’di ni sems kyi brtson ’grus shes bya’o. de la sems kyi brtson ’grus mi zad pa de yongs su rdzogs par bya ba’i phyir gang ’jug pa thams cad gnas pa dang, mtshan ma thams cad dang bral ba dang, de mtshan ma’i las thams cad du yang ’jug la ye shes kyi las la yang gnas pa ste, de las thams cad kyang ye shes kyis bya ba byed do.

de la sems kyi brtson ’grus mi zad pa de yongs su rdzogs par bya ba’i phyir zhes bya ba la sogs pas ni byang chub sems dpa’ rnams sems kyi brtson ’grus de dag rdzogs par bya ba’i ched du thabs ji lta bus ’jug pa ston to. ’jug pa thams cad dang gnas pa dang, mtshan ma thams cad dang bral ba zhes bya ba ni ’jug pa thams cad dang gnas pa thams cad la yang gnas la, gzung ba dang ’dzin pa’i mtshan nyid lus dang ngag dang yid kyi las kyi mtshan ma thams cad dang yang dag par bral bar byed do zhes bya ba’i tha tshig go. ’o na dge ba’i rtsa ba dang bsgrub pa dang sems can gyi don gyi bya ba la sogs pa yang mi byed dam zhe na? de mtshan ma’i las thams cad du yang ’jug pa zhes gsungs te, lus dang ngag dang yid kyi sgo nas sems can yongs su smin par bya ba dang sangs rgyas kyi zhing yongs su sbyangs pa la sogs pa la ’jug ces bya ba’i tha tshig go.