nges pa dang ma nges pa zhes bya ba la sogs pa rigs rnam pa lnga ste: nyan thos kyi rigs can dang, rang sangs rgyas kyi rigs can dang, theg pa chen po’i rigs can dang, rigs ma nges pa dang, rigs med pa’o. de la rigs med pa’i gang zag rnams ni nges pa ste, de dag tu thams cad du ’khor bar gnas par gdon mi za ba’i phyir ro. theg pa gsum du nges pa’i rigs can ni ma nges pa ste, dge ba’i bshes gnyen gyi rkyen gyis mya ngan las ’das par yang ’gyur bas na, khams gsum du gnas par nges pa med pa’i phyir ro. yang na rigs can rnam pa gsum ni nges pa ste, rang rang gi theg pa la brten nas ’bras bu thob par gdon mi za ba’i phyir ro. ma nges pa’i rigs can ni ma nges pa ste, dge ba’i bshes gnyen gyi rkyen gyis theg pa gar btsud par ’jug cing, dge ba’i bshes gnyen dang ma phrad na mya ngan las ’das par ’gyur bar chad pa med pa’i phyir ro.
yang dag pa’i lta ba la zhugs pa’i gang zag rnams ni yang dag pa zhes bya ste, las dang las kyi ’bras bu dang, dkon mchog dang bden pa la sogs pa yod par lta bas so. log par lta ba la zhen pa’i gang zag ni log pa zhes bya ste, las dang las kyi ’bras bu dang, bden pa dang dkon mchog la sogs pa med par ’dod pa’i phyir ro. yang na, bcom ldan ’das kyis tshogs rnam pa gsum gsungs te, yang dag pa nyid du nges pa’i tshogs dang, log pa nyid du nges pa’i tshogs dang, ma nges pa’i tshogs so. de la yang dag pa nyid du nges pa’i tshogs ni gang ’phags pa rnams te, ’dod chags ma lus par spangs pa dang, zhe sdang ma lus par spangs pa dang, gti mug ma lus par spangs pa ste, de dag ni nyon mongs pa zad par nges pas na, yang dag par nges pa zhes bya’o; de la log par nges pa ni mtshams med pa byed pa’i gang zag rnams te, de dag ni ngan song gsum du skye bar nges pa’i phyir log par nges pa zhes bya’o; nges pa las gzhan pa rnams ni ma nges pa zhes bya ste, rkyen la ltos nas gal te na nyon mongs pa spong bar byed la, gal te mtshams med pa’i las kyang byed pa’i phyir ro.
chos de dag nyid ’bras bu yid du ’ong ba dang yid du mi ’ong ba skyed pa’i bye brag gis rnam pa gnyis su gzhag ste, dge ba dang mi dge ba’o. de la ’bras bu yid du ’ong ba ni lha dang mi la sogs pa bde ’gro rnams so; de skyed pa ni dge ba zhes bya ste, srog mi gcod pa dang, ma byin par mi len pa la sogs pa dge ba bcu’i las kyi lam rnams so. ’bras bu yid du mi ’ong ba ni sems can dmyal ba dang dud ’gro la sogs pa’o; de skyed par byed pa ni mi dge ba zhes bya ste, srog gcod pa la sogs pa mi dge ba bcu’i las kyi lam rnams so.
chos de kyang dag gleng du mi rung ba dang gleng du rung ba’i sgo nas gnyis su gzhag ste, kha na ma tho ba dang bcas pa dang kha na ma tho ba med pa’o. de la dam pa rnams kyi gleng zhing bsnyad du mi rung ba ni kha na ma tho ba dang bcas pa zhes bya ste, srog gcod pa la sogs pa mi dge ba’i las nyid do; dam pa rnams kyi nang du gleng zhing bsnyad du rung ba ni kha na ma tho ba med pa ste, srog gcod pa las phyir log pa la sogs pa dge ba bcu’i las kyi lam dang, dad pa dang, tshul khrims la sogs pa’o.
chos de dag kyang khams gsum du ’byung bar byed pa dang mi byed pa’i bye brag gis rnam pa gnyis su gzhag ste, zag pa dang bcas pa dang zag pa med pa’o. de la khams gsum du ’byung bar byed pa’i chos rnams ni zag pa dang bcas pa zhes bya ste, khams gsum du skye ba’i rgyu byed pa’o; de la zag pa ni ’dod chags la sogs pa’i nyon mongs pa la bya ste, de dang bcas pas zag pa dang bcas pa’o. khams gsum du ’byung bar mi byed pa’i chos de dag ni zag pa med pa ste, ’phags pa’i lam la sogs pa’o.
chos de dag nyid rgyu rkyen gyis bskyed pa dang ma bskyed pa’i bye brag gis rnam pa gnyis su gzhag ste, ’dus byas dang ’dus ma byas so. de la gang rgyu dang rkyen gyis bskyed pa rnams ni ’dus byas zhes bya’o; gang rgyu dang rkyen gyis ma bskyed pa ni ’dus ma byas zhes bya ste, de bzhin nyid dang mya ngan las ’das pa la sogs pa’o.
chos de dag nyid ’jig rten gyis ’dris par byas pa dang ma byas pa’i bye brag gis rnam pa gnyis su gzhag ste, ’jig rten pa dang ’jig rten las ’das pa’o. de la ’jig rten pa rnams kyis ’dris par byas pa ni ’jig rten pa ste, nye bar len pa’i phung po lnga la sogs pa ’khor bar gtogs pa’i chos thams cad do. ’jig rten pa rnams kyis ’dris par ma byas pa ni ’jig rten las ’das pa zhes bya ste, gang zag dang chos la bdag med pa’i de bzhin nyid rnam par dag pa dang, rnam par mi rtog pa’i ye shes dang, dag pa’i ’jig rten pa’i ye shes la sogs pa’o.
chos de dag nyid dam pa dang dam pa ma yin pa’i sgo nas rnam pa gnyis su gzhag ste, bzang po dang ngan pa’o. de la gang dam pa rnams ni bzang po zhes bya ste, nyon mongs pa’i phyogs su gyur pa spangs pas na ’jig rten las ’das pa’i chos rnams la bya’o. de la chos gang dam pa ma yin pa rnams ni ngan pa zhes bya ste, ’jig rten par gtogs pa’i chos rnams so.
chos de dag nyid nag po’i phyogs dang dkar po’i phyogs kyi bye brag gis rnam pa gnyis su gzhag ste, kun nas nyon mongs pa dang rnam par byang ba’o. de la nag po’i phyogs ni kun nas nyon mongs pa zhes bya ste, ’dod chags la sogs pa’o; dkar po’i phyogs ni rnam par byang ba ste, byang chub kyi phyogs dang sa dang pha rol tu phyin pa la sogs pa’o.
chos de dag nyid sdug bsngal gyi gzhi dang bde ba’i gzhi’i bye brag gis rnam pa gnyis su gzhag ste, ’khor ba dang mya ngan las ’das pa’o. de la chos gang sdug bsngal gyi gzhir gyur pa rnams ni ’khor ba zhes bya ste, ’di ltar ’khor ba zhes bya ba ni sdug bsngal gsum dang brgyad la sogs pa sdug bsngal dpag tu med pa’i rten du gyur pa’i phyir ro. bde ba’i gzhir gyur pa ni mya ngan las ’das pa ste, mya ngan las ’das pa ni ’jig rten dang ’jig rten las ’das pa’i bde ba thams cad dang ldan pa’i phyir ro.