gang ma ’ongs pa’i sems dang sems las byung ba, dge ba’i rtsa ba’i tshogs la nges par sems shing, byang chub mngon du ’gyur ba’i las sems te: bdag gi dge ba’i sems bskyed pa gang dag skye bar ’gyur ba, de dag ni bla na med pa yang dag par rdzogs pa’i byang chub tu yongs su bsngo bar bya’o; mi dge ba’i sems dang sems las byung ba rnams kyi skabs mi dbye, zhes, gang de lta bur sems la bsgo ba, de ni ma ’ongs pa la mkhas pa’o.

ma ’ongs pa’i dus la mkhas pa bstan pa’i phyir gang ma ’ongs pa’i sems dang sems las byung ba zhes bya ba la sogs pa gsungs te, ma ’ongs pa na bdag gi bsod nams dang ye shes kyi tshogs bla na med pa’i byang chub thob pa’i rgyu bdag dang gzhan la phan par byed pa’i rkyen du gyur pa’i dge ba’i rtsa ba rnams gnod mi za bar bya’o zhes sems pa ni dge ba’i rtsa ba’i tshogs la nges par sems pa zhes bya’o; don de nyid bstan pa’i phyir byang chub mngon du ’gyur ba’i las sems te zhes bya ba gsungs te, byang chub thob par ’gyur ba’i dge ba’i las bya bar sems pa ni byang chub mngon du ’gyur ba’i las sems pa zhes bya’o; don de nyid ji lta bu yin pa gsal bar bstan pa’i phyir bdag gi dge ba’i sems bskyed pa gang dag ces bya ba la sogs pa gsungs te, dge ba dang ’brel pa’i sems ni dge ba’i sems so, bskyed pa ni da ltar gyi dus na dge ba’i sems skyes zin pa’o, skye bar ’gyur ba ni ma ’ongs pa’i dus na dge ba dang ’brel pa’i sems gnod mi za bar skye bar ’gyur ba’o; de dag ces bya ba ni dus gnyis kyi dge ba’i sems nyid la snyegs te, da ltar gyi dus na dge ba’i sems skyed pa dang ma ’ongs pa’i dus na skye bar ’gyur ba de dag ces bya ba’i don to, ni zhes bya bas dge ba de dag theg pa gnyis dang lha dang mi’i bde ’gror mi sngo zhes bya bar ston to, byang chub ces bya ba ni byang chub thob par bya ba’i phyir zhes bya ba’i tha tshig go, skabs ni mi dbye zhes bya ba ni ma ’ongs pa’i mi dge ba’i sems dang sems las byung ba skye ba’i skabs mi dbye zhes bya bar ston to; gong du bshad pa’i don rnams bsdus te bstan pa’i phyir gang de lta bur sems la bsgo ba, de ni zhes bya ba la sogs pa gsungs te, de lta bur sems la bsgo zhes bya ba ni ji nas da ltar gyi dus nas dge ba’i sems bskyed pa dang, ma ’ongs pa’i dus na dge ba’i sems skye bar ’gyur ba de dag nges par byang chub tu bsngo la, ma ’ongs pa’i mi dge ba’i sems dang sems las byung ba skye ba’i skabs mi dbye’o zhes de lta bur de nas sems la bsgo zhing sems la ’jog par byed pa de ni zhes bya ba’i don to