gzhan yang sbyor ba mi zad pa bzhi ste. bzhi gang zhe na? dgon pa la gnas shing sbyangs pa’i yon tan dang yo byad bsnyungs pa’i rjes su ’gro ba la mi ngoms pa’i sbyor ba mi zad pa dang; bsod nams dang ye shes kyi tshogs bsags pa la mi ngoms pa’i sbyor ba mi zad pa dang; thos pa btsal ba la mi ngoms pa’i sbyor ba mi zad pa dang; byang chub tu yongs su bsngo ba’i shes pas mi ngoms pa’i sbyor ba mi zad pa ste; bzhi po de dag ni sbyor ba mi zad pa’o.

gzhan yang sbyor ba mi zad pa bzhi ste zhes bya ba la sogs pas sbyor ba mi zad pa rnam grangs bzhis ston te, yul la chags pa’i gnyen po la sbyor ba dang, bsod nams kyi tshogs la sbyor ba dang, ye shes kyi tshogs la sbyor ba dang, thabs mkhas pa’i sbyor ba’o. de la dgon pa la gnas shing sbyangs pa’i yon tan dang yo byad bsnyungs pa’i rjes su ’gro ba la mi ngoms pa’i sbyor ba mi zad pa zhes bya bas yul la chags pa’i gnyen po la sbyor ba bstan te, de yang gang na chags pa med pa dang, gang gis chags pa med pas yul la chags pa’i gnyen por ’gyur te, dgon pa la gnas pa dang tshigs phyi ma rnams kyis rang bzhin bstan to. bsod nams dang ye shes kyi tshogs bsags pa la mi ngoms pa’i sbyor ba mi zad pa zhes bya bas bsod nams kyi tshogs la sbyor ba bstan te, de la tshad med pa bzhi dang ldan pa ni bsod nams kyi tshogs so; byang chub kyi phyogs sum cu rtsa bdun dang ldan pa’i ting nge ’dzin ni ye shes kyi tshogs so. yang na sbyin pa dang tshul khrims dang bzod pa gsum ni bsod nams kyi tshogs so, bsam gtan dang shes rab gnyis ni ye shes kyi tshogs so. tshogs de gnyis bsag pa la chog mi shes par sbyor ba ni mi ngoms pa’i sbyor ba mi zad pa zhes bya’o. thos pa btsal ba la mi ngoms pa’i sbyor ba mi zad pa zhes bya bas ye shes kyi tshogs la sbyor ba bstan te, tshogs kyi sgra ni rgyu’i don to, dam pa’i chos mnyan pa la chog mi shes par sbyor ba la ye shes skye bar ’gyur ba’i phyir ro. byang chub tu yongs su bsngo ba’i shes pas mi ngoms pa’i sbyor ba mi zad pa zhes bya bas thabs la mkhas pa’i sbyor ba ste, dge ba’i rtsa ba thams cad bla na med pa’i byang chub tu yongs su bsngo ba la mkhas pa ni byang chub tu bsngo ba shes pa ste, de ltar bsngos nas dge ba’i rtsa ba chung ngu yang bla na med pa’i byang chub thob kyi bar du bar ma dor zad par mi ’gyur bar brtson ’grus mi zad pa’i skabs nas rgya mtsho chen po chu’i thigs pa lhung ba’i dpes bstan pa lta bu yin pas thabs la mkhas pa’i sbyor ba zhes bya’o. The reference on pariṇāmana is to p. 44,36-45,6