’jig rten gyi khams kyi de bzhin gshegs pa’i yon tan phun sum tshogs pa bsngags pa yang mdor na rnam pa gsum gyis bstan te; gsum gang zhe na? gnas pa rnam par dag pa dang, gnas rnam par dag pa dang, bdag po rnam par dag pas bstan to. gnas pa rnam par dag pa yang yon tan rnam pa lngas bstan te, rgyu rnam par dag pa dang, rang bzhin rnam par dag pa dang, ’bras bu rnam par dag pa dang, las rnam par dag pa dang, sbyor ba rnam par dag pa ste, de yang lan gsum du bzlas te ston to. dad pa dang mos pas de bzhin gshegs pa’i ye shes chags pa med cing sgrib pa med pa la mi skrag par bya’o, the tshom za bar mi bya’o zhes bya ba ni mi ’dzums pa’i ’jig rten gyi khams dang de na bzhugs pa’i byang chub sems dpa’ de dag dang, de bzhin gshegs pa’i yon tan bshad pa thos nas ye shes de lta bu mi srid do snyam du skrag pa dang, bden nam brdzun snyam du the tshom za bar ma byed cig ces bya ba’i don to. de la ye shes de shes bya thams cad la thogs pa med par mkhyen pas na chags pa med pa zhes bya’o; shes bya’i sgrib pa dang nyon mongs pa’i sgrib pa spangs pas na sgrib pa med pa’i ye shes zhes bya ba’o.