’di lta ste: ma rig pa’i ’grogs pa dang lhan cig mi gnas so, de bzhin du ’du byed dang, rnam par shes pa dang, ming dang gzugs dang, skye mched drug dang, reg pa dang, tshor ba dang, sred pa dang, len pa dang, srid pa dang, skye ba dang, rga shi’i ’grogs pa dang lhan cig mi gnas so;

de la ma rig pa’i ’grogs pa dang lhan cig mi gnas so zhes bya ba la sogs pas ’khor ba’i rgyu srid pa’i yan lag bcu gnyis rnams dang lhan cig mi gnas par bstan te: de la ma rig pa ni yang dag pa’i mtha’ khong du ma chud pa’o; ma rig pa de nyid ’grogs pa yin pas na ma rig pa’i ’grogs pa ste, ma rig pa’i dbang du gyur pa’am, ma rig pa dang ’dres par gyur pa’o. mi gnas so zhes bya ba ni de dang ma ’dres pa’am, ma ’bags pa zhes bya ba’i don to. gal te rnam par mi rtog pa’i ye shes de ma rig pa dang ’dres na ni gzhan gyi dbang gi mtshan nyid bzhin du ’khor bar lhung ba’i skyon du ’gyur ro. de bzhin du zhes bya ba ni de dang ’dra ba zhes bya ba’i don to. ’du byed rnams dang lhan cig mi gnas so zhes bya ba nas yan lag lhag ma rnams la yang de dang ’dra bar sbyar ro. de la ’du byed ni rnam pa gsum ste, bsod nams ma yin par nye bar ’gro ba’i ’du byed dang, bsod nams su nye bar ’gro ba’i ’du byed dang, mi g.yo bar nye bar ’gro ba’i ’du byed do. rnam par shes pa ni sa bon thams cad kyi rten rnam par smin pa’i rang bzhin kun gzhi rnam par shes pa’o. ming ni tshor ba dang ’du shes dang ’du byed dang rnam par shes pa rnams so. gzugs ni bstan du yod la thogs pa dang bcas pa’am, bstan du med la thogs pa dang bcas pa dang, bstan du yang med la thogs pa yang med pa ste, de gnyis gcig tu bsdus na ming dang gzugs zhes bya’o. skye mched drug ni mig gi skye mched nas yid kyi skye mched kyi bar du’o. reg pa ni yul dang dbang po dang rnam par shes pa rnams rgyu dang ’bras bu’i mtshan nyīd du dus mnyam du tshogs pa’o. tshor ba ni bde ba dang sdug bsngal ba dang bde ba yang ma yin sdug bsngal ba yang ma yin pa’i tshor ba rnams so. sred pa ni yul dang longs spyod la rgyun du spyod kyang tshva chu ’thung ba dang ’dra bar ngoms pa dang tshim pa med pa’o. len pa ni ’dod pa len pa dang, tshul khrims dang brtul zhugs len pa dang, lta ba len pa dang, bdag tu smra ba len pa dang. srid pa ni ’dod pa’i srid pa dang, gzugs kyi srid pa dang, gzugs med pa’i srid pa’o. skye ba ni las kyi bag chags rnam pa sna tshogs bags pa’i khyad par las nying mtshams sbyor ba de dang de dag tu phung po dang khams dang skye mched la sogs pa mngon par grub pa’o. rga ba ni mer mer po dang, nur nur po dang, mkhrang gyur pa dang, rkang lag ’gyus pa nas gzhon nu dang lang tsho dang dar la bab pa’i stobs dang mthu dang gzi brjid dang mdangs la sogs pa rab tu gzhan du gyur te nyams pa’o. shi ba ni tshe dang drod dang rnam par shes pa med par gyur pa’o.