de dag gis sangs rgyas rjes su dran pa ’di thob ma thag tu chos thams cad la sgrib pa med pa’i ye shes thob par ’gyur te, sangs rgyas bcom ldan ’das thams cad kyis gsungs pa ’dzin cing brjed par yang mi byed, dran par yang mi byed de, sgra’i don thams cad rnam par nges par yang rnyed par ’gyur ro;

chos thams cad la thogs pa med pa dang chags pa med par shes pa ye ses ni chos thams cad la sgrib pa med pa’i ye shes zhes bya ste, don du na thams cad mkhyen pa’i ye shes thob par ’gyur zhes bya ba’i tha tshig go. sangs rgyas bcom ldan ’das thams cad kyis gsungs pa ’dzin zhes bya ba ni rjes su dran pa de thos nas kun rdzob tu de bzhin gshegs pas bshad pa’i gsungs rab yan lag sde bcu gnyis la sogs pa’i don dang tshig rnams ’dzin cing mi brjed pa’i phyir brjed par mi byed ces bya’o; dran par yang mi byed ces bya ba ni don dam par na chos de dag kyang stong pas btags pa tsam du zad de yod pa ma yin pas na dran par yang mi byed do. sgra’i don thams cad rnam par nges pa zhes bya ba ni bshad par bya ba’i chos thams cad kyi don phyin ci ma log par khong du chud pa’i don kyang rnyed par ’gyur zhes bya ba’i don to.