byang chub sems dpa’i ye shes kyi tshogs ni tshad med de; de la byang chub sems dpas bgrang ba ’di ’dra bas ’jug par bya’o: stong gsum gyi stong chen po’i ’jig rten gyi khams na sems can gang dag ’khod pa, de dag thams cad dad pas rjes su ’brang ba’i ye shes dang ldan par gyur kyang, de dag gi chos kyi rjes su ’brang ba’i ye shes dang ldan pa’i brgya’i char yang nye bar mi ’gro’o, stong gi cha dang, brgya stong gi cha dang, bye ba’i cha dang, bye ba brgya’i cha dang, bye ba stong gi cha dang, bye ba brgya stong gi cha dang, grangs dang, cha dang, bgrang ba dang, dpe dang, rgyur yang nye bar mi ’gro’o. de bzhin du chos kyi rjes su ’brang ba’i ye shes dang ldan pa rnams ni brgyad pa’i ye shes dang ldan pa la’o; brgyad pa’i ye shes dang ldan pa rnams ni rgyun du zhugs pa’i ye shes dang ldan pa la’o; rgyun du zhugs pa’i ye shes dang ldan pa rnams ni lan cig phyir ’ong ba’i ye shes dang ldan pa la’o; lan cig phyir ’ong ba’i ye shes dang ldan pa rnams ni phyir mi ’ong ba’i ye shes dang ldan pa la’o; phyir mi ’ong ba’i ye shes dang ldan pa rnams ni dgra bcom pa’i ye shes dang ldan pa la’o; dgra bcom pa’i ye shes dang ldan pa rnams ni rang sangs rgyas kyi ye shes dang ldan pa la’o; rang sangs rgyas kyi ye shes dang ldan pa rnams ni bskal pa brgyas nges par byung ba’i byang chub sems dpa’i ye shes dang ldan pa’i brgya’i char yang nye bar mi ’gro ba nas dpe dang rgyu’i bar du yang nye bar mi ’gro’o; bskal pa brgyas nges par byung ba’i byang chub sems dpa’i ye shes dang ldan pa rnams ni bzod pa thob pa’i byang chub sems dpa’i ye shes dang ldan pa la’o; bzod pa thob pa’i byang chub sems dpa’i ye shes dang ldan pa rnams ni phyir mi ldog pa’i byang chub sems dpa’i ye shes dang ldan pa la’o; phyir mi ldog pa’i byang chub sems dpa’i ye shes dang ldan pa rnams ni skye ba gcig gis thogs pa’i byang chub sems dpa’i ye shes dang ldan pa’i brgya’i char yang nye bar mi ’gro ba nas dpe dang rgyu’i bar du nye bar mi ’gro’o. stong gsum gyi stong chen po’i ’jig rten gyi khams na sems can gang dag ’khod pa, de dag thams cad skye ba gcig gis thogs pa’i byang chub sems dpa’i ye shes dang ldan par gyur kyang, byang chub kyi snying po la ’dug pa’i byang chub sems dpa’i ye shes dang ldan pa’i brgya’i char yang nye bar mi ’gro ba nas dpe dang rgyu’i bar du yang nye bar mi ’gro’o. ’jig rten gyi khams mtha’ yas mu med pa dag na sems can gang dag ’khod pa, de dag thams cad byang chub kyi snying po la ’dug pa’i byang chub sems dpa’i ye shes dang ldan par gyur kyang, de dag gis de bzhin gshegs pa’i gnas dang gnas ma yin pa mkhyen pa’i ye shes kyi stobs kyi brgya’i char yang nye bar mi ’gro ba nas rgyu dang dpe’i bar du yang nye bar mi ’gro’o. de bzhin gshegs pa’i stobs dang, mi ’jigs pa dang, sangs rgyas kyi chos ma ’dres pa bco brgyad thams cad yongs su ’grub pa’i rim pa yang de bzhin te, byang chub sems dpa’ gang ye shes kyi tshogs la ’jug pa ’di thos nas mi skrag, mi dngang zhing dngang bar mi ’gyur ba, ’di ni byang chub sems dpa’i ye shes kyi tshogs mi zad pa zhes bya’o.

No Tibetan