’jig rten gyi tha snyad dang, yi ge dang, sgra dang, brdas bstan pa ji snyed pa’o.

de la tha snyad kyi bden pa bstan pa’i phyir tha snyad kyi bden pa ni zhes bya ba la sogs pa gsungs te, tshig gis mngon par brjod pa mang po ni tha snyad do, brjod pa des khong du chud par ’gyur ba’i bden pa ni tha snyad kyi bden pa’o. tha snyad kyi bden pa de’ang rnam pa gnyis te, ma ’khrul pa’i ’jig rten pa’i shes pa’i yul dang, ’khrul pa’i ’jig rten pa’i shes pa’i yul lo. de la ma ’khrul pa’i ’jig rten pa’i shes pa ni rjes las thob pa dag pa ’jig rten pa’i ye shes te, de’i yul bstan pa’i phyir gang dus su bden pa smra ba ste, gang ’di sdug bsngal gyi bden pa dang zhes bya ba la sogs pa gsungs pa’o. de la gang dus su bden par smra ba zhes bya ba ni de bzhin khong du chud pa dang ldan pa’i gang zag rnam par mi rtog pa’i ting nge ’dzin las langs nas bdag gis ji ltar myong ba’i don ’dul ba rnams yongs su smin pa’i dus dang sbyar te, rjes las thob pa dag pa ’jig rten pa’i ye shes kyis ’di ni sdug bsngal gyi bden pa ’di ni kun ’byung ba’i bden pa’o zhes phyin ci ma log par ’chad cing ston pa ni dus su bden par smra ba zhes bya’o. ’khrul pa’i ’jig rten pa’i shes pa’i yul bstan pa’i phyir ’jig rten gyi tha snyad dang zhes bya ba la sogs pa smras te, ’jig rten gyi tha snyad yi ge dang ’brel pa’i sgras bstan pa’i brda ni ’jig rten gyi tha snyad dang yi ge dang sgra dang brdas bstan pa zhes bya ste, ’jig rten gyi tha snyad thams cad ni brdzun pa yin pas na ’khrul pa’o. yang na gdul ba’i dus su bden par smra ba ni tha snyad kyi bden pa zhes bya ste, de la bden pa gang zhe na? gang sdug bsngal gyi bden pa dang zhes bya ba la sogs pa gsungs pa’o. smra ba gang zhe na? ’jig rten gyi tha snyad dang zhes bya ba la sogs pa gsungs te, don du na ’jig rten gyi tha snyad dang mthun pa’i yi ge dang sgra dang brdas sdug bsngal la sogs pa bden pa bzhi bstan pa ni tha snyad kyi bden pa zhes bya’o.